Ma̱rkut 13
13
Yesu Tak Á̱zanson tazwa Kyang A̱ga̱de á̱ na Li a̱ni
(Mat 24:1-2; Luk 21:5-6)
1A̱tuk a̱kya nang Yesu nshya̱ di̱ ghwut Mali Nwuat Za̱nang A̱gwaza ka a̱ni; huhwa a̱tyo nyiung mami mman ta̱m nggu na si̱ nyia̱ ma̱ng a̱nggu a̱ni, “A̱tyu tyiet, di ntangka̱i a̱sham a̱ka̱nok nani ma̱ng a̱tsatsak nfang wu di̱ mbat na!”
2Huhwa Yesu nyia̱ ma̱ng a̱nggu a̱ni, “A li a̱cha̱chet a̱ka̱nok nani a? Ma̱ng a̱nia, á̱ na bi̱ri̱m na a̱mgba̱m. Á̱ mbyia̱ a̱fang a̱nyiung nang á̱ na ghwon tazwa a̱ghyang a̱ni bah!”
3Nang Yesu nshya̱ di̱ swan tazwa Tsok Za̱itun ji̱ shya̱ a̱ma̱nyi kukwaat A̱li Nwuat Za̱nang A̱gwaza ka a̱ni; huhwa Bitut, Yakubu, Yoona, mbeang Anda̱rawut, si̱ bai ba̱ si̱ nwuo lyi̱ri̱m gu da̱ a̱beam nyia̱, 4“Zi̱ chat a tak ma̱ng a̱nzi̱t; zang jen ja nang nkyang nani na mbai? A̱wot yihwa bu na yet kyang a̱ga̱de ku yet a̱lama ku na tak jen nang na̱ shim bai a̱ni?”
5A̱jawa Yesu si̱ nwuo shei ma̱ng a̱mba nyia̱, “Nyi ta̱bam, kalak a̱yin a̱ du laai nyin. 6Mat á̱niet ma̱ a̱di̱di̱t na bai da̱ a̱lyoot nung di̱ bwoi a̱ka̱laa, ba̱ kyiak nyia̱ bibya yet ‘Kristi’ a̱ yet a̱tyu A̱gwaza kup gu tyok a̱ni#13:6 Lyuut cha̱chaat: “Ba̱ kyiak nyia̱, ‘Nung gwa.’ ”. A̱wot ba̱ na laai á̱niet ma̱ a̱di̱di̱t. 7Ka̱ nyi fwuong nkhang zwang ma̱ng nkhang a̱ka̱yaat ma̱ a̱di̱di̱t, nyi yok fa̱k a̱sok a̱fa bah. Ku yet ta hwa nkyang nani na bai, a̱wot a̱mgba̱m jen wu a̱ sii bai.
8“Nwap na kwan zwang ma̱ng nwap. A̱wot tyok ku kwan zwang ma̱ng tyok. A̱byin na tyi̱ri̱m da̱ a̱vwuo ma̱ a̱di̱di̱t mi̱ swanta hu. A̱wot á̱ bu nyia̱ a̱cha̱chet nzong da̱ a̱vwuo ma̱ a̱di̱di̱t. Nkyang nani nia na yet a̱son swuo a̱bung ka, ka̱ na bai ma̱nang a̱fa mbyin ni̱ ntsa bwuak a̱byii̱k di̱n jen twei ma̱ng byin a̱ni.
Yesu Tak Á̱zanson nang Á̱ na Ya̱shuk Mman Ta̱m nggu na
9“A̱wot nyin, nyi chok pyipyia̱ nyin. Mat á̱ na tyia̱ nyin mbwak sot a̱cha̱chet a̱yaakwak a̱son A̱yahudawa; a̱wot á̱ tsot nyin mi̱ á̱tutu a̱tung A̱yahudawa ba; á̱ nyia̱ nyin shi̱ri̱ya a̱zaghyi á̱gwam ma̱ng a̱yaagwomna mat shei A̱sham Nkhang nung ka. Huhwa nyi na byia̱ a̱wat nyi shei nkhang nung na a̱zaghyi mba. 10A̱wot ku yet ta hwa á̱ tsa shei A̱sham Nkhang ka da̱ a̱vwuo a̱mgba̱m nnwap mi̱ bibyin swanta na, a̱mgba̱m jen wu a̱ sii bai.
11“Jen nang á̱ na nya̱baat nyin á̱ bai ma̱ng a̱nyin a̱zaghyi á̱niet nyia̱ shi̱ri̱ya a̱ni; nyi yok nwuo a̱di̱dam tazwa kyang nang nyi na hyia̱ a̱ni bah. A̱wot ki̱ jen ji nyia̱ á̱ na nwuak nyin kyang hu nang nyi na hyia̱ a̱ni; mat nyin bya lyiat bah. A̱za̱za̱rak Ntswa A̱gwaza wu wa na lyiat nyin ndyo.
12“A̱na̱nyiuk na la̱p a̱shuk a̱ nwuak a̱na̱nyiuk á̱ hyat. Ma a̱nia wa a̱tyia̱ na nwuak nggwon guu. Mman na meang na ta̱ngam ba̱ tyia̱ á̱ hyaai á̱niet mbyin mba ba. 13Á̱niet ma̱ a̱di̱di̱t na lak li nyin, mat nyi yet á̱niet khwi nung bya#13:13 Lyuut cha̱chaat: “Da̱nian a̱lyoot nung ka.”. A̱wot a̱tyu a̱ gbang a̱lyia̱ a̱ si̱ yong mi̱ chet si̱ nat sangba̱p swuan nggu ji a̱ni; a̱ na shya̱ san.”
A̱shi̱shi̱k Kyang a̱ Tyei A̱na̱ndyung a̱ni
(Mat 24:15-28; Luk 21:20-24)
14“Nyi na li a̱shi̱shi̱k nkyang#13:14 Wa̱i a̱lyiat: Shimba A̱shi̱shi̱k kyang á̱ fa a̱ji a̱ni yet, ghwughwu ku tangka̱i ghwughwu a̱yaagwaza sang swuan nang á̱ sak mami A̱za̱za̱rak A̱swang Mali Nwuat Za̱nang A̱gwaza, ku tyei nka a̱na̱ndyung a̱ni. nang á̱ sak ma̱ a̱za̱za̱rak a̱vwuo, a̱ tyei A̱li Nwuat Za̱nang A̱gwaza ka a̱na̱ndyung; a̱ si̱ tyia̱ á̱ si̱ kam nka á̱ ghwon a̱ni.” (A̱tyu a̱ fang a̱lyiat nani a̱ni, yok gu fi̱k shansham!) “Di̱n jen a̱ja á̱si̱ ba̱ shya̱ mi̱ fam Yahudiya a̱ni, ku yet ta hwa, ba̱ tyong á̱ nat da̱ tsutsok. 15A̱tyu a̱ shya̱ tazwa a̱kup nyuo a̱ni, gu yok mak a̱ chyok a̱ nwuo a̱ kyiak kyang mi̱ nyuo, a̱ sii nkat bah. 16Ma a̱nia wa, a̱tyu a̱ shya̱ ma̱ a̱byin khap a̱ni, gu yok bwuok a̱ nat a̱mali, da̱nian a̱ ka kyiak a̱toot gu sii nkat bah. 17Ku na swan á̱nyiuk a̱ka̱fa ma̱ng á̱nyiuk ba̱ nyia̱ na̱mbwon mman na̱ nwaai di̱n jen a̱ja a̱ni. 18Nyi naai A̱gwaza gu beang chung nyin ji ji̱ yok bai mi̱ njen shyishyim bah.
19“Mat mmam a̱nia, á̱ na nyia̱ a̱gba̱ndang swuo a̱bung tangka̱i hu nang á̱ ka̱n mak swuo a̱ni bah; neet di̱n jen nang A̱gwaza mmat swanta hu a̱ni, ba̱ng ba̱ tat a̱fwun. Da̱ mba, á̱ bu na swuo tangka̱i a̱bung huni bah. 20A̱tsak a̱lyiat, si̱ nang A̱gwaza ghyuai mmam a̱nia, á̱ mbyia̱ a̱tyo nyiung a̱ na shya̱ san a̱ni bah. Mat á̱niet ba nang A̱gwaza khai a̱ni, bibya mbyia̱ gu si̱ nghyuai mmam a̱nia.
21“Di̱n jen a̱ja, ka̱ a̱yin nyia̱ ma̱ng a̱nyin, ‘Nyi li, di A̱gwam Kristi wa wu!’ Ke a̱ bu nyia̱, ‘Nyi li, di nggu wa waau!’ Nyi yok nwuak a̱chuchuk bah. 22Mat á̱niet bwoi a̱ka̱laa ba̱ kyiak nyia̱ ba̱ yet A̱gwam Kristi; ma̱ng á̱niet ba̱ kyiak nyia̱ bibya yet á̱tsak a̱yaata̱m a̱kwonu A̱gwaza, na ghwut kpa̱sai. Ba̱ nyia̱ nkyang a̱ri̱bi̱di ma̱ng a̱ga̱de, ba̱ ka laai á̱niet nang A̱gwaza khai a̱ni, ka̱ ba̱ shya̱ a̱wat ka.
23“A̱wot nyi chok pyipyia̱ nyin! N ka̱n tak ma̱ng a̱nyin kuzang nkyang lap!
Yesu na Bwuok a̱ Bai mi̱ Swanta hu
(Mat 24:29-31; Luk 21:25-28)
24“A̱wot mi̱ njen a̱ja, nang a̱gba̱ndang swuo a̱bung wu ka̱n swaak, á̱ lyuut nyia̱,
‘Mam na nyiip a̱vwuo ka̱ tyia̱ lyin.
Ma a̱nia wa, zwat ji̱ na sai bah.
25Á̱ta̱ngwat na shyot á̱ kwa̱i neet mi̱ kyai tswazwa.
A̱wot a̱mgba̱m a̱cha̱chet nkyang
na̱ shya̱ tswazwa a̱ni,
á̱ na zwun naa.’#13:25 Ish 13:10; 34:4; Jow 2:10.
26“Di̱n jen a̱jaja á̱ na ndi Nggwon A̱tyubishyi ka̱ bwuot a̱ neet a̱ chobai ma̱ á̱ni̱nian ma̱ng a̱gba̱ndang tyok ma̱ng a̱kyenkyai shi.#13:26 Dan 7:13. 27A̱wot a̱ na ta̱m ma̱ng a̱yaata̱m tswá nggu ba, da̱nian ba̱ ka tung á̱niet nang gu khai di̱ nfam naai swanta na a̱ni; neet di̱ sangba̱p swanta ji, si̱ nat sangba̱p tswazwa ji.”
Kidee Tazwa A̱kwon A̱bwabwap
(Mat 24:32-35; Luk 21:29-33)
28“Nyi myiam kyang di̱ kidee a̱kwon a̱bwabwap ji: Jen ji nang nyi ndi mbwak a̱kwon na ta̱kut, a̱wot a̱kyikyo ba si̱ nwuo fuut a̱ni; nyi fi̱k nang a̱kwa̱i ka mbai kpa̱mkpaan. 29Ma a̱nia wa, ka̱ nyi li nang ntangka̱i nkyang a̱ga̱de nani bai, nyi lyen nang bwuok gu hu mbai kpa̱mkpaan, a̱ shya̱ a̱zanunyuo.
30“A̱tsak a̱lyiat, n tak ma̱ng a̱nyin, che#13:30 Wa̱i a̱lyiat: Shimba Che jini fa “A̱junjung njen” ku “Nwap Isi̱rela.” huni na swak bah; si̱ nang a̱mgba̱m nkyang nani bai da̱ a̱nu ka. 31Kyai tswazwa ma̱ng a̱byin na kuut. A̱wot A̱lyiat nung na si̱ mi̱n kwa a̱byin bah!”
Ku Myim Á̱niet Khwi ba̱ Jhyi Swat á̱ Fwuong Chobai Yesu hu
(Mat 24:36-44; Luk 17:26-30,34-36)
32“A̱wot mam a̱hwa ku jen a̱ja; á̱ mbyia̱ a̱tyu a̱ lyen a̱ni bah. Ku a̱yaata̱m tswá A̱gwaza ba ba̱ shya̱ Ma A̱gwaza tswazwa ka a̱ni, mbeang Nggwon A̱gwaza ka, ba̱ lyen bah; si̱ ma̱ A̱tyia̱ wu ma̱nyin gu, nggu wa lyen. 33Nyi ta̱bam! Nyi cham! Mat nyi lyen jen nang n na mbwuok a̱ni bah.
34“Bwuok Nggwon A̱tyubishyi hu na li nang a̱tyu a̱ naat chyet ma̱ gbang a̱ni. A̱ si̱ ghwon a̱li nggu ka. A̱ si̱ tyia̱ nta̱m bwak a̱khwo nggu ba, konyan ma̱ng ta̱m nang gu na nyia̱ a̱ni. A̱wot a̱ si̱ tak ma̱ng a̱tyu a̱ chok a̱na̱nwuai ka a̱ni, nyia̱ gu cham gu yok kai nda bah.
35“Ma a̱nia wa, nyi swan cham! Mat nyi lyen jen ji nang a̱tyoli nyin wu na mbwuok a̱ bai a̱ni bah; ke jenshyung ja oo, ke a̱tyia̱ka̱u a̱tyetuk kya oo; ke mi̱n shong a̱tson hwa oo; ke ma̱ a̱tsotson a̱tson kya oo. 36Ka̱ a̱ bai di̱ mi̱ lyen, nyi yok shim á̱ ba̱ shya̱ nang nyi khan nda bah. 37A̱wot kyang hu nang n gba nyin a̱ni, huhwa n gba konyan: ‘Nyi swan cham bwuok gu hu!’ ”
Currently Selected:
Ma̱rkut 13: TyapNT
Tya elembo
Kabola
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo
© 2015, The Nigeria Bible Translation Trust and Wycliffe Bible Translators, Inc. All rights reserved.