Mateus 3
3
Yohan Te Taafer sayn mensaaj
Markus 1.1-8; Lukas 3.1-9,15-17; Yohan 1.19-28
1In tëne tsayte is Yohan, Te Taafer, pis an te tesërt fon te Yutëya kang un hot aan kefanag se preetiche, 2am saan:
— Royert aych fon ayre sinte, wayl te Hërkots Raych is xon am khome.
3Iwich Yohan, hat te Profët Isaiias soo kexrip kehat:
“Yemant is am xraaye im tesërt:
Prepareyert te weech tas te Hër torich keen khan!
Macht richte xtroose uf fer iim!”
4Yohan hot sich keklayt mit en khameele pels un en leter këtel un hot kraas hupser un wilte hoonich kes. 5Ti pewooner fon Yeruusalëm, fon te rechioon fon Yutëya un fon te kanse pletser woo um te Jortaan flus rom waare sin imer tëm aan heere kang. 6Tii hon sayn sinte kepaycht un Yohan hot se ketaaft im Jortan Flus.
7Wii Yohan kesiin hot tas fiile fariseyer un satuseyer am khome waare fer aach ketaaft wëre, saat er:
— Kiftiche xlange nist! Weyer hot kasaat tas teyer fom xrekliche xtroof langst khomt woo Kot xikt? 8Macht tings woo tsaycht tas teyer aych keroyert fon ayre sinte het. 9Un saat net ene fer te anere: “Aapraham is unsere foerkhomer.” Wayl ich saan aych sicher tas Hërkot sokaar fon tëne xteen nookhomer fon Aapraham mache khan. 10Ti aks is xon fërtich fer ti peem an te wortsle ap hake. Yeete paam woo khee kuute fruchte kept wërt ap kehakt un ins fayer kexmis. 11Ich taafe mit waser tee woo sich peroyert, awer tee woo noo mich khomt wil aych mit em Hayliche Kayst un mit fayer taafe. Tee is importanter wii ich, un ich sin es net weyert tëm sayn santaale se traan. 12Mit te mixt kawel woo eyer in te hant hot, tuut eyer ti waytse fom xtroo ausnaner mache. Eyer tuut ti waytse in sayne xop uf heepe, awer tuut tas xtroo ferprëne im fayer woo nii aus keet.
Yeesus sayne taaf
Markus 1.9-11; Lukas 3.21-22
13In tëne taache, is Yeesus fon te Kalilëya pis an te Jortan Flus khom fer ketaaft kewe fon Yohan Te Taafer. 14Awer, Yohan wolt tas net mache, am saan:
— Ich mist fon tich ketaaft kewe, un tuu khomst tsu mich?
15Yeesus, awer, am antworte, saat tëm:
— Los tas mool yets soo laye, wayl soo tuun meyer mache was Hërkot wil.
Tan, hot Yohan tas soo in kep.
16Un, wii Yeesus ketaaft kep waar, is eyer klaych aus em waser khom, un tan hot te himel sich uf kemach, un eyer siit em Hërkot sayne Kayst am runer khome wii en taup iwich iim. 17Un en xtim fom himel saat:
— Tas is mayne peliipte Soon, mit weem ich mich fraye.
2022 Sociedade Bíblica do Brasil
