Juan 4
4
Jesús Samaria llajtayoj warmiwan parlan
1Fariseokunaqa kayta uyarisqanku: Jesusqa Juanmanta nisqa astawan ashkha yachachisqakunayoj, astawan ashkhatataj bautizan, nispa nejta. 2Manapis Jesuschu bautizasharqa, manachayqa yachachisqankunalla. 3Jesustaj fariseokuna chayta yachasqankuta yachaspa, Judea jap'iymanta llojsispa, yachachisqankunawan khuska Galilea jap'iyman ujtawan rerqa.
4Galileaman rinankupajqa Samaria jap'iynejtapuni rinanku karqa.#4.4 Judea jap'iymanta Galilea jap'iyman rinapaj ñanqa Samaria jap'iynejta cheqan karqa. 5Chayarqankutaj Samariapi kaj Sicar llajtaman, maypichus Jacobqa churin Joseman chayaqeta qosqa, chay qayllaman. 6Chaypitaj Jacobpa yaku pujyun karqa. Jesustaj sayk'usqa kaspa, chay pujyu qayllapi tiyarikorqa, chawpi p'unchay jinaña kashasqanrayku. 7Jinaqa chayman Samaria jap'iypi Sicar llajtayoj uj warmi jamorqa yakuta orqhoj, Jesustaj chay warmita nerqa: Yakuta qoriway, nispa. 8Jesusrí chaypacha sapallan kasharqa, imajtinchus yachachisqankuna llajtaman mikhunata rantej risqanku.
9Chantá warmeqa Jesusta nerqa: Qanqa judío kanki, noqataj Samaria jap'iymanta warmi kani. Jina chayqa, imaraykutaj yakuta mañakushawankiri? nispa. Chayta nerqa, imaraykuchus judiokunaqa Samaria jap'iymanta kajkunawan mana allintachu kawsaj kanku.
10Jinaqa Jesús kutichispa, nerqa: Qanqa Dios imatachus qosuyta munasqanta mana yachankichu, nillataj pichus yakuta mañakusojtapis rejsinkichu. Yachawajchus chayqa, noqamanta yakuta mañakuwankiman, noqataj kawsachej yakuta qoykiman, nispa.
11Chantá chay warmi nerqa: Wiraqochi, mana imapis yakuta orqhonaykipaj tiyapusunkichu, pujyutaj allin ukhu. Maymantataj chay kawsachej yakuta qowankimanri? 12Qanqa ñawpa tatayku Jacobmantapis aswan kuraj kasqaykitachu yuyanki? Paymin kay pujyuta saqewarqayku, mayqenmantachus pay, wawankuna, chantá uywankuna ima ujyarqanku, chayta, nispa.
13Chantá Jesús kuticherqa: Pillapis kay yakumanta ujyajqa watej yaku ch'akiyniyoj kallanqataj. 14Noqaj qosqay yakuta ujyajrí manaña jayk'ajpis ujtawan ch'akichikonqachu. Aswanpis noqaj qosqay yakoqa paypi mana ch'akej pujyu jina kanqa, chay yakutaj payman wiñay kawsayta qonqa, nispa.#Jn 6.35; 7.37-38.
15Warmitaj nerqa: Wiraqochi, chay yakuta qoway ari, amaña yakumanta ch'akichikunaypaj, nitaj ujtawan kay pujyuman yakuta orqhoj jamunaypaj, nispa.
16Chantá Jesús nerqa: Rispa, qosaykita wajyamuy, chantá kutimuy, nispa.
17Warmitaj kuticherqa: Mana qosay kanchu, nispa. Jesustaj nerqa: Allinta ninki: Mana qosay kanchu, nispa, 18imajtinchus phishqa qosayoj karqanki, kunan piwanchus tiyakushanki, chayqa mana qosaykichu. Chaytaqa cheqanta parlanki, nispa.
19Warmitaj chayta uyarispa, nerqa: Wiraqochi, qanqa Diosmanta sut'inchajsina kankeqa. 20Chayrayku noqa tapurikuykiman. Ñawpa tataykukuna kay orqopi Diosta yupaycharqanku. Jina kajtenqa, imaraykutaj qankuna judiokuna ninkichej Jerusalenllapi Diosta yupaychana kasqanta, nispa.
21Chantá Jesús kuticherqa: Warmisita, kayta sut'ita niyki: Qhepanejmanqa mana kay orqopichu, nitaj Jerusalenpichu Tata Diosta yupaychankichej. 22Samaritanokunaqa pitachus yupaychasqaykichejta mana yachankichejchu. Noqaykurí pitachus yupaychasqaykuta yachayku, imaraykuchus Qhespichejqa judiokuna ukhumanta rikhurimonqa.#Is 2.3; Ro 9.4-5. 23Chay p'unchay chayamunan karqa, kunantaj chayamunña: Tata Diosta cheqatapuni yupaychajkunaqa Santo Espíritoj yanapasqan cheqa kajman jina tukuy sonqo yupaychanqanku, imaraykuchus Tata Diosqa ajina yupaychajkunata mask'an. 24Diosqa mana rikukoj espiritumin, payta yupaychajkunataj Santo Espíritoj yanapasqan cheqa kajman jina tukuy sonqo payta yupaychananku tiyan, nispa.
25Warmitaj nerqa: Yachani Cristo nisqa Mesías jamunanta, pay jamuspataj, tukuy imata willawasqayku, nispa.
26Jesustajrí nerqa: Noqa chay Cristo kani, pichus parlashasunki, chay, nispa.
27Jinallapi yachachisqankuna chayamuspa, Jesusta uj warmiwan parlashajta rikorqanku. Chantá t'ukorqanku. Chaywanpis mana pipis taporqachu: Imaraykutaj paywan parlashankiri? Chayrí: Imamantataj chay warmiwan parlasharqankiri? nispa. 28Chay warmirí yaku p'uñunta pachanpi saqerparispa, llajtaman kutirerqa. Chaypitaj llajta masinkunata nerqa: 29Jamuychej, uj runata rejsinaykichejpaj. Payqa tukuy ima ruwasqayta uyaypi nipuwan. Manachu pay Cristo kanman? nispa.
30Chantá chay llajtapi tukuy tiyakojkuna llojsispa, rerqanku, maypichus Jesús kasharqa, chayman. 31Chaykamarí Jesuspa yachachisqankuna payta nerqanku: Yachachej Wiraqochiyku, imallatapis mikhurikuy ari, nispa. 32Jesustajrí kuticherqa: Waj mikhuna tiyapuwan, qankunarí mana yachankichejchu chay mikhuna imachus kasqanta, nispa.
33Chantá yachachisqankuna paykunapura ninakorqanku: Mana kaypi kananchejkama, pichus mikhunata jaywanman karqa, í? nispa.
34Jesustaj paykunata nerqa: Mikhunayqa Kachamuwaj Diospa munasqanta ruwanay, imatachus ruwanantataj tukuychanay. 35Qankuna ninkichej: Tawa killamantaraj chajra oqharina kanqa, nispa. Noqarí niykichej: Qhawariychej, chajraqa oqharinapaj jina poqosqaña. 36Pichus ruthojmanqa sumaj pagota paganku. Oqharisqanku poqoytaj runakuna kanku, pikunachus wiñay kawsayman yaykonqanku, chaykuna. Ajinaqa pichus tarpojwan, chajrata oqharejwan ima khuska kusikonqanku. 37Runa kay jinata nisqanqa cheqapuni junt'akun: Uj tarpun, wajtaj tarpusqanta oqharin, nispa. 38Noqaqa mana tarpusqaykichejta ruthojta kachashaykichej. Wajkuna tarporqanku, qankunataj chay tarpojkunaj poqochisqanta oqharinkichej, nispa.
39Chantá Samaria jap'iypi chay llajtayojkunamanta ashkhapuni Jesuspi atinikorqanku, chay warmej willasqanta uyarispa, imaraykuchus pay nisqa: Pay tukuy ruwasqayta uyaypi nipuwan, nispa. 40Ajinaqa chay runakuna, Jesús maypichus kasharqa, chayman chayaspa, paykunawan qheparikunanta mañarikorqanku. Jesustaj iskay p'unchayta chaypi qhepakorqa. 41Chaypacha Jesuspa parlasqanta uyarispa, astawan ashkha paypi atinikorqanku. 42Warmitataj nerqanku: Kunanqa paypi atinikuyku mana qan willawasqaykuraykullachu. Manachayqa noqayku kikiyku payta uyarispa, yachayku cheqapuni pay tukuy runata qhespichej Cristo kasqanta, nispa.
Jesusqa kamachejpa churinta qhaliyachin
43Jesús chaypi iskay p'unchayta kaytawan, Samaria jap'iymanta llojsispa, Galilea jap'iyman rerqa. 44Manaraj rishaspa, Jesús nisqa Diosmanta sut'inchajqa llajtanpi pisipaj qhawasqa kasqanta.#Mt 13.57; Mc 6.4; Lc 4.24. 45Chaywanpis Galileaman Jesús chayajtin, chay llajtayojkuna jamusqanmanta kusikorqanku. Paykunapis Jerusalenpi Pascua raymiman rillasqankutaj, chaypitaj Jesuspa tukuy ima ruwasqanta rikusqanku.
46Chaymanta Jesús Galileapi Caná llajtaman kutimullarqataj, maypichus yakuta vinoman tukuchisqa, chayman. Chaypachallataj Cafarnaunpi kamachejta yanapaj uj runa kasharqa, paypa wawantaj onqosqa kasharqa. 47Judeamanta Galileaman Jesús jamusqanta yachaspa, payqa Jesuswan tinkukoj jamorqa, mañarikorqataj wasinman rispa wawanta qhaliyachinanta, imaraykuchus wawanqa wañuy patapiña kasharqa. 48Chantá Jesús payta nerqa: Manachus runaj mana jayk'aj rikusqanta, chantá t'ukuna imakunata ima ruwajta rikuwankichej chayqa, qankuna noqapi mana atinikunkichejchu, nispa.
49Jesús chayta nishajtinpis, kamachejta yanapaj runa nillarqapuni: Wiraqochíy, ama jina kaspa, wasiyman rina ari, manaraj waway wañupushajtin, nispa. 50Jesustaj nerqa: Wasiykiman kutipuy. Wawaykeqa mana wañonqachu, kawsanqa, nispa.
Chantá chay runaqa Jesuspa nisqanta jap'ikuspa, riporqa. 51Wasinman chayashajtintaj, kamachinkuna taripaj llojsimuspa, nerqanku: Wawaykeqa kutiripun, nispa. 52Chantá pay kamachinkunata taporqa mayk'ajchus wawan qhaliyapusqanta. Paykunataj nerqanku: Qayna chawpi p'unchaynejta k'aja onqoynin chinkaporqa, nispa. 53Wawaj tatantaj repararqa chay phanita jina Jesús payman nisqanta: Wawaykeqa kawsashan, nispa. Chantá chay runa, wasinpi tukuy kajkunapis Jesuspi atinikorqanku.
54Jesús Judeamanta Galileaman kutimuspa, chay iskay kaj t'ukunata ruwarqa, pipunichus pay kasqanta yachayta qonanpaj.
Currently Selected:
Juan 4: DQDC
Tya elembo
Share
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo
Revisión Biblia Quechua Boliviano © Sociedad Bíblica Boliviana, 2017.