Romanos 6
6
Mana jusalikunansipaq yäsishqan
1Sayno kaptinqa Tayta Dios mas kuyapämänansipaq ¿jusalikursuraq kawashun? 2¡Manami! Noqansiqa jusalikuypaq wanushnönami kaykansi. Sayno kaykarqa ¿imanöparaq jusalikur kawaykushwan?
3¿Manaku musyayanki Jesucristo cruzcho wanushqanno noqansipis bautizakushpansi jusalikuypaq wanushnöna kaykashqansita? 4Bautizakushqansi hörami Jesucristuwan pampakuykaqno kashkansi. Saypitanami Jesucristuta Tayta Dios munayninwan kawarisimushqanno noqansitapis mushuq kawayta qomashkansi.#Col. 2.12. 5Jesucristo wanushqanno noqansipis jusalikuypaq wanush kaykarqa pay kawarimushqannömi kawarimushun.
6Shumaq tantiyakushun. Unay kawayninsiqa Jesucristuwan cruzcho wanushnami kaykan. Saymi kananqa jusalikuypa munayninchönasu kaykansi.#Gál. 2.20. 7Wanushkuna mana jusalikuyashqannömi noqansipis mana jusalikuypa kawanansipaq kaykansi. 8Saymi kananqa Jesucristuwan wanushna kar musyansi paypa makinchöna kawanansipaq kashqanta.
9Saynöpis musyansi Jesucristo kawarimushna kar imaypis manana wanunanpaq kashqanta. Payqa wanuyta vincishnami. 10Juk kutila wanurmi jusalikuypita jorqamänansipaq wanurqan. Kananqa Tayta Diospa nawpanchönami kawaykan. 11Saynöla qamkunapis jusalikuypaq wanushnöna kayay. Kananqa [Señorninsi] Jesucristucho kayashpayki Tayta Dios munashqanno kawayay.
12Sayno kaykarqa jusalikuypa munaynincho amana kawayaynasu. Shonquyki jusalikuypaq wanuptinpis ama jusalikuyaysu. 13Lutan ruraykunamanpis ama jatikäyaysu. Wanuyashqaykipita kawarimushnöna kaykarqa Tayta Diospa makinchöna kawayay. Intëru cuerpuykipis Tayta Dioslapaqna kasun. 14Manami Tayta Diospa leyninkunata cumpliyashqaykiman yärakursu salvakuyanki, saypa trukanqa kuyapäkuq kayninman yärakurmi. Sayno karqa manami jusalikuypa munayninchönasu kaykäyanki.
Tayta Dios patronninsi kashqanta tantiyasishqan
15Kuyapäkuq Tayta Diosman yärakuyninsipa salvacionta chaskiykarqa ¿jusalikularsuraq kawashun? ¡Manami! 16Jusalikular kawashqaqa jusalikuymi patronninsi rikakun. Ashmayninta lapan munashqanta patrón rurasishqannömi jusalikuypis patronninsi kar munashqanta rurasimansi. Sayno kawarqa castïgumanmi aywaykansi. Patronninsi Tayta Dios kaptinmi isanqa salvakunsi.
17Nawpataqa jusalikuymi qamkunapapis patronniki karqan. Kananqa Jesucristupa wilakuyninta lapan shonquykiwan chaskikush karmi Jesucristupa munayninchöna kaykäyanki. Saymi Tayta Diosta agradëcikü. 18Jusalikuypa munayninpita librina kayashpaykimi Tayta Dios munashqanta ruralarna kawaykäyanki.
19Patronman tinkusiypa sayno parlaykä shumaq tantiyayänaykipaqmi. Nawpataqa jusalikuypa munaynincho karmi melanaypaq kaqkunata rurar kawayashkanki. Kananqa sayno kawayaynasu, saypa trukanqa mana jusalikuypa Tayta Dios munashqannöna kawayay.
20Jusalikuypa munaynincho karqa Tayta Diosta mana cäsukuypami kawayarqayki. 21Tayta Diosta mana cäsukur ¿ima alitataq jorquyashkanki? Tantiyakuriyaptikiqa say lutan rurayashqaykikuna lapanpis penqakuypaqmi kaykan. Sayno kawayashqaykipitami wanuyanki.
22Kananqa jusalikuypita librina karmi Tayta Diospa makinchöna kawaykäyanki. Saymi pay munashqanno kawayänaykipaq yanapaykäyäshunki. Sayno kawarmi paypa nawpancho imayyaqpis kawayanki. 23Jusalikuyqa wanuymanmi apamansi. Señorninsi Jesucristo noqansi rayku wanush kaptinmi Tayta Dios dembaldila salvamansi nawpancho imayyaqpis kawanansipaq.#Prov. 12.28.
© 2003, Wycliffe Bible Translators, Inc. All rights reserved.
