Oosana 8
8
Nammari aufirafa taikoo ufafa.
1Marufanoo Anutufa Nooanara faqa narí aiku asauku faqa aiqama aandau mina faqa marusara faqa iriseenoo qufanoo ufai uqufanoo nammari fannoo qumi marinau. 2Maqa ameemaanaindari nammari ururee maruna rafaaqa finau. Rafaaqafuseenoo innaaruna kooqiara foora ititasoofanoo innaarunaindaraa nammari faqa sia quminau. 3Itita fufanoo maqasaa nammari fannoo ireeda kai ireeda kai ooru maree ooru maree qumiqumii ufanoo maqa koorooinau. 150 suanisaa nammari qumimarinau. 4Dinni taikaseenoo dinni oonu qaaraqanda marasee 7 quqoonasaa miqi mandee quqoonna qambaanai qisaukuqara faqa dinni qiku taikaseenoo dinni oonu qaara marasee 17 faasaana Nooana sipa fannoo Ararata aaqanasaa muqufi quqasoofanoo marinau. 5Miqooqari nammari uru maree ooqinufanoo qisaukuqara taikasee 10 quqoonasaa indaaruqaa faasaanasaa aaqana atiuqa koorooinau.
6Qaara fasiqa niku nisauku taikasee 40 faasaana aiqaroofanoo Nooafa winduaqa atuaseenoo ufini kaammeesa fooqaana mara aqinau. 7Ufini fannoo sia kaifaa aninau. Kaqi kai qaqanoo nimarinau. 8Nooafa mi ufininara rakisusia sia anufanoo nakipuruna mara aquseenoo nammari qafaanifeera aiqanau. 9Aqusoofanoo nakipuruna maqara randoosianoo nammari kaqi marufanoo mi eendanaki kai kaifaa Nooafunnai sipaki aninau. Nooafa narí asauku madaanai quqaseenoo qumara sipaki quqanau. 10Qisauku dinni taikasee dinni oonu qaara marasee 7 faasaana afeesida mariufanoo Nooafa nakipuruna kaiqaa mareeqeenoo madaanai aqinau. 11Eenee marufanoo nakipuruna fannoo oorifa saqari amanee ammunirana rakeemma aaku maree aninau. Nooafa mi saqari amaneena qafamaseenoo doo nammari ooqi maridanoo fee qinau. 12Miqooqari kaifaa dinni taikasee dinni oonu qaara marasee (7) faasaana aiqaroo fanooo Nooafa nakipuruna kafaa mara quqasoofanoo doo funnai fifinoo doo sia kafaa aninau. 13Nooafa 601 aukuana marasoofanoo indaaruqaa quqoona indaaruqaa faasaanasaa nammari tukaqnanau. Nooafa sipa ataufakaaqa akuamaqaqoona rafaammasee qafoofanoo maqa aadana usimarinau. 14Namba 2 quqoonasaa 27 faasaanasaa aiqama nammari tukaqnamafufanoo maqa maaqa aadana uqanna marinau.
15Miqimmafufanoo Anutufa Nooana qimaminoo qinau. 16Doo sipakiqari anee faqa aneenna anaaqa faqa aneenna faiqi namu faqa misa ninaaqmaaka faqa raudaaqa. 17Aiqama ufiniuqa faqa aandauqa faqa nifiqee raudaaqa. Raudamafiqa maqa maaqaki daraaniqa asumu moomoo kambiaaqa.
18Miqi qimasoofanoo Nooafa faqa narí anaaqa faqa narí faiqi namu faqa misa ninaaqmaaka faqa sipakiqari raudaqau. 19Aiqama aandauqa faqa ufiniuqa faqa narí oosana narí oosana kai moodaanaki suqufufaqa raudamaki daraaniqau.
Nooafa karaambaiqa tatufirana suqa aminau.
20Nooafa rafudamafufanoo karaambaiqa tatufirana suqarara ooni qumareenoo aaku aakummaseenoo Anutuna afusaa anukara aandau faqa ufini faqa maraseenoo muduka Anutuna tatufirana suqa aminau. 21Suqoofanoo mina afunda karaambaiqa aikiambu ufanoo udirama qafeenoo asasinau. Asasammaseenoo maaqi qimasee qimmirinoo qinau. Sia qinee kaifaa faiqí inni mandainaina akiiqara aiqama maqa maaqa niquraraanauranoo. Inneeqa faiqi saaqari irirana faqa marirana faqa mandaika kai imarunara sia kaifaa unandee iqa maqa maaqa afaaqasasa maria fasiqa aanaaseesa faqa aandau doodaani faqa naru taikaanaura.
22Anutufa minara maaqi qimasee qinau.
Maa maqafa kaqi marinaqa
qummaqira aukuana faqa narana nara aukuana faqa
suara faqa aiqaiqa faqa aaku aukuana faqa
suani aukuana faqa faasaana faqa eendaki faqa
sia taika nimaqaanaura, kaqi marifaranoo.
© 2017 Wycliffe Bible Translators, Inc. All rights reserved.