Yohani 3
3
U Yesu nu Nikodemu
1Kukabako umulongozi yumo uwa Chiyuda yuyo akaba we Nikodemu, uwa kabukatila aka ba Falisayi. 2Ubusiku bumo akabuka kwa Yesu nukunena nawe ukuti, “Wee Labi, tuzimenye ukuti awe we mumanyisi yuyo atumiwe nu Chala. Ataliko nayumo umuntu yuyo angabomba ivimanyilo vivyo ukubomba nanti u Chala ate nawe.”
3U Yesu akamula akati, “Naloli inkukubuzya ukuti nayumo umuntu yuyo anginjila mu Bumwene ubwa Chala ukusita ukupapiwa sona.”#3.3 sona: Pamo ukufuma kumwanya.
4U Nikodemu akamulalusya akati, “Umuntu usongo angapapiwa buli-buli sona? Naloli atanginjila sona mulwanda ulwa nyina nukupapiwa akabubili.”
5U Yesu akamula akati, “Naloli inkukubuzya ukuti nayumo umuntu yuyo anginjila mu Bumwene ubwa Chala, ukusita ukupapiwa sona kumizi, na ku Muzimu Umuzelu. 6Umuntu akupapiwa ku mubili na bapapi bache, loli akupapiwa ku muzimu nu Muzimu Umuzelu. 7Utakaswighaye pachifukwa chakuti nkukubuzya ukuti ubaghiye pakupapiwa sona. 8Impepo yikuputa kosi kuko yikulonda, ukwivwa bulo ichongo chicho yikupanga, loli utakumanya na kuko yikufuma pamo kuko yikubuka. Momumo zibeleye sona nu muntu wesi yuyo apapiwe nu Muzimu Umuzelu.”
9U Nikodemu akalalusya akati, “Zingaba buli-buli?”
10U Yesu akamula akati, “Awe we mumanyisi umumanyikwe mu Izilayeli, loli utazimenye zinizi? 11Naloli inkukubuzya ukuti aswe tukunena zizyo tuzimenye, tukuzisimikizya zizyo tuzyenizye, loli nayumo umuntu mumwinyu yuyo akulupokela ulusimikizyo lwitu. 12Nanti mutakusubila ivintu ivya muchisu ichapasi vivyo inkubabuzya, po mungasubila buli-buli nanti inkubabuzya ivintu ivya kumwanya? 13Nayumo umuntu yuyo afikiteko kumwanya, loli mwene u Mwana uwa Muntu, yuyo akika kumwanya.
14 #
Ukk. 21.9
“Ngati mumo u Mozesi akayipayikila injoka iya chela pikwi munkolongo mula, umwakuyana bulo wepe u Mwana uwa Muntu abaghiye pakupayikiwa, 15kokuti umuntu wesi yuyo akumusubila abanje nubumi ubwa bwila na bwila. 16Pakuti u Chala akabaghana nkani abantu aba muchisu ichapasi, umwakuti akabapa u Mwana wache mwene na mwene, kokuti umuntu wesi yuyo akumusubila atakafwanje, loli abanje nubumi ubwa bwila na bwila. 17U Chala atakatuma u Mwana wache muchisu ichapasi ukuti abanje mulongi, loli ukuti abanje Mupoki wabo.
18“Umuntu wesi yuyo akumusubila u Mwana atakulongiwa, loli yuyo atakumusubila alongiwa kale pachifukwa chakuti atamusubiye u Mwana mwene na mwene uwa Chala. 19Iyi yo nongwa iya kubalongela: Ulukozyo lwizite muchisu ichapasi, loli abantu bachighanite nkani ichisi ukuchila ulukozyo pakuti imbombo zyabo mbibi. 20Umuntu wesi yuyo akubomba ivintu ivibibi alubengite ulukozyo, po atangiza pabuzelu pakuti atakulonda ukuti imbombo zizyo akubomba zibonekele pabuzelu. 21Loli umuntu wesi yuyo akubomba ubwanaloli akwiza pabuzelu kokuti ulukozyo lungalanjizya pabuzelu ukuti amwivwila u Chala pakubomba zizyo abomba.”
U Yesu nu Yohani
22Pisinda pache u Yesu na bamanyili bache bakabuka muchigaba icha Yudeya, kuko akikalako nabo kwa kabalilo nukozya. 23U Yohani wepe akozyanga mu Ayinoni, papipi nu Salimu pakuti pabuzilo bula pakabapo amizi aminji. Abantu bakabukagha kukwache, po akabozyanga. 24#Mat. 14.3; Mlko. 6.17; Luk. 3.19-20Izi zikabombiwa bo nu Yohani atabikiwe mujele.
25Abamanyili bamo aba Yohani bakanda pakudalinkana nu mu Yuda yumo#3.25 Amasimbo ghamo aghakale ghasimbite ukuti Aba Yuda bamo. panyiho izyakwiswefya. 26Po bakabuka kwa Yohani nukunena nawe ukuti, “Wee Mumanyisi, wamukumbuka umuntu yuyo ukaba nawe kwisila ilinji ilya Yolodani, yuyo ukamunenagha? Ilelo ali pakozya, sona umuntu wesi akubuka kukwache.”
27U Yohani akamula akati, “Ataliko nayumo umuntu yuyo angaba nacho chimo, ukusita u Chala pakumupa. 28#Yoh. 1.20Amwe mwe bakaboni bane ukuti inkanena ukuti, ‘Ane inte ne Kilisitu, loli natumiwa bulo muntazi mumwache.’ 29Yuyo asenda we yuyo we mwenecho uwa mukolo. Loli umumanyani uwa mwenesendwa we yuyo akwimilila papipi nukuteghelezya. Akuhoboka nkani bo akwivwa amazyu agha mwenesendwa. Bunubu nane ihobokite nkani. 30Umwene abanje wapamwanya, loli ane imbanje wapasi.”
Yuyo akufuma kumwanya
31Yuyo akufuma kumwanya wapamwanya ukuchila bosi. Yuyo akufuma muchisu ichapasi uwa muchisu, sona akunena ivya muchisu ichapasi, loli yuyo akufuma kumwanya wapamwanya ukuchila bosi. 32Umwene akuzisimikizya zizyo azyenizye nu kuzyivwa. Loli nayumo umuntu yuyo akulupokela ulusimikizyo lwache. 33Loli umuntu wesi yuyo akulupokela ulusimikizyo lwache akusimikizya ukuti u Chala wanaloli. 34Pakuti yuyo u Chala amutumite akunena amazyu agha Chala, pachifukwa chakuti u Chala akumupa u Muzimu Umuzelu ukusita ukumamilizya. 35#Mat. 11.27; Luk. 10.22Uwise amughanite u Mwana sona abikite ivintu vyosi munyobe zyache. 36Umuntu wesi yuyo akumusubila u Mwana ali nubumi ubwa bwila na bwila, sona wesi yuyo atakumusubila u Mwana atakwiza pakuba nubumi, loli u Chala akwiza pakumufunda.
Currently Selected:
Yohani 3: LMBNT2016
Tya elembo
Share
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo
The copyright is jointly and equally held by:
©️ The Bible Society of Malawi, 2014
©️ The Word for the World International, 2014
Yekola Koleka na Ntina ya Ulufingo Ulupya