Saaŋ 15
15
Kidgiŋ reseñi na naak ciŋ wa
1Yeesu woosa ne : « A mi kidgiŋ reseñi keeh-keehi, Baabiŋ ngo nikka guurohi. 2Naak nu nik nga so te wa raakɗi rim ɗah, a hey wa nguɗe. Waaye waa nu raak rim ɗah, a hey wa carse po wa hool ne wa ɓaat rim. 3Ɗu nak, ɗu hooliɗ po ƴutiɗ sagu woo ci ŋ woo ɗu. 4Genaat nga so findi ŋ genoh nga ɗu ; naak minɗi raak rim kiik wa, wa joy gen amb ŋ kidgi. Wa mand ɗaa nga ɗu, ɗu minɗi raak rim ne ɗu genɗi amb nga so ɗah.
5A mi kidgiŋ reseñi, e ɗu naak ci. Ɓo' nu gen nga so findi ŋ genoh nga ɗe ɗah, a hey raake rim laayiɗ laam ɗu nikɗi nga so ɗah ɗu minɗi haɓiɗ ali in. 6Ɓo' nu genɗi nga so ɗah, a hey mbetse ŋ hara findi naak ci baahaaɗiici. Ca suy ɗah, ca nangɗohu, ca njafu ŋ yongkaaha, ca doh.
7Ɗu gen nga so te woo kiŋ ngo gen ŋ keeñ ciŋ ɗu ɗah, kiimaat in nu ɗu waaɗ ɗah, wa raakohan ɗaa nga ɗu. 8Ɗu raak rim laayiɗ ɗah, ɗu hey teeɓohe ne ɗu taalubeeciŋ ngo te wa hey teeɓohe yaki Baabiŋ ngo yak. 9Findi Baabi waaɗoh ho, ŋ nam ɗu waaɗoh ɗaa. Genaat ŋ waaɗi ŋ waaɗ ɗu weem. 10Ɗu taambiɗ nakoh ciŋ ngo ɗah, ɗu hey gene ŋ waaɗi ŋ waaɗ ɗu, findi ŋ taambɗoh nakoh ciŋ Baabiŋ ngo te ŋ geniɗ ŋ waaɗi a waaɗ to.
11Ŋ woyiɗ ɗu in ceem ne sumi ŋ sum nik nga ɗu, te sumiŋ ɗu mit sik. 12Inii weɗ ŋ nakoh : Waaɗtiɗohaat ŋ harmban ɗu findi ŋ waaɗoh ɗu. 13Ɓoyi eɗoh kiñin kiŋ ɗe sagu nawleeciŋ ɗe, raakɗi waaɗ-waaɗi uup yak waaɗ-waaɗeem. 14Ɗu nawleeciŋ ngo, ne ɗu haɓiɗ ini ŋ nak ɗu ɗah. 15Ŋ ɓeeɗkohissanɗi ɗu ñaam, laam ñaam na inheeɗi ini heɗ ce na haɓɗe. Mi, ŋ inhiɗiɗ ɗu ini ŋ kerhoh ŋ Baabiŋ ngo jen, tahha po ŋ ɓeeɗkohan ɗu nawleeciŋ ngo kotii.
16E ɗu tan ndo haa, ñam tan ɗu, ŋ tufkiɗta ɗu ne ɗu kaɗ, ɗu raak rim te ca nik rim ci genan gen. Ŋ ineem Baabi hey ɗu one in nu ɗu kiim ɗe ŋ tiikiŋ ngo ɗah. 17Ini ŋ nak ɗu weɗ ne ɗu waaɗtiɗoh ŋ harmban ɗu. »
Adina sangiɗ Yeesu na taalubeeciŋ ɗe
18Yeesu woyissa ne : « Adina sang ɗu ɗah, inhaat ne wa koc co sang. 19Ɗu ɓaaheen ŋ Adina ɗah, Adina heen ɗu waaɗe sagu waaɗi wa waaɗ ini wa raak. Waaye ɗu ɓaahɗi nga laam ŋ kooɗohiɗ ɗu ŋ ɗooƴ wa, weɗ tah wa sannga ɗu.
20Kinaat alkoh woo ki ŋ woo ɗu ne : “ Ñaam uupuu heɗ ce. ” Nik ne ɓa tolfiɗ to ɗah, ɓa hey ɗu tolfiɗe. Ɓa ambiɗ jangɗohiŋ ngo ɗah, ɓa hey ambe wiŋ ɗu. 21Waaye ineem jen ɓa hey ɗu wa tume saguuso laam ɓa inahɗi Yi woos so.
22Ŋ hayeeɗi te ŋ woyeeɗi na ɓa ɗah, ɓa heeɗi taambse bakaaɗ. Waaye ɗiski wa nik ɓa raakisɗi taaskoha ŋ bakaaɗ ciŋ ɓa. 23Yaa nu sang ngo ɗah, a nam sang Baabiŋ ngo. 24Ŋ tumeeɗi ŋ ɗooƴ ɓa in ci ali ɓo' wiiriis tumɗi ɗah, ɓa heeɗi taambse bakaaɗ. Waaye ɗiski wa nik ɓa hotiɗ in ci ŋ tum te ɓa sangiɗ to, ɓa sangiɗ Baabiŋ ngo. 25Waaye ineem raakiɗ ne woo ki fiisu ŋ waasiŋ ɓa raak, wa woo ne : “ Ɓa sangiɗ to te ɓa degɗaa ŋ ɗisik.#Sabuur 35:19; 69:5 ”
26Ɓaatɗohohi ŋ woyee ne ŋ hey ɗu ɗe woosohe ŋ tiikiŋ Baabi, te a nikka Fuuɗsi Hoolohngaani puloh ŋ Baabi ; a yi na teeɓohe keeh ki ŋ ini kaɗ ŋ Kooh ; a hay ɗah, a yi seede'an ndo. 27Ɗu, ɗu hey yo name seede laam ŋ cambohaana poyi, ɗu ɓii na so. »
Currently Selected:
Saaŋ 15: YM
Tya elembo
Kabola
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo
© Wycliffe Bible Translators, Inc