Hechos 16
16
Pablutawan Silasta Timoteo walkishqan
1Saypitanami Derbe y Listra markakunaman Pabluwan Silas chäyarqan. Listra markachömi juk discïpulu tarqan Timoteo jutiyuq. Timoteupa taytan mana Israel runa kaptinpis mamanqa Jesucristuman yärakuq Israel warmimi karqan. 2Timoteo ali maqta kashqantami Listra y Iconio markakunacho taq wawqi panikuna parlayaq.
3Timoteupa taytan mana Israel runa kaptinmi pïmaypis musyayarqan Timoteo señaläni kashqanta. Saymi Pablo pushayta munar say kinraycho taq Israel runakuna mana jamuräyänanpaq Timoteuta señalasirqan. 4Saypita markan markan purirmi wawqi panikunata wilapäyarqan apostolkuna y mayor wawqikuna Jerusaléncho wilanakur niyashqanta cumpliyänanpaq.#Hech. 15.23-29. 5Saynöpami Jesucristuman shumaq yärakur wawqi panikuna waranlan waranlan askayäyarqan.
Macedonia runa qayakamuqta Pablo revelacioncho rikashqan
6Asia provinciaman wilakuq aywayta munayaptinpis Espíritu Santu manami munarqansu. Saynami Galaciapa y Frigiapa päsayarqan. 7Misia partiman chaykur Bitinia provinciapa aywayta yarpäyaptinpis Jesúspa Espïritun saypa aywayänanta manami munarqansu. 8Saymi Misia partipa päsar Troas markaman chäyarqan. 9Juk sakaynami revelacioncho Pablo rikarqan Macedonia provinciapita juk runa qayakamur nimuqta: <<Macedoniaman shayämuy yanapäyämänaykipaq, taytay>>.
10Revelacioncho rikashqanta wilayämaptinmi tantiyayarqä#16.10 Troaspitami kay libruta qelqaq Lucaspis Pabluwan purir qalaykurqan. say markakunamanpis wilakuyninta chäsiyänäpaq Tayta Dios munashqanta. Saymi Macedoniaman aywayänäpaq jukla kamarikuyarqä.
Filipos markacho wilakuyashqan
11Troaspita büquiwan aywarmi Samotracia islaman chäyarqä. Waraynin junaqnami Neápolis markaman chäyarqä. 12Saypitanami Filipos markaman chäyarqä. Filipos markaqa Macedonia provinciacho wakin markakunapita mas jatunmi kaykan. Saychömi Roma runakuna täyan. Juk ishkay junaqmi saycho qoyäyarqä.
13Tayta Diosta manakuyänanpaq mayu kuchuncho imaypis shuntakäyashqanta musyarmi jamay junaqcho markapita yarqur sayman aywayarqä. Saycho warmikuna shuntakash kaykäyaqtami Tayta Diospa wilakuyninta wilapäyarqä. 14Saychömi Tiatira markapita Lidiapis kaykarqan. Payqa granäti tëlakunatami rantikuq. Mana Israel warmi karpis Tayta Diosta mansapakuqmi karqan. Lidiata Tayta Dios tantiyasiptinmi Pablo wilapashqanta chaskikurqan. 15Paypis y wayincho taqkunapis bautizakurirmi ruwakur niyämarqan: <<Señor Jesucristuman yärakuq mayiki kaykaptïqa wayïcho päsakuyänaykipaq shayämuy>>.
Sayno niyämaptinmi wayinman aywayarqä.
Pablutawan Silasta carcilman wichqayashqan
16Juk kutimi Tayta Diosta manakuq aywaykäyashqächo supaypa munayninwan adivinaq jipashwan tinkuyarqä. Say jipashmi patronninkunata aska qellayta gänasirqan. 17Paymi Pabluta y noqakunata qatirämar sinchipa nirqan: <<¡Kay runakunaqa munayyuq Tayta Diostami sirviyan! ¡Paykunami tantiyasiyäshunki imano salvakuyänaykipaq kashqantapis!>> nir.
18Sayno waran waran qatiräyämaptinmi Pablo rabyakushpan jipashcho kaykaq supayta nirqan: <<¡Kay jipashpita yarqunaykipaq Jesucristupa jutinchömi qamta qarqü!>>
Sayno niptinmi jinan höra supay yarqurqan.
19Saymi jipashpa patronninkuna qellayta manana gänayänanpaq kashqanta tantiyakur Pablutawan Silasta prësu sariykur autoridäkuna juzgayänanpaq pläzaman apayarqan. 20Autoridäkunaman chaykasirmi niyarqan: <<Kay Israel runakunami marka mayinsikunata rabyanaykäsiyan. 21Israel runakunapa costumbrinkunata rurayänanpaqmi markansicho yachaykäsiyan. Noqansiqa Roma runa kashpansi manami say costumbrikunata chaskipashwansu>>.
22Sayno niyaptinmi lapan runakuna Pablupa y Silaspa contran sharkuyarqan. Saymi autoridäkuna niyarqan Pabluta y Silasta qarapachaskir wiruyänanpaq. 23Nirkurmi carcilman wichqasiyashpan prësukuna täpaq wardiata niyarqan shumaq täpananpaq. 24Sayno niyaptinmi mas ruri kaq calapösuman wichqaykur chakinkunata cëpuman#16.24 Cëpuqa rakta tablapita rurashqami karqan. Saychömi runata chakipita karpis, makipita karpis y kunkapita karpis prësuräsiyarqan. Cëpuchöqa prësukuna pasaypami nakayarqan. amusirqan.
25Pulan paqasno kaykaptinmi Pabluwan Silas Tayta Diosta manakur alabayarqan. Saytami wakin kaq prësukunapis wiyayarqan. 26Say höra elaqpita pasa fiyupa suksukyar carciltapis kuyusiptinmi lapan punkukunapis jukla kichakäkuyarqan y prësukuna wataräyashqan cadinakunapis paskakäkuyarqan. 27Prësukuna täpaq wardianami rikcharkamur punkukuna kicharaykaqta tarirqan. Saymi prësukuna qeshpikuyashqanta yarpar espädanwan wanusikuyta munarqan. 28Sayta rikarmi Pablo sinchipa nirqan: <<¡Ama wanusikuysu! ¡Lapäkunami kaykäyä!>>
29Sayno niptinmi aksita manakuskir Pabluwan Silas kaykäyashqanman cörrila yaykur puntanman suksukyaykar qonqurpakuykurqan. 30Carcilpita jorqaskamurmi tapurqan: <<Taytakuna, ¿salvakunäpaq imataraq ruräman?>> nir.
31Sayno tapuptinmi niyarqan: <<Señor Jesucristuman yärakuy. Payman yärakurqa qampis y wayikicho taqkunapis salvakuyankimi>>.
32Nirkurnami say wardiata y wayincho taykaqkunatapis Señor Jesucristupa wilakuyninta wilapäyarqan. 33Say sakaymi wardiaqa Pablupa y Silaspa qaran pashtashkunata maylapar jampiparqan. Nirkurnami paypis y wayincho taqkunapis bautizakurir 34wayinman pushaykur mikuyta qararqan. Tayta Diosman yärakuyänanpaq tantiyakushqanpitami wayincho taqkunawan fiyupa kushikuyarqan.
35Waraynin tutanami Pablutawan Silasta kachariyänanpaq autoridäkuna wardiakunata kachayarqan. 36Saymi prësukuna täpaq wardia Pabluta nirqan: <<Autoridäkunami wilakasiyämush qamkunata kacharinäpaq. Kananqa jawkalana aywakuyay>>.
37Saymi wardiakunata Pablo nirqan: <<Roma runa kaykäyaptïmi mana juzgamaylapa lapanpa nawpancho wiruyämash y nirkur kay carcilman wichqasiyämash. Kananqa ¿pakaylapa kachariykayämaytaku munaykäyan? ¡Kikinkunaraq shayämusun jorqayämänanpaq!>>
38Sayno nishqantami wardiakunaqa autoridäkunata wilayarqan. Roma runa kayashqanta musyaykurmi autoridäkuna mansariyarqan. 39Saymi Pablo y Silas kaqman aywaykur perdonta manakuyarqan. Nirkurnami carcilpita jorquskir say markapita aywakuyänanpaq ruwakuyarqan. 40Carcilpita yarqurirmi Lidiapa wayinman aywayarqan. Saycho wawqi panikunata shakyarkasirmi Filipos markapita aywakuyarqan.
© 2003, Wycliffe Bible Translators, Inc. All rights reserved.
