Jenesii̱s 26
26
Bi̱ kamaá Isaa̱ ko̱jo Abimelee̱k
1-6Kui ni̱xtjin jàn kisꞌie ngo kjindiá ngayeje nangi Kanaa̱n, xikó má kamá ni̱xtjin nga kisꞌijña Abraa̱n. Achichí ꞌniú kamá kui kjindiaá, kó katsꞌénkjó Isaa̱ nga ko̱e̱je̱ nangi Ejipto̱, ta̱nga Néná jatjokjaà Isaa̱ kó bi̱ katsoó:
«Ngata̱ ꞌmijín ji nangi Ejipto̱, ta̱sá ki̱a̱ ti̱ndyin ji ngotjón nangi Ngeraa̱r, nínga tikón Abimelee̱k, nda̱ ree̱ já Filisteaa̱, kó an ngatsjéni̱xtjin kotíjña̱joo, kó sa̱ꞌinchikonñé an ngayeje ni xi si̱ꞌin ji, kó ji ko̱jo xota̱ tji̱e̱ tse̱ tsjàa̱ ngayeje kui tꞌanangii̱. Kó bo̱a̱ tsꞌén sa̱ꞌinkjatjosón an ni xi kixiáa̱n na̱ꞌmíi̱ Abraa̱n nga sa̱ꞌin an. Sa̱ꞌinkjín an xota̱ tji̱e̱ tse̱, xikó maá ńño xi tjín nkꞌa jàn, kó ngatꞌaa̱ xota̱ tji̱e̱e̱ nga ka̱machikonñé ngayeje na̱xi̱ńdá xí tjín nga̱sondiee̱, ngatꞌa̱ Abraa̱n tsintꞌiéꞌénna, kó katsꞌénkjatjosón kjo̱a̱botíxomana, ko̱jo ni xi kixiáa̱n nga sa̱ꞌín».
Kó Isaa̱ kijí nangi Ngeraa̱r nga kijíchji̱a̱jo Abimelee̱k, kó ki̱a̱ kisꞌijña kui nangii̱. 7Kó kjiꞌanga jáxíꞌín xi chji̱a̱ni kui nangii̱ asíyaá kjo̱a̱a̱ na̱ Rebekaa̱, ndichja án boá katsó Isaa̱. Kó katsakjónní ngatꞌa̱ bi̱ tsꞌén katsꞌénkjó: «Na̱ Rebekaa̱ achichí tsjákjiꞌi, kó kui jaá ka̱mamejeén sa̱ꞌínkꞌiénna ta̱ngatꞌanii̱ kui».
8Ngo ndi̱yà Abimelee̱k tsꞌénkotsijen xtji̱e̱e̱n nga̱ntjo̱a̱masienkjaá ndiꞌaa̱, kó kamábe nga Isaa̱ tjítsꞌéndájoón na̱ Rebekaa̱. 9-10Kósꞌe̱ Abimelee̱k tsíchji̱a̱a̱ Isaa̱, kó bi̱ katsoó:
—¡Ka̱májín xꞌi̱ṉche̱jení án! ¡Kui naa̱ ndichjejín bo̱a̱, chjóo̱n boá! Kó, ánní nga bo̱a̱ kjiꞌi ni xi kiniꞌínje̱jne̱. ¡Kó tsi tjín já xi nijan síndojo̱na kꞌi̱e̱e̱ xi kisꞌiejo̱ kui naa̱, a mí tsí ngayejejne̱ nga kisꞌiniéjne̱ kui jeé!
Kó bi̱ katsó Isaa̱:
—Kjo̱a̱a̱ nga katsakjonña an nga si̱ꞌankꞌienna tsi̱ꞌe̱ nga ngo kui jaá kꞌuijñájo̱ kui naa̱.
11Kósꞌe̱ Abimelee̱k tsíchji̱a̱jo ngayeje xota̱ na̱xi̱ńdaá nga bi̱ katsoó:
—Ta̱ꞌyaní xi sa̱ꞌínxtií kui nda̱a̱ ko̱jo chjo̱ón, chjiéngá ko̱yà.
12Ti̱ kuii̱ nó, Néná katsjaá Isaa̱ nga tsie ni tjié kamáxchaá, kó úchán bo̱a̱ kjiꞌi ngase ni xi ítji̱e̱ kui tꞌanangii̱ xi jaꞌátikó. 13Kó bo̱a̱ tsꞌén Isaa̱ achichí to̱n katsꞌén, kó ꞌniú kamácho̱n. 14Kisꞌiee̱ kjín cho̱tsa̱nga̱, cho̱yojo ko̱jo moso̱, kó já Filisteaa̱ ítsꞌi̱yani nga kamáꞌonkon. 15Kuíni nga já Filisteaa̱ indyiándié ngayeje ndáńchꞌi̱ xi katsꞌénda já mosoo̱ Abraa̱n ngasꞌe̱. 16Kó ngaskande Abimelee̱k bi̱ katsoó Isaa̱: «Ta̱sá xín tꞌen ji, ngatꞌa̱ jè ꞌniú cho̱n ngase ji ta̱bo̱a̱jiín ji̱n».
17Kó Isaa̱ jatjoxieni kui ngi̱ndiee̱, kó ki̱a̱ kisꞌijña nangi nínga soón nangi Ngeraa̱r. 18Kjiꞌanga to̱kó tikón ngase nga̱sondie Abraa̱n, kjín ndáńchꞌi̱ katsꞌénda, ta̱nga ngije kꞌien, já Filisteaa̱ indyiándié kui ndáńchꞌií, ta̱nga Isaa̱ ti̱ katsꞌéntsjie nginí nga ngo nga ngo kui ndáńchꞌií, kó bo̱a̱ tsꞌén ítꞌajaꞌén nginí xikótsꞌèn ítꞌajaꞌén na̱ꞌmii̱ ngasꞌe̱.
19Ngo ndi̱yà nga já mosoo̱ Isaa̱ ndyi̱tsꞌènda ngo ndáńchꞌi̱ ki̱a̱ nangi soón, ki̱a̱ kasakoo̱ ngo ndáńchꞌi̱ xi sijén má ndáfoaa̱. 20Ta̱nga já moso̱ xi koo̱n cho̱tsa̱nga̱ xi chji̱a̱ni nangi Ngeraa̱r, ko̱jo já moso̱ xi koo̱n cho̱tsa̱nga̱a̱ Isaa̱ askjantjéni kui ndáńchꞌií nga tsa̱ji̱n boá ndáfoa xi tjitjoó katsó. Kuíni nga Isaa̱ «Xi ikixkántjéni» ítꞌajaꞌén kuí ndáńchꞌií. 21Ti̱ ingo ndáńchꞌi̱ katsꞌénda nginí, kó Isaa̱ «Kjo̱a̱xti» ítꞌajaꞌén. 22Jaskan ngi̱chí kjin kijí, kó ki̱a̱ katsꞌénda nginí ingo ndáńchꞌi̱, kó ngiti̱ jmíjín xi askjan ki̱a̱a̱, kó «Kjo̱a̱ndé» ítꞌajaꞌén kui ndáńchꞌií, ngatꞌa̱ bi̱ katsó: «Ngotꞌe̱ ꞌné nga Néná jè katsjáná kjo̱a̱ndé tsi̱ꞌe̱ nga nda ko̱e̱je̱e̱ kui xotaa̱».
23Kósꞌe̱ kijí xtji̱e̱e̱n ngo ngi̱ndie xi jaskan Beersebaa̱ kiꞌmí. 24Kó Néná jatjokjaà kui ni̱xtji̱e̱e̱n, kó bi̱ katsoó: «Án boá xi Nee̱ na̱ꞌmíi̱ Abraa̱n, kó ta̱ngatꞌanii̱ kui nga sa̱ꞌinchikonñeé jí ko̱jo nga sa̱ꞌinkjín an xota̱ tji̱e̱ tse̱, kuíni nga ngata̱ ndakinjín má ji, ngatꞌa̱ an boá xi kosiko̱joo ngayeje ni xi si̱ꞌin ji».
25Kósꞌe̱ Isaa̱ ki̱a̱ katsꞌénda ngo ṉchandikón nínga katsꞌéntsjaà Néná, kó ki̱a̱ katsꞌénda ndiꞌa xi tji̱xi̱ín cho̱ kamáni, sꞌe̱ já mosoo̱ katsꞌénda ingo ndáńchꞌi̱. 26Nga kamábe kui nii̱ Abimelee̱k, jatjoni nangi Ngeraa̱r kó jachókoón Isaa̱ nga kijíchji̱a̱jo kó ti̱ kijíjo̱ Ausaa̱k, ngo nda̱ xi nda yaꞌa ko̱jo Fikoo̱l ngo nda̱ xi ngito̱ko̱o̱ jájuún kamá. 27Kó Isaa̱ bi̱ katsoó kui jaá:
—Ánní nga an ndyi̱foéꞌechonjnúꞌun nga ndajín kiniꞌánjo̱jnúꞌun ngi̱ndiejnú, kó ngaskande ikiyotji̱ngíjnúꞌun.
28Kó bi̱ katsó kui jaá:
—Jè kamáyàjne̱ nga Néná tikónjoo̱ ji, kuíni nga mejénjne̱ nga ngo ni kꞌuíndajo̱jne̱ ji, ta̱nga chjiéngá ngindyi̱ko̱n Néná si̱ꞌán kuí kjo̱a̱ꞌbíndaa̱. 29Ji̱n jmíni̱xtjin kiniꞌánxtíjne̱ ji, ta̱sá ngatsjéni̱xtjin nga nda kiniꞌánjo̱jne̱ ji, kó ngaskande nda tsꞌén kiniꞌánkixotꞌa xingi̱ xikoó tsi amingo̱ máná xingi̱, ngotꞌe̱ ꞌne̱ mejénjne̱ nga ji jmí ni xi ndajín si̱ꞌinje̱jínjne̱, ngatꞌa̱ Néná achichí tjítsꞌénchíkonñeé ji.
30Kósꞌe̱ Isaa̱ katsjaá tsie nichinie, kó kui jaá iskjinie ko̱jo katsꞌe. 31Kó nga jñóyà ngasee̱ nga kamángindyiojón jastjíe̱n Isaa̱ ko̱jo Abimelee̱k, kó ja̱kꞌi̱e̱ ja̱ngaján índajo̱ xkjín nga jmí ni xi ndajínkjiꞌi sa̱ꞌínjo̱, sꞌe̱ jaskan xió katsꞌénkixotꞌa xkjín.
32Ti̱ kuii̱ ni̱xtjin já mosoo̱ Isaa̱ jachókoón nga katsóyaà nga kui ndáńchꞌi̱ xi ndyi̱tsꞌèndaa̱ je kasakoo̱ ndáfoa. 33Kó Isaa̱ «Ni xi ikꞌínda» ítꞌajaꞌén kui ndáńchꞌií, kó ngaskande ngotꞌe̱ kui na̱xi̱ńdaá Beersebaa̱ ꞌmí ngatꞌa̱ «Ndáńchꞌií ni xi ikꞌíndaa̱» tsó kui jaꞌeén.
Bi̱ tsꞌén ixán Esauu̱
34Ngije kamá yichán noó Esauu̱ kisꞌijñajo̱ na̱ Jundii̱t, tsa̱kji̱ín ngo nda̱ xi xota̱ itita̱ xi ꞌmí Beeri̱. Ti̱ ixánjo̱ na̱ Basemaa̱t nga, tsa̱kji̱ín ingo nda̱ xi xota̱ itita̱ xi ꞌmí Eloo̱n. 35Nga jó kui ínchjiín xi achichí kjo̱a̱xti katsjaá Isaa̱ ko̱jo na̱ Rebekaa̱.
Currently Selected:
Jenesii̱s 26: MAIX
Tya elembo
Kabola
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014