Jenesii̱s 35
35
Bi̱ tsꞌén Néná katsꞌénchikonñé Jakoo̱b ki̱a̱ Betee̱l
1Kó Néná bi̱ katsoó Jakoo̱b: «Kjiꞌanga ikiyindikíi̱n ntsꞌie ji Esauu̱, an jatjokjaà ki̱a̱ Betee̱l, kó kuíni nga ngotꞌe̱ ꞌne̱ ki̱a̱ ti̱ndyin ji Betee̱l, kó ki̱a̱ ti̱ꞌindení ngo ṉchandikón».
2Kósꞌe̱ Jakoo̱b, bi̱ katsoó xota̱ xkjín ko̱jo xi ki̱a̱ síndojo̱:
«Tꞌíndomasienjnú kui ni xi ne ndyi̱ꞌmìjnúu̱ xi síndojnú, sꞌe̱ jaskan ti̱ndáyájnú kó tasíkjojnú ńjñojnú, 3ngatꞌa̱ chjiéngá Betee̱l kongín, tsi̱ꞌe̱ nga ngindyi̱ko̱n Néná konginkíndyiá. Ki̱a̱ boá nínga sa̱ꞌindàa̱ ngo ṉchandikón Néná, tsi̱ꞌe̱ nga tsjàa̱ ndokꞌóchjì, ngatꞌa̱ kuí boá xi asíko̱jona kjiꞌanga kisꞌiena kjo̱a̱xti. Néná boá xi ngatsjéni̱xtjin tsoꞌbájo̱na ndi̱yà xí tsoꞌbá an».
4Kó bo̱a̱ tsꞌén kui xotaa̱ katsꞌénkꞌasꞌiee̱n Jakoo̱b ngayeje ni xi ne katsoó xi kisꞌińdoo̱ ko̱jo nangínijon xi yajángií tji̱bo̱a̱nijon, kó Jakoo̱b ngindiee̱ ngo yáꞌensino̱ xi tikón ki̱a̱ Sikee̱n ínijín ngayeje kui nii̱. 5Kó ngije jatjo kui ngi̱ndiee̱, Néná katsꞌén nga ngayeje xota̱ na̱xi̱ńdá xí síndo nínga tiñaa̱ nga achichí katsakjónní kui jaá, kó jmíjín xi kijíngátji̱ngii̱ ndií Jakoo̱b.
6Kó Jakoo̱b ko̱jo ngayeje xota̱ xi tsoꞌbájo̱ jachó na̱xi̱ńdá xi ꞌmí Betee̱l, xi tikón nangi Kanaa̱n. 7Ki̱a̱ boá nínga Jakoo̱b jatjokjaà Néná kjiꞌanga tsangandikoón Esau̱ ntsꞌi̱e̱. Kuíni nga Jakoo̱b ngo ṉchandikón katsꞌénda ki̱a̱a̱, kó kui ngi̱ndiee̱ «Néná xí tsi̱ꞌe̱ Betee̱l» ítꞌajaꞌén.
8Kui ni̱xtjin jàn kꞌien na̱ Ndéboraa̱, xota̱chjo̱on xí askoo̱n na̱ Rebekaa̱ ndeskande nga tsa̱kjìnchí, kó ngo ngindie yáꞌensino̱ akjanijín, ki̱a̱ tiña Betee̱l, kuíni nga kui ngi̱ndiee̱ «Yaá kjo̱a̱chaꞌaá» ꞌmí.
9Ngasꞌe̱ Néná jatjokjaà Jakoo̱b kjiꞌanga kijíꞌoyá nginí Pandaa̱n-Araa̱n, kó katsꞌénchikonñé. 10Kui ni̱xtjin jàn, Néná bi̱ katsoó: «Jí boá xi ꞌmií Jakoo̱b, ta̱nga jè ngiti̱ Jakoo̱bjín kꞌuin ngasee̱, Israee̱l kꞌuiín ngotꞌe̱ ꞌne̱». Kó ndeskande koó kjiꞌa Néná, Israee̱l katsoó. 11Kó ti̱ ki̱a̱ Néná bi̱ katsó ngasee̱:
«Án boá kui Ne xi tjiín ngayeje ngaꞌniuú, kó mejénna nga kjín xota̱ tji̱e̱ kꞌuieé ji, ki̱a̱ kjo̱tjojinni kjín na̱xi̱ńdá, kó ti̱ ki̱a̱ kjo̱tjojinni kjín já re. 12Tꞌanangi xi katsjáa̱ Abraa̱n ko̱jo Isaa̱ kuí boá xi ti̱ tsjaa ji ngotꞌe̱, kó jaskan tsjàa̱ xota̱ tji̱e̱ tse̱».
13-14Ngije xín ngi̱ndie kijí Néná, Jakoo̱b iskjíbé ndi̱jo̱ xi índoxó sꞌe̱ iskjitjónjón isti̱ ko̱jo bino̱, kó Néná katsꞌénkꞌasꞌiee̱n kui ngi̱ndiee̱. 15Kó nga Néná ki̱a̱ tsíchji̱a̱jo, kuíni nga Jakoo̱b Betee̱l ítꞌajaꞌén kuí ngi̱ndiee̱, «ndiꞌaa̱ Néná» tsó kui jaꞌeén.
Bi̱ tsꞌén kꞌien na̱ Rakee̱l
16Jaskan jatjoni Jakoo̱b ko̱jo xotaa̱ ki̱a̱ Betee̱l, kó kijí xtji̱e̱e̱n nangi Efrata̱, kó ngije makjachó má kui nangii̱, na̱ Rakee̱l ítsꞌi̱yanii̱ tsi̱ndi̱o̱o̱ nga stse̱n ndií xi ingoo̱. 17Kó achichí niꞌin katsꞌén, kósꞌe̱ xota̱chjo̱on xí ꞌboje̱n ndií bi̱ katsoó: «Ngata̱ ndakinjín má ji, ti̱ xi̱ꞌin ka̱ma nginí kui ndií nga».
18Kó nda tsꞌén katsen kui ndií, ta̱nga na̱ Rakee̱l kichikjo̱a̱jiín, kó ngindiee̱ nga ko̱yà Benoni̱ ítꞌajaꞌén kuí ndií «ndií kjo̱a̱ndakjanna» tsó kuí jaꞌeén, ta̱nga Jakoo̱b asíkjoo̱ jaꞌeén kó Benja̱ katsoó «ndí xí tjó ngasena» tsó kui jaꞌeén.
19Kó kꞌien na̱ Rakee̱l, kó ki̱a̱ akjanijín ndi̱yà xi fí Efrata̱, ki̱a̱ nínga na̱xi̱ńdáꞌniú Belee̱n ꞌmí ngotꞌe̱. 20Jakoo̱b ngo xó ndi̱jo̱ katsꞌénda nga̱soón nga̱tsjo̱ó na̱ Rakee̱l. Kó kuí ni̱xtjin xi̱ꞌbi̱ nga kiniꞌánꞌindó kui nii̱, kuí boá kuí xó ndi̱jo̱o̱ xi chi̱bo̱a̱ kjima nínga tikón nga̱tsjo̱ó na̱ Rakee̱l.
21Kó ingo ndi̱yà Jakoo̱b ti̱ kijí nginí xín ngi̱ndie, kó ki̱a̱ katsꞌénda ndiꞌaa̱ ngi̱chí kjinnii̱ nínga tikón tarieé Éndee̱r. 22Tji̱e̱nga kisꞌijña Jakoo̱b kui ngi̱ndiee̱, ndií kui xi ꞌmí Rubee̱n kisꞌiejo̱ na̱ Bilaa̱, kui xi chjo̱on mánii̱ Jakoo̱b, kó tsintꞌié kuí nii̱ Jakoo̱b.
Ndií Jakoo̱b
Tiejó kamá ndií Jakoo̱b.
23Ndí xí kisꞌiee̱ na̱ Liyaa̱ kuí boá xi Rubee̱n, ndí xi tjoón, ko̱jo Simeoo̱n, ko̱jo Lebii̱, ko̱jo Jundáa̱, ko̱jo Isakaa̱r ko̱jo Sabuloo̱n.
24Ndí xí kisꞌiee̱ na̱ Rakee̱l kuí boá xi Kosiee̱, ko̱jo Benjaa̱.
25Ndí xí kisꞌiee̱ na̱ Bilaa̱ na̱ chji̱ni̱e̱ꞌboo̱ na̱ Rakee̱l kuí boá xi Ndaa̱n ko̱jo Neftalii̱.
26Ndí xí kisꞌiee̱ na̱ Silpaa̱ na̱ chji̱ni̱e̱ꞌboo̱ na̱ Liyaa̱, kuí boá xi Ngaa̱nd ko̱jo Asee̱r.
Kuí bí xí kamá ndií Jakoo̱b xi katsen nga kisꞌijña ki̱a̱ nangi Pandaa̱n-Araa̱n.
Bi̱ tsꞌén kꞌien Isaa̱
27Jaskan Jakoo̱b kijí nginí ndiꞌaa̱ Isa̱ na̱ꞌmii̱, kui xi kisꞌijña ki̱a̱ nínga ꞌmí Ebroo̱n, nínga kisꞌijña Abraa̱n nga. 28Úchán ichítié ko̱jo kantié noó Isaa̱ nga kꞌien. 29Kó jè ꞌniú xchá Isaa̱ nga kꞌien, kó ndií, kui xi ꞌmí Esauu̱ ko̱jo Jakoo̱b ki̱a̱ yínijín nínga kjiyojonijín xkjín.
Currently Selected:
Jenesii̱s 35: MAIX
Tya elembo
Kabola
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014