Hechos 10
10
Pedruta Cornelio qayasishqan
1Cesarea markachömi tarqan juk soldädu Cornelio jutiyuq. Pay karqan Italiano nishqan batallonpa capitanninmi. 2Wayincho lapan taqkunawanmi Corneliuqa Tayta Diosta mansapakur pay munashqanno kawayaq. Muchuqkunatapis yanaparmi Tayta Diosta imaypis manakuq. 3Juk junaq malway intino kaykaptinmi Tayta Diospa angilninta revelacioncho rikarqan. Say angilmi <<¡Cornelio!>> nirqan.
4Saymi seqaypa mansakash rikaraykashqancho <<¿imataq, taytay?>> nirqan.
Sayno niptinmi ángel nirqan: <<Manakushqaykita Tayta Dios wiyashushkankimi. Muchuqkunata yanapashqaykitapis rikashushkankimi. 5Kananqa Simón jutiyuq runata pushayämunanpaq Jope markaman kachakuy. Paypa jukaq jutinmi kaykan Pedro. 6Payqa lamar kuchuncho suëla ruraq Simónpa wayinchömi posädaraykan. [Paymi wilashunki imata ruranaykipaqpis]>>.
7Ángel aywakuptinnami Cornelio qayarqan ishkay ashmayninkunata y Dios munashqanno kawaq juk yanapaqnin soldädutapis. 8Paykunatami ángel nishqankunata wilaparkur Jope markaman kacharqan.
9Saypita waraynin pulan junaqnami Cornelio kachashqan runakuna Jope markaman chaykäyarqan. Say hörami Pedrupis posädarashqan wayi jananman Tayta Diosta manakuq wisarqan.#10.9 Israel nacioncho say wisan wayita qatananpa trukanqa terrädu jananman saqlarkurmi mituwan tortarkuyaq. Say jananchönami warmikuna y runakuna awakuyaq, aqakuyaq y trïgutapis akrayaq. 10Manakuykaptinmi pasaypa puchaknay sarikuykurqan. Mikuyta yanukapäyashqanyaqmi Tayta Dios revelaptin 11jana pasa kicharaykämuqta rikarqan. Rikärishqanchömi jana pasapita chuskun puntanpa watash jatunkaray jaku niraq uraykämuqta rikarqan. 12Say jakuchömi kaykarqan tukuy casta uywakuna, lashtaypa puriqkuna y pajaqkunapis#10.12 Wakin runakunaqa vuelaqkunapis niyanmi.. 13Rikaraykaptinmi jana pasapita nimurqan: <<Pedro, saykunata pishtaskir mikuy>>.
14Sayno nimuptinmi Pedro nirqan: <<Manami saykunata mikümansu, Taytay. Impüru uywakunataqa#Lev. 11.1-46. manami imaypis mikushkäsu>>.
15Sayno niptinmi yapay nimurqan: <<Mikunaykipaq püru kashqanta Tayta Dios nikäshuptikiqa ama impüru kashqanta niysu>>.
16Say revelacionta kimsa kuti Pedro rikaskiptinmi say jakuta jana pasapa kutisikurqan.
17<<¿Imapaqraq rikasimash?>> nir yarpachakuykaptinmi Cornelio kachashqan runakuna tapukuraykar Simónpa wayiman chäyarqan. 18Chaykuyashpanmi tapukuyarqan: <<¿Kaychöku Simón Pedro posädaraykan?>> nir.
19Revelacionta rikashqanpita Pedro yarpachakuykaptinmi Espíritu Santu nirqan: <<Kimsa runakunami ashiykäyäshunki. 20Noqami say runakunata kachamushkä. Mana mansariypa paykunawan ayway>>.
21Sayno niptin urarkamurmi say runakunata Pedro nirqan: <<Say ashiykäyashqayki runa noqami kaykä. ¿Imalapaqtaq ashiykäyämanki?>>
22Saymi niyarqan: <<Capitán Corneliumi kachayämash, taytay. Payqa Tayta Diosta mansapakuq ali runami. Lapan Israel runakunami payta kuyayan. Qamta qayasishunaykipaqshi Tayta Diospa santu angilnin nish. Wayinmanshi aywaykuläshun Tayta Diospa wilakuyninta wilapänaykipaq>>.
23Sayno niyaptinmi posädarashqan wayicho Pedro paykunata posädasirqan.
Waraynin tutanami Cornelio kachakushqan runakunawan y Jopicho taq wakin wawqikunawan Pedro aywarqan. 24Aywayashqanpita warayninraqmi Cesarea markaman chäyarqan. Corneliumi ayllunkunawan y kuyanakuyashqan runakunawanpis wayincho shuyakuykäyarqan. 25Chaykuyaptinnami Pedrupa puntanman Cornelio qonqurpakuykur payta adorarqan. 26Saymi Corneliuta janchashpan Pedro nirqan: <<¡Sharkuy! Noqapis qamno runalami kä>>.
27Saypitanami paywan parlaraykar yaykuyashpan aska runakuna shuntaraykäyaqta tarirqan. 28Saymi Pedro nirqan: <<Qamkuna musyayankimi Israel runa mana Israel runakunawan mana shuntakänanpaq ni wayinmanpis mana chänanpaq kashqanta. Sayno kaykaptinpis Tayta Diosmi tantiyasimash pipis impüru mana kashqanta.#10.28 Israel runakuna niyarqan mana Israel runakuna impüru kayashqantami. Saymi paykunawan shuntakäyaqsu ni wayinmanpis chäyaqsu. 29Saymi qayasimaptiki jukla shamushkä. Kanan nimay imapaq qayasimashqaykitapis>>.
30Niptinmi Cornelio nirqan: <<Chusku junaqnami kay hörano [ayunar] Tayta Diosta manakuykarqä. Tardi malway hörami chipipiykaq mödanash runa yuripämash. 31Paymi nimash: <Cornelio, manakushqaykita Tayta Dios wiyashqami. Muchuqkunata yanapashqaykitapis rikashqami. 32Kananqa Simón jutiyuq runata pushayämunanpaq Jope markaman kachakuy. Paypa jukaq jutinmi kaykan Pedro. Payqa lamar kuchuncho suëla ruraq Simónpa wayinchömi posädaraykan. [Pay chaykamurmi wilapäshunki]>. 33Sayno nimaptinmi jukla kachakamurqä pushamushunaykipaq. Shamushqaykipita kushikümi, taytay. Wilakuyninta wiyayta munarmi Tayta Diospa nawpancho lapäkuna kaycho shuntakäyashkä>>.
Corneliupa wayincho Pedro wilakushqan
34Saymi Pedro nirqan: <<Kanan rasunpaypami tantiyä Tayta Dios pitapis manakaqman mana churashqanta.#Deut. 10.17. 35Saynölami may nacionpita kaptinpis payta mansapakur cäsukuq kaqtaqa pïmaytapis kuyapan. 36Sayno kuyapämashpansimi Jesucristo kayninpa perdonamansi paywan ali kawanansipaq. Jesucristuqa lapanpapis Señorninmi kaykan. Say ali wilakuytami Israel runakunata Tayta Dios musyasirqan.
37<<Musyayankimi bautizakuyänanpaq Juan wilakushqanpitaraq Galileacho qalaykur intëru Judeacho ima päsashqantapis. 38Say wisanmi Nazaret markapita kaq Jesús munayyuq kananpaq Espíritu Santuta payman Tayta Dios kachamurqan. Tayta Dios yanapaptinmi markan markan Jesús purirqan alikunata rurar y diablu qeshyasishqan runakunata kachakäsir.
39<<Noqakuna rikayashkämi Jerusaléncho y intëru Judeacho Jesús rurashqankunata. Cruzcho wanusiyaptinpis 40kimsa junaqtami Tayta Dios kawarisimush. Kawarirkamurmi noqakunata yuripäyämash. 41Saytaqa manami lapan runakunasu payta rikayash, sinöqa nawpapita pasa Tayta Dios akrashqan kaqkunalami. Saymi kawarimuptin paywan juntu mikur upur kayashkä. 42Nirkurnami kachayämash wilakuyninta wilakur kayno niyänäpaq: <Wanushkunatapis kawaykaqkunatapis juzgananpaqmi Tayta Dios Jesústa churash>. 43Paypitami lapan profëtakunapis wilakuyarqan. Saynöpami musyansi lapantapis payman yärakuq kaqtaqa jusalikushqanpita Tayta Dios paypa jutincho perdonashqanta>>.
Mana Israel runakuna Espíritu Santuta chaskiyashqan
44Pedro sayno wilapaykaptinmi saycho wiyaykaqkunaman Espíritu Santu charqan. 45Sayta rikarmi Pedruwan aywaq Israel runakuna admirakur niyarqan: <<¡Mana Israel runakunatapis Espíritu Santuta Tayta Dios qarashqami!>>
46Sayno niyarqan juk idiömakunapa parlar Tayta Diosta alabaykäyaqta wiyarmi. 47Saymi Pedro nirqan: <<Paykunapis noqansino Espíritu Santuta chaskikuykäyaptinqa manami pipis bautizakuyänanta michanmansu>>.
48Saymi Jesucristupa jutincho paykunata bautizarqan. Saypitanami Corneliupa wayincho shuntaraykaqkuna Pedruta ruwayarqan ishkay kimsa junaqlapis qoyäpäyänanpaq.
© 2003, Wycliffe Bible Translators, Inc. All rights reserved.
