JENESIS 8
8
Kaba kut jong ka jingshlei um
1U Blei um shym la klet ïa u Noah, bad ïa ki mrad baroh kiba ïadon lem bad u ha ka lieng; u la pynlong ïa ka lyer ban beh, bad ka um ka la sdang hiar. 2Ïa ki umpohliew shapoh ka khyndew bad ïa ki khyrdop um jong ka suiñbneng la khang noh. 3U slap u la sangeh, bad ka um ka la nang hiar suki suki ha ki shispah sanphew sngi. 4Te ha ka sngi kaba khathynñiew jong u bnai uba hynñiew, kata ka lieng ka wan neh den halor u lumbah ha ki lynter lum Ararat. 5Kata ka um ruh ka la nang hiar nang hiar, bad ha ka sngi kaba nyngkong jong u bnai uba shiphew, ki kliar lum ki la paw.
6Hadien sawphew sngi u Noah u plie ïa ka jingkhangïit, bad u pyllait ïa ka tyngab. 7Kam shym la wan phai, hynrei ka shu her kylleng kylleng haduh ba ka um kan da rngad. 8Ha kajuh ka por, u Noah u la pyllait ïa ka paro ban tip la kata ka um ka la rngad ne em, hynrei namar ba ka um ka dang tap ïa ka khyndew, kata ka paro kam shym lap jaka ban dem. 9Ka wan phai pat sha ka lieng, bad u Noah u kner ïa la ka kti, bad u rah ïa ka shapoh. 10U la ap sa hynñiew sngi, bad u pyllait biang ïa kata ka paro. 11Ha ka por janmiet, kata ka paro ka wan phai pat sha u, ka da wanrah ha la ka shyntur ïa u sla dieng Olib ba dang shu kheit. Kumta u Noah u tip ba ka um ka la rngad. 12Nangta u ap sa hynñiew sngi, bad u pyllait biang ïa kata ka paro; ha kane ka sien kam shym la wan phai shuh.
13Ha ka sngi kaba nyngkong jong u bnai uba nyngkong mynba u Noah u la dap hynriewspah wei snem, ka um ka la rngad noh na ka khyndew. U Noah u lied noh ïa ka jingtap jong kata ka lieng, u khmih sawdong, bad u ïohi ba ka khyndew ka la nang rkhiang. 14Bad ha ka sngi kaba arphew hynñiew jong u bnai uba ar, ka khyndew ka la rkhiang nadong shadong.
15U Blei u ong ha u Noah, 16“Khie ïamihnoh na kato ka lieng bad la ka tnga, ki khun shynrang jong me lem bad ki tnga jong ki. 17Shim bad me ïa baroh ki sim bad ki mrad, khnang ba ki lah ban ïaroi bad saphriang kylleng ka khyndew.” 18Kumta u Noah lem bad la ka tnga, bad ki khun shynrang jong u bad ki tnga jong ki, ki la ïamih shabar na kata ka lieng. 19Baroh ki mrad bad ki sim ki la ïamihnoh shabar na ka lieng ha la ka kynhun kynhun ka jait jong ki.
U Noah u kñia ainguh ha U Blei
20Te u Noah u tei ïa ka duwan ha U Trai; u shim na kawei kawei ka jait ki mrad bad ki sim ïa kiba la ñiew ba ki long kiba khuid, bad u thang tylli ïa ki kum ka jingkñia ainguh halor kata ka duwan. 21Ka jingiw jong ka jingkñia ainguh ka la pynsngewbha ïa U Trai, bad U la ong ha lade, “Lano lano ruh ngan ym buh ïa ka pyrthei hapoh ka jingtim namar kaei kaba ki briew ki leh; nga tip ba naduh ba ki dang samla, ki jingpyrkhat jong ki, ki long kiba sniew. Lano lano ruh ngan ym pynjot shuh ïa ki jingthaw ba-im baroh, kumba nga la leh ha kane ka sien. 22Katba ka pyrthei ka dang sah, kan don ka aïom bet bad ka aïom ot. Kan don ka jingkhriat bad ka jingshit, ka lyiur bad ka tlang, ka sngi bad ka miet.”
Currently Selected:
JENESIS 8: KHACLBSI
Tya elembo
Share
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo
Khasi CL Bible
Copyright © Bible Society of India, 2016.
Used by permission. All rights reserved worldwide.