Jenesii̱s 28
28
1Kósꞌe̱ Isaa̱ tsíchji̱a̱a̱ Jakoo̱b, kó ngije katsꞌénchikonñé, bi̱ tsꞌén atíxomaa̱:
«Ngata̱ na̱ xi chji̱a̱ni nangi Kanaa̱njín mindyinje̱ ji. 2Ta̱sá tꞌen ji nangi Pandaa̱n-Araa̱n, ndiꞌaa̱ na̱ꞌmindyiboáa Betuee̱l, kó ki̱a̱ ti̱xenje̱ ji ngo ndichjexti ji xi ndí ínchjiín Labaa̱n. 3Mejénna an nga kui Néná xí tjiín ngaꞌniuú ngatsꞌénchíkonñeé, kó ngatsjaá nga kꞌuieé kjín ndí. Kó ti̱ mejénna nga ngo na̱xi̱ńdá xí ꞌniú je ngatama xota̱ tji̱e̱ tse̱. 4Néná ngatsꞌénchíkonñeé ji ko̱jo xota̱ tji̱e̱ tse̱, xikótsꞌèn katsꞌénchikonñé Abraa̱n. Kó bo̱a̱ tsꞌén nga ji xi sa̱ko̱ó nga tse̱ ka̱ma kui tꞌanangi nínga tindyin ji ngotꞌe̱ xikoó tsi ngo xota̱ xi xín nangi, ngatꞌa̱ Néná boá xi katsjaá Abraa̱n kui ngi̱ndiee̱».
5Ngije kamá kui nii̱, Isaa̱ katsꞌénkixotꞌa Jakoo̱b nga kijí nangi Pandaa̱n-Araa̱n kó ki̱a̱ kisꞌijña ndiꞌaa̱ xkjín na̱aa̱n.
6-8Kó ngije kamábe Esauu̱ ngayeje ni xi tsíchji̱a̱jo Isaa̱ Jakoo̱b ko̱jo nga ki̱a̱ nangi Pandaa̱n-Araa̱n kijí Jakoo̱b, kamákjiín nga na̱ꞌmii̱ chꞌo kamaá ínchjín xí chji̱a̱ni nangi Kanaa̱n. 9Kuíni nga ndatsi je tjiín kje̱ꞌe ínchjín Esauu̱, ti̱ ixánjo̱ ngo tsa̱kji̱ín Ismaee̱l, ndií Abraa̱n, xi ꞌmí Maalaa̱t ndichja Nebayoo̱t.
Bi̱ tsꞌén tseꞌéchi̱nii̱ Jakoo̱b
10Kó Jakoo̱b jatjoni nangi Beersebaa̱, sꞌe̱ kijí nangi Araa̱n. 11Kó nga jachó ngo ngi̱ndie ki̱a̱ katsꞌénkjaꞌyá kui ni̱xtji̱e̱e̱n, ngatꞌa̱ jè kjimajñó. Kó ngo ndi̱jo̱ xi tjín kuí ngindiee̱ iskjíbé xi íngitoko, sꞌe̱ kisꞌifé ki̱a̱a̱. 12Kui ni̱xtji̱e̱e̱n tseꞌeé ngo chi̱ni nínga kamábe ngo yákíjo̱n xi sikónsón nga̱són tꞌanangii̱, kó ngaskande ndiꞌakꞌajmii̱ jachó ndyi̱ko̱n kui yákíjo̱o̱n, kó kamábe nga ndítsjiee̱ Néná ndyi̱fínijíngí ndyi̱fíjaya kui yákíjo̱o̱n. 13Kó kamábe nga nínga tikón ndyi̱ko̱n kui yákíjo̱o̱n, ki̱a̱ tikón Néná, kó Néná bi̱ katsó:
«Án boá xí Nee̱ Abraa̱n, ko̱jo xi Nee̱ Isaa̱, kó tsꞌénxiyaa nga kui tꞌanangi nínga titsjajni ji, ji ko̱jo xota̱ tji̱e̱ tse̱ boá xí tsjàa̱. 14¡Xota̱ tji̱e̱e̱ kjín ka̱ma xikó maá xa̱a̱ tꞌanangii̱! Kó kꞌi̱e̱ kꞌuíndo ngayeje kui na̱xi̱ńdaá, kó ngatꞌaa̱ ji ko̱jo xota̱ tji̱e̱ tse̱ boá nga ngayeje xota̱ na̱xi̱ńdá xí tjín nga̱sondiee̱ ka̱machikonñé. 15Kꞌi̱e̱ tikónjoo̱ ji, kó jmíni̱xtjin kꞌuijñámasiee̱n ngaskande nga kjo̱tjosón ni xi tꞌíxiaán. An skoon ta̱ nínga kꞌuin jí, kó an kjoéꞌe̱jo ngiñaá kui ngi̱ndiee̱».
16-17Kó ngije jaꞌaá Jakoo̱b, achichí katsakjónní nga bi̱ katsó: «¡Achichí ndikón kuí ngi̱ndiee̱! Ja̱koxi̱ boá nga kꞌi̱e̱e̱ nínga tikón Néná kó nde bejín an. ¡Kꞌi̱e̱ bí ndiꞌaa̱ Néná! ¡Kꞌi̱e̱ bí nga̱ntjo̱a̱a̱ ndiꞌakꞌajmii̱!»
18Kó nga kamángindyiojón achichí ta̱jñó jastjíe̱n Jakoo̱b, kó iskjíbé kuí ndi̱jo̱ xi íngitoko, iskjininkꞌa nga íjñá ngo chi̱bo̱a̱ sꞌe̱ katsꞌénkꞌasꞌiee̱n Néná nga iskjitjónjón isti̱ kui ndi̱jo̱o̱. 19Kó ndatsi nga tjón tjón ki̱a̱ na̱xi̱ńdá nínga kisꞌijña kui ndi̱jo̱o̱ Almendra̱ kiꞌmí, ta̱nga Jakoo̱b, Betee̱l#28:19 En hebreo, Betee̱l significa casa de Dios. ítꞌajaꞌén kuí ngindiee̱.
20Sꞌe̱ jaskan Jakoo̱b bi̱ katsó nga sa̱ꞌínkjatjosón ngo ni:
«Tsi Néná ko̱e̱je̱jona, kó tsi skónna ndi̱yà nínga tsꞌénfí an, kó tsi tsja̱ana ni xi skjíni̱e̱ an ko̱jo ńjño xi koajà an, 21kó tsi nda tikòn an nga kjoéꞌe̱ ngiñá an ndiꞌaa̱ na̱ꞌmina, ja̱ ti̱ Ne tsa̱ꞌa̱n ka̱ma nga. 22Kó kui ndi̱jo̱ xi je iskjininkꞌa an kꞌi̱e̱e̱, kuí boá xi ka̱ma chi̱bo̱a̱a̱ ngi̱ndie nínga ngayeje xi kji̱ndi̱bá tsꞌéndíkón Néná, kó ngayeje ni xi tsja̱ana Néná, tie nga úchán tsja ngiñáa̱ kui».
Currently Selected:
Jenesii̱s 28: MAIX
Tya elembo
Kabola
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014