Ra Vei Hira Yarisula 17
17
NA SOPENA 17.
1Tau teralaho tali Amvipolis me Appolonia, teramalua me Tessalonaika; na pea hina lotu hira Ju natuha.
2Paul, paletuha movei tuitui, moruhusahamai mera, ra sapat motolu moaso valuira suri na Leo tahonai.
3Mopisera paleve tesiveioso me Kristo, paleve mo-tamaraha hina mate: Iesu naa, isei apiseamiu, inie na Kristo.
4Valura terohoroho, tetoni hi Paul me Sailus: hira tajua Kris motavere, ra tupuna varese ra tari mono.
5Maa ra Ju tesarohoroho, na lolora tehanira, telavi ra tajua-oso ra tari, tevera tajua hina vanua na lolora tehahara. Telosi na peai Jeson, temeje na lavituhera me ra tanoho.
6Tesapasuara; telavi Jeson me valura uluo hi Iesu me ra moli, teaso, “Ra tajua naa tepovi na ulu, tel a Bobnra, morasi m jtaa, ime, raulnohmai anu me na peana, lorjhorobo me Atua, raaii malua naano mono.
7Isei Jeson molavira me na peana: tevera sanu tari Siser moaso totena vera, teaso na valuna tajua mo-moli, Iesu.”
8Ra tanoho me ra moli terohoe, temamahanu.
9Telavi na sule hi Jeson, na valuna tajua mono; tejurira telaho.
10Ra Tuahara vileahi tesula Paul me Sailus teralaho me na pohi me Peria; hisa teramalua, teraruhusahamai me na pea hina lotu hira Ju.
11Ra tajua hi Peria tetahonai jivi hira tajua hi Tessalonaika, suria telavi vilehei na Leo, tetiro na Leo tahonai me na rani vunuvunu, sura rena sanu vai tetaharahu.
12Suria ra tari hire terohoroho, ra tupuna varese hi Kris ra tari mono, ra tajua ra tari mono.
13Hisa ra Ju hi Tessalonaika tepinisi Paul molalaa na Leo hi Atua me Perea, tesumai natuha mono, tevera lolora tajua tehahara.
14Natuha vileahi ra Tuahara tesula Paul molaho me na tasi, maa Sailus me Timote teratohoae.
15Hire tetuli Paul telavia me Attens, tau telavi na pepe me Sailus me Timote movarairarua terasumai mea vileahi, tetaliliu.
16Me na rani Paul molohotirarua me Attens, na lolona mohahara suria morena vanua motavere hina popora.
17Suria tuitui molalaa me ra pea hina lotu hira Ju, valui ra tajua tahalotu, me na vonae hina volivoli na rani vunuvunu valui ra tajua tepasuae.
18Ra tajua lolorani, ra Epikurian, ra Stoik, teaso, juijuli nie. Valura teaso, “Na sava na mali-loena moaso?” Valura teaso, “Moaso suri ra sari nonoho:” suria molalaa suri Iesu Kristo, me na tamaraha hina mate.
19Tehijitohoae, telavia me na Vuti hi Mars, teaso, “Motahonai oivaraiamiu na leo havui na sava.
20Suria oivarai amiu ra sanu nonoho, tomeje na pinisi ra sanu naa.”
21(Ra tajua Attens, ra tajua nonoho tetitohoae tuitui tevei sanu tipa maa tevarai e teroho na sanu havui)
22Natuha Paul moturi me na vuati hina Vuti, na hisena Mars, moaso, “Tajua hi Attens, apinisi me ra sanu vunuvunu otolotu tavere.
23Suria ajivia, areni sari himiu otolotu mera, apasu na sule-hina-hapu, na uliuli mea, “Hina sari tosapinisia.” Isei otolotu mea, maa otosapinisia, apiseamiu.
24Atua isei motai na ulu me ra sanu tetitohoara, suria inie na Moli hina tailahi me na ulu, tomosatoho me na pea otosaria hira havemiu.
25Mono ra haveja tesapinisi na rahu mea ra sanu momejeira, pala mosilavi ra sanu, suria morahu na mauri hira sanu vunuvunu, na mahosora, me na sanu vunuvunu.
26Motai ra tajua vunuvunu me na ulu na jaera motea, movera tetitoho mera vonae vunuvunu hina ulu, majiha moaso movisa na rani tetitoho me na ulu, moaso paravu paleve telaho.
27Sura tetiro ra Moli, vai tetahotahotiroe me tepasuae, maa mosaparavu meja vunuvunu.
28Suria tomauri nie, suria, tolali, suria totitoho; pala valura pilaja tajua-tetie-na-aviavi teaso, “Suria hije mono ra matuna.”
29Suria hije ra matuna Atua, moso toninima mopala na sule hahara, na sule voe, na sule, na sanu te tajua motaia.
30Me na rani hina sapinisi susuhi, Atua mosapuri tahajia, maa varihi moaso hauhaua ra tajua vunu-vunu me na vanua vunuvunu tesijomi.
31Moaso me na rani motea moilailahi tataholo ra tajua vunuvunu hina tajua Atua mosulae; suria moaso taharahu me ra tajua vunuvunu suria movea motamaraha hina mate.”
32Hisa terohoe suri na tamaraha hina mate ra valura teuru suria: ra valura teaso, “Tororoho vahatea maa suri na sanu naa.”
33Palea Paul molaho turera.
34Maa ra valura tajua tetoni hina, terohoroho: hira Tionisius na lolorani, me na hajae na hisena Tamaris, me valura valuira.
Currently Selected:
Ra Vei Hira Yarisula 17: TLM9109
Tya elembo
Kabola
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo
This is a historic text maintained by the British and Foreign Bible Society.