Luka 12
12
Mu yape Nyambi, mwa yapa anu
(Mat 10.26-27)
1Ou ya kwamaharire yoihe eyi, tukore na tukore twanu twa ciwanawanine ku ninga ci mane shime aa cidyatadyata ku mauru. Yesu wa amberire tango erongwa yenthzi ci: “Mu mamere mamene Afarithsi, ao mahetaheta o. 2Kwithsa ethsi thsi na thsikiwa ethsi thsa kukana ku thsikuriwa, kwithsa thso ku horekiwa ethsi thsa kukana ku hokoriwa. 3Mweyo, eyi mu na ambera mu mirema kenge ya ku yuviwa mutenya, eyi mu na yaayera ku mukunda mu tupingwethzi kenge ya ku kuereriwa peuru thzetuwa yo manthzio.
Oyu mu na roera ku yapa
(Mat 10.28-31)
4“Naa mi tongwera amwe mwambushange, mwa yapa awo o kwipaa erama, uno honi munyima thzeyo kwithsa karo ethsi nga a twethsa ku kwama thso kupita ethso. 5Unone kenge ni mi tongwera oyu mu na roera ku yapa, mu yape Nyambi aye oyu o di nokoro o kwipaa erama no ku i konthzera mu dihere, ii, oyo po yo mu na roera ku yapa. 6Kadi tundumbu to mutanu twaa urithsiwa ko tuwayawaya twidi? Unone kwithsa shaanga kofoci ku kwato aka a na vurama Nyambi. 7Shaanga huki thzo ku mitwi thzenu thzi na tariwa. Mweyo, mwa yapa! Amwe po mwaa shimiwa nene kupita tundumbu totungi.
Kucitawera Yesu nji ku mu hamura
(Mat 10.32-33; 12.32; 10.19-20)
8“Naa mi tongwera ci munu yomuhe o ku pa ombangi keyi yange pa meho anu, Mwana Munu naye kenge a ku pa ombangi keyi yenthzi pa meho o tungeru twa Nyambi. 9Unone o ku ni hamura pa meho anu kenge mba a hamuriwa pa meho o tungeru twa Nyambi. 10Munu yomuhe o ku amba thsothsimango kwa Mwana Munu kenge a ku teteriwa, unone o ku yengwera Mupepo Oukenu mbera ka a teteriwa.
11“Ou a ku mi twara mu masinagoge no ku manguvuru nakwakutumina ku ka mi thzekithsa mwa ku cithzekera omu mwa ku ka citawerera nji eyi mwa ku ka amba. 12Inene Mupepo Oukenu kenge a ku mi rongithsa mwethso thsikati eyi mwa ku ka amba yoihe.”
Kathsimo ko fumanyi o mutomba
13Munu yumweya mu mbunga wa amberire Yesu ci: “Murongithsi, o ambere mukurwange a ni ere ku rufumo oru a thsiire tata.”
14Yesu wa mu tawire ci: “Shadi, oyu naa ni pa okoro o ku ratura no ku era rufumo ne edye?” 15Ngou a wa amberire ci: “Mu mamere! Mu cinyunge ku mishovo thzothzihe thzo rununa, inene mwoyo po ka u di mweyi a na fumu munu.”
16Wa shumunineko ko ku wa tera kathsimo ci: “Munu yumweya o fumanyi wekarire no dikanda dyo muve o wiro omu a wanine edya yoingi. 17Wa cipurire yothsinda ci: ‘Ngepi ni tenda? Ka ni di nomu mo ku paka edya yange yoihe.’
18“Wa ambire ci: ‘Kenge na ku kwama kenge, kenge na ku umburura eshete yo kare no ku umba yoikuru honi, na ku pakemo vuroto wange netere yange yoihe. 19Wangu na kwikare pashi no ku ciambera nothsinda ci: “Ame no munu o thsiyauthzi ni di nenu yoingi eyi ya ku shimba myaka thzothzingi kadi ya ku pwa. Ni turumwithse honi, ni dye, ni nwe, ni cikore.” ’
20“Unone Nyambi wa mu amberire ci: ‘Owe thsitomba! Ouno othsiku waa fa, edye oyu o thsiera yoihe eyi no kwama?’ ”
21Yesu wa manenenine ku amba ci: “Dyo i di no ku munu o ku cungumeka rufumo unone ka a di no rufumo rweyi ya Nyambi.”
Mwa cithzekera
(Mat 6.25-34)
22Yesu wa amberire erongwa yenthzi ci: “Mweyo, naa mi ambera ci mwa cithzekera yo mwoyo wenu ci ine mwa ku dya, nji yerama yenu ci ine mwa ku vata. 23Inene mwoyo po ukuru mu thsivaka kupita edya, nerama ikuru mu thsivaka kupita evata. 24Mu mone mañwarara. Ka a dima nji ku cora, ka a wana etaravo nji eshete. Unone Nyambi aa a rera, amwe po mwakuru nene mu thsivaka ku pita enyunyi. 25Edye ku kwenu o ku twethsa ku shumuna shaanga thsitunde thsofoci ku mwoyo wenthzi ko ku cithzekera? 26Ngeci mwaa kwanga enu yoionye kengeyo, ine yo ku coyokera enu yoshokuru?
27“Mu mone matemo o mu murundu edi a kura. Ka a fuyuka ku kwama nji ku hota wanda, unone naa mi tongwera ci shaanga Fumu Solomoni mu kutethzima kwenthzi kokuhe ka ekarire nekoveyo yoiwa eci aa matemo. 28Ngeci Nyambi aa twethsa ku vateka kengeyo muhonyi o mu murundu o kuninga ci rero ko u di, peunthza waa kuheriwa mu dirungu ne, ene nga ka a twethsa ku mi yenga amwe? Mayuwane amwe mwanu mwa shopu thsitawo!
29“Karo mwa cithzekera ci ine mwa ku dya nji ci ine mwa ku nwa, mwa cishupwathzeka enu yo kengeyo. 30Inene eyi yoihe po yodiyo a na randarandanga anu o kaye. Unone Tata wenu po o na dimuka ci yaa fotahara ku kwenu eyi. 31Uno honi mu fote Kutumina kwenthzi, aye kenge a ku mi pa yoihe eyi enu.
Rufumo ro ku wiru
(Mat 6.19-21)
32“Wa yapa owe o mutangaana, inene Tata wenu po i na mu nyanyukithsa yo ku mi pa Kutumina. 33Mu urithse eyi mu di nayo, ao madi mu a pe ahepwe. Mu cipakere epaupau yo kukana ku kurupara, rufumo ro mu wiru ro kukana kwipa, kwithsa mwithzi oyu nga thzako nji ku rwipithsa menje. 34Oku ru di rufumo rwenu, no micima thzenu kodiyo thzi di.
Mu taterere no ku ciroithsera kukeya kwa Fumu
35“Mu ange miya thzenu thzi tanare, karo mu muneke tumbarambara twenu no ku ciroithsera yoihe eyi ya ku mi keyera. 36Mu cipiture eci anu o ku taterera ñathsire wo ci a ka huke ku ka tunda ku thsidika thso wenga, ci popahe apa a ka hukera kamona ayepo ngongomona, a yokorore ku mu yanthzurwera. 37Akwathsiyauthzi angamba awa a ku na wana ñathsire wo o kwa kenga ou a ku kuma. Naa mi tongwera yoshemwa ci kenge a ku honya thsikoveyo no ku wekarithsa ku tafure a ku wa ere edya. 38Awo angamba kenge a kwikara no thsiyauthzi ou a ku na wa wana o kwa kenga ou a ku keya pa kaci kothsiku nji ruura.
39“Mu dimuke ci thsinda thsa nthzio nga aa dimukanga thsikati ethsi a keya mwithzi, nga tumba a thsierera mwithzi o ku tuva nthzio thzenthzi. 40Namwe karo mu ciroithsere, inene ame no Mwana Munu kenge na ku keya thsikati ethsi mu na kana ku dimuka.”
Ngamba o ku rurama noyu o kukana ku rurama
(Mat 24.45-51)
41Peturu wepurire ci: “Fumu, aka kathsimo ne waa ka tera atwe pohuma nji nanu amweya?”
42Fumu wa mu tawire ci: “Edye mupika o munu shemwa nonyanyami, oyu a ku pa ñathsire wenthzi ku endithsa nthzio thzenthzi no ku eranga aenthzenthzi apika edya ko thsikati ethsi thsi na roera? 43Oyo mupika oyo kenge a kwikara no thsiyauthzi ngeci waa ku na mu wane ñathsire wenthzi o ku tendanga kengeyo, ou a ku ka huka. 44Naa mi tongwera yoshemwa ci oyo mupika kenge a ku mu pa ku endithsa rufumo rwa ñathsire wenthzi roruhe. 45Unone honi ngeci oya ngamba waa ku ambe mu mucima wenthzi ci, ‘Ñathsire wange kure a di no ku keya,’ ayepo tateka ku dikauranga aenthzenthzi apika wakwerume nambuyama no ku dya no ku nwa no ku penda. 46Ñathsire wenthzi diyuwa edi a ku kuma ko thsiundumukera o ku na kana ku dimuka, oya mupika kenge a ku na mu cinaura tupinthzipinthzi no ku mu paka mofoci nakwakukana ku tawa.
47“Mupika o ku dimuka eyi a shima ñathsire wenthzi ci nga na i tende, unone kadi wa ku i ciroithsera ku i tenda, kenge a ku piwa humbithso thzo ku furiwa nene. 48Unone honi oyu na kana ku dimuka, ngeci ayepo tenda eyi i na roera ku piwera humbithso, kenge a ku piwa humbithso thzothzionye. Oyu na piwa yoingi ku kwenthzi ku na tatereriwa ku wanako yoingi pa ku huthsa, oyu naa piwa ekwama yoikuru kenge kwa ku fotiwa yoingi ku kwenthzi.
Yesu mukwa ku tepa
(Mat 10.34-36)
49“Kuma na ni keyera ku na fakara mudiro mu kaye, naa cikumbwethza ci nga u na yuuma kare. 50Ni di no korovethzo ethzi ni na roera ku korovethziwa, naa thzi cithzekera shime ou thza ku pwa. 51Ene mwa anekera ci naa keyera ku reta thsiyaro pano pa kaye? Dyombo, naa keya ku na tepa anu. 52Ku tunda pano mikuta thzothzingi kenge thza ku citepa, akwa mutanu mu dira dyo kenge a ku citepa, ahatu a ku thzimbe aidi, nawo aidi a ku thzimbe waya ahatu.
53“Mushemi o mukwerume a ku thzimbe mwanenthzi o mukwerumeana, naye mukwerumeana a ku thzimbe tata wenthzi, mushemi o mbuyama a cithzimbe na mwane o mbuyamaana, naye mbuyamaana a thzimbe mama wenthzi, ngumwenya munu a cithzimbe na munu wa mwane, naye munu wa mwane a thzimbe mama wa munuwenthzi.”
Kudimukera ekati
(Mat 16.2-3)
54Yesu wa thsiurukerire ku mbunga no ku amba ci: “Kamona mu mona mavui o kwa tunderera mu mutoko, mwaa ninga ci mvura pepi a di no ku roka, karo yaa dikara kengeyo. 55Yoihe mu yuva mupepo o ku u pepa ku tunderera mu mboera mwaa amba ci: ‘Kenge ku pya’, karo yoshemwa dyo ikara. 56Amwe mwakwamahetaheta! Mwaa kenga pashi no ku wiru no ku dimuka thsikati thso mwaka, mwaa kwanga ngepi ku dimuka yo thsino thsikati edi ya kwikara?
Eyi mu na roera ku tenda o ku mu na cipithsera
(Mat 5.25-26)
57“Ngepi dyo ku kwanga ku hangura eyi i na roera? 58O ku thza na mukwathsithzimbo thsoe ku kuta, o ereke nene ku ciyuva nenthzi mu dikuñwa. Inene kamona ayepo ka ku kumithsa kwa mukwakuratura, mukwakuratura aye kenge a ka kwithsera tupathso otu tu ka ku twara mu kamenga. 59Naa ku tongwera ko wa ku tundamo shime ou wa ku manenena ku kura murandu ouhe.”
©2023 The Seed Company
