LIPOH 40
40
Melang Müchehcho
1Azachah lipü Ijip yangthsaba yongkha shing biba ko abi hümdhse külüprü ayingba nyühnü, arüh yangthsaba nyüm mehshücho. 2Abinü abi dikehrü hinyi te zichürocho 3ko anyüh tsü anyahrü aziba kuh la Josef yohpübala rangyohcho. 4Arüh arangyoh la tsü anyahli licho ko anüchibanü Josef tsü arüh dikehsohcho.
5Romang khüdu arangyoh la tsü yongkha shing biba ko hümdhse külüprü ayingba anyüdingnü melang khüdu-khüdu melangcho, ko melang tsü adüzü papa licho. 6Khode nyangnyü khüu Josef anyüh yang rocho, abinü anyüh mükünyang ngucho. 7Abinü anyüh te tsingdhingcho, “Tuepü nühjü chünye hitoh-i mükünyang nguro?”
8Anyünü lalingcho, “Ihjüdingnü melang khüdu-khüdu melangko, ko melang adüzü müchehnung hila süsü mühle.”
Josef-nü yocho, “Melang müchehchehba tsü Tsingrangba-nü jüre. Ite nühjü melang tsü young.”
9Achotsü yongkha shing bibanü yocho, “I melang I bete shükusishü khüdu 10ajengza asang kehpü nguko. Hütsü ava thümlangyeng api picho ko shükusih tsü nyicho. 11Ihnü yangthsaba shing biyacho; hütsünü Ihnü shükusih tsü laachonü shingla tsü yümyohcho ko abi khyang jücho.”
12Josef-nü yocho, “Hütsü adüzü hiroh-i linung: Ajengza asang adüzü nyümong asang. 13Nyümong asang kahla yangthsabanü nüh müthehnung ko nü mülang pehjüpü nüpu nguchi thali jünung. Akhudi nüh abi shing birü thsade kyo nühnü abi shing binung. 14Ta khode nüh lüpcho tsapenang Ih lümchehng, ko yanglilüm yangthsaba te I nengdangsü yojüng ko hiba arangyoh lanü Ih nüchehnung müipü Ih troung. 15Ibrirü lih lanü Ih rangropü ko Ijip hila Ih arangyoh kuh la yohpünungthsa Ihnü tusü münguchi.”
16Khode hümdhse külüprü ayingba tsünü yongkha shing biba melang müchehba tsü tsa ngucho, abinü Josef te yocho, “Ihnüsü melang khüdu melangko; Ihnü I thah chah hümdhse loh asang dhipü yacho. 17Amungthriba lohla tsü hümdhse alang papa yangthsaba khyang zehcho, ta I thah chah lohla tsünü hümdhse tsü uzatinü tsucho.”
18Josef-nü yocho, “Hütsü adüzü hi: Loh asang adüzü nyümong asang. 19Nyümong asang kahla yangthsabanü nüh müthehnung, ko nü ku dengnung! Hütsüpü abinü nü fü singchah tbengnung, ko uzatinü nü shuh tsunung.”
20Nyümong asang khanglang abi suro nyümongla yangthsabanü abi pohki adirüti atümung khyang thsüti jücho; abinü abi yongkha shing biba ko hümdhse külüprü ayingba anyüding lehcheh abi thsazirü bete norocho. 21Abinü abi yongkha shing biba thali apu nguchi jücho, ko abinü Farao khyang ashing jücho, 22ta hümdhse külüprü ayingba tsü aku dengcho. Hi apüm Josef-nü yocho roh-i du tikehcho. 23Ta yongkha shing bibanü khodesü Josef nengdang mülümdhingcho ko abi nengdang nbüchüpehcho.
Currently Selected:
LIPOH 40: SANGBSI
Tya elembo
Kabola
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo
Sangtam Naga (Re-edited) Bible - AMÜSA BAIBEL
Copyright © 1995 by The Bible Society of India
Used by permission. All rights reserved worldwide.