Yohane 20
20
Yesu tuwo hule
(Mat. 28:1-10; Mrk. 16:1-8; Luk. 24:1-12)
1Hungku mabaa alo Minggu, laomi Maria Magdalena i talumba. Hawe inditi, liliu naita watu petuko talumba telolimi. 2Ido hai melangkami lao i Simo Peturu hai i hadua topeguruna Yesu au napokakaia, nauliangaahe, “Watana Pue raalami hangko i talumbaNa, hai bara kiisa kaiumbana rawoli!”
3Mewali laomohe Peturu hai rangana iti i talumba. 4Melangka sambelahe, agaiana rangana iti meliu kamagasina, ido hai ioru hawe i talumba. 5Napelogami, agaiana bara mani mesua. Moitami bana au rapopobungkuhi Yesu arato inditi. 6Roo indo hawemi, Simo Peturu hai liliu mesua. Moita worimi bana pebungkuna Yesu. 7Agaiana bana au rapopowewe waana Yesu, tewilolo hai tepatani hangko i bana ntani. 8Hangko inditi, topeguruNa au hadua, au ioru hawe i talumba inona, mesua worimi. Naitami apa au mewali i lalu talumba iti, pane napoinalai. 9Hawe i tempo iti, bara manihe moisa apa au teuki i lalu Sura Malelaha hangkoia au mopakanoto, “Ia hangangaa tuwo hule.”#Pta. 16:10-11; Yes. 53:10-11; Hos. 6:2 10Roo indo, mesulemohe topeguruNa au rodua iti lao i sounda.
Yesu mopatongawa wataNa i Maria Magdalena
11Agaiana Maria Magdalena meangka pea i raoa talumba, moteria liliu. Tangana moteria, ia meloga i lalu talumba. 12Unga pea moita rodua malaeka au mebadu bula hai mohudahe i karadampaana watana Yesu, hadua ntanda i waaNa, hai hadua ntanda i bitiNa. 13Mekunehe malaeka iti i Maria, rauli, “Ina, moapari pane moteriako?”
Nauli Maria, “Ampuku raalami hangko inde, hai bara kuisa iumba rawoli.”
14Hangko inditi, membalilimi Maria hai moita Yesu meangka i taleuna, agaiana bara naisa kaYesunami. 15Mekunemi Yesu iria, “Ina, moapari hai moteriako? Hema au nuhaoki?”
Nauli laluna Maria: ba topokampai bonde dolou. Ido hai nauliangaa, “Tua, ane Oio au mangala wataNa, Nutudungiana iumba nuwoli bona lao kuala.”
16Nauli Yesu, “Maria.”
Membalilimi Maria i Yesu, hai mololita i lalu basanda to Yahudi, “Rabuni!” (Lempona, ‘Guru’.)
17Nauli Yesu i Maria, “IneeNa nukingki, lawi bara maniNa mengkaore lao i UmaNgku. Laomoko i halaluNgkuhe, nuuliangaahe ina laomona i UmaNgku hai Umamu wori, Pue AlaNgku hai Pue Ala au nipenombai.”
18Laomi Maria Magdalena mampohidupaahe topeguruna Yesu, nauli, “Kuitami Pue!” Hai napahaweamohe ope-ope au nauli Yesu.
Yesu mopatongawa wataNa i topeguruNa
(Luk. 24:36-39,47-49)
19Kaindina i alo Minggu iti, topeguruna Yesu moguluhe i lalu sou hai ragili babana, lawi langahe i tadulakonda to Yahudi. Unga pea ara Yesu meangka i olonda, hai Natabehe, Nauli, “Roa ngkatuwo hawe irikamu.” 20Roo indo, Napopaitaamohe taieNa hai lompeNa. Matana mpuu lalunda moita Ampunda. 21Nauli mbuli Yesu, “Katinda lalu hawe irikamu. Nodo UmaNgku motuduNa, nodo wori Iko motudukau.” 22Roo indo, Natawuehe pane Nauli, “Nidokomi Inao Malelaha. 23Hema au niampungi dosana, naampungi wori Pue Ala. Hema au bara niampungi dosana, bara wori naampungi Pue Ala.”
Yesu mopatongawa wataNa i Tomas
24Tomas au rauli Toporopa, hadua hangko i hampulo hai rodua topeguruna Yesu, bara ara hihimbela hai rangana i kahawena Yesu nguru-nguruna. 25Ido hai rauliangaa rangana, “Kiitami Pue!”
Agaiana nauli Tomas, “Ane bara mani kuita hai kupetobo pepakua i taieNa, hai ane bara mani kuperera petambukua i lompeNa, bara ina kupoinalai.”
26Liumi haminggu, mogulu mbulimohe topeguruna Yesu i lalu sou iti. I tempo iti, Tomas ara womi indo. Hai ope-ope baba ragilimi. Nauri nodo, unga pea Yesu ara meangka i olonda, hai mololita, Nauli, “Roa ngkatuwo hawe irikamu.” 27Roo indo, Yesu mouliangaa Tomas, “peita hai nuperera pepakua au i taieNgku. Hai nupetobo wori petambukua i lompeKu. Ineemi bata-bata lalumu. Nupoinalaimi!”
28Nauli Tomas, “Oiomi Ampuku hai Pue Ala au kupenombai!”
29Nauli Yesu i Tomas, “Mepoinalaiko lawi nuitamoNa. Morasihe tauna au mepoinalai Iriko, kehapiri baraNa raita.”
Tunggaia sura ide
30Ngkaia mani tanda kuasa au nababehi Yesu i lindonda topeguruNa, agaiana bara ope-ope teuki i lalu sura ide. 31Agaiana apa au kuuki ide, kuuki bona nipoinalai kaYesunami Datu Topehompo, Anana Pue Ala, hai bona molambikau katuwo maroa au bara mokahopoa hangko i pepoinalaimi Iria.
Currently Selected:
Yohane 20: NPY
Tya elembo
Kabola
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo