LIPOH 38
38
Juda ko Tamar
1Hütsütade, Juda-nü ajünirüti pehjüpü jowünü Adullam yangdila nyüh khüdu anengnü Hira te licho. 2Hütsüla Juda-nü Kanan-larü khüdu anengnü Shua shirücho. 3Abinü abükyü khyücho ko abükyünü azarü khüdu nümüsucho ko abi neng Er dsicho. 4Adesü abükyü fü müdeng kangcho ko azarü khüdu nümüsucho ko aneng Onan dsicho. 5Adesü abükyünü azarü khüdu nümüsucho ko aneng Shela dsicho. Azaba surode tsü Juda Akzib la licho.
6Juda-nü atsurü aukhuba Er khyang anitpü anengnü Tamar khyüjücho. 7Ta Abüdongba jingte Er akang saying tsa mülicho, hütsünü Abüdongba-nü abi süsohcho. 8Achotsü Juda-nü Er ani Onan te yocho, “Wüng ko nü mung nitpü te mükhong. Nü mung chahnü majüh linungthsa nü mung nirü roh-i abükyü te nguching.” 9Ta Onan-nü tsuzarü tsü abi yo müthsanungepü müdhe, khodederü abükyü te mükhongnang amung nengdang azarü mülisohnung shulüm, abaji tsü abinü alih la shopehsohcho. 10Ta abinü nguchiba tsünü Abüdongba mükünyangsohcho, hütsünü Abüdongba-nü abisü süsohcho. 11Hütsüpü Juda-nü atsunyahlatpü Tamar te yocho, “Nüurü kulang thali wüng ko I tsurü Shela mülümjingde chomih lieng.” Amungrüti kyo Shela-sü süsohkhang mütsapü lümcho. Achotsü Tamar aurü kulang tsicho.
12Azachah lipü Juda anitpü sücho. Meshü pipü khanglang, abinü Adullam-rü amüyang Hira anyüding abi san nbüh müjüpchah Timna lang jowücho. 13Hütsüde khürünü Tamar te Timna lang aku san nbüh müjüpnung wülepü yocho. 14Achotsü abükyünü khyo yaba chomih jengki mülihcho ko aku müshüpü Timna lang wüba langla Enaim yangdi tbükhüm la pümcho. Tunüo Juda tsurü achangba Shela tsü adelü lümjingnye abükyü mükhyüsohcho tsü abükyünü müdhecho.
15Khode Juda-nü abükyü ngucho, abinü abükyü tsü shutsa-irüepü lümcho, tunüo abükyü ku müshüpü licho. 16Abinü lang jüpnü abükyü yang wünü yocho, “Angang khütoi khyüro?” (Abinü hütsü atsunyahlatpüepü mümüdhecho.)
Abükyünü yocho, “Nühnü I khyang tu jünung?”
17Abinü yocho, “Ihnü nü khyang I san lanü mizaza khüdu hirosohnung.”
Abükyünü yocho, “Khang, nühnü miza tsü hiro müjüde anyengchotacho amüdhethsa I khyang lango jüng.”
18Abinü yocho, “Ihnü amüdhethsa tu jünung?”
Abükyünü yocho, “Nü neng shingba ko ayo, ko nü kheh la ja tsü jüng.” Abinü hütsüri abükyü khyang jücho. Hütsüpü anyüh mükhongcho ko abükyü afü müdeng kangcho. 19Tamar-nü kulang thali wücho ko ajengki mülihpü chomih jengki thali khyücho. 20Juda-nü amüyang Hira khyang miza tsü bipü khingkutpü kheh la abi anyengchotaba kohro tsü khyünung wüsohcho, ta Hira-nü abükyü tsü müshirücho. 21Abinü Enaim la khürüte tsingdhingcho, “Hila langjüp pümba shutsa-ilatpüsü khülo?”
Arühnü yocho, “Khodesü hila shutsa-ilarü mühle.”
22Abinü Juda yanglang thali wü yocho, “Ihnü abükyü müshirü. Hütsüla lirünüsü hütsüla khodesü shutsa-ilarü mülirepü yoko.”
23Juda-nü yocho, “Kohro tsü yohpüsohng! Mahkhang Ihsabürü münyüdong kangnung. Ihnü angang jünung müküpko, ta abükyü müshirü.”
24Choo asango khanglang khürünü Juda te yocho, “Nü tsunyahlatpü Tamar-sü shutsa-ilarü kang rachipü ade atsu zehle.”
Juda-nü yuzengjücho, “Abükyü nochüdung ko trüpseh süsohng!”
25Abükyü notside, abükyünü aku yang yu hi yochücho. “Kohro hiri abüdongba-nü Ifü müdengsohko. Sü yonang hiri dhingdhing; neng shingji ayo kehpü ko hiba ja.”
26Juda-nü hütsüri dhingcheh yocho, “Abükyü athsalange. Ihnü I tsudhre Shela khyang abükyü khyüsohba thsako.” Hütsükolü Juda-nü abükyü te khodesü mümükhongcho.
27Khode abükyü zatbünung becho chihcho, abükyünü azarü arüp suronung müdhepehcho. 28Khode mikhung rocho, khüdu kheh akhu chürocho; arükutpünü she amohnü akheh la müthsüjüpü yocho, “Hi akhu chürochoe.” 29Ta abinü akheh thali tohyoh tsicho ko ani tsü akhu surocho. Achotsü arükutpünü yocho, “Nühnü hita nü lang khangthru chüroko.” Hütsünü abinü aneng Perez dsicho. 30Hütsüpü amung tsü akheh la she amoh müthsürang bipü aka chürocho ko abinü aneng Zera dsicho.
Currently Selected:
LIPOH 38: SANGBSI
Tya elembo
Kabola
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo
Sangtam Naga (Re-edited) Bible - AMÜSA BAIBEL
Copyright © 1995 by The Bible Society of India
Used by permission. All rights reserved worldwide.