Mateus 10
10
Ti tswelef aphostle
Markus 3.13-19; Lukas 6.12-16
1Yeesus hot sayn tswelef tisiple keruuf un hot tëne autoriteet kep fer xlechte kayste fort yaae un aler xweere krankheete heele. 2Tas sin ti naame fon te tswelef aphostle: eyerxt Simon, Pheeter kenënt, un sayne pruuter Antrëas; Yaakop un sayne pruuter Yohann, puuwe fon Sepeteu; 3Filip, Partolomeu, Thoome un Mateus, te xtayer kaseerer; Yaakop, soon fon Alfeu; Tateu 4un Simon, te natsionalist; un Yuutas Iskariotes, woo Yeesus hinerkang hot.
Ti misioon fon te tswelef aphostle
Markus 6.7-13; Lukas 9.1-6
5Yeesus hot tii tswelef mëner kexikt, un hot tëne tii ortnung kep:
— Keet net uf ti plets woo tii woo khee yute sin leewe, un keet net in te samaritaaner sayn xtet. 6In keeche teel, suucht ti ferloerne xeef fom israelite folek. 7Keet un saat tas aan: “Te Himels Raych is ticht.” 8Heelt ti lepra kranke un anere kranke, tuut ti toote peleepe un temoone fort yaae. Teyer hot kriit oone se petsaale; tan, kept oone kelt ap hoole. 9Tuut net mit nëme im leter këtel net mool kolt, net silwer, net khupfer nikle. 10Uf tee rees nëmt khee sak, net mool en punx mee, net santaale, net mool xtok fer sich xtaype, wayl te aarwater hot ti recht fer se kriin was iim neetich is fer se leewe.
11— Wën teyer in en xtat ore wile rin keet, suucht yemant uf woo aych in ti khost hoole wil un playpt in tëm sayn haus pis teyer fort keet fon tëm plats. 12Wën teyer in en haus rin khomt, saat: “Tas te friite in tëm haus sin sol!” 13Wën ti layt fon tëm haus aych kuut uf nëme, tas te friite pekriisung mit tëne playwe tuut. Awer, wën se aych net kuut uf nëme, hoolt ti pekriisung wech. 14Un, wën in en haus ore xtat ti layt aych net kuut ap hoole wole, net aych aan heere, keet raus fon tëm plats. Un am auskang xitelt te xtaap fon ayre santaale ap, als protest sinaal keeche tii mënxe. 15Ich fersichere aych tas tas woer is: am Kerichts Taach, wërt Hërkot Sotoma un Komora mee petaure als tii xtat.
Persekusioone un Layte
Markus 13.9-13; Lukas 21.12-19
16— Heyert! Ich sin aych am xike wii xeef in te mite fon te wolfe. Teyer mist xlau sin wii ti xlange un oone xlechtichkheet wii ti taupe. 17Past uf, wayl teyer wërt inkexpërt un uf es kericht kenom un wërt ferpaytxt in te sinakooke. 18Wayl teyer mayn aanhënger sayt, kept teyer pay kowerneyer un kheeniche hiin kenom fer julkeyert se kewe. Tan saat teyer te ewankeelium aan fer tii kowerneyer un fer tii woo khee yute sin. 19Wën se aych hiin nëme fer julkeyert se kewe, khimert aych net mit was teyer san mist ore wii teyer xpreche solt. Wën te momënt khomt, kept Hërkot fer aych was teyer xpreche mist. 20Wayl ti wërter woo teyer aus xpreche tuut sin net fon aych selepst, awer khome fom Kayst fon ayre Fater, woo torich aych xpreche tuut.
21— Fiile wëre sayn aychne kexwister ap kewe fer toot kemach wëre, un ti eltre wëre sayn khiner ap kewe. Ti khiner playwe keeche sayn eltre un tuun se umpringe. 22Al wëre aych hase wayl teyer mayn aanhënger sayt. Awer weyer xtram pis ans ën playtp kept keret. 23Wën teyer keyacht kept in en xtat, rayst aus noo en aner. Ich fersichere aych tas tas woer is: teyer kept net fërtich mit ayer aarwat in te kanse xtet fon Israel eep te Soon fom Man khomt.
24Khee ëne xiiler is importanter wii sayne leerer, un khee knecht is importanter als tee woo en aanxtelt. 25Also, te xiiler sol tsufriite kewe wën eyer kept wii sayne leerer, un te knecht in sin wii tee woo en aankextelt hot. Wën te xëf fon te familye Pelsepuu kenënt kept, tan wëre ti layt fon tee familye mit noch xlechtere naame ferxënt.
Fon weem sole mer pang hon
Lukas 12.2-7
26Also, praycht khee pang hon fon nimant. Ales was tsuu ketekt is, kept uf ketekt; un ales was ferxtekelt is, wërt pekhant. 27Was ich aych in te tunkelheet saan, saat tas noch mool im hele licht. Un was teyer in kehëmnis keheyert het, saat tas kans klaar aan. 28Praycht khee pang hon fon tëne woo te khërwer umpringe, awer khëne net ti seel umpringe. Awer, khënt pang hon fon Hërkot, woo in te hel fernichte khan soo ti seel wii te khërwer. 29Is es, filaycht, net woer tas tswaay feelcher ferkhaaf kewe fer phaar nikelcher? Awer khee ëne fon tëne falt uf te porem wën te Fater tas net soo paseere lost. 30Un was aych aan keet, sokaar yeete hoer faatem is ketseelt. 31Soo, praycht khee pang hon, wayl teyer sayt fiil mee weyert als fiile feelcher.
Yeesus konfeseere un ap saan – Tsu Yeesus keheere
Lukas 12.8-9
32— Wën yemant unich te layt fersichert tas eyer tsu mich keheyert, tuun ich aach, am Kericht Taach, fersichere foer mayne Fater, woo im himel is, tas eyer mich keheyert. 33Awer, wën yemant unich te layt saat tas eyer mich net keheere tuut, tuun ich aach, am Kericht Taach, saan foer mayne Fater, woo im himel is, tas eyer net tsu mich keheyert.
Xwaat anxtat friite
Lukas 12.51-53; 14.26-27
34— Tënkt net tas ich friite pringe khom sin fer ti welt. Ich sin net friite pringe khom, awer ti xwaart. 35Ich sin khom fer ti khiner keeche ti eltre xmayse, ti tochtere keeche sayn motere un ti xwiicher tochtere keeche sayn xwiicher motere. 36Un soo, ti xlechste faynte fon en persoon sin sayn aychne ferwante.
37— Weyer sayne fater ore sayn mama mee liipt wii er mich liipt is net weyert mayne aanhënger sin. Weyer sayne soon ore sayn tochter mee liipt wii er mich liipt is net weyert mayne aanhënger sin. 38Tiint net fer mayne aanhënger sin weyer net fërtich is fer se xtërwe soo wii ich xtërwe tuun un mit mich keen. 39Weyer sayn aychne interese suucht wërt nii tas echte leewe hon; awer weyer sich selwer ferkest, wayl er mayne aanhënger is, wërt es echte leewe hon.
Ti peloonunge
Markus 9.41
40Weyer aych uf nëmt is mich am uf nëme; un weyer mich uf nëmt is tee woo mich kexikt hot am uf nëme. 41Weyer en profët uf nëmt, wayl tee en profët is, wërt en teel fon tëm sayn peloonung kriin; un weyer en kuut persoon uf nëmt, wayl tee en kuut persoon is, wërt en teel fon tëm sayn peloonung kriin.
42— Ich fersichere aych tas tas woer is: weyer was kept fer te kleenste fon mayn aanhënger, wëns ach ploos en klaas fol khalt waser is, wërt kans sicher sayn peloonung kriin.
2022 Sociedade Bíblica do Brasil
