ಯೋಹಾನ 3
3
ಯೇಸು ಅಜು಼ ನಿಕೊದೇಮ
1ಏಕ್‌ ಜ಼ಣೊ ಯೆಹೂದ್ಯವಾಳೊ ಅದಿಕಾರಿ ಹುಯಿರೋಥೊ, ಇನು ನಾಮ್ ನಿಕೊದೇಮ ಅಜು಼ ಯೊ ಫರಿಸಾಯರ್‌ನಿ ಝೂ಼ಂಡ್‌ವಾಳಮ ಏಕ್‍ಜ಼ಣೊ ಹುಯಿರೋಥೊ. 2ಯೋ ಏಕ್‌ ರಾತೆ ಯೇಸುಕನ ಐನ್, “ರಬ್ಬಿ, ತು ದೇವ್‍ಥಿ ಆಯೋಹುಯೊ ಫಡಾವವಾಳೊ ಕರಿ ಹಮೂನ ಮಾಲುಮ್‌. ತು ಕರಾತೆ ಖ್ಹಣೇದ್‍ನು ಕಾಮ್ ಕರಾನ, ದೇವ್ನಿ ಮದತ್ ಕೊಯ್ನಿತೆ ಕಿನೇಥೀಬಿ ಕೋ ಹುವಾನಿ” ಕರಿ ಬೋಲ್ಯೊ.
3ಇಮ್‌ ಬೋಲ್ತಾನ ಯೇಸುನೆ, “ಮೇ ತುನ ಖ್ಹಾಚಮಾಬಿ ಬೋಲುಸ್ಕಿ, ಕೋಣ್‌ತೋಬಿ ಏಕ್‌ ಜ಼ಣು ದೇವ್ನಿ ರಾಜ್ಯಮ ಪಾಛು಼ ಪೈದಾ ನಾ ಹುಯೂತೊ, ದೇವ್‌ನು ರಾಜ಼್‌ನ ದೇಖಾನ ಕೋ ಹುವಾನಿ?” ಕರಿ ಬೋಲ್ಯೊ.
4ತದೆ ನಿಕೊದೇಮನೆ ಯೇಸುನ, “ಏಕ್‌ ಅದ್ಮಿ ಬುಢು ಹುಯಿಜಾ಼ವಪರ್, ಪಾಛು಼ ಪೈದಾ ಹುವಾನ ಕಿಮ್ ಉಷೆ? ಯೋ ಅದ್ಮಿ ಪಾಛು಼ ಇನಿ ಆಯಾನ ಗರಬ್‌ಮ ಪೇಶಿನ್, ಪೈದಾ ಹುವಾನ ಕೋ ಹುವ್ವಾನಿನಿ! ಕರಿ ಬೋಲ್ಯೊ.
5ಇಮ್‌ ಬೋಲ್ತಾನ ಯೇಸುನೆ, “ಮೇ ತುನ ಖ್ಹಾಚಮಾಬಿ ಬೋಲುಸ್ಕಿ, ಏಕ್‌ ಅದ್ಮಿ ಪಾಣಿಥೀಬಿ, ಆತ್ಮಥಿ ಪೈದಾ ನಾ ಹುಯೂತೊ,#3:5 ಪಾಣಿಥೀಬಿ, ಆತ್ಮಥೀಬಿ ಬ್ಯಾಪ್ತಿಸ್ಮ ಲೇವ್ಣುಕರಿ ಮತ್‌ಲಬ್. ಯೋ ದೇವ್ನಿ ರಾಜ್ಯಮ ಜಾ಼ಶೇಸ್ ಕೊಯ್ನಿ. 6ಏಕ್‌ ಜ಼ಣೊ ಶರೀರ್‌ಥಿ ಪೈದಾ ಹುಯಿರೊಸ್. ಕತೋಬಿ ಆತ್ಮೀಕಥಿ ರ‍್ಹವಾಳೊ ಯೊ ಆತ್ಮಥಿ ಪೈದಾ ಹುವ್ವವಾಳು ಹುಯಿರ್ಹುಸ್. 7ತುಮೆ ನವೇಥಿ ಪೈದಾ ಹೋಣು ಕರಿ ಬೋಲ್ಯೋತೊ ಇನ ಆಶ್ಚರ್ಯ ನಾಖಾವ್ಣು. 8ವಹಿರೊ ಇನ ಕಿಮ್ ಹೋಣುಕಿ ತಿಮ್ ವಾಗ್‌ತು ರ‍್ಹೇಸ್‌; ಇನೊ ಅವಾಜ಼್ ತುನ ಖ್ಹಮಜ಼್ ಪಡಾಸ್‌, ಪಣ್ಕಿ ಯೋ ಕಿಜ್ಗಾ಼ಥು ಉಳ್ಯಾವಾಸ್‌ ಅಜು಼ ಕಿಜ್ಗಾ಼ ಉಳ್ಯುಜಾ಼ಸ್‌ ಕರಿ ತುನ ಮಾಲುಮ್‌ ಪಡಾಕೊಯ್ನಿ, ಆತ್ಮಥಿ ಪೈದಾ ಹುವ್ವವಾಳು ಖ್ಹಾರೂಬಿ ಇಮ್ನೀಸ್‌ಘೋಣಿ ಹುಯಿರ‍್ಹೂಸ್” ಕರಿ ಬೋಲ್ಯೊ.
9ನಿಕೊದೇಮನೆ, “ಆ ಕಿಮ್ ಉಶೆ?’ ಕರಿ ಪುಛಾ಼ಯೊ.
10ಯೇಸುನೆ, “ತೂ ಇಸ್ರಾಯೇಲ್‌ ಅದ್ಮಿನ ಬೋಲಿ ವತಾಳವಾಳೊ ಗುರು ಹುಯಿರ‍್ಹೋಸ್, ತೋಬಿ ತುನ ಆ ಮಾಲುಮ್‌ ಪಡಾಕೊಯ್ನಿಕಿಶೂ? 11ಮೇ ತುನ ಖ್ಹಾಚ ಬೋಲುಕರುಸ್: ಹಮೂನ ಮಾಲುಮ್‌ ಛಾ಼ತೆ ಇನಿ ಬಾರೇಮ ಹಮೆ ಬೋಲೆಸ್, ಅಜು಼ ಹಮೆ ದೆಖೇಸ್ತೆ ಇನಿ ಬಾರೇಮ ಸಾಕ್ಷಿ ಬೋಲೆಸ್, ಕತೋಬಿ ತುಮೆ ಹಮೆ ಬೋಲೆಸ್ತೆ ಇನ ಮಾನಕೊಯ್ನಿ. 12ಮೆ ಜಗತ್ನಿ ವಾತ್ನಿ ಬಾರೇಮ ಬೋಲ್ಯೋತೊ ತುಮೆ ಇನ ಮಾನಕೊಯ್ನಿ, ಅಮ್ ರ‍್ಹವಾಪರ್ ಮೆ ತುಮೂನ ಸೊರ್ಗನಿ ವಾತೆನ ಬೋಲ್ಯೊತೊ, ತುಮೆ ಕಿಮ್ ವಿಶ್ವಾಸ್‌ ಕರ್ಶು? 13“ಸೊರ್ಗಥೊ ಉತ್ರಿನ್ ಆಯೋತೇಸ್‌ ಕತೊ, ಅದ್ಮಿನೊ ಛಿಯ್ಯೋಸ್ ಪಣ್ಕಿ, ಬಿಜು಼ ಕೋಣ್‌ಬಿ ಸೊರ್ಗಾನ ಚ಼ಢೀನ್‌ ಕೋ ಜೈ಼ರ‍್ಹೂನಿ”.
14ಮೋಶೆನೆ ಉಜ್ಜಾ಼ಡಿ ಝ಼ಗೋಪರ್‌ ತಾಂಬಾನು ಖ್ಹಾಪ್‍ನ ಊಚ಼ ಖಂಬಾಪರ್‌ ಮ್ಹೇಲ್ಯೋತೆ#3:14 ಅರಣ್ಯಕಾಂಡ 21.9 ಇಮ್ಮಸ್, ಅದ್ಮಿನೊ ಛಿಯ್ಯಾನಾಬಿ ಊಚು಼ ಪಾಡ್ನು. 15ಅನೇಥಿ ಇನಾಪರ್‌ ವಿಶ್ವಾಸ್‌ ಕರಾವಾಳು ಹರೇಕ್ನ ಹಮೇಶಾನಿ ಜಿ಼ಂದ್‌ಗಿ ಮಳ್‌ಶೆ” ಕರಿ ಬೋಲ್ಯೊ. 16ದೇವ್ನೆ ಆ ಜಗತ್‌ನು ಅದ್ಮಿನ ಕೆತ್ರೇಸ್ಕಿ ಜಾ಼ಖ್ಹತ್ ಪ್ಯಾರ್ ಕರೀನ್, ಇನೊ ಏಕ್‍ನೊ-ಎಕ್ಕಸ್ ಛಿಯ್ಯಾನ ದಿದೊ; ಇನ ನಂಬವಾಳು ಏಕ್‌ಬಿ ಮರ‍್ನುನಾತೆ ಹರೇಕ್ನ ಹಮೇಶಾನಿ ಜಿ಼ಂದ್‌ಗಿ ಮಳ್‌ಣು ಕರಿ ಇನ ದಿದೊ. 17ದೇವ್ನೆ ಇನ ಛಿಯ್ಯಾನ ಮೋಕ್‌ಲ್ಯೊತೆ ಆ ಜಗತ್ನ ಅದ್ಮಿನ ರಕ್ಷಣೆ ಹೋಣುಕರಿ ಮೋಕ್‌ಲ್ಯೊತೆ ಪಣ್ಕಿ, ತೀರ್ಪ್‌ ಕರಾನಖ್ಹಾಜೆ ಕಾಹೆ.
18ಇನ ನಂಬವಾಳಾನ ತೀರ್ಪ್‌ ಕೋ ಹೊಯ್ನಿ, ಕತೋಬಿ ನಂಬಕೊಂತೆ ಇನ ತದೇಸ್‌ ತೀರ್ಪ್‌ ಹುಯ್ಗಿ. ಶನಕತೊ ಇನೆ ದೇವ್ನ ಎಕ್ಕಸ್ ಛಿಯ್ಯಾನ ನಾಮ್ನ ಉಪ್ಪರ್ ಭರೋಖ್ಹೊ ಕರ‍್ಯೊಕೊಯ್ನಿ. 19ಯೋ ತೀರ್ಪ್‌ ಶಾತ್‌ಕತೊ ಉಜಾ಼ಳು ಜಗತ್‌ಮ ಆಯುತೋಬಿ ಅದ್ಮಿವೊನು ಕಾಮ್ ಖರಾಬ್‍ಥೂತೆ ಇನಖ್ಹಾಜೆ ಇವ್ಣೆ ಉಜಾ಼ಳೇಥಿಬಿ ಅಂಧಾರನ ಪ್ಯಾರ್ ಕರ‍್ಯು. 20ಖರಾಬ್‌ನ ಕರಾವಾಳು ಇವ್ಣು ಖರಾಬ್ ಕಾಮ್‍ಅಖ್ಖು ಭಾರ್‌ ಆವ್‍ತುರ‍್ಹೀಶೆಕರಿ ಉಜಾ಼ಳಮ ಆವಕೊಯ್ನಿ ಅಜು಼ ಉಜಾ಼ಳಾನ ವಹೇರ್‌ಕರಸ್. 21ಕತೋಬಿ ಖ್ಹಾಚ಼ನ ಲೀನ್ ಚಾ಼ಲವಾಳೊ ಯೋ ದೇವ್‍ಥಿ ಚ಼ಲೈಲ್ಯವಾಳೊ ಹುಯಿರಿನ್ ಇನ ಕಾಮ್ನ ಭಾರ್‌ ಲ್ಯಾವವಾಳೊ ಹುಯಿರೇಸ್.
ಯೇಸು ಅಜು಼ ಬ್ಯಾಪ್ತಿಸ್ಮ ದೆವಾಳೊ ಯೋಹಾನ
22ಅನ ಬಾದ್‌ಮ, ಯೇಸು ಅಜು಼ ಇನ ಶಿಷ್ಯರ್‌ ಯೂದಾಯ ತಬರ್‌ಖಾನ ಗಯ. ಹಿಜ್ಜಾ಼ ಯೊ ಇವ್ಣ ಶಿಷ್ಯರ್‌ನಿ ಜೋ಼ಡೆ ರ‍್ಹೀನ್, ಬ್ಯಾಪ್ತಿಸ್ಮ ದಿದೊ. 23ಯೋಹಾನಾಬಿ ಸಲೀಮ್‌ ಗಾಮ್‌ನ ಖನ್ನೆ ಥೂತೆ ಐನೋನ್‌ಕನ ಬ್ಯಾಪ್ತಿಸ್ಮ ದೆವ಼್‌ಕರ್ತೋಥೊ. ಶನಕತೊ ಹಿಜ್ಜಾ಼ ಘಣು ಪಾಣಿ ಥೂ; ಅದ್ಮಿಖ್ಹಾರು ಹಿಜ಼್ಜಾಐನ್, ಬ್ಯಾಪ್ತಿಸ್ಮ ಕರೈಲೆವ್‌ ಕರ್ತುಥು. 24ತಬ್ಲಗು ಯೋಹಾನ ಜೇಲ್‌ಮ ಕೊಘರಾಖ್ಯುಥುನಿ ಹೈರುತೆ ಯೋಹಾನ್ನ ಜೇಲ್‌ಮ ಕೋಂಡಿ ಘಾಲಾನ ಪಹಿಲೇಸ್ ಚಾ಼ಲಿರುಥು. #3:24 ಮತ್ತಾಯ 14.32; ಮಾರ್ಕ 6.17; ಲೂಕ 3.19,20
25ಯೋಹಾನ್ನ ಥೋಡ ಶಿಷ್ಯರ್‌ಮ ಅಜು಼ ಏಕ್‌ ಯೆಹೂದ್ಯವಾಳನಿ ಧಾರ್ಮಿಕ ಪದತ್ತಿನಿ ಘೋಣಿನಿ ಅಶ್ನಾನ್‌ಧಾನ್ನಿ ಬಾರೇಮ ಚರ್ಚೆಹುಯು. 26ತದೆ ಇವ್ಣೆ ಯೋಹಾನಕನ ಐನ್, “ಗುರು, ಯೊರ್ದನ್‌ ನದ್ದಿನ ಪಾರ್ಲಿಬಾಜು ತಾರಕನ ಥೋತೆ ಏಕ್‍ಜ಼ಣಾನಿ ಬಾರೇಮ ತುನೆ ಸಾಕ್ಷಿ ಬೊಲ್ಯೊನಿ, ಯೋಸ್ ಹಮ್ಕೆ ಅದ್ಮಿಖ್ಹಾರಾನ ಬ್ಯಾಪ್ತಿಸ್ಮ ದೆವ್‌ಕರಾಸ್‌, ಅಜು಼ ಹರೇಕ್ ಜ಼ಣು ಇನಾಕನ ಒಳ್ಯುಜಾ಼ಸ್!” ಕರಿ ಬೋಲ್ಯು.
27ಯೋಹಾನನೆ ಸೊರ್ಗಥು ತಬ್ಲಗು ದೇವ್ ಕೊ ದೇಯ್ನಿಕಿ ತಬ್ಲಗು ಖೆವಾಬಿ ಅದ್ಮಿನ ಶಾತ್ಬಿ ಕೊ ಮಳ್‌ಶೇನಿ. 28ತುಮೆ ಅಖ್ಖು ಸಾಕ್ಷಿಹುಯಿರಾಸ್, ಮೆ ಬೋಲ್ಯೊಥೊ, “ಮೇ ಕ್ರಿಸ್ತ ಕಾಹೆ, ಕತೋಬಿ ಇನೇಥಿ ಅಗಾಡಿ ಮನ ಮೋಕ್ಲಿರಾಖ್ಯೊಸ್”.#3:28 ಯೋಹಾನ 1.20 29ವ್ಹೆತುಲ್ಡಾನ ಮಳಾಸ್ತೆ ವ್ಹೆತುಲ್ಡೀಸ್, ಕತೋಬಿ ವ್ಹೆತುಲ್ಡಾನೊ ದೋಸ್ ಇನ ಖನ್ನೆ ಭೀರಿನ್‌, ಇನಿ ಅವಾಜ಼್‌ನ ಖ್ಹಮ್‌ಜಿನ್‌ ಘಣು ಖ್ಹುಶಿಕರಸ್. ಆಸ್ ಮನ ಛಾ಼ತೆ ಖ್ಹುಶಿ, ಯೋ ಪೂರ ಹುಯು. 30ಯೋ ಉಪ್ಪರ್ ಪಡಾವ್ಣು ಅಜು಼ ಮೇ ಹೇಟೊ ಹೋಣು” ಕರಿ ಬೋಲ್ಯೊ.
ಸೊರ್ಗಥೊ ಆಯೊಹುಯೊ
31ಕೋಣ್ ಜ಼ಮೀನ್‌ಪರ್ ಛಾ಼ಕಿ ಯೊ ಜ಼ಮೀನ್ನಿ ವಾತೆನಿ ಬಾರೇಮ ಬೋಲಸ್, ಕತೋಬಿ ಕೋಣ್ ಸೊರ್ಗಥಿ ಆವಾಳೋಕಿ ಯೋ ಖ್ಹಾರೇಥಿ ಮಹಾನ್ ಹುಯಿರ‍್ಹೋಸ್. ಆ ಜಗತ್‌ವಾಳು ಆ ಜಗತ್ನ ಮಳ್ಯೊಹುಯೊ ಹುಯಿರ್ಹುಸ್. 32ಯೋ ಶಾತ್‌ ದೇಖ್ಯೋಕಿ ಅಜು಼ ಖ್ಹಮ್‌ಜೋಕಿ ಇನಿ ಬಾರೇಮ ಸಾಕ್ಷಿ ಬೋಲಾಸ್, ತೋಬಿ ಇನಿ ಸಾಕ್ಷಿನ ಕೋಣ್‌ಬಿ ಮಾನಕೊಯ್ನಿ. 33ಕತೋಬಿ ಕೋಣ್ ಇನಿ ಸಾಕ್ಷಿನ ಮಾನಿಲೇಸ್ಕಿ, ಯೋ ಅಮ್ ಕರಾಥಿ ದೇವ್ ಖ್ಹಾಚು಼ ಕರಿ ಸಾಬಿತ್ ಕರಸ್. 34ಶನಕತೊ,ಕಿನದೇವ್‍ನೆ ಮೋಕ್ಲಿ ರಾಖ್ಯೋಸ್ಕಿ, ಯೋ ದೇವ್ನಿ ವಾತೇನ ಬೋಲಾಸ್. ಇನ ದೇವ್ನೆ ಆತ್ಮಥಿ ಭರ್‌ಪೂರ್‌ ಕರಾಸ್. 35ಅಜು಼ ಬಾ ಇನ ಲಾಡ್ನ ಛಿಯ್ಯಾನ ಇನಿ ಅಖ್ಖಿ ಅದಿಕಾರ್‌ನ ದೀರಾಖ್ಯೊಸ್.#3:35 ಮತ್ತಾಯ 11.27; ಲೂಕ 10.22 36ಇನ ಛಿಯ್ಯಾನ ನಂಬವಾಳಾನ ಹಮೇಶಾನಿ ಜಿ಼ಂದ್‌ಗಿ ಛಾ಼; ಕತೋಬಿ ಛಿಯ್ಯಾನಿ ವಾತೆನ ಝಿಟ್ಕಾರಸ್ಕಿ ಇವ್ಣುನ ಯೋ ಜಿ಼ಂದ್‌ಗಿ ಮಳ್‌ಶೆ ಕೊಯ್ನಿ, ಅಜು಼ ದೇವ್‌ನೊ ಇರಾದೊ ಇವ್ಣಾಪರ್ ರ‍್ಹಿಶೆ” ಕರಿ ಬೋಲ್ಯೊ.
The New Testament in Waghri Language © The Word for the World International and Waghri Translation Samiti, Karnataka, 2023.
