Mataayo 4
4
Syetaani kaaregeeja Yeesu
(Maariko 1:12‑13; Ruuka 4:1‑13)
1Neeya Yeesu ˆnaatangasibhwa na Mwoyo Mweru okuja mw‑ibhara, korereki aregeejibhwe na Syetaani.#4:1 Syetaani. Ku‑meeresyo amaafu, ringira mu‑Meeresyo inguru ya Emisango Emikomeeye. 2Yeesu ˆnaamara eyo masuubha makumi gana, mu‑ngeta na mu‑mwisi okurya ebhiryo bhyonebhyone wuri. Omwanya ogwo gwejire gwawa, ˆnoongwa omweko muno. 3Niwo Syetaani ˆnaaja okumuregeeja. ˆNaamubhwira ati, “Araabha awe uri Mwana wa Nyamuwanga, indura amabhuyi ganu gabhe emikaate.” 4Nawe Yeesu ˆnaamusubhya ati, “Jikaamirwe mu‑Bhikaame Ebhyeru ati,
‘Obhurame bhwa omuunu bhutari ku‑bhyokurya era,
tari mu‑kugayuka omusango gunu ogusooka mu‑kanwa ka Nyamuwanga.’#4:4 Ringira Orwichuko rwa Ebhiraagiro 8:3.”
5Neeya Syetaani ˆnaagega Yeesu ˆnaamusira mu‑musi omweru gwa Yerusareemu, ˆnaamwimereegusyu ku‑chisonge cha Riyekaru,#4:5 Riyekaru. Inju inu yaariga iri ya echibharo ya okuramirisya‑mo Nyamuwanga mu‑musi gwa Yerusareemu eyo. Ku‑meeresyo amaafu, ringira mu‑Meeresyo inguru ya Emisango Emikomeeye. 6ˆnaamubhwira ati, “Araabha naawe Omwana wa Nyamuwanga, ijunga ugwe aasi, kwa okubha jikaamirwe mu‑Bhikaame Ebhyeru ati,
‘Nyamuwanga kaja okuragirira bhamaraayika bhaaye,
na owuja okugwa mu‑mabhoko geebhwe,
korereki utaja okwikuujura okuguru kwawo kw‑ibhuyi.’#4:6 Ringira Ijabhuri 91:11‑12.”
7Nawe Yeesu ˆnaamusubhya ati, “Jikaamirwe rindi ati, ‘Waasiga okuregeeja Raatabhugenyi Nyamuwanga waawo.’#4:7 Ringira Orwichuko rwa Ebhiraagiro 6:16.”
8Ku‑bhuteero, Syetaani ˆnaagega Yeesu ˆnaamusira ku‑chiima echireera muno. Awo, ˆnaamweresya obhukama na obhuniibhi bhwa ebhyaro bhyone, 9ˆnaamubhwira ati, “Araabha ukandamya, enikuyaana bhyone bhinu.” 10Nawe Yeesu ˆnaamusubhya ati, “Sooka anu, Syetaani! Jikaamirwe mu‑Bhikaame Ebhyeru ati,
‘Uramye Raatabhugenyi Nyamuwanga waawo.
Umukorere emirimu omwene era.’#4:10 Ringira Orwichuko rwa Ebhiraagiro 6:13.”
11Niwo Syetaani ˆnaasiga Yeesu awo. Awoawo, bhamaraayika bha Nyamuwanga nibhaaja okumufurubhendera.
Yeesu kaamba obhukosi bhwaye abhwerubhweru
(Maariko 1:14‑15; Ruuka 4:14‑15)
12Mbe, Yeesu ejire oongwa ati, Yowana Omubhatiija abhoyerwe mw‑ibhoyero, Yeesu ˆnaagenda mu‑mukoowa gwa Gariraaya. 13Gariraaya eyo, Yeesu ˆnaawuma okusooka mu‑musi gwa Najareeti, ˆnaagenda okwikara mu‑musi gwa Kaperinaawumu. Kaperinaawumu ni musi gunu guri ku‑ngego ya inyanja ya Gariraaya, gusijeene na ebhyaro bhya Jaabhurooni na Naafitaari. 14꞉Jaakorekeene kutyo, korereki gukuumire omusango gunu Nyamuwanga ꞉aayikire ku‑njira ya omuragi Iisaya ati,
15“Mutegeresye, emwe abhaanu bha echaaro cha Jaabhurooni na cha Naafitaari,
jimbaara jinu jiri ku‑njira ya okurosya ku‑nyanja,
na ku‑ngego ya omusima gwa Yorodaani,
mu‑Gariraaya anu bheekaaye abhaanu bha amaanga agandi.
16Abhaanu bhanu bheekaaye mu‑chisuute,
bhaarora obhweru bhwafu,
na bhanu bheekaaye mw‑irengesi rya orufu,
bhaamurikirwa obhweru.”#4:15‑16 Ringira Iisaya 9:1‑2.
17Ku‑mwanya ogwo, Yeesu ˆnaamba okuraasisya abhaanu ati, “Mute ebhibhiibhi bhyemwe ku‑Nyamuwanga, kwa okubha obhukama bhwa mu‑rwire bhuri yeeyi!”
Yeesu kaamba okusora abheeyigisibhwa bhaaye
(Maariko 1:16‑20; Ruuka 5:1‑11)
18Omwanya gunu Yeesu aaribhataga ku‑njekekera ya inyanja ya Gariraaya, ˆnaarora abhakokoosi bhabhiri, Simooni unu aatogwaga Peetero na Andereya omumura waabho. Abhakokoosi abho bhaariga nibheesa rigoobhe mu‑nyanja korereki bhatege jiiswi. 19Yeesu ˆnaabhabhwira ati, “Muuje, munduubhe! Enija okubhakora mubhe abhategi bha abhaanu.”#4:19 Abhategi bha abhaanu. Obhugajuro bhwagwo ni ati, bhasoosye abhaanu mu‑bhibhiibhi bhyebhwe na okubhakumanya aamwi mu‑bhaanu bha Nyamuwanga. 20Awoawo, nibhasiga rigoobhe ryebhwe, nibhamuruubha.
21Yeesu ejire aafogera‑wo imbere kutooto, ˆnaarora abhaanu abhandi bhabhiri, Yakobho na Yowana omumura waabho, abhaana bha Jebhedaayo. Abhaanu abho bhaariga bhari mu‑ngama aamwi na esemwene, nibhasobhooraga amagoobhe geebhwe. Yeesu ˆnaabhabhirikira bhamuruubhe. 22Awoawo, nibhasiga awo ingama na esemwene, nibhamuruubha.
Yeesu keeyigisya abhaanu na okuwosya abharwaye
(Ruuka 6:17‑19)
23Yeesu aaturaga enu na erya mu‑mukoowa gwone gwa Gariraaya. Eengiraga mu‑nju ja ameekofyanyo ga Abhayawudi#4:23 Mu‑nju ja ameekofyanyo ga Abhayawudi. Jinju ejo jaariga jiri jinju ja Abhayawudi okwikofyanya‑mo inguru ya okuramya Nyamuwanga na okwiyigisyanya Ebhikaame Ebhyeru, chimwichimwi mu‑masangisyo geebhwe ku‑rusuku rwa Isabhaato. Ku‑meeresyo amaafu, ringira Inju ya eriikofyanyo rya Abhayawudi mu‑Meeresyo inguru ya Emisango Emikomeeye. na okwiyigisya abhaanu omwo. Aariga wone ˆnaaraasisya abhaanu Emisango ja Ekisi inguru ya obhukama bhwa mu‑rwire na okuwosya abhaanu abha amarwara ga mbaga nyafu. 24Emisango inguru ya Yeesu nijiswirana muno, nijikinga mu‑chaaro choone cha Siiriya. Abhaanu nibhamureetera abharwaye bheebhwe bhoone bha amarwara ga bhuri imbaga. Mu‑bhaanu abho, bhaariga bhari‑mo bhanu bhaariga nibhanyaasibhwa muno, bhanu bhaariga bhawungirwe amasambwa,#4:24 Amasambwa. Ku‑meeresyo amaafu, ringira mu‑Meeresyo inguru ya Emisango Emikomeeye. bhanu bhaariga nibhagwa echitwe na bhanu bhaariga bhafuuwe emibhiri. Yeesu ˆnaabhawosya bhoone. 25Mbe, abhaanu bhaafu muno okusooka Gariraaya, Dekapoori, Yerusareemu, Yuudeya na ku‑njekekera ya omusima gwa Yorodaani nibhamuruubha.
© 2023, Wycliffe Bible Translators, Inc. All rights reserved.
