Jenesii̱s 29
29
Bi̱ tsꞌén jachó Jakoo̱b nangi Pandaa̱n-Araa̱n
1Kó Jakoo̱b kijíra ndi̱ya̱à, sꞌe̱ jachó nangii̱ xota̱ xi síndo xtji̱e̱e̱n nínga fotjo tsꞌueé ki̱a̱ nangi Kanaa̱n. 2Kó ki̱a̱ ngi̱jin kꞌijñaá kamábe ngo ndáńchꞌi̱ nínga ndyi̱ꞌbi ndáfoa cho̱o̱, kó ki̱a̱ tꞌa kui ndáńchꞌií síndo nga ndyi̱tsꞌènkjaꞌyá ján xtín cho̱tsa̱nga̱, kó ngo ndi̱jo̱ tjixtió tsꞌoa kui ndáńchꞌií, 3kó ta̱ kjiꞌá tsí boeꞌeé ndáfoa cho̱tsa̱nga̱a̱ ngaskande nga matikó ngayeje xtín cho̱tsa̱nga̱ xi fochójo̱ já xí koón kui cho̱o̱, sꞌe̱ ngije katsꞌe ndáfoa foꞌmá nginí kui ndáńchꞌií. 4Kó Jakoo̱b kijíkóntiñaa̱ kui já xí koón cho̱tsa̱nga̱a̱ kó asíyaá ñá chji̱a̱ni kui jaá. Ngije katsóyaà nga nangi Araa̱n chji̱a̱ni, 5bi̱ katsó nginí Jakoo̱b:
—A yàjínjnú ngo nda̱ xi ꞌmí Labaa̱n, kui xi ndínde manii̱ Najoo̱r.
—¡Jo̱o̱n yàjne̱! —Katsó kui jaá.
6—Kó a nda tikón kui nda̱a̱. —Katsó Jakoo̱b.
Kó kui jaá bi̱ katsó ngase:
—Jo̱o̱n, nda tikón, jànꞌa̱n ki̱a̱ tsꞌéndibá na̱ Rakee̱l, tsa̱kji̱ín Labaa̱n, nga tsꞌéndibájo̱ cho̱tsa̱nga̱a̱.
7Kósꞌe̱ Jakoo̱b bi̱ katsoó:
—¡Xotí ngase kó kji̱e̱ ma jñójín! Ta̱sá te̱ꞌéjnúu̱ ndáfoa cho̱tsa̱nga̱a̱, sꞌe̱ ti̱ niꞌánkjí nginíjnú nínga kjién ndi̱xcho̱, kji̱e̱ chi̱bo̱a̱jiín nga ku̱i̱ndyiaꞌya.
8Kó bi̱ katsó kui jaá:
—Kji̱e̱ ka̱májín ko̱e̱ꞌéjne̱ ndáfoa, chjiéngá xchiyàjne̱ ngaskande nga ka̱matikó ngayeje xtín cho̱tsa̱nga̱a̱, sꞌe̱ chje̱ꞌéxínjne̱ ndi̱jo̱ xi kjiꞌixtio tsꞌoa ndáńchꞌií, sꞌe̱ ka̱ma kꞌuí ndáfoa ngayejee̱.
9Tji̱e̱nga Jakoo̱b to̱kó tsꞌénchji̱a̱jo ngase kui jaá, jachó na̱ Rakee̱l nga jachójo̱ cho̱tsa̱nga̱a̱ na̱ꞌmii̱, ngatꞌa̱ na̱ xi koo̱n cho̱tsa̱nga̱ kamá kui tsa̱kji̱ín. 10-12Kó Jakoo̱b jaꞌáxiín ndi̱jo̱ xi kjiꞌixtio kui ndáńchꞌií, kó katsjaá ndáfoa cho̱tsa̱nga̱a̱, sꞌe̱ katsjaá ngo ndsó na̱ Rakee̱l, kó askjandá tsjá. Ngije Jakoo̱b katsóyaà na̱ Rakee̱l nga ntsꞌi̱e̱xtio ma xkjín, ngatꞌa̱ Labaa̱n ntsꞌi̱e̱ ma na̱aa̱n, na̱ Rakee̱l tsanga má kijíkoón na̱ꞌmii̱ nga kijítsáyaá kui nii̱.
13Ngije tsintꞌié Labaa̱n nga ki̱a̱ tikón Jakoo̱b, ndií ndichja, tsanga má kijíkjaꞌáyíndi̱yà, janíkjá kó katsjaá ngo ndsó tꞌanijon, sꞌe̱ kijíjo̱ ndiꞌaa̱, kó ngije jachó, Jakoo̱b katsóyaà Labaa̱n ngayeje ni xi kamaá. 14Kósꞌe̱ Labaa̱n bi̱ katsó: «¡Ja̱koxi̱ boá nga xingi̱jne̱ ma ji!»
Bi̱ tsꞌén ixánjo̱ Jakoo̱b na̱ Liyaa̱ ko̱jo na̱ Rakee̱l
Ngije jaꞌa ngo sá nga jachó Jakoo̱b kui ngi̱ndiee̱, 15Labaa̱n bi̱ katsoó Jakoo̱b: «Jmí tsi kjo̱a̱a̱ nga xingi̱ má, sꞌe̱ ta̱ si̱ꞌinxé kjo̱a̱nde jí. Tꞌíyéní kótjín mejeén nga kꞌuichjií».
16Jó kamá ndí xí ínchjiín Labaa̱n, xi xchaá na̱ Liya̱ kiꞌmí, kó xi kjindií na̱ Rakee̱l kiꞌmí. 17Achichí tsjákón kamá ndyi̱ko̱n na̱ Liyaa̱, ta̱nga na̱ Rakee̱l achichí ꞌniú tsjá kisꞌie kui. 18Kó nga Jakoo̱b kamámejeén na̱ Rakee̱l, bi̱ katsoó Labaa̱n:
—Mejénná nga tsa̱kjíi̱n xi kjindií kotíjña̱jo an, tsi jo̱ꞌo ka̱maa̱ ji, yito nó sa̱ꞌínxájo̱ kjo̱a̱ndaa̱.
19Kó bi̱ katsó Labaa̱n:
—Ndakjíꞌí, ta̱sá nda nga ji ku̱i̱xenje̱, ta̱bo̱a̱jiín nga kje̱ꞌe xí ku̱i̱xanjo̱.
20Kó bo̱a̱ tsꞌén Jakoo̱b yito nó katsꞌénxá kjo̱a̱nda ta̱ngatꞌanii̱ na̱ Rakee̱l, kó ta̱sasá jaꞌa kui ni̱xtjii̱n, ngatꞌa̱ achichí kamámejeén na̱ Rakee̱l. 21Ngije jatjosón xi yito noó, Jakoo̱b bi̱ katsoó Labaa̱n: «Te̱ꞌéní na̱ Rakee̱l ꞌne̱, tsi̱ꞌe̱ nga kotíjña̱jo an».
22Kósꞌe̱ Labaa̱n ngo sꞌué ꞌniú katsꞌén, kó katsóyaà ngayeje xota̱ xi chji̱a̱ni kui ngindiee̱. 23Kó nga kamájñoó, Labaa̱n iskjíbé tsa̱kji̱ín xi ꞌmí na̱ Liyaa̱ kó kui kijíjoo̱ Jakoo̱b, kó Jakoo̱b kisꞌiejo̱ kui naa̱.#29:23 Este engaño fue posible porque la novia, durante la fiesta de bodas, permanecía cubierta con un velo. 24Kó Labaa̱n ti̱ katsꞌénkꞌasꞌiee̱n na̱ mosoo̱ xi ꞌmí na̱ Silpaa̱ nga, tsi̱ꞌe̱ nga kui xi ka̱ma chji̱ni̱e̱ꞌboo̱ na̱ Liyaa̱, xikoó tsi ngo ni xi katsjaá kjo̱a̱a̱ kjo̱a̱bixaa̱n. 25Nga kamángindyiojón nga kisisie̱èn, nga kamábe Jakoo̱b nga na̱ Liyaa̱ boá xi kjiꞌijñatꞌaa̱ kijíkoón Labaa̱n nga bi̱ katsoó nga asíyaꞌa:
—Míkjo̱a̱a̱ nga kichꞌíṉche̱jení. ¡Kjo̱a̱a̱ na̱ Rakee̱l boá nga katsꞌenxá kjo̱a̱ndaa̱!
26Kó Labaa̱n bi̱ katsoó:
—Chjiéngá tjón tsa̱kjìn xí xchaá xi bixan, jmí tsi tjón tsa̱kjìn xí kjindií, bo̱a̱ kjiꞌi kjo̱a̱xcha̱á kui ngi̱ndiee̱. 27Ta̱nga tsi mejeén si̱ꞌinxé kjo̱a̱ndení ngi yito nó, ngije kjo̱a̱ꞌa ngo xomana̱, ka̱ma tsjaa nga ku̱i̱xenje̱ ji na̱ Rakee̱l nga.
28Kó Jakoo̱b katsꞌénjo̱ꞌo ni xi kiꞌmií, kó ngije jaꞌa xi ngo xomanaa̱ ixánjo̱ na̱ Rakee̱l. 29Kó Labaa̱n ta̱ katsjárií na̱ mosoo̱ xi ꞌmí na̱ Bilaa̱, tsi̱ꞌe̱ nga kui xi ka̱ma chji̱ni̱e̱ꞌboo̱ na̱ Rakee̱l, xikoó tsi ngo ni xi katsjaá kjo̱a̱a̱ kjo̱a̱bixaa̱n. 30Kó Jakoo̱b tjó ngase kamaá na̱ Rakee̱l ta̱bo̱a̱jiín na̱ Liyaa̱, ndatsi ngi yito nó katsꞌénxájo̱ kjo̱a̱nda ngase Labaa̱n.
Ndií Jakoo̱b xi kisꞌiee̱ na̱ Liyaa̱
31Kó Néná kamábe nga Jakoo̱b katsꞌénchꞌó na̱ Liyaa̱, kó katsjaá nga kisꞌiee̱ ndí, ta̱nga na̱ Rakee̱l ndi̱ kamá. 32Kó na̱ Liyaa̱ kisꞌiee̱ ngo ndí, kui xi Rube̱n ítꞌajaꞌén, ngatꞌa̱ bi̱ katsó: «Néná kamábe kjo̱a̱ndasenna, kó ngotꞌe̱ ꞌné nga ja̱koxi̱ nga sa̱ꞌínmejénna xi̱ꞌinna».
33Jaskan ti̱ tsaꞌa nginí ingo ndí na̱ Liyaa̱, kó nga katsen kui ndí xí ma joó, bi̱ katsó: «Néná boá xi katsjána kui ndií nga, ngatꞌa̱ tsintꞌié nga tjójiín an xi̱ꞌinna». Kó kuíni nga Simeo̱n ítꞌajaꞌén, ngatꞌa̱ kui jaꞌeén «Néná ntꞌié» tsó.
34Jaskan ti̱ tsaꞌa nginí ingo ndí na̱ Liyaa̱ xi ma jaán ndi̱yà, kó nga katsen kui ndií, bi̱ katsó: «Ngotꞌe̱ ꞌné nga ꞌniú ngase ka̱mangojne̱ an ko̱jo xi̱ꞌinna, ngatꞌa̱ jè ján ndí katsjáa̱». Kuíni nga Lebi̱ ítꞌajaꞌén, ngatꞌa̱ kui jaꞌeén «Xi kamángo» tsó.
35Jaskan ti̱ tsaꞌa nginí ingo ndí na̱ Liyaa̱, kó nga katsen kui ndií, bi̱ katsó: «Ngotꞌe̱ ꞌné nga sa̱ꞌintsjáa̱ Néná». Kuíni nga kui ndií Jundáa̱ ítꞌajaꞌén, ngatꞌa̱ kui jaꞌeén «Nga kiniꞌántsjá» tsó. Kósꞌe̱ ngiti̱ kisꞌiejiín ngase ndí.
Currently Selected:
Jenesii̱s 29: MAIX
Tya elembo
Kabola
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014