METHU 7
7
Mi Mika Haliiniiñ
(Lk 6.37,38,41,42)
1 #
Lk 6.37-38; Mk 4.24; Rom 2.1; 14.10. Halii yo, niimpalukoda nunu mitrḛ halii kemake. 2Niihtañpa nunu ayakacho katii hiitañ pa nunu mitrḛ halii kendoke, ho niimkane pa nunu khiiliitii hiimkane pa nunu mitrḛ khiilii kendoke. 3#Lk 6.41-42. Niimpa nunu nunuka anubarmii ka amee hoka hiiri amii pere giiniiñ miya kahado, atoh amee hoka sampo kane giiniiñ miya hempa siimapa? 4Malo niihtañpa nunu nunuka anubarmii mi lula kendo, Niika amee daka hiirimi lapa toso, niika amee hoya sampo kane pohe giido la? 5Nunu apukahi, kapyopa nunuka amee daka sampo miya lapa siito rañ, hoke nunu didḛrpa kappa lakiñ donii niika anubarmii ka amee daka hiirimi.
6Niihna darii donii hiimi akie atañmi biyo; ho nunuka tassañ mi alyee mi kubiyo, hiilamiikoda mohlu mohluka alih nyota lala ho niimi asiipa miikiñ doke.
Kuto, Meto, Padiñ to
(Lk 11.9-13)
7 #
Lk 11.9-13; Mk 11.24; Jn 15.7; 16.23-24; Jem 4.3; 1 Jn 3.22; 5.14. Kuto, ho nunumi bikiñ doke; meto, ho nunu mepa kendoke, padiñto, ho alyeh miiko bikiñ doke. 8Niimpalukoda kone abi kunii atañ lanya biida, ho huna menya donii mepa nyadu, ho hutiina padiñ nyadonii, hiipa miiko bikiñdo. 9Malo nunu niihtañ miyupe, niika wiinga matiirḛ yatañ kudo koda, mohmi yalañ bikiñ dopeha? 10Malo mo matiirḛ ngiiyyi kudo koda, mohmi tabu bikiñ dopeha? 11Nunuya, diimmah siido tiirḛ, chindo niihtañ aya ahmiñayiñ na bikiñ donii nunuka wiinga atañmi, niimkane kayeya nunuka Aba dariiganda hoka duniibo bikiñdo huna mohmi kuchinii! 12#Lk 6.31. Niihtañpa no mihmi niipa miibi kencho hiila hendo, hiitañpa no mohlupa miibito; niimpalukoda siika sike dapo la nyibuhenii atañ.
Hagya Ponchu
(Lk 13.24)
13 #
Lk 13.23-24; Jn 14.6; 10.7. Hagya ponchu hopa ahto; niimpalukoda hagya poro ho lembo hii impyodo, hii byasako dalyi hoke ingiidonii, ho hiiko hopa hempḛr abuje ahnya da. 14Hagya ponchu siido ho lembo iru siido, hii sango dalyi hoke ingii donii, ho hiimi lamasii kapa siidonii.
Sannii la Hiika Ahee
(Lk 6.43,44)
15 #
Mt 24.11,24; 1 Jn 4.1; Jn 10.12. Hendi nyatolya gollumisu nyibuhenii atañ kokii, nunuko subuñ ammu hokii giitola ahkiñdo hojalo ahha ura hii siipya ke. 16#Lk 6.43-44; Mt 12.33-35; Mt 3.10; Jem 3.12; Lk 13.7. Nunu mohlumi mohluka ahee loke kala kendonii. Roahee si tareapya ho giidu peha, malo tarro ahee si piita sannii hokii peha? 17Hopa, kapane aya sannii hii aya ahee hidu, hojalo ayamanii sannii hii ayamanii ahee hidu. 18Aya sannii hii ayamanii ahee hila kemma, hii chulipa ayamanii sannii hiitiirḛ aya ahee hila kemma. 19#Mt 3.10; Lk 3.9. Sannii buhe abi niihna aya ahee hima nii hiimi palo lala la yamuho jopa liikiñdo. 20#Mt 12.33. Si chulipa nunu mohlumi kala kendoke mohluka ahee-amḛrlo.
Ngo Pema Niimi Kachiñ Ma
(Lk 13.25-27)
21 #
Lk 6.46. Kone abi hutiina ngiimi ludonii, Atoh, Atoh, hii dariiganda ka raddeganda ho ahla kemma, hojalo huna dariiganda daka Aba ka henko jaho miidonii hii kontiisii ahla kensu donii. 22#Lk 13.26-27; Mt 25.12. Hiika allo ho abuje ngiimi lukiñ do, Atoh, Atoh, ngunu niika armyañ pa nyibuhema toha, ho niika armyañ lo igii mompa matoha, ho abuje tamo-chikho miigo miima toha niika armyañ pa? 23Ho Ngo mohlumi luchi, Ngo nunumi iche tiirḛ kachiñ make; ngiiko hokii insa nyato, nunu ayamanii miinii atañ.
Ude Penii Anye
(Lk 6.47-49)
24 #
Lk 6.47-49; Jem 1.22-25. Hutiina ngiika luniiñmi tapa lala ho hii chulipa miidonii hiike hendinii miyu huna atoh ude mi yalañ hoka pembii donii hiilyañ; 25ho miido hutii, yasie tuha siitii, ho allyi heha la hiika ude mi heda siitii, hojalo hii tehyi ma, niimpalukoda hii yalañ ayoh ho pentii.
26Ho hutiina ngiika aguñmi tapa lala ho hii chulipa miinya manii hii piicha miyu chulido huna atoh ude mi suru ho pembii donii; 27ho miido hukele, ho yasie tuha kiile, ho allyi hekele ude ho hedatii, ho hii tehyi datii; ho hiika tehyi nii hii hempḛr urotii.
Jisu ka Otority
28 #
Mk 1.22; Lk 4.32; Mt 11.1; 13.53; 19.1; 26.1. Ho Jisu siika kolobiisie niimi luja kukele, miyuatañ mohka tonsḛr niimi aluñ nyatii, 29niimpalukoda mo mohlumi tonsḛrtii hukohona otority giidonii chulipa, ho mohluka pagenii atañ chulima.
Currently Selected:
METHU 7: APATBSI
Tya elembo
Share
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo
Apatani New Testament - NITI GONTU
Copyright © The Bible Society of India, 2014.
Used by permission. All rights reserved worldwide.