LIPOH 42
42
Josef Amungrü Ijip lang Fürü Lihnung Wücho
1Khode Jakob-nü Ijip la fürü lilepü yuchicho, abinü atsurüti te yocho, “Nührülü lango nguching. 2#R. Ngu 7.12Ijip la fürü lilepü yuchire; Ihsa akongchonü müsünung jowü hütsülangnü fürü lii hirung.” 3Achotsü Josef amungrü dhüre tsü Ijip lang fürü lihnung jowücho, 4ta Jakob-nü Josef anikhung Benjaminlü dhsürü mütohnü mütsaekopü müwüsohcho.
5Hütsüta bürü yola Jakob tsurüti fürü lihnung wücho, tunüo Kanan la yangkong licho. 6Ijip yanglih la Josef tsü governor thsa, abinü limih apüm langnü rorüh khyang fürü icho. Ko Josef amungrü rocho ko abi jingte alih la arüh romih hüpkeh mükhukehcho. 7Khode Josef-nü amungrü ngucho, abinü arüh dhingchehcho, ta abinü arüh mümüdherü roh-i ngusohcho. Abinü arüh te kakonü tsingdhingcho, “Nührü khüdenü rocho?”
Arühnü lalingcho, “Ihrü Kanan lanü fürü lihnung rochoe.”
8Josef-nü arüh dhingchehnye, arühnülü abi müdhingchehcho. 9#Lip 37.5-10Abinü arüh nengdang abi melang lümcheh yocho, “Nührü füzathsarüe; ihrü yanglih chehdhingnung rochobae.”
10Arühnü yocho, “Adirü, mah! Ihrü nü yurü roh-i fürü lihnung rocho lile. 11Ihrü hi amung-ani due. Ihrü füzathsarü mah, adirü, ihrü yuje chorü nyitsarüti lile.”
12Josef-nü arüh te yocho, “Mah! Nührü hi ihrü yanglih chehdhingnung rochobae.”
13Arühnü yocho, “Kanan lih la au khüdu chahnü ihrü jünirü atümungnü dhüreanyüh thsacho. Ihrü nirü khüdu süko achangba tsü ade uwa te lile.”
14Josef-nü lalingcho, “Hütsü Ihnü yoba tsü mado! Nührü hi füzathsarüe. 15Ko Ihnü nührü hita thsadsünung: Nührü ani achangba tsü hila münorode nührü khodesü mütsisohnung pü Ihnü yangthsaba nengla yuchümre. 16Nührü yola nyüh khüdu wüng ko abi norung. Ko anyingcho tsü nührünü yoba tsü yuje a mahnang mütsüpde arangyoh la linung. Hütsü yuje müthsakhang, Ihnü yangthsaba nengla yore, nührü füzathsarütie.” 17Hütsüta abinü arüh nyümong asang arangyoh la yohpücho.
18Asangu nyümongla Josef-nü arüh te yocho, “Ih Tsingrangba drürü nyitsarü khüdue, hütsüeko nührünü hi nguchikhang Ihnü nührü müthehnung. 19Nührü yuje nyitsarüepü müdhenung shulüm nührü yola nyüh khüdu arangyoh la lieng; ko anyingcho kongseh liba kukhirüti nengdang fürü tsü hiwüng. 20Ko nührü ani achangba tsü I yanglang norung. Hütsü khu nührü tsü yuje-epü yuzi jünung ko Ihnü nührü müsüsohnung.”
21Arühnü hütsü nyengchocho, ko khüdunü khüdu te yocho, “Ho, Ihsanü Ihsa nirü te tu nguchicho hütsü amii chünye Ihsa chongchare; abi chongcha amülahla lide abi troungpü kihchicho Ihsanü mütro. Hütsü khu chünye Ihsa chongchare.”
22 #
Lip 37.21-22
Reuben-nü yocho, “Azaba tsü tüthsakehjü pü Ihnü nührü te yochoe, ta nührünü mühnyi. Hütsünü abi süchongang ade Ihsa khyang thali jüre.” 23Arühnü chotaba tsü Josef-nü nyichehcho, ta hütsü arühnü mümüdhe, tunüo arühnü abi te yu thsamülarü khu chotacho. 24Hütsüde Josef-nü arüh pehjü wü tramüsucho. Ko khode abinü thali chotanung tsacho, abi thali rocho ko Simeon throcheh arüh betenü rahsohcho.
Josef Amungrü Kanan lang Thalicho
25Hütsüpü Josef-nü amungrü bha thsajünung, ko arüh thsi tsü thali arüh bha la yohjünung, ko lang nengdang tsangtüm rungnümjünung yuzengjücho, ko hütsüta nguchicho. 26Hütsüpü arühnü palu gadu chah bhathsacho ko shemüsu tsicho. 27Ko hütsü romang arüh langla nyehkehcho, ko arüh yola nyüh khüdunü abi gadu yangtüpnung abha lehchehde, apu thsi tsü zeh ngucho. 28Abinü amung-aniti dsinü yocho, “I khyanglü I thsi thali yohjüko! I bha la hi zehle.” Arüh müci kyüchopehcho, ko drüsehnü khüdunü khüdu te yocho, “Tsingrangba-nü Ihsa te hi tu nguchicho?”
29Khode arühnü ro Kanan la au chihcho, atikehcho apüm tsü arühnü abi te yocho: 30“Ijip la governor-nü ihrü te dee kakonü chota ihrü arüh lih chehdhingnung rochoepü mülangjüko. 31‘Ta ihrünü ihrü füzathsarü mah’ ihrü yuje nyitsarüepü yoko. 32Au khüdu chahnü ihrü jünirü dhüreanyüh thsacho. Khüdu süko, ko achangba tsü Kanan la uwa te lilepü yoko. 33Hütsüde abinü yocho, ‘Nührünü yoba tsü yuje a mahnang hita nguchi thsadsünung: Nührü yola nyüh khüdu Ite linung; ko anyingchoti fürü hipü thali tsieng. 34Ko nührü nirü achangba tsü I yanglang norung. Hütsüpü du ajüje nührü füzathsarü mah pü Ihnü müdhenung; ko nührü amung nührü khyang thali jünung, ko nührünü hila shithsabhüleh linung.’”
35Hütsüpü arühnü arüh bha zangdhingde, arüh atümungnü arüh thsi zeh ngucho; ko hütsü ngu arüh ko arüh au Jakob mücipehcho. 36Arüh aunü arüh te yocho, “Nührünü I tsurü atümung changsohnyürü mah-o? Josef mühle; Simeon mühle; ko ade nührünü Benjamin hitsinyüre. Hi Ih du khingchire.”
37Reuben-nü au te yocho, “Ihnü Benjamin thali münorokhang, I tsurü anyüh tsü nühnü müpsehpehng. Abi I chah nyümkehjüng; Ihnü abi thali noronung.”
38Ta Jakob-nü yocho, “I tsudhre nührü te müwünung; amung sopehko, ko abi du nying lile. Langla abi chah lango tikehnung kohle. Ih ashirüe, ko alongrichonü Ih sünung.”
Currently Selected:
LIPOH 42: SANGBSI
Tya elembo
Kabola
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo
Sangtam Naga (Re-edited) Bible - AMÜSA BAIBEL
Copyright © 1995 by The Bible Society of India
Used by permission. All rights reserved worldwide.