GÉNESIS 8
8
1Diostaq Noeta yuyarikurqan, hinallataq tuyuq wasipi paywan kaq lliw animalkunatapas, lliw uywakunatapas. Diosmi kay pachaman wayrachimurqan, hinan unuqa pisiyayta qallarirqan. 2Chinkay-chinkay unu pukyukunataq wisq'akapurqan, hinallataq hanaq pacha phawchikunapas, manañataq parampurqanchu. 3Hinaqtinmi unuqa kay pachapi ch'akiykapusharqan kayman chayman aytikuspa. Pachak phisqa chunkayoq p'unchay qhepata unuqa pisiyaykapurqan, 4hinan tuyuq wasiqa tiyaykurqan Ararat orqo-orqopi, qanchiskaq killaq chunka qanchisniyoq p'unchayninpi. 5Unun pisiyasharqan chunkakaq killakama, chunkakaq killa qallariypi orqokunaq uman rikhurirqan.
6Tawa chunka p'unchay qhepatataq, Noeqa tuyuq wasipi qhawana t'oqo ruwasqanta kicharirqan, 7hinaspan alqamarita kacharqan, chaytaq lloqsispa muyurqan unu kay pachapi ch'akipunankama. 8Hinallataq urpitapas kacharqan kay pachapi unu ch'akipusqañachus chayta yachananpaq, 9urpitaq mana tarirqanchu maypi tiyaykunanta kay pachantinpi unu kashasqanrayku. Chaymi Noeman kutimpurqan tuyuq wasiman, hinaqtinmi payqa hap'ispa kasqan wasiman apaykurqan.
10Hinaspataq qanchis p'unchaytawanraq suyarqan, yapamantataq wasimanta urpita kacharqan. 11Hinan urpiqa payman kutipurqan llanllashaq olivo raphita chhurunanpi achuykusqa. Chaymi Noeqa yacharqan kay pachapi unu ch'akipusqanta. 12Hinaqtinmi huk qanchis p'unchaytawanraq suyarqan, hinaspan urpita kachallarqantaq, manañataq astawan urpiqa payman kutipurqanchu.
13Soqta pachak hukniyoq watayoq Noé kashaqtintaq, ñawpaqkaq killa qallariy p'unchayta, unuqa kay pachapi ch'akipurqan. Hinan Noeqa tuyuq wasi qatata kicharispa qhawarirqan, hinaspan rikurqan kay pachaqa ch'akipusqanta. 14Iskaykaq killaq iskay chunka qanchisniyoq p'unchayninpitaq kay pachaqa ch'akillaña kapurqan. 15Diostaq Noeta nirqan:
16—Tuyuq wasimanta warmiykipiwan lloqsiy, hinallataq churiykikunapas warmintinkama. 17Horqonki llapa t'aqa animalkunata, phalaq animalkunata, uywakunata, pampanta llapa suchuqkunata. Purichunku kay pachantinman, mirachunku askhayachunkutaq, nispa.
18Chaymi Noeqa warmintin lloqsirqan, hinallataq churinkunapas warmintinkama. 19Kaqllataq tuyuq wasimanta lloqsirqan llapa animalkuna, llapa phalaq animalkunapas, pampanta llapa suchuqkunapas t'aqankuman hina. 20Noetaq Señor Diospaq huk altarta perqaspaña, hap'irqan llapa sacrificana animalmanta, llapa sacrificana phalaq animalmanta, hinaspanmi altarpi ruphachispa sacrificiokunata haywarqan. 21Señor Diostaq sumaq q'apayta chaskispan sonqonpi nirqan:
—Manañan runa hawa kay pachata ñakasaqchu, wayna-kayninmantapachan runaq sonqonqa mana allin yuyaykuq, manañan astawan lliw kawsaqta ch'usaqyachisaqchu kunan ruwasqayta hinaqa. 22Chaywanpas kay pacha kanankamaqa kanqaraqmi tarpuypas, cosechapas, chiripas, q'oñipas, poqoypas, chirawpas, p'unchaypas, tutapas, nispa.
Currently Selected:
GÉNESIS 8: QC88
Tya elembo
Share
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo
Biblia en Quechua de Cuzco © Sociedades Bíblicas Unidas, 1988.