Yela 44
44
Korowii nɔn kpɔe dɛ́ tɔ nɛn nɛɛ wesoŋa
Kora dea bii yel
1N Naa Korowii, ya noa deŋne
ne, ya naawa bol
wejena haa ɛa,
ba bere saŋ la ya be.
2He kpeɡri nee he doŋi harɛre
nɛra, dɛ kpɔ ya naawa
ka so ba harɛ la ta.
He chɔɡ ba, dɛ ɡel ya naawa
wobɛlbwa do wer tɛɛ ba.
3Ba tokobie ne laa
ba yo lɛ harɛ la, kɛɛ
ba ɡbaɡba bokpeɡa ne laa,
he ɡbabir kpeɡri nee,
dɛkalkɛ he baɡ ba nyoa ŋɔ,
he ja ba nɛ, dɛɛ nyin ba.#Mma 4:37
4Henee kooro
ne Korowii maa dɛ tomɛ,
dɛ ɡel he nɛra Israel tena
yo,
dɛɛ pɔ ya dɔma nɛ.
5He kpeɡri taa a che, ya won
pɔ ya dɔma nɛ,
he sɔn taa ya che,
dɛ tiɡri ba nɛ.
6N to kɛɛ n tokobi,
laa ɡela n won pɔ
n dɔma nɛ.
7Henee tɛ yaa kpeɡri,
ya pɔ ya dɔma nɛ,
dɛ ɡel sihiih kpo
nɛra baa hah yaa.
8N Naa Korowii, he nɛɛ
yaa tamane tɔpere bɛlbwa,
yaa kpɛɛre saŋ bɛlbwa
dɛɛ la.
9Kɛ taraken, he vɛh yaa
dɛ ɡel ba pɔ ya nɛ,
haa ya laa tena nɛɛ ja,
dɛɛ la laa kpa.
10He ɡelɔ ya chwa le ya dɔma
sie,
asɛ ba ba kam ya laala,
kɛ laa ta kwa.
11He ɡelɔ ba kpoo yaa kɛŋɔ
peera ken,
dɛ lɔ yaa peɡre harɛre ta.
12He yoɡ yaa tɛ ya dɔma
pɛɛpɛɛ,
he ta komɛlbwa dɔe le a ta.
13He ɡelɔ ya bala nyiŋi yaa dɛɛ
vah,
nɛra baa soɡa bar yaa
dɛ mamɛ yaa.
14Yanee harɛre tena bol waa
dɛɛ yaɡɛ,
ba nyiŋi yaa
dɛɛ viiɡi nyuune.
15Tɔpere bɛlbwaa mɛɛ di sihiih,
sihiih ɡboo n bwa,
16nɛra dɛ chɛɡ mɛ, dɛɛ muɡli n
baah, dɛkalkɛ,
n dɔma cheɡɛ ɡɛ ta,
dɛɛ tɔ ba wel.
17A lole kɛŋɔ anɔ bwa pu yaa,
kɛ dɛ ya ta he waa soɛh,
kɛɛ dɛ chɔɡ ya ne
he fɔo yaa fɔwa la.
18He waa ta lɔ ya bambile ta,
ya ta waa haa do yaa a ta
la vɛɛh,
19kɛ he ɡel yaa tɛ
kpɔɡ bini ola,
biro tenten tɔ ya nɛ.
20Dɛ ya fe vɛh hen Korowii
yaa dɛ tomɛ,
dɛ kaa tomɛ harɛfala ta
voɡa aa,
21he fe nao, dɛkalkɛ,
he jemɛ ya nyu bini
liire aa sɔah bwa.
22He nomanta, ya cheɡɛ
seo nyoa saŋ bɛlbwa,
baa ɛ yaa kɛ peera baa
dɛ la ka kpoora ken.#Rom 8:36
23N Naa Korowii, ir nyu ne,
ɛrɛɛ a do kɛŋɔ he chɔ dom
nɔɔ?
Gɔɔ he te, dɛ bɛ
yaa vɛh kwaraa.
24Ɛrɛɛ he kpɔ sie sɔh yaa nɔɔ?
Bɛ ya dɔma wenaale baa
do yaa a ta la soh.
25Ya cholo chɔ bomboɡ ta,
yaa wola won ir kpa.
26Ir nyu ne, dɛ́ ba cha yaa!
Lɛ yaa he nyina aa wola
jaɡa dɔe la wa.
Currently Selected:
Yela 44: mzw
Tya elembo
Kabola
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo
© 2017, Ghana Institute of Linguistics, Literacy and Bible Translation. In cooperation with Wycliffe Bible Translators, Inc.