Salmos 4
4
1Hneˉ Dio kya̱a̱nꜙ hi̱ˉ chehꜗ nëˊ kinꜙ,
nʉʉˉ läꜙko̱hꜘ maˊ tëëhnꜙ hneˉ.
Läꜙko̱hꜘ maˊ kuˈji̱i̱ꜙ kinꜙ, hneˉ baˊ jmeehˉ dsaˉtu̱hꜙ kinꜙ.
Waˊ läˉñihꜘ hohꜘ kinꜙ,
nʉʉˉ kihꜗ läꜙjëꜙ heˉ chu̱u̱nꜘ kya̱a̱hˊ hneˉ.
2Hnähꜘ hi̱ˉ jmeeꜙ jʉʉhˉ kihꜗ hi̱ˉ saꜙ la̱a̱ꜗ dio,
¿lɨhꜘ baˊ tʉhꜗ hnähꜘ heˉ llehˉ oˉhihꜙ kinꜙ?
¿Lɨhꜘ baˊ tʉhꜗ hnähꜘ heˉ he̱e̱ꜘ hohꜘ hnähꜘ heˉ saꜙ jmääꜗ hiꜙ hnoohˈ hnähꜘ heˉ laꜗ juuˈ taˉjuuˈ?
3Waˊ läˉñehˊ hnähꜘ,
DSAˉJØ̱Ø̱Hˈ jnänˋ baˊ hi̱ˉ maˉlle̱e̱hˉ kya̱a̱ꜗ hi̱ˉ miˉteꜗ kiyhꜗ.
DSAˉJØ̱Ø̱Hˈ jnänˋ baˊ hi̱ˉ nuuˉ waˊraˉ gaꜙchu̱u̱nꜗ kya̱a̱yhˊ.
4Waˊ ga̱hꜙ hnihꜘ hiꜙ moꜙtoꜙ jmeeˉ gaˊ dsoˊkyeˉ.
Waˊraˉ gaꜙtëꜘ jeeˊ kya̱a̱hꜗ nëˊ ji̱i̱ˊ kyahˈ, toˉkëˊ baˊ jmeeˊ hʉʉˊdsëˉ haˉ läꜙ laꜗ nehꜙ tuhˉhohꜘ.
5Kwëëhˋ Dio läꜙko̱hꜘ teꜗ lleˋ kihˈ
hiꜙ waˊ chaˉ oˉjø̱hꜙ dsëˉ kyahꜗ kya̱a̱yhˊ.
6Jwë̱ë̱ꜘ jähꜘ läꜙlaˉ: “¿Haˉ taꜙ jäꜙ hi̱ˉ heehꜗ jnäähˈ heˉ lluꜗ?”
Pero jnäꜘ jwɨɨn˜ DSAˉJØ̱Ø̱Hˈ kya̱a̱nꜙ:
“Jmeeˊ läˉjnäꜘ waˊjeˉ kyahꜗ nëˊ kya̱a̱ˈ jnäähꜗ.”
7Hneˉ gaꜙjmeehˊ cha̱a̱nˉ chaˉgaˊmiihˉ lluꜗ läꜙko̱hꜘ gaˊ hi̱ˉ gaꜙchoohꜗ chaˉmiihˉ mɨɨˈ hmaˉ kya̱a̱hˊ mɨˈjëhꜗ.
8Läꜙka̱a̱ˉ tuhˉdsënꜙ naˊnɨɨhnˋ kinꜙ mahꜗ gwɨ̱ɨ̱nꜚ lluꜗ.
Jëëhꜘ ja̱a̱ˉ hneˉ baˊ DSAˉJØ̱Ø̱Hˈ kya̱a̱nꜙ hi̱ˉ jmeeꜙ chaˉ oˉjø̱hꜙ dsëˉ kinꜙ.
© 2003, Wycliffe Bible Translators, Inc. All rights reserved.