ดอ โฆว 42
42
ลอง เฆ อีกัด อาโยว ตัห ฌัม มืง แอฆึบ
1อาโกบ ตึอน บอ นับ เฆ มึห ดี กาซาง โหงว แคง มืง แอฆึบ, อัน บอ ต็อห ดี ฆอน อีมาย อัน, “เหมา อึณ ปาย ปี กอย เบ ดี นี, ตู โบง มาเซ?” 2อัน วี ต็อห, “โอว แฮะ ยึร, อึณ มึห ปี ดี โฮม แคง มืง แอฆึบ. แตห เบ โลง มืง นา เตต, แตห เบ จึห ดีฆาว, แตห เอ วี มึห ปี ดี โฮม, แกวะ แตห เอ ชึม อาซาก เอ.”
3ปัน ตี เฆ อีกัด อาโยว ฆึร วี บอ โลง มืง แอฆึบ, แตห เฆ จึห โหงว. 4อึณ ฆีด มี อาเบนยาม, อี มูห วา อาโยว. อาโกบ ตู แตห อัน โลง รึม โดบ อีกัด อัน. อาโกบ โยว บอ ฆอน เตียะ อัน ดี บอ ฌัม ดูก. 5ปาย ตี เฆ ฆอน อีมาย อาโกบ บอ ตัห ฌัม มืง แอฆึบ. บอ เฆ อี เฮา แฮะ ตัห จึห โหงว. โคว, บอ แคง มืง กานัณ ตึอน เฆ เอต ปี ดี โฮม.
6อาโยว ตึอน ยี มูห ดา กาณา อี อึบ มืง. อึณ มูห อัน, อี โลว กาซาง ปี ดี โฮม ดี ดูอี ดอน อี. ปัน ตี อีกัด อาโยว ตึอน, เฆ บอ ตัห โดง กอย อาโยว, เฆ วี ครึบเครา ดี อาต อัน. 7อัน บอ ยึร อีกัด อัน, อัน บอ นับ อู เฌณ, อึณ มูห เฆ. อัน ยี ตู แตห เฆ นับ, อัน มูห อาเซ. อัน วี กาลาง โฆรห หมึอม โยว ดี เฆ. อัน ต็อห, “เบ ตัห นา เหมา?” เฆ วี ต็อห, “เย แฮะ ตัห มืง กานัณ, แตห เย ปึอน ดี จึห ปี ดี โฮม.”
8ดอ อัน ตี อาโยว ตึอน แฮะ นับ, อึณ มูห อีกัด อัน อี แฮะ ตัห. เฆ ยี ตู นับ ดา กาณา ตี มูห อาเซ. 9อาโยว วี โหลห ปี ดึอม อึณบาว อัน. แฮะ ฮอต อัน วี ต็อห ดี เฆ, “เบ มูห ดูอี อี ปรา ดี คยอง ดี ยอด มืง เย แตห เบ นับ นา เหมา ดี ปึอน ดี ลึบ ตึก มืง เย.”
10เฆ ต็อห, “อาว มูห ปาย ตี แม ดา กาณา เย. แฮะ หมาน อาคาคัร, หมาย แม แฮะ ตัห ดี นี, แตห เย ปึอน ดี จึห ปี ดี โฮม. 11เย ดอน อี มูห ฆอน อีมาย ดา อู วี. เย มูห ดูอี บอด, ดูอี หมึอม. เย หมาย แม ตู ดึอม ปรา ดี คยอง ดี ยอด มืง อี เฮา.”
12อัน ยี ต็อห ดี เฆ, “แฮะ มูห, ปี ต็อห โอว. เบ แฮะ ตัห, แตห เบ คยอง ดี ยอด มืง นี.”
13เฆ วี ต็อห, “แฮะ หมาน ปี ต็อห เย. เย อี มูห หมาย แม, เย มูห อูกัด อูวา ฆึร ดี อา วี. เย มึห ฆูณ อู วี. อัน กอย มืง กานัณ ตึอน. วา เย วี เตียะ, อัน ซี กอย รึม โดบ ฆูณ เย. วา ปอ อู วี อาว ฮู มึห.”
14อาโยว วี เวียะ โฆรห เฆ ต็อห, “อึณ หมาน ปี ต็อห โอว. เบ แฮะ ปรา ดี ตัห ยอด มืง เย. 15โอว ยี ดี เทว เบ. โอว กาลาง โฆรห หมาน อาคาคัร ดี เบ, แตห บอ คูนดีคัม โทม. เซ วา เตียะ เบ ตู ตัห ฌัม ดี นี, โอว ตู วี แตห เบ เวณ, เลห ตัะ ดี นี. 16โคว, แตห เบ ตึย อู วี, แตห อัน แดะ วา เบ ตัห ดี นี. ดอ ฮาว อัน, เบ ดอน อี ยี โลว กอย แคง กาปึม โอว. ปาย ตี โอว ดี เทว โฆรห เบ, โยว เบ กาลาง โฆรห หมาน ตู หมาน. เซ วา เบ ตู ตัห, บอ โอว บอ คูนดีคัม, ยาย ดี นับ, เบ มูห ดา อี ปรา ดี ยอด มืง เย.” 17อัน แฮะ ฮอต กาลาง ปาย ตี อัน วี คร็อง เฆ แคง กาง ดา อี บัร กาปึม อาดา โอย ซีแง.
18บอ ฌัม โอย ซีแง อาโยว ตึอน วี กาลาง โฆรห ดี เฆ. อัน ต็อห, “แตห เบ โบง ปี ต็อห โอว. แฮะ ฮอต, โอว ดี เบลห เบ ฮาว. โอว มืร มูห ดา อี โยว เฌาพรา. 19เซ โฆรห ปี กาลาง เบ ดี โอว แฮะ หมาน, แตห อู วี กอย แคง กาปึม ตี. ดอ อัน ตี, แตห เบ อี เฮา วี เวณ, แตห เบ ปึอน ดี ตึย ปี ดี โฮม ดี อึณโฮม เบ. 20เบ ยี โลว วี ตัห โดง กอย โอว, ตึย บอ วา เตียะ เบ ตัห ดี นี. ปาย ตี โอว ดี นับ, โฆรห เบ แฮะ หมาน. ปัน ตี เบ ดี ลอด ยัม.” อัน แฮะ ฮอต กาลาง ปาย ตี เฆ บอ โพรม.
21เฆ วี ลาย กาลาง กาแต เฆ. เฆ ต็อห, “ดอ ตี นี, เอ วี โลว คัม หมาบ เอ ปี โบง เอ ดี วา เอ. ดอ หมาณ อัน ดี เอ, แตห เอ กาเว อัน, เอ ตู โทม ปี ต็อห อัน, เอ ตู กาเว อัน. ดอ ตี นี ดูก ปี ดึอม คัม อัน แฮะ วี ตัห ฌัม ดี เอ, แตห เอ วี โลว คัม ปาย ตี.”
22อารูเบน ตึอน วี ต็อห, “โอว แฮะ ดึอม กาลาง ดี เบ, แกวะ แตห เบ โบง นา ตู หมึอม ดี วา เอ. เบ ยี ตู ซี โทม. ดอ ตี นี เอ โลว วี คัม แคะ ปี ดึอม โบง เอ ดี อัน.” 23มาแล, เฆ ตู นับ, อาโยว ตึอน แฮะ นับ ดี โทม โฆรห เฆ ตี ดอน แด. โคว, อึณ มึห ดา อี บยาน โฆรห เฆ ดี อาโยว.
24อัน ยี แฮะ ฮอต โทม โฆรห เฆ, อัน วี ฮาว ปอ โปละ อาดา อู กาจัน, แตห อัน ปึอน ดี ยาม. แฮะ ฮอต ยาม, อัน กอ วี ปึอน กาลาง โฆรห ดี เฆ, อัน ดึห อาซีเมโอน, แตห อัน เลห ตัะ เฆ, แตห เฆ ปัก อัน, แตห ดอน อี ยึร.
25ปัน ตี อาโยว วี จัร หมาย อัน, แตห เฆ ฮับ โหงว แคง จาน เฆ, แตห อึณ กอ โนะ, วี ดัว ดี อีกัด อัน. แฮะ ฮอต, อัน จัร หมาย อัน ดึห รึอน อีกัด อัน, วี ฮับ แคง จาน เฆ วี เหมา วี อัน, แตห เฆ บอ มึห ปี ดี โฮม ดอ ฮาว เฆ โดบ อึณเตณ. อัน ยี ตู แตห อาเซ นับ ลอง อัน ตี. เฆ หมาย อัน วี โบง โตต ปี จัร ดา กาณา เฆ. 26วาย อัน ตี เฆ เบลห โกรวกราม เฆ แดง มาลา เฆ. แฮะ ฮอต เฆ วี เลห ตัะ มืง แอฆึบ, เวณ กาง เฆ.
27ดอ ฮาว เฆ โดบ อึณเตณ, แคง หมึร อึณ มึห อูกัด อูวา เฆ อู วี, อัน วึห จาน อัน, แตห อัน ดึห โหงว อี แจก, ดัว มาลา อัน โฮม. ดอ อัน ตี อัน วี ยึร รึอน แฮะ กอย นา แดง โหงว แคง จาน อัน. 28อัน วี ต็อห ดี อูกัด อูวา อัน, “แฮะ มึห อี แฮะ ฮับ รึอน แคง จาน โอว.” ปัน ตี น็อห เฆ กอ วี กาปึณ กาเซา, เฆ วี ลาย ดีหมอด ต็อห, “มาเซ อึณ มูห, ปี โบง เฌาพรา ดี เอ ดอ ตี นี?”
29ปัน ตี เฆ แฮะ ฮอต ฌัม โดง กอย ฆูณ เฆ, เฆ วี กาลาง โตต ดอน โมยว ดี อัน. 30เฆ ต็อห, “ดูอี ตึอน, อี มูห ดา กาณา มืง, อัน แฮะ กาลาง โฆรห อี หมึอม โยว ดี เย ต็อห, เย แฮะ ปรา ดี คยอง ดี ยอด มืง. 31เย วี ต็อห ดี อัน, ‘เย มูห ดูอี หมึอม. เย ตู ดึอม ปรา ดี คยอง ดี ยอด มืง อี เฮา. 32เย บอ ต็อห, เย มึห อูกัด อูวา ฆึร ดี อา วี, ฆูณ เย อู วี. วา เย อู วี ยี แฮะ ยัม. วี เตียะ แฮะ กอย รึม โดบ ฆูณ เย แคง มืง กานัณ.’
33เย แฮะ ฮอต ต็อห ปาย ตี ดา กาณา อี อึบ มืง ตึอน, อัน วี ต็อห, ‘แตห อู วี กอย ดี นี, แตห เบ อี เฮา เวณ แคง มืง เบ, ตึย ปี ดี โฮม ดี อึณโฮม เบ. 34เบ ยี โลว วี ตัห ดี นี, ตัห ตึย วา เตียะ เบ ตัห ฌัม ดี อาต โอว. ปัน ตี โอว ดี นับ, เบ แฮะ กาลาง โฆรห หมาน, เบ ตู มูห ดา อี ปรา ดี คยอง ดี ยอด มืง เย. แฮะ ฮอต โอว ดี วี เบลห อีกัด เบ, อี กอย ดี นี, แตห อัน วี โดบ เบ. โอว ดี บอ แตห เบ วีน ดี แล แคง มืง เย.’”
35เฆ แฮะ ฮอต กาลาง โฆรห ตี ดี ฆูณ เฆ, เฆ วี ฮูห เลห โหงว เฆ แคง จาน เฆ. ดอ อัน ตี เฆ ดอน อี วี ยึร, รึอน กอย แคง จาน เฆ. ดอ วี ยึร เฆ ฮู อี มึห รึอน เฆ, บอ เฆ บอ ฆูณ เฆ วี โยว. 36ฆูณ เฆ วี ต็อห ดี เฆ, “เบ แฮะ ปีโบยห ฆอน โอว. อาโยว แฮะ หราย. บอ อาซีเมโอน อาว ฮู กอย. ดอ ตี นี เบ ดี ดึห บอ อาเบนยาม ดี โอว. โอว บอ โลว คัม อี ตู หมึอม ปาย ตี เซเซ.”
37อารูเบน ตึอน วี กาลาง ดี ฆูณ อัน. อัน ต็อห, “โอว ดี แตห แม ง็อห แวน ฆอน อีมาย โอว อา วี, เซ โอว ตู ตึย อาเบนยาม, แตห อัน วี ตัห ฌัม โดง กอย แม นี. แตห โอว บัร อัน. โอว ดี วี ตึย อัน ตัห ฌัม โดง กอย แม.”
38ฆูณ อัน วี ต็อห, “ฆอน โอว วี ตี, โอว ตู แตห อัน โลง โดบ แม. อีกัด อัน แฮะ ฮอต ยัม. อึณ ฆีด มี อัน. เซ อัน ดี บอ ฌัม ดูก ดอ ฮาว เบ โดบ อึณเตณ, เบ ดี โบง แตห บอ โอว ยัม.”
© 2021, Wycliffe Bible Translator, Inc. All rights reserved.
