ማቶሳ 14

ፃማቂያ ዮሃኒሳ ሃይቁዋ

(ማር 6፡14-29፤ ሉቅ 9፡7-9)

1ሄ ዎዴ ጋሊላ ጋዲያ ኣዪሲያ ሄሮዲሴ ዬሱሳባ ሲሴዳ፤ 2ያቲዴ ባሬ ቆማቱዋሲ፥ «ሃዌ ሃይቁዋፔ ዴንዴዳ ፃማቂያ ዮሃኒሳ፤ ፆሳይ ኦያ ዎልቃማ ማላታ ኢ ኦያዌ ሄዋሳ» ያጌዳ።

3ኣዪሲ ጎፔ፥ ሄሮዲሲ ባሬ ኢሻ ፒሊጶሳ ማቻቲ ሄሮዲያዲ ጋሶታን ዮሃኒሳ ኦይ ቃሺሲዴ፥ ቃሾ ጎሌን ዬጊ ዎዳ። 4ኣዪሲ ጎፔ፥ ዮሃኒሲ ሄሮዲሳ፥ «ኔኒ ሄሮዲያዶ፥ ኔ ኢሻ ማቻቶ ኣካናው ሂጊ ዲጌ» ያጌዳ። #ዎግ 18፡16፤ 20፡21 5ሄሮዲሲ ዮሃኒሳ ዎናው ኮዬዳ፤ ሺን ዪሁዳ ኣሳይ ናቢያዳን ዮሃኒሳ ፄሌዳ ዲራው፥ ኣሳው ያዬዳ።

6ሺን ሄሮዲሲ ዬሌቴዳ ጋላሳ ባላይ ጋኪና፥ ሄሮዲያዲ ናታ ኣሳ ሲንን ዱራዴ ሄሮዲሳ ናሼቻው። 7ሄሮዲሲ ናቶ፥ «ኔና ሎዔዳዋ ኣያኔ ጊዶፔ፥ ታና ኦቻ፤ ታኒ ኔው ኢማና» ያጊዴ ኢዚው ጫቄዳ። 8ናታ ባሬ ዳይ ዞሪያ ኣካዴ ሄሮዲሳ፥ «ፃማቂያ ዮሃኒሳ ሁጲያ ሃ ዎጪቲያን ዎዴ ታው ኢማ» ያጋዱ። 9ካቲ ኣው ቃሬቴዳ፤ ሺን ባሬ ጫቁዋ ዲራዉኔ ባሬናና ማዳን ኡቴዳ ኢማ ዲራው፥ ኢዚው ዮሃኒሳ ሁጲ ኢሜታና ማላ ኣዛዜዳ። 10ካቲ ኪቲዴ፥ ዮሃኒሳ ቆያ ቃሾ ጎሌን ሙጪሴዳ። 11ሁጲያ ዎጪቲያን ዎ ኣሂዴ፥ ናቲው ኢሜዲኖ፤ ናታ ሄ ሁጲያ ባሬ ኣቲኮ ኣፋዱ። 12ዮሃኒሳ ካሊያዋንቱ ዪዴ፥ ኣ ኣኃ ኣፊዴ ሞጌዲኖ፤ ሄዋፔ ሲሚዴ ሃ ዬዉዋ ዬሱሳው ቢዴ ኦዴዲኖ።

ዬሱሲ ኢቼሹ ሻዓ ኣሳ ሚዜዳ

(ማር 6፡30-44፤ ሉቅ 9፡10-17፤ ዮህ 6፡1-14)

13ዬሱሲ ሄዋ ሲሲዴ፥ ዎንጊሪያን ጌሊዴ፥ ሄዋፔ ባሬካ ኣሳይ ባይናሳ ቤዳ፤ ኣሳይ ሄዋ ሲሲዴ፥ ካታማፔ ዴንዲዴ፥ ጌዲያን ኣ ካሌዲኖ። 14ዬሱሲ ዎንጊሪያፔ ኬሴዳ ዎዴ፥ ዳሮ ኣሳ ቤዒዴ፥ ሄ ኣሳው ቃሬቴዳ፤ ያቲዴ ኡንቱንቱና ዴዒያ ሃርጋንቻቱዋ ፓዳ።

15ሳዓይ ኦማርሲያ ዎዴ፥ ዬሱሳ ካሊያዋንቱ ኣኮ ዪዴ፥ «ሃዌ ሳዓይ ኣሳይ ባይናሳ፤ ሃዒ ሳዓይ ቃሚዲጌዳ፤ ኣሳይ ኡባይ ቄሪ ካታማቱዋ ቢዴ፥ ባሬንቶ ቁማ ሻማና ማላ፥ ኣሳ ሞዪዛ» ያጌዲኖ።

16ሺን ዬሱሲ ኡንቱንታ፥ «ኣሳይ ባናው ኮሼና፤ ኣሳው ሜቴቲያባ ሂንቴንቱ ኢሚቴ» ያጌዳ።

17ኡንቱንቱ ዛሪዴ ኣ፥ «ኑሲ ሃዋን ኢቼሹ ኡኪፔኔ ላዑ ሞሊያፔ ኣቲን፥ ሃራይ ባዋ» ያጌዲኖ።

18ዬሱሲ ኡንቱንታ፥ «ሄዋንታ፥ ሃ ታኮ ኣሂቴ» ያጌዳ። 19ኣሳይ ማታኒ ኡታና ማላ፥ ዬሱሲ ኣዛዜዳ፤ ኢቼሹ ኡኪኔ ላዑ ሞሊያ ኦይቂዴ፥ ሳሉዋ ፑዴ ፄሊዴ፥ ፆሳ ጋላቴዳ፤ ሄ ኡኪ ሜንዴ፥ ባሬና ካሊያዋንቱሲ ኢሚና፥ ኡንቱንቱ ጮራ ኣሳው ጊሼዲኖ። 20ኣሳይ ኡባይ ሚዴ ካሌዳ፤ ኣቴዳ ሱፓ ዶካ ታማኔ ላዑ ዛምቤሊያ ኩሜዳዋ ዴንዲኖ። 21ሜዳ ኣሳይ ማጫ ኣሳኔ ናና ፓይዴናን፥ ኢቼሹ ሻዓ ጊዲያዋ ኬና።

ዬሱሲ ኣባ ቦላና ሃሜቲዴ ቤዳ

(ማር 6፡45-52፤ ዮህ 6፡15-21)

22ዬሱሲ ጮራ ኣሳ ሞዪዚዴ፥ ባሬና ካሊያዋንታ ዎንጊሪያን ጌሊዴ፥ ባሬፔ ሲንቲዴ፥ ኣባፔ ሄፊን ፒናና ማላ ኣዛዜዳ። 23ኣሳ ሞዪዚዴ፥ ፆሳ ዎሳናው ዴሪያ ሁጲያ ባሬካ ኬሴዳ፤ ሳዓይ ቃሚ ዲጊናካ ሄዋን ባሬካ ዴዔ። 24ሺን ዎንጊሪ ሄ ዎዴ፥ ኣባ ቦላን ዴዒሺን፥ ሲን ባጋና ጫርኩ ጫርኪያ ዲራው፥ ቤታይ ዎንጊሪያ ያኔ ሃኔ ሱጌ።

25ባይራ ኩቱ ዋሲ ሲሚና፥ ዬሱሲ ኣባ ቦላ ሃሜቲዴ፥ ኡንቱንቱኮ ዬዳ። 26ኣ ካሊያዋንቱ ኣባ ቦላ ኢ ሃሜቲሺን ቤዒ ዳጋሚዴ፥ «ሃዌ ሞይቲሊያ ጊዴኔ!» ጊ ያዪዴ ዋሴዲኖ።

27ሺን ዬሱሲ ኤሌካ ኡንቱንታ፥ «ኣይኔ ባዋ፤ ታናቴኔ፤ ያዮፒቴ!» ያጌዳ።

28ጴፂሮሲ ዛሪዴ ኣ፥ «ታ ጎዳው፥ ሃዌ ኔና ጊዶፔ፥ ታኒ ሃ ቦላና ኔኮ ባና ማላ፥ ታና ኣዛዛሪኪ» ያጌዳ።

29ዬሱሲ ጴፂሮሳ፥ «ሃያ!» ያጌዳ።

ጴፂሮሲ ዎንጊሪያፔ ዎዴ፥ ሃ ቦላና ሃሜቲዴ፥ ዬሱሳኮ ቡሳ ዶሜዳ። 30ሺን ጫርኩዋ ዎልቃ ቤዒዴ፥ ያዬዳ፤ ሃይ ባሬና ሚቱዋ ዶሜዳ ዎዴ፥ ባሬ ኮሻ ቁ ኦዴ፥ «ታ ጎዳው ታና ኣሻሪኪ!» ያጊ ዋሴዳ።

31ሄ ማንዒያንካ ዬሱሲ ባሬ ኩሺያ ዬዲ ጴፂሮሳ ኦይቂዴ፥ «ላ ሃ ኣማኑ ላፌዳዎ! ኣዪሲ ሲዲ?» ያጌዳ።

32ኡንቱንቱ ላዑ ዎንጊሪያን ጌሌዳ ዎዴ፥ ጫርኩ ዎፑ ጌዳ። 33ዎንጊሪያ ጊዶን ዴዒያ ኣ ካሊያዋንቱ ዬሱሳ፥ «ኔኒ ፆሳ ናዓ ጊዴዳዌ ቱማ» ያጊዴ ኣው ጎዪኔዲኖ።

ዬሱሲ ጌንሳሬፄን ሃርጋንቻ ፓዳ

(ማር 6፡53-56)

34ኡንቱንቱ ኣባ ፒኒዴ፥ ጌንሳሬፃ ጌቴቲያ ጋዲያ ጋኬዲኖ። 35ሄ ጋዲያ ኣሳይ ዬሱሳ ጊዲያዋ ኤሬዲኖ፤ ሄዋ ሄራ ጋዲያ ኡባ ኪቲዴ፥ ሃርጊያ ኣሳ ኡባ ኣኮ ኣሄዲኖ። 36ሃርጊያ ኣሳይ ኣ ማዩዋ ማጫራ ፃላላ ቦቻና ማላ፥ ኣ ዎሴዲኖ፤ ኣ ማዩዋ ማጫራ ቦቼዳ ኡባይካ ፓፄዳ።

선택된 구절:

ማቶሳ 14: dwrENT

하이라이트

복사