SAN MATEO 4
4
1Yūcuán na te ni jinū Jesús nde nuū ñúhun téhé ní sáha Espíritu Santo. Te yūcuán coto ndee jexeén yā, chi cúní jeē sáha ya cuēchi.
2Te ni īyo ndite ni yā uū xico nduú uū xico ñuú, sáá te jíí yā sōco. 3Te ni quee maá jéxeén jeē cóto ndee un yá, te ni cahān jiín yá:
Núu máá ró cúu Sēhe Yaā Dios, te cahān rō jeē yuū yúcu yáha na ndúu staā caji rō, achí.
4Te ni cahān yā jiín:
Tuú chi yósó núū tútu iī: Nasūu máni máá jíín stáā cátecu ñayuu, chi suni jíín táca jnúhun cáhán Yaā Dios, achí yá.
5Yūcuán na te cuahān jexeén un jíín yá nde ñuu iī Jerusalén. Te ni jeni ya xinī torre templo. 6Te ni cahān jiín yá:
Te núu Sēhe Yaā Dios cúu ró, te sɨ́ngava ró máá ró nde nuū ñúhun, chi jnama ya rohó. Chi yósó núū tútu:
Tejníñu ya ndajéhé yā quijicoo coto róhó.
Te cunundee yā rohó jíjnáhan ya,
návāha ma cáchihi ró jéhē rō nuū yuú.
Achí tutu. Achí jexeén.
7Te ni cahān Jesús:
Tuú chi suni yósó núū tútu jeē ma cóto ndee ñayuu Jitoho i Yaā Dios, núu jnama ya i chí tuú, áchí yá.
8Te jexeén un ní jeca tucu ya cuahān jiín yá nde xinī ɨɨn yucu súcún ndasɨ́. Te ni steén tācá nación nɨɨ́ cáhnu ñayɨ̄vɨ núū yā, te yōhyo luu cáa ndɨhɨ. 9Te ni cahān jiín yá:
Tācá ñuu yáha cuáha ri nuū rō, te núu cuɨñɨ yɨ́tɨ́ ró chiñúhún ró ruhū, achí.
10Yūcuán na te ni cahān Jesús nuū jexeén:
Satanás, cujiyo quihīn rō, chi yósó núū tútu jeē chiñúhún ñayuu maá Jítoho i Yaā Dios, te nuū maá‑ni ya cuajníñu i. Achí yá.
11Yūcuán na te ni cujiyo‑ni jexeén un cuáhān. Te ni quecoo ndajéhé Yaā Dios ni cajejníñu nuū yā.
Jeē ní quejéé Jesús nácani ya jnūhun región Galilea
(Mr. 1.14‑15; Lc. 4.14‑15)
12Te ná ni nihīn Jesús jnūhun jeē íne Juan vecāa, te cuanuhun yā región Galilea. 13Te tu ní cóndee yā ñuu Nazaret, chi ni jehēn yā ni condee yā ñuu Capernaum. Te ñuu un íne yumar, máá región Zabulón jiín Neftalí. 14Te súcuan ni squícu jnūhun ni tee Isaías, tēe ni nacani jnūhun Yaā Dios nde jenahán:
15Región Zabulón jiín Neftalí,
ichi jeē yɨ́hɨ yumar, lado yūte Jordán nuū cáne niāndii,
jíín región Galilea nuū cáyūcú ñayuu tācá nación tu jíní jnūhun ya.
16Ñayuu ún chi nájnūhun cáyūcú i nuū néē,
te coto i nájnūhun ɨɨn luz cáhnu.
Te ñayuu je yajni naa, nihīn i jnūhun váha ndasɨ́,
suu jnūhun jeē jnama ya anuá i.
Achí Isaías.
17Te nde quɨvɨ̄ yúcuan ní quejéé Jesús nácani ya jnūhun, te ni cahān yā suhva:
Nacani ni rō jijnáhan ró jéē stóo ró cuéchi ró, chi je ni cuyajni Yaā ndeé andɨvɨ́ jéē ndacu ya jniñu nuū rō, achí yá.
Jeē ní cana ya cuūn tēe jnɨ́ɨ chācá
(Mr. 1.16‑20; Lc. 5.1‑11)
18Te jíca Jesús yumar Galilea cuahān yā. Te ni jito ya nuū uú jnáhan ñani. Te ɨɨn de cúu Simón jeē suni nání Pedro, te ɨnga de cúu Andrés. Te tēe cájnɨɨ chācá cácuu de, te cásɨ́nga de ñunu de ini mar. 19Te ni cahān yā jiín de:
Condiquīn ruhū na quíhín yō, te nasáha ri rohó tée nihīn cuehē ñayuu candíje ruhū, nájnūhun cánihīn rō chācá, áchí yá.
20Yūcuán na te ni castóo‑ni de ñunu de, te ni candiquīn de ya.
21Te ni jica ya jecu gā, te ni jito ya nuū ɨnga uū jnáhan ñani. Te cácuu de Jacobo jiín Juan, sēhe Zebedeo. Te cáyūcú de ini barco jiín tátá de Zebedeo, cánachijnɨ̄ɨ de ñunu de. Te suni ni cana ya de jeē cóndiquīn de ya. 22Te ni castóo‑ni de tátá de jíín barco, te ni candiquīn de ya cuangoo de.
Jeē ni stéén yā nuū cuehē ñayuu
(Lc. 6.17‑19)
23Te ni jica cuu Jesús nɨɨ́ región Galilea, ni steén yā jnūhun ini tācá vehe iī jeē cúu sinagoga. Te ni nacani ya jnūhun vāha ndese ndácu Yaā Dios jniñu. Te ni nasávāha ya ñayuu cácuhū tācá‑ni cuehyɨ̄. 24Te ni jitē núu jnūhun ya cuahān nɨɨ́ región Siria. Te nuū yā ni caquindeca i tāca ñáyuu cácuhū, ñayuu cándoho tɨjnɨ nuū cuehyɨ́, jiín jéē jetú, jíín jéē ñúhun tachī ini, jiín jéē jihí yɨ̄hɨ́, jíín jéē ni íjin. Te ni nasávāha ya i jíjnáhan i. 25Te cuehē ñayuu región Galilea jiín Decápolis, jiín ñáyuu ñuu Jerusalén jiín región Judea, jiín táca ñuu ichi núū cáne niāndii yūte Jordán, ni cacondiquīn i ya.
Jeē ní nacani ya jnūhun nde nuū yúcu
© 1973, Wycliffe Bible Translators, Inc. All rights reserved.
