ማቶሳ 27

ዬሱሲ ጲላፆሳ ሲን ፒርዳው ሺቄዳ

(ማር 15፡1፤ ሉቅ 23፡1-3፤ ዮህ 18፡28-32)

1ዎንታ ጉራን ቄሳቱዋ ካፓቱ ኡባቱኔ ጋዲያ ጪማቱ ዬሱሳ ዎናው ማቄቴዲኖ፤ 2ኡንቱንቱ ዬሱሳ ቃቺ ኣፊዴ፥ ጋዲያ ኣዪሲያ ጲላፆሳው ኣ ኢሜዲኖ።

3ዬሱሳ ሄ ዎዴ ኦይዳ ዪሁዳይ ጲላፆሲ ዬሱሳ ቦላ ፒርዴዳዋ ቤዒዴ፥ «ኣዬሮ! ኦይናን ኣጋሪኪታ!» ያጊዴ፥ ሄ ማንዒያንካ ሃታሙ ቢራ ቄሳቱዋ ካፓቶኔ ጋዲያ ጪማቶ ጉዬ ዛሪዴ፥ 4«ታኒ ጌሻ ኣሳ ኦይዴ ናጋራ ኦዲ» ያጌዳ።

ሺን ኡንቱንቱ ኣ፥ «ሄዌ ኑሲ ኣያ ሜቴ? ሄዌ ኔ ሼኔ» ያጌዲኖ።

5ዪሁዳይ ቢራ ጌሻ ጎሊያን ኦሊ ኣጌዳ፤ ኡንቱንቱ ማታፔ ቢዴ፥ ሱሌቲ ሃይቄዳ።

6ቄሳቱዋ ካፓቱ ቢራ ኣኪዴ፥ «ሃ ቢራይ ሱ ሚሻ ጊዲሺን፥ ኑኒ ጌሻ ጎሊያ ሚሻና ጋያዌ ዎጋ ጊዴና» ያጌዲኖ። 7ሄዋፔ ጉዬ ኢቲፔ ዞሬቲዴ፥ ኢማ ኣሳው ሞጎ ጋዲያ ኦናው ኡርቃፔ ሚሻ ሜያዋንቱ ጋዲያ ሻሜዲኖ። 8ሄዋ ዲራው፥ ሄ ጋዲ ሃቼ ጋካናዉካ፥ ሱ ጋዲያ ጌቴቲዴ ፄሴቴ።

9ናቢያ ኤርሚያሲ፥ «ኡንቱንቱ ኣው ኢማናው ቆፔዳ ሃታሙ ሹቻ ቢራ ኣኪዴ፥ 10ጎዳይ ታና ኣዛዞዋዳን፥ ኡርቃፔ ሚሻ ሜያዋንቱ ጋዲያ ሻማናው ኢሜዲኖ» ጌቴቶዌ ሄ ዎዴ ፖሌቴዳ ጌዳ። #ዛክ 11፡12-13

ጲላፆሲ ዬሱሳ ኡባባ ኦቼዳ

(ማር 15፡2-5፤ ሉቅ 23፡3-5፤ ዮህ 18፡33-38)

11ዬሱሲ ጋዲያ ኣዪሲያዋ ሲን ሺቂና፥ ጋዲያ ኣዪሲያዌ ኣ፥ «ኔኒ ኣዪሁዳቱዋ ካቴ?» ያጊዴ ኦቼዳ።

ዬሱሲ ኣ፥ «ኔኒካ ጋዴዓ» ያጌዳ።

12ቄሳቱዋ ካፓቱኔ ጋዲያ ጪማቱ ኣ ሞቲና፥ ኡንቱንቶ ኣይኔ ዛሩዋ ኢሚቤና። 13ሄ ዎዴ፥ ጲላፆሲ ዬሱሳ፥ «ሃዋንቱ ኔና ሞቲያባ ኡባ ሲሲኪ?» ያጌዳ።

14ዬሱሲ ሃራይ ኣቶ፥ ኢቲ ቃላካ ዛሬናን ኢፂና፥ ጋዲያ ኣዪሲያዋንቱ ዳሪ ማላሌቴዳ።

ዬሱሲ ሃይቆ ፒርዴቴዳ

(ማር 15፡6-15፤ ሉቅ 23፡13-25፤ ዮህ 18፡39-40፤ 19፡1-16)

15ጋዲያ ኣዪሲያዌ ፓሲጋ ቦንቺያ ጋላሳን፥ ኣሳይ ኮዪያ ኢቲ ኡራ ቃሹዋፔ ቢሊያ ዎጋይ ዴዔ። 16ሄ ዎዴ ኢቲ ባርባና ጌቴቲያ ዬሱሲ ዳሮ ኤሬቴዳ ኢታ ቢታኒ ቃሾ ጎሌን ዴዔ። 17ሄዋ ዲራው፥ ጮራ ኣሳይ ኢቲሳ ሺቄዳሳን ጲላፆሲ፥ «ታኒ ሂንቴንቶ ባርባና ጊያ ዬሱሳ ቢሎ፥ ዎይ ኪሪስቶሳ ጌቴቲያ ዬሱሳ ቢሎ?» ያጊዴ ኣሳ ኦቼዳ። 18ኣዪሲ ጎፔ፥ ኡንቱንቱ ቃናቲዴ ዬሱሳ ኦዳዋ ኢ ኤሬ።

19ጲላፆሲ ፒርዳ ጎሌን ኡቲዴዒሺን፥ ኣ ማቻታ ኣው፥ «ሄ ፂሎ ቢታኒያ ኣይኔ ኦፓ፤ ኣያው ጎፔ፥ ታኒ ሃቼ ቃማ ኣኩሙዋን ኣባን ዳሮ ሜቶታዲ» ያጋዴ ኪታዱ።

20ሺን ቄሳቱዋ ካፓቱኔ ጋዲያ ጪማቱ ጲላፆሲ ባርባና ቢሊዴ፥ ዬሱሳ ዎናዳን፥ ሺቄዳ ኣሳይ ኣ ዎሳና ማላ፥ ኣሳ ጪሜዲኖ።

21ጲላፆሲ ዛሪዴ ኡንቱንታ፥ «ታኒ ኡንቱንቱ ላዓቱዋፔ ሂንቴው ኦና ቢላናዳን ኮዪቴ?» ያጊና ኡንቱንቱ፥ «ባርባና ቢላናዳን ኮዬቶ» ያጌዲኖ።

22ጲላፆሲ፥ «ያቲና፥ ኪሪስቶሳ ጌቴቲያ ዬሱሳ ዎቶ?» ያጊዴ ኡንቱንታ ኦቺና ኡባይ፥ «ማስቃሊያ ቦላ ሚሲማሪያን ሼቲዴ ካቄቶ» ያጌዲኖ።

23ጲላፆሲ ኣሳ፥ «ኣዪሲ? ኣይ ኢታባ ኦዴ?» ያጌዳ።

ሺን ኣሳይ ካሴዋፔካ ባሬንቱ ኮሻ ቁ ኦዴ፥ «ማስቃሊያ ቦላ ሚሲማሪያን ሼቲዴ ኢ ካቄቶ» ያጌዲኖ።

24ዋላሳይ ዴንዳናዋፔ ኣቲን፥ ኣይኔ ሃኔናዋ ጲላፆሲ ቤዒዴ፥ ሃ ኣኪዴ፥ «ሃ ቢታኒ ሃይቂያዋን ታኒ ጌሊኬ፤ ሄዋ ሂንቴንቱ ኤሪቴ» ያጊዴ ሺቄዳ ኣሳ ሲንን ባሬ ኩሺያ ሜጬቴዳ። #ዛር 21፡6-9

25ሺቄዳ ኣሳይ ኡባይ ዛሪዴ፥ «ኣ ሱ ጎሚ ኑናኔ ኑ ናና ጋኮ» ያጌዳ።

26ሄዋፔ ጉዪያን፥ ጲላፆሲ ባርባና ኡንቱንቶ ቢሌዳ፤ ሊሱዋን ዬሱሳ ሾጪዴ፥ ማስቃሊያ ቦላ ሚሲማሪያን ሺዴ ካቃናው ኡንቱንቶ ኣዴ ኢሜዳ።

ዎታዳራቱ ዬሱሳ ቦላ ቂሊጬዲኖ

(ማር 15፡16-20፤ ዮህ 19፡2-3)

27ሄዋፔ ጉዪያን፥ ጲላፆሳ ዎታዳራቱ ዬሱሳ ጋዲያ ኣዪሲያዋ ቤሩዋ ኣፊና፥ ዎታዳራቱ ኡባይ ኣ ሚዪያን ዩዪ ኣዴ ኤቄዲኖ። 28ኣ ማዩዋ ቃሪ ኣኪዴ፥ ዞዖ ማዩዋ ኣ ማዪዜዲኖ። 29ቃሲ ኣጉን ኣኪሊሊያ ጊጊሲዴ፥ ኣ ሁጲያን ዎዲኖ፤ ኣ ኡሼቻ ኩሺያን ማቃ ፃምዓ ኦይዴ፥ ኣ ሲንን ጉልባቲዴ፥ «ኣዪሁዳቱዋ ካቴው፥ ሳሮ ዴዓይ!» ያጊዴ፥ ኣ ቦላ ቂሊጬዲኖ። 30ኣ ቦላ ጩቼዲኖ፤ ሄ ማቃ ፃምዓ ኣኪዴ፥ ኣ ሁጲያ ሾጬዲኖ። 31ኡንቱንቱ ኣ ቦላ ቂሊጬዳዋፔ ጉዪያን፥ ዞዖ ማዩዋ ኣፔ ቃሪ ኣኪዴ፥ ኣ ማዩዋ ኣ ማዪዜዲኖ፤ ቃሲ ማስቃሊያ ቦላ ሚሲማሪያን ሺዴ ኣ ካቃናው ኣፌዲኖ።

ዬሱሲ ካቄቴዳ

(ማር 15፡21-32፤ ሉቅ 23፡25-43፤ ዮህ 19፡17-27)

32ኡንቱንቱ ካሬ ኬሲዴ፥ ኢቲ ሲሞና ጌቴቲያ ቄሬና ጋዴ ኣሳ ዴሚዴ፥ ዬሱሳ ማስቃሊያ ዎልቃን ቶሴዲኖ። 33ጎልጎታ ጌቴቲያሳ ጋኬዲኖ። «ጎልጎታ» ያጌቲያዌ «ሁጲያሳ» ጊያዋ። 34ሄዋን ኡንቱንቱ ጫሜዳ ዎዪኒያ ኤሳ ዬሱሳው ኡሻናው ኢሜዲኖ፤ ኢ ሄዋ ጋንፂ ፄሊዴ፥ ኡሼናን ኢፄዳ። #ማዝ 69፡21

35ኡንቱንቱ ማስቃሊያ ቦላ ሚሲማሪያን ሺዴ ኣ ካቆዋፔ ጉዪያን፥ ኣ ማዩዋ ሻኪዴ፥ ሳማ ዬጊዴ ኣኬዲኖ። #ማዝ 22፡18 36ሄዋፔ ጉዪያን፥ ኣ ናጋናው ሄዋን ኡቲ ኣጌዲኖ። 37ቃሲ፥ «ሃዌ ኣዪሁዳቱ ካቲያ ዬሱሳ» ያጊዴ ሞቱ ፃፌቶዋ ኣ ሁጴ ባጋና ዎዲኖ። 38ዬሱሳና ሄ ዎዴ ላዑ ካዪሳቱዋ ኢቱዋ ኣፔ ኡሼቻ ባጋና፥ ቃሲ ኢቱዋ ኣፔ ሃዲርሳ ባጋና፥ ማስቃሊያ ቦላ ሚሲማሪያን ሺዴ ካቄዲኖ።

39ኦጊያና ኣያ ኣሳይ ዬሱሳ ካዴ፥ ባሬንቱ ሁጲያ ቃዴ ቦሬዲኖ። #ማዝ 22፡7፤ 109፡25 40«ጌሻ ጎሊያ ኮላዴ ሄዙ ጋላሳ ጊዶን ኬፂያዎ፥ ኔ ሁጲያ ኣሻ፤ ኔኒ ፆሳ ናዓ ጊዶፔ፥ ኣኔ ማስቃሊያ ቦላፔ ዎ» ያጌዲኖ። #ማት 26፡61፤ ዮህ 2፡19

41ሄዋዳንካ፥ ቄሳቱዋ ካፓቱ ሂጊያ ታማሪሲያዋንቱናኔ ጪማቱዋና ኢቲፔ ዬሱሳ ቦላ ቂሊጪዴ፥ ሃዋዳን ያጌዲኖ፤ 42«ሃራንታ ኣሼዳ፤ ሺን ባሬና ኣሻናው ዳንዳዬና። ኢ ኢስራዔሊያ ካቲያ፤ ኣኔ ማስቃሊያ ቦላፔ ሃዒ ዎ፤ ኑኒካ ቃሲ ኣኒ ኣማናና። 43ፆሳን ኢ ኣማኔቴ፤ ፆሳይ ኣ ኣሻናው ኮዮፔ ኣኔ ኣሾ፤ ኣያው ጎፔ፥ ኢ ባሬና፥ ‹ታኒ ፆሳ ናዓ› ጌ» ያጌዲኖ። #ዛር 22፡8

44ቃሲ ሃራይ ኣቶ፥ ኣናና ማስቃሊያ ቦላ ሚሲማሪያን ሼቲዴ ካቄቴዳ ካዪሳቱካ ሄዋዳን ጊዴ፥ ኣ ቦላ ቂሊጬዲኖ።

ዬሱሲ ሃይቄዳ

(ማር 15፡33-41፤ ሉቅ 23፡44-49፤ ዮህ 19፡28-30)

45ኡሱፑን ሳቲያፔ ዶሚዴ፥ ኡዱፑ ሳቲያ ጋካናው፥ ቢታይ ኡባይ ሜዳ። 46ኡዱፑ ሳቴ ጊዲያ ሄራን ዬሱሲ ባሬ ቃላ ቁ ኦዴ፥ «ኤሎሄ፥ ኤሎሄ፥ ላማ ሳባቂታኒ?» ያጌዳ። ሄዋ ጉሳይ፥ «ታ ፆሳው፥ ታ ፆሳው፥ ታና ኣዪሲ ጮዑ ጋዲ?» ጉሳ። #ማዝ 22፡1

47ሄዋን ኤቄዳ ኣሳፔ ኢቱ ሄዋ ሲሲዴ፥ «ሃ ቢታኒ ኤላሳ ፄሴ» ያጌዳ። 48ሄ ማንዒያንካ ኡንቱንቱፔ ኢቱ ዎፂዴ፥ ኢስፖንጂያ ኣኪዴ፥ ጫላ ዎዪኒያ ኤሳ ጊዶ ዬጊዴ፥ ሄዋ ማቃ ፃምዓ ፄራን ዎዴ፥ ኡሻናው ኣ ዶናኮ ሺሼዳ። #ማዝ 69፡21 49ሺን ዮኮንቱ፥ «ኣኔ ዴዓሻ፥ ኤላስ ኣ ኣሻናው ያናዌንቶ ቤዓና» ያጌዲኖ። 50ዬሱሲ ላዔንዋ ባሬ ቃላ ቁ ኦ ዋሲዴ፥ ሃይቂ ኣጌዳ።

51ኣኬኪቴ፤ ጌሻ ጎሊያን ካቄቴዳ ጋሪዱ ቆሞፔ ዱጌ ጋካናው፥ ላዑ ኬሲዴ፥ ፖሼቲ ዎዳ፤ ሳዓይ ቃፄዳ። ቃሲ ዛላይካ ጳልቄቴዳ፤ #ኬስ 26፡31-33 52ጮራ ዱፉ ዶዬቴዳ። ፆሳ ኣሳፔ ጮራቱ ሃይቄዳዋንቱ፥ ሃይቁዋፔ ዴንዴዲኖ። 53ኡንቱንቱ ዱፉዋፔ ኬሲዴ፥ ዬሱሲ ሃይቁዋፔ ዴንዶዋፔ ጉዪያን፥ ጌሻ ካታማ ቤዲኖ፤ ሄዋን ኡንቱንታ ጮራ ኣሳይ ቤዔዳ።

54ፄቱዋ ካፑኔ ኣናና ዬሱሳ ናጊያ ዎታዳራቱ ሳዓይ ቃፂያዋኔ ሄዋን ሃኔዳዋ ኡባ ቤዔዳ ዎዴ ዳሮ ያዬዲኖ፤ ያሻ ጋሱዋን፥ «ቱሙ ሃዌ ፆሳ ናዓ» ያጌዲኖ።

55ሄዋን ጮራ ማጫዋንቱ፥ ጋሊላፔ ዶሚዴ፥ ዬሱሳ ማዲዴ ካሊያዋንቱ፥ ሃኩዋን ኤቂዴ ፄሊኖ። 56ኡንቱንቱ ጊዶን ማግዳላ ጌቴቲያ ካታማፔ ዬዳ ማይራማ፥ ያዪቆባኔ ዮሴፎ ዳያ ማይራማኔ ዛቢዲዮሳ ናና ዳያ ዴዒኖ።

ዬሱሲ ሞጌቴዳ

(ማር 15፡42-47፤ ሉቅ 23፡50-56፤ ዮህ 19፡38-42)

57ሳዓይ ኦማርሲያ ዎዴ፥ ዮሴፋ ጌቴቲያ ኢቲ ዱሬ ቢታኒ፥ ኣርማቲያሳ ካታማ ቢታኒ ዬዳ፤ ኢ ባሬ ሁጴዉካ ዬሱሳ ካሊያዋ። 58ዮሴፎ ጲላፆሳኮ ቢዴ፥ ዬሱሳ ኣኃ ኣካናው ዎሴዳ፤ ጲላፆሲ ዮሴፎ ኢሜታና ማላ ኣዛዜዳ። 59ዬሱሳ ኣኃ ኣኪዴ፥ ጌሻ ሞጉዋ ማዩዋን 60ፃፂዴ ባሬው ሞጌታናው ሹቻ ዎጬዳ ኦራ ጎንጎሉዋ ጊዶን ኣ ኣኃ ዎዳ፤ ቃሲ ሄ ጎንጎሉዋ ዶናን ዎጋ ሹቻ ጎንዶርሲ ዎዴ፥ ባሺ ቤዳ። 61ማግዳላ ካታማፔ ዬዳ ማይራማኔ ዮኮ ማይራማ ሄዋን ጎንጎሉዋኮ ሲሚዴ ኡቴዲኖ።

62ሳምባታሲ ጊጌቲያ ጋላሳፔ ዎንቴ ጋላሲ፥ ቄሳቱዋ ካፓቱኔ ፓሪሳዋቱ ጲላፆሳና ጋኬቲዴ፥ ሃዋዳን ያጌዲኖ፤ 63«ጎዳው፥ ሄ ዎርዱ ፓፃ ዴዒያ ዎዴ፥ ‹ታኒ ሄዙ ጋላሳፔ ጉዪያን፥ ሃይቁዋፔ ዴንዳና› ያጎዋ ኑኒ ሃሳዬዶ። #ማት 16፡21፤ 17፡23፤ 20፡19፤ ማር 8፡31፤ 9፡31፤ 10፡33-34፤ ሉቅ 9፡22፤ 18፡31-33 64ሄዋ ዲራው፥ ኣ ሞጌዳ ጎንጎሉዋ ሄዙ ጋላሳ ጋካናው፥ ሎይ ናጋና ማላ ኣዛዛሪኪ፤ ሄዌ ዮፔ ኣ ካሊያዋንቱ ቢዴ፥ ኣ ኣኃ ዉዒዴ ኣሳው፥ ‹ሃይቁዋፔ ዴንዴዳ› ያጋናዋንታ፤ ላዔንያ ባላይ ካሴ ባላፔ ኡባ ያ ኢታና» ያጌዲኖ።

65ጲላፆሲ ኡንቱንታ፥ «ሂንቴንቶ ናጊያዋንቱ ዴዒኖ፤ ቢዴ ሂንቴንቶ ዳንዳዬቲያ ኬና ናጊሺቴ» ያጌዳ።

66ሄዋፔ ጉዬ ኡንቱንቱ ቢዴ፥ ሹቻ ቦላ ማታፋ ኣታሚዴ፥ ቃሲ ናጊያዋ ያኒ ዎዴ፥ ዬሱሳ ሞጌዳ ጎንጎሉዋ ናጊሴዲኖ።

선택된 구절:

ማቶሳ 27: dwrENT

하이라이트

복사