1 Timote 4
4
SOPENA 4.
1Maa na Talume moaso taharahu, me na rani mosamalua reji, valura tajua tejurituhe na sera rohoroho, teroho ra talume taha-jihajiha me na pisahi hina talume-oso,
2Isei telope sura jihajiha; ra matuna-lolora tepala na aion tutunu motunira;
3Teaso na talahia moso, teaso ototena hani na visihona sanu tahamauri Atua movea sura ra taharohoroho, ra tahapinisi na taharahu telavia valui na aso tahonai.
4Suria ra sanu vunuvunu Atua motaia motahonai, moso tovotoa te sanu itea vai tolavia valui na aso tahonai:
5Motapu taharahu suria na aso tahonai hi Atua, suria na matapisi.
6Vai oivera Tuahamu teninima ra sanu naa iniho pa na tahavarao tahonai hi Iesu Kristo, oipasu pa na hamu me na leo hina rohoroho me na pisahi tahonai oilavia mine.
7Maa ra uliuli tahaoso me ra uliuli hira hajae-varie oijurituhera, oiviteho sura oitajua tahonai hi Atua.
8Na vite hina epena motahonai suri ra sanu satavere, maa na lotu taharahu motahonai suri ra sanu vunuvunu suria morahu na mauri tahonai naano me na mauri pa tuitui.
9Naano na aso taharahu, motahonai ra tajua vunuvunu telavia.
10Suria tovarao, toroho na etieti, suria torohoroho me na Atua taha-mauri isei na Tahajolo hira tajua vunuvunu, maa jivi hira terohoroho.
11Ra sanu naa oivaraira tesivera, oipisera.
12Moso te tajua mojoreiho suria opuluo; maa motahonai iniho na tapusahe suri ra taharohoroho tepalaiho, me na semu aso, me na lalaa, me na meje, me na lolomu, me na rohoroho, me na voevoe.
13Mine anumai, oiviteho me na evi na pepe, me na lalaa, me na pise.
14Oitena jomuture na rahuvuso hi Atua meho, oilavia sura na aso talatau motaraae, me na rani ra varese-hina-lotu tetatana havera meho.
15Oininima ra sanu naa; oimata hire tuitui sura hire vunuvunu tereniho oijiha tahonai.
16Oitapumu mata niho me ra sanu oipisera. Oivea tuitui, sura oijolo pa, me ra tajua terohoho tejolo pa.
Currently Selected:
1 Timote 4: TLM9109
Tya elembo
Kabola
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo
This is a historic text maintained by the British and Foreign Bible Society.