LUK 18
18
Chomitpü ko Yukhabong Yukitacho
1Hütsüpü Jisu-nü amonoti te lede sumüzahpü dangkhidangnangnung nengdang yukita khüdu yocho. 2“Yangdi khüdula Tsingrangba müdrürü ko nyitsarü mükhimüngurü yukharü khüdu licho. 3Ko hütsüba yangdila tsü chomilarü khüdu licho, ko abükyünü abi yang rodu ro yocho, ‘I rorüh nyüm yu khajüng!’ 4Abinü anyahli dhsonglicho, ta achangkala abinü alüm la yocho, ‘Ihnü Tsingrangba müdrünye ko nyitsarü mükhimüngunye, 5Chomitpü hinü Ih longmüzirareko, Ihnü abükyü langjü khajünung; mahkhang abükyünü ro du ronung ko achangkala Ih müthohpehnung!’”
6Ko Abüdongba-nü yocho, “Yujemücho yukhaba tsünü tu yochonang nyidhing. 7Tsingrangba-nü apu nyitsarü sürünü abi te ama tsingse arüku nengdang züdero arüh khüm yu mükhanung ang? Arüh tronung abinü münunung ang? 8Ihnü nührü te yore, Abinü arüh khüm zah khajünung. Ta Nyitsarü Tsurü tsünü abi rode limih la yudsirü ngunung mah-o?”
Farisirü ko Alihmüthsü Dhrirü Yukitacho
9Nyitsarü sürünü arühbürü amüsaepü lüm aparü müchühmükehcho arüh te Jisu-nü yukita hi yocho. 10“Shikhe khüdu nyüh anyüh dangkhidangnangnung amübükuh la züducho; khüdu Farisirü ko akhüu tsü alihmüthsü dhrirü thsacho.
11“Farisiba tsünü pathsa yapü dangkhidangnangcho, ‘Tsingrangba, Ih aparü roh-i müxümüngu, yuje mücho, nahtrahnaxeng mahkhang alihmüthsü dhribong hivi mükyocho nengdang Ihnü nüh sere. 12Ihnü nyükhih la nyümong anyüh kongre, ko Ihnü nguchoba lüpcho lanü nü khyang dhüre nohlüm jüre.’
13“Ta alihmüthsü dhribong tsü ashula yapü aromih mii ninglang mütsungmüsupü adrengla hamchi yocho, ‘Tsingrangba, Ih amünyiba nyitsarü te müing!’ 14Jisu-nü yocho, Ihnü nührü te yore, Farisiba tsü mah ta alihmüthsü dhribong tsü Tsingrangba jingte alanglang ngupü akuhlang wücho. Tunüo sünü abürü jangjang diro abi azikyah kangnung, ta sünü abürü jangjang azikyah kangro abi disohnung.”#Mat 23.12; Luk 14.11
Jisu-nü Azarüti Müwajücho
(Mat 19.13-15; Mrk 10.13-16)
15Nyitsarü khürünü Jisu yang akhungarü abi khehnü arüh chah thahpüsohnung norocho, ta hütsü ngude monotinü arüh yübücho. 16Ta Jisu-nü azarüti tsü abi yang dsinü yocho, “Azarüti tsü I yanglang rosohng, arüh tüiti, tunüo ninglang yanglih tsü hitari yo thsanung. 17Hi lümchehng! Sünü Tsingrangba yanglih tsü azarü khüdu roh-i mükhyüchonang hütsüla khodesü müzüdunung.”
Alibong
(Mat 19.16-30; Mrk 10.17-31)
18Jihudarü langnürü khüdunü Jisu te tsingdhingcho, “Athsingyurü Atsa, müchangkaba akang ngunung Ihnü tu nguchinung?”
19Jisu-nü abi te yocho, “Tuepü Ite atsa dsiro? Tsingrangba chah khu süsü atsa mühle. 20Nühnü yuzengti müdhele: ‘Nahtrahnaxeng tüthsa; tümüpseh; tüfü; arahkheh la süsü tümülangjü; nü tpa ko nüu jengreng drüng.’ ”#Nüch 20.12-16; Azk 5.16-20
21Nyitsarüba tsünü lalingcho, “Hiri yuzeng I zadenü bichiko.”
22Khode Jisu-nü hütsü yuchicho, abinü abi te yocho, “Nüh adesü lango nguchinung lile. Nü licho apüm ieng ko thsi tsü ailümrü khyang jüng, ko ninglang nü kuthsi linung; hütsüpü rung ko Ih iirung.” 23Khode abinü hi yuchicho, abi longyüpehcho, tunüo abi dee alirü thsacho.
24Jisu-nü abi longyücho ngu yocho, “Alirü nengdang Tsingrangba yanglih la züdunung khüta athsah! 25Tbang khi la ut bücheh tsinung thsahcho tenü alirünü Tsingrangba yanglih la züdunung deenü athsah-u thsanung.”
26Hütsü yuchirütinü yocho, “Khang, sü du khümchonung?”
27Jisu-nü lalingcho, “Nyitsarü nengdang tu amükohnung hütsü Tsingrangba nengdang akohnung.”
28Hütsüde Peter-nü yocho, “Dhing! Ihrünü ihrü kuh pehjüpü nüh iirochoe.”
29Jisu-nü arüh te yocho, “Yutsatsa Ihnü nührü te yonung, sünü Tsingrangba yanglih khyanglangnü kuh mahkhang anitpü mahkhang jünirü mahkhang tpurü mahkhang tsuzarüti pehjünang, 30arühnü hiba shangla dee alaa ngunung ko aronung shangla müchangkaba akang ngunung.”
Jisu-nü Apu Sünung Nengdang Asangpiu Chore
(Mat 20.17-19; Mrk 10.32-34)
31Jisu-nü mono dhüreanyüh tsü nükhu arüh te yocho, “Nyieng! Ihsa Jerusalem lang würe, hütsüla Nyitsarü Tsurü nengdang azikehrünü thrahcho apüm tikehnung. 32Abi yangpirü kheh la khakhuchüjünung; arühnü abi münyüjünung, müthsamünyünung ko abi chah müchokehjünung. 33Arühnü abi xüpnung ko müpsehnung, ta nyümong asang lipü abi kangli ronung.”
34Ta monotinü hiri tusü münyichehcho; Yu adüzü tsü arüh tenü rangpo licho, ko Jisu-nü tu chorünang arühnü mümüdhecho.
Nahtohrü Khüdu Kyangjücho
(Mat 20.29-34; Mrk 10.46-52)
35Jisu Jeriko amünyethsa rode, nahtohrü khüdu langthsilang pümpü chingkichingnang pümcho. 36Sühdi tsü lahkhu tsicho yuchinü abinü tsingdhingcho, “Hi tuo?”
37Arühnü abi te yocho, “Nazaret-rü Jisu lahkhu tsiyale.”
38Abinü züdecho, “David tsurü Jisu! Ite chomang!”
39Bekhulangrünü abi te tübolo pü yübücho. Ta abinü alaa du züdecho, “David tsurü! Ite chomang!”
40Hütsüde Jisu-nü nyehli anatohba tsü abi yang norung pü yuzengjücho. Khode abi amünyethsa rocho, Jisu-nü abi te tsingdhingcho, 41“Ihnü nü nengdang tu nguchisohnyüro?”
Abinü lalingcho, “Abüdongba, Ihnü ngunyüre.”
42Jisu-nü abi te yocho, “Ngung, nü yudsinü nüh kyangjüko.”
43Hütsüdenü abinü ngunung kohcho, ko Tsingrangba nengse Jisu khanglang iiwücho. Khode sühdi tsünü hütsü ngucho, arüh atümungnü Tsingrangba neng secho.
Currently Selected:
LUK 18: SANGBSI
Tya elembo
Share
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo
Sangtam Naga (Re-edited) Bible - AMÜSA BAIBEL
Copyright © 1995 by The Bible Society of India
Used by permission. All rights reserved worldwide.