Jenesis 6
6
Dalleth an Nefilim
1Pan dhallathas mab-den kressya war enep an dor, hag y feu myrghes dineythys dhedha, 2mebyon Duw a welas myrghes mab-den ha'ga bos teg, hag i a gemmeras dhedha aga honan gwragedh a vyns anedha a dhewissons. 3Hag yn-medh an Arloedh, ‘Ny drig#6:3 drig: Ow siwya an Septuagint ha'n Vulgat. ow spyrys vy pup-prys gans mab-den, rag kig yw ev, ha'y dhydhyow a vydh hwegh-ugens blydhen.’
4Yth esa an Nefilim#6:4 an Nefilim: Po war-lergh an Septuagint kewri. y'n nor y'n dydhyow na, hag a'y wosa keffrys, pan dheuth mebyon Duw dhe vyrghes mab-den; hag i a dhineythis fleghes dhedha. Tus alloesek ens i a dermyn koth, tus a vri.
Gwarnyans a'n Liv
5Ha'n Arloedh a welas bos droktra mab-den bras war an nor ha nag o pub mynnas a dybyansow y golonn marnas drog pub dydh oll. 6Ha'n Arloedh a repentyas ev dhe wul mab-den war an nor, ha grevys veu yn y golonn.
7Hag yn-medh an Arloedh, ‘My a vynn diswul dhiworth enep an dor an den a wrug vy y formya: den ha best ha pryv hag ydhyn an ayr, rag edrek a'm beus y hwrug vy aga gul.’ 8Mes Noy a gavas gras yn golok an Arloedh.
9An re ma yw henedhow Noy. Noy o gour gwiryon ha perfydh yn y dermyn hag yth esa Noy ow kerdhes gans Duw. 10Ha Noy a dhineythis tri mab, Shem, Ham ha Yafeth.
11An nor ynwedh o legrys a-rag Duw, ha lenwys o an nor a arowder. 12Ha Duw a welas an nor hag awotta, legrys ova, rag pub kig re wrussa legri y fordh war an nor. 13Hag yn-medh Duw dhe Noy, ‘Yma diwedh dhe bub kig devedhys a-ragov, rag lenwys dredha gans garowder yw an nor, hag awotta, my a vynn aga distrui gans an nor.
Gorhel Noy
14‘Gwra dhis gorhel#6:14 gorhel: Ebrow argh. a brenn gofer. Ty a wra roumys y'n gorhel ha'y ura stanch a-ves hag a-ji gans pyg. 15Yndella ty a'n gwra. Hys an gorhel a vydh trihans kevelin, ha'y les hanter-kans kevelin, ha'y ughelder deg kevelin warn ugens. 16Ty a wra fenester#6:16 fenester: Po to. Styr an ger ebrow yw ankler. Cf. 8:6. dhe'n gorhel, ha bys yn unn kevelin ty a'n kowlwra a-wartha, ha gorra daras an gorhel y'n tenewen anodho; gans flouryow isella, nessa ha tressa ty a'n gwra. 17Hag awotta, yth esov vy ow honan ow tri liv dowrow war an nor dhe dhistrui pub kig hag ynno anall bewnans yn-dann nev. Pup-tra eus war an nor a wra merwel. 18Mes genes jy my a wra fastya ow hevambos; ha ty a wra dos a-bervedh y'n gorhel, ty ha'th vebyon ha'th wreg ha gwragedh dha vebyon genes jy. 19Hag a bub kreatur bew, a bub kig oll, ty a wra dri dew a bub sort anedha a-bervedh y'n gorhel dh'aga gwitha yn few genes jy. I a vydh gorow ha benow. 20A'n ydhyn war-lergh aga hinda, hag a'n chatel war-lergh aga hinda, pub pryv a'n dor war-lergh y ginda, dew a bub sort anedha a wra dos dhis dh'aga gwitha yn few. 21Ha kemmer dhis neppyth a bub eghenn a voes a vo dybrys, ha ty a wra y guntell dhis; hag y fydh boes ragos jy ha ragdha i.’ 22Ytho Noy a wrug war-lergh pup-tra a erghis Duw dhodho; yndella y hwrug ev.
Currently Selected:
Jenesis 6: ABK
Tya elembo
Share
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo
© Kesva an Taves Kernewek 2004, 2024
© Cornish Language Board 2004, 2024