Ra Vei Hira Yarisula 8
8
NA SOPENA 8.
1Saul motami sura sena veimete. Na rani natuha teveioso tahajia me ra uluo hi Iesu me Jerusalem; temajamajala me ra vanua vunuvunu hi Jutia, me Sameria, Ra Varisula hasa tetitoho.
2Ra tajua tahonai telavi Stiven sura japovia, tetahi tahajia suria.
3Maa Saul, movei leelee ra tajua hina lotu, moruhusahamai me ra pea vunuvunu, motuhera tajua me ra hajae sura hajirira.
4Suria ra tajua temajamajala, telaho veteni, telalaa na Leo.
5Natuha Vilip mosivo me na vanua Sameria, molalaa suri Kristo ta mera.
6Ra vau motea teroho ra sanu Vilip moaso, hisa teroho me tereni ra varao tahajia movera.
7Ra talume oso, teaso pati, teruhusivo me ra tajua ra tari: ra taha-epe-mate ra tahatiho te-hauhaua.
8Na ejieji tahajia me na vanua natuha.
9Na tajua, na hisena Saimon, tomotoho mine me na vanua naa momahumahu me ra tajua Sameria, movaraira inie na tajua tahajia:
10Hire vunuvunu terohoe, ra varese ra paule, teaso “Tajua naa inie na hauhaua hi Atua.”
11Terohoe, suria me na esa mine momahumahu tuitui.
12Maa hisa terohoroho ra sanu hi Atua, Vilip molalaa, me na hisei Iesu Kristo, tepaptais, ra tajua me ra hajae.
13Natuha Saimon morohoroho mono: hisa mopaptais, tomotoho valui Vilip, momahemahai moreni ra varao tahajia me ra matamata movera.
14Hisa ra Varisula me Jerusalem, terohoe! Sameria molavi na Leo hi Atua, tesula Piter me Jon ta mera:
15Hisa terasumai, teramatapisi surira, sura telavi na Talume Tapu:
16(Suria maa mosamalua me ra, tepaptais me na hisei Iesu Kristo hasa)
17Teratatana havera ta mera, me na Talume Tapu mosumai mera.
18Hisa Saimon moreni suria ra Varisula teratatana havera ta mera, Na Talume Tapu momalua, momeje na volia,
19Moaso, Orarahu na hauhaua naa ta meau mono, sura tajua atatana haveu ta mea molavi na Talume Tapu.
20Maa Piter moaso ta mea, Pilam sule momate valuiho, suria oininima oivoli na rahavuso hi Atua.
21Na leo hija mosapilam, suria na lolomu mosatataholo valui Atua.
22Oisijomi na pilam veioso, oisimatapisi me Atua, vai na loloi Atua momalumu suri na ninima hina lolomu.
23Suria apinisi na lolomu mphaniho, na lolomu mohauhaua me na veioso.
24Natuha Saimon moaso liliu, Oramatapisi me na Moli suriau, suria saite sanu, oraso, momalua ta meau.
25Piter me Jon, tau teralalaa, teravarai na Leo hi na Moli, tetaliliu me Jerusalem, me na rio teravarai na Leo Tahonai me ra vanua ra tari me Sameria.
26Na enjel hina Moli moaso me Vilip, Oimaraha, oisahe, me na rio momaraha me Jerusalem movano me Kasa, na Tano-Oru.
27Momaraha, molaho: na tajua hi Itiopia, na varese hina Hajae-Moli hira tajua Itiopia, na hisena Kan-tesi, momata ra pilana sanu, momalua me Jerusalem sura lotu.
28Motamule, tomosihe me na pilana “kart,” moevi na Provet Isaiah.
29Natuha na Talume Taou moaso me Vilip, Oiva tararoi, toho tararoi valuia.
30Vilip morovo suria, morohoe moevi na Provet Isaiah. Motuhae, Oipinisi na sanu oievia?
31Moaso, Paleve, saite tajua mopiseau? Motuha Vilip, mosahamai, mosihe valuia.
32Na rau na Pepe moevia naa, Te-raveia pala sip sura veimete: pala matuna sip mo-moto tararoi na taha-ututusi, palea mosaaso.
33Hisa mo-tahavuso, teveioso mea. Isei movarai suri na rani hina? Suria sena mauri mopahituhea me na ulu.
34Na varese moaso liliu me Vilip, Atphaho, na Provet moaso suri isei? suria tapuna e suri valuna tajua.
35Natuha Vilip molalaa, movaere me na rau naa na pepe, movaraia na Leo Tahonai suri Iesu.
36Teravano me na rio, terarena pei, na varese moaso: Orenia, naano na pei; na sava moveho oisapaptaisiau?
37Vilip moaso, Vai oirohoroho me na lolomu vunu-vunu, oipaptais. Moaso liliu, Arohoroho Iesu na Matui Atua.
38Moaso na “kart” moturitoho, terasivo me na pei —Vilip me na Varese—Vilip mopaptaisia.
39Hisa teramaraha ture na pei, Na Talume Tapu molavi tuhe Vilip, suri na Varese mosatarenia: molaho me na rio, moejieji.
40Maa tepasu Vilip me Asotus: molalaa me ra vanua vunuvunu moruhujere turera, tau momalua me Sameria.
Currently Selected:
Ra Vei Hira Yarisula 8: TLM9109
Tya elembo
Kabola
Copy

Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo
This is a historic text maintained by the British and Foreign Bible Society.