Yohane 17
17
Osɔfonukpa sɔlemɔ ni Yesu sɔle. Yesu sɔle hã ehe
1Be ni Yesu wie nii nɛɛ lɛ, ewo ehiɛ nɔ kɛtee ŋwɛi, ni ekɛɛ, “Ataa, ŋmɛlɛtswaa lɛ eshɛ; wo oBi lɛ hiɛ nyam, koni oBi lɛ hu awo ohiɛ nyam; 2#Mat 11.27 tamɔ bɔ ni ohã lɛ hegbɛ yɛ gbɔmɛi fɛɛ anɔ, koni mɛi fɛɛ ni okɛhã lɛ lɛ, ehã amɛ naanɔ wala lɛ. 3#1 Yoh 5.20 Shi enɛ ji naanɔ wala lɛ, akɛ amɛle bo, anɔkwa Nyɔŋmɔ kome lɛ, kɛ Yesu Kristo, mɔ ni otsu lɛ. 4Miwo ohiɛ nyam yɛ shikpɔŋ lɛ nɔ, akɛni nitsumɔ lɛ ni okɛhã mi tsumɔ lɛ, migbe naa lɛ. 5#Yoh 17.24; 1.1; Fil 2.6 Ni agbɛnɛ, Ataa, kɛ anunyam ni miyɔɔ yɛ oŋɔɔ dani abɔ je lɛ awo mihiɛ nyam yɛ omasɛi.”
Yesu sɔle hã ekaselɔi lɛ
6 #
Yoh 17.9
“Mijie ogbɛi lɛ shi mitsɔ̃ɔ gbɔmɛi ni okɛhã mi kɛjɛ je lɛŋ lɛ. Onii ji amɛ, ni okɛ amɛ hã mi, ni amɛye owiemɔ lɛ nɔ. 7Agbɛnɛ amɛle akɛ nii fiaa ni okɛhã mi lɛ, oŋɔɔ ejɛ; 8#Yoh 16.30 ejaakɛ wiemɔi lɛ ni okɛhã mi lɛ, mikɛhã amɛ; ni amɛmɔ mli, ni amɛna amɛle anɔkwale mli akɛ oŋɔɔ mijɛ, ni amɛhe amɛye akɛ bo otsu mi. 9#Yoh 6.37, 44 Amɛ mibiɔ mahã; jeee je lɛ mibiɔ mahã, shi moŋ mɛi ni okɛhã mi lɛ, ejaakɛ onii ji amɛ. 10#Yoh 16.15 Minii fɛɛ lɛ onɔŋ, ni onii fɛɛ lɛ minɔŋ, ni mihiɛ eba nyam yɛ amɛmli. 11#Yoh 10.30 Mibɛ je lɛ mli dɔŋŋ, shi mɛnɛɛmɛi yɛ je lɛ mli, ni mi lɛ miiba oŋɔɔ. Ataa Krɔŋkrɔŋ, mɛi ni okɛhã mi lɛ, too amɛ yɛ ogbɛi lɛ mli, bɔ ni afee ni amɛfee ekome tamɔ wɔ. 12#Yoh 6.39; Lal 41.9; 109.8 Be ni mikɛ amɛ yɔɔ lɛ, mito amɛ yɛ ogbɛi lɛ mli. Mɛi ni okɛhã mi lɛ, mibu amɛhe, ni amɛteŋ mɔ ko mɔ ko elaajeko, ja laajemɔ bi lɛ, koni nɔ ni aŋma lɛ aba mli. 13#Yoh 15.11 Ni agbɛnɛ miiba oŋɔɔ, ni miiwie nii nɛɛ yɛ je lɛ mli, koni amɛna mimiishɛɛ lɛ ni eye emuu yɛ amɛmli. 14#Yoh 15.19 Mikɛ owiemɔ lɛ ehã amɛ, ni je lɛ miinyɛ amɛ, ejaakɛ amɛjɛɛɛ je lɛ mli, tamɔ bɔ ni mi hu mijɛɛɛ je lɛ mli lɛ. 15#2 Tes 3.3 Mibiii akɛ ojie amɛ kɛjɛ je lɛ mli, shi moŋ akɛ ojie amɛ kɛjɛ mɔ fɔŋ lɛ dɛŋ ni oto amɛ shweshweeshwe. 16Amɛjɛɛɛ je lɛ mli, tamɔ bɔ ni mi hu mijɛɛɛ je lɛ mli lɛ. 17#Yoh 6.63 Feemɔ amɛ krɔŋkrɔŋ yɛ anɔkwale lɛ mli; owiemɔ lɛ anɔkwaleŋ. 18#Yoh 20.21 Tamɔ bɔ ni otsu mi je lɛ mli lɛ, nakai nɔŋŋ mi hu mitsu amɛ je lɛ mli. 19Ni amɛhewɔ mi diɛŋtsɛ mifeɔ mihe krɔŋkrɔŋ lɛ, koni amɛ hu afee amɛ krɔŋkrɔŋ yɛ anɔkwale mli.”
Yesu sɔle hã esɛɛnyiɛlɔi ni baaba
20“Shi jeee mɛnɛɛmɛi kɛkɛ mibiɔ mahã, shi miibi mahã mɛi ni baahe minɔ aye yɛ amɛwiemɔ naa lɛ hu; 21#Gal 3.28 bɔ ni afee ni amɛ fɛɛ amɛfee ekome, tamɔ bɔ ni bo, Ataa, oyɔɔ mimli ni mi hu miyɔɔ omli lɛ, koni amɛ hu amɛfee ekome yɛ wɔmli, ni je lɛ ahe aye akɛ bo otsu mi. 22#Bɔf 4.32 Ni anunyam ni okɛhã mi lɛ, mikɛhã amɛ, koni amɛfee ekome tamɔ bɔ ni wɔ hu wɔyɔɔ ekome lɛ. 23#1 Kor 6.17 Miyɛ amɛmli, ni bo hu oyɛ mimli, koni amɛfee ekome kɛwula shi, ni je lɛ ale akɛ bo otsu mi, ni osumɔɔ amɛ tamɔ osumɔɔ mi lɛ. 24#Yoh 12.26 Ataa, mɛi ni okɛhã mi lɛ, miisumɔ akɛ he ni miyɔɔ lɛ amɛkɛ mi abahi jɛi, koni amɛna minunyam ni okɛhã mi lɛ, ejaakɛ osumɔ mi dani ato je lɛ shishi. 25Ataa Jalɔ, je lɛ leee bo, shi mi lɛ mile bo, ni mɛnɛɛmɛi le akɛ bo otsu mi; 26ni mijie ogbɛi lɛ kpo mitsɔ̃ɔ amɛ, ni masaa majie lɛ kpo matsɔ̃ɔ, koni suɔmɔ ni okɛsumɔ mi lɛ ahi amɛmli, ni mi hu mahi amɛmli.”
Currently Selected:
Yohane 17: NEGAB
Tya elembo
Share
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo
Bible in Ga Language © Bible Society of Ghana, 2020.