Luke 3
3
Ntuma Njyami
1Kasibi ka kwumu ŋa otaani ka kiigi Tibere Sezare mfumu kasi. Ntini yia ye kiigi Pontese Pilate okunji wo bungu le Jude. Erode Atipase mfumu a Ngalile. Ndumu a nde Filipe kiigi okunji wo Liture bila bungu le Tarakonite, Lyzaniyase okunji wo bungu le Abilene. 2Ŋaa Anaa bila Kayife kiigi ampi ambwoŋi baanini. Ŋaa ma ntini yeankulu yia Njyami wobi ŋa Jan, mwana Zakari kanca biri eli baari kali. 3Jan yiri ma ebiri eso ba bungu le lesuniŋi ŋa okeri o nkuumu Zurde, nde amono ata obamaŋa ndi: «Lekaala eku e be, leyaga ateemi#3.3 Ateemi: Cinda le ba tuba mbuuru wo omi yalaga Jezi Kirisite nca okeri, ŋaa amana acuzigi nde, ma lemigi le ndigi o nde bila Jezi Kirisite ma leku bila enyuzigi e nde. , ŋaa Njyami kabologo maami a be maabi.» 4Mono lemigi le teende ntuma Njyami wo nkuumu Ezayi, nca buku le nde ndi:
«Jui le mbuuru leta obamaŋa nca ncege. Leselege Mfumu njila, lesa anjila a nde aka tele.
5Edebi njwori esiliga, ekuru njwori bila angaala ajiniŋa.
Anjila ma enkoro aka tele, aselege anjila ma abi.
6Ŋaa baari aso baamono kasaga vuzuga Njyami bo.»
7Jan alyele ŋa bege le baari le leyi ma kayaga le ateemi, ndi: «Be ŋa kura mva ampili! We olyele be ndi be le duma opami a Njyami wo aya na? 8Lesa maami maave ma kamvyere ndi be le mi kaala eku. Ŋaa lebira kalyele ma be ankulu ni, bizi ampabigi ba Abarayame! Okorogo mi elyele be ni Njyami abuna kayaga akele maa ma kakiriga ampabigi ba Abarayame. 9Kawunu yiga tuga ma kacaga eti tii onkaŋa: eti njwori ba beebiza mpa mburu yeemve, ba acaga ŋa acuni ka mbaa.
10Ŋaa kuna le baari lia le epiza ndi: «Ŋaa bizi lesa bunu?» 11Jan akaala ŋa bo ndi: «Ŋaa mbuuru oli ŋa angoyi mwele mpi buga oli ŋa kaama mon, ŋaa wooli ŋa biila osi se bwa.» 12Angaa lempo, ayi mono nde se ma kayaga ateemi, ŋa bo ndi: «Mfumu, ŋaa bizi lesa bunu?» 13Nde ŋa bo ndi: «Lebiza mvunu ye ampi be kalusa.» 14Aworo se apizi nde ndi: «Ŋaa eto ma bizi, bizi lesa bunu?» Nde akaala ŋa bo ndi: «Lebiza baari ampara kayaga, bila mpari sikali ma alaa, ŋaa be kakese wura le be.»
15Bege le baari lia ba kajila bila tari, ma kamono Kirisite ntuma Njyami, ŋaa bo aso ba kacimiŋa ndi, Jan kiigi ntuma wua. 16Nde akaala ŋa bo aso ndi: «Ma mi ateemi ma katuba be ma anja, ŋaa mbuuru wo aje kaya vuli mi onkani. Ŋaa mi eka buna kasuga otele tele ka miizi a nde ŋi. Nde aje kampa be ateemi ma Oduduma Cece bila ma mbaa. 17Nca kwogo ka nde, nde ma kwara kacegi ma kasege mburu. Nde bayi mburu bila ebu, ŋa nde alege mburu yila otalaga. Ŋaa nde kayaga ebu nde cugi ka mbaa ya ye bira dima.» 18Jan mpi ncia yeemve ŋa baari bila bege le anjwo akima ma yiezi nde bo. 19Ŋaa Jan yuumi Erode wo kiigi mfumu a bungu kabila nde vuri bala Erodiyase wo okari a ndumu a nde. Ŋaa Erode se kiigi maasa bege le maami akima maabi. 20Ŋi Erode vuri si jaa lekima le levuli obi, nde tumi kalege Jan ma ongeneŋe.
Jezi ayaga ateemi
21Ntini ye mani Jan ka mpa bege le baari aso ateemi, Jezi se oyi yaga a nde ateemi se. Ŋaa ntini ye kiigi bwono Jezi, yulu le naaŋi, 22Ŋaa Oduduma Cece surigi yila nde ma kadisi akuuna le kubigi. Ŋaa ayuga jui le fi yulu ndi: «We Mwana mi ojya, we ampa mi kase.»
Kacia ka Jezi
23Kabaani Jezi janja, nde kiigi yiga ŋa ekwumu ba esibi etari. Ma lemigi le baari le acimiŋi ndi nde mwana Jozefe. Jozefe mwana Eli. 24Eli mwana Matate, Matate mwana Levi, Levi mwana Meleki, Meleki mwana Janayi, Janayi mwana Jozefe, 25Jozefe mwana Mataciyase, Mataciyase mwana Amose, Amose mwana Nawume, Nawume mwana Esili, Esili mwana Nangayi, 26Nangayi mwana Maate, Maate mwana Mataciyase, Mataciyase mwana Semeyi, Semeyi mwana Yoseke, Yoseke mwana Yoda, 27Yoda mwana Yoyanane, Yoyanane mwana Resa, Resa mwana Zorobabele, Zerobabele mwana Salatiyele, Salatiyele mwana Neri, 28Neri mwana Meleki, Meleki mwana Adi, Adi mwana Kosame, Kosame mwana Elemadame, Elemadame mwana Ere, 29Ere mwana Jezi, Jezi mwana Eliyezere, Eliyezere mwana Zorime, Zorime mwana Matate, Matate mwana Levi, 30Levi mwana Simiyon, Simiyon mwana Juda, Juda mwana Jozefe, Jozefe mwana Yoname, Yoname mwana Eliyakime, 31Eliyakime mwana Meleya, Meleya mwana Mena, Mena mwana Matata, Matata mwana Natame, Natame mwana Davide, 32mwana Zese, Zese mwana Zobede, Yobede mwana Booze, Booze mwana Sala, Sala mwana Naasone, 33Naasone mwana Aminadabe, Aminadabe mwana Adimine, Adimine mwana Areni, Arini mwana Esirome, Esirome mwana Farese, Farese mwana Juda, 34mwana Jakobe, Jakobe mwana Izake, Izake mwana Abarayame, Abarayame mwana Ntera, Ntera mwana Nakore, 35Nakore mwana Seruke, Seruke mwana Rango, Rango mwana Faleke, Faleke mwana Ebere, Ebere mwana Sala, 36mwana Kayinane, Kayinane mwana Arifazade, Arifazade mwana Seme, Seme mwana Nowe, Nowe mwana Lameke, 37Lameke mwana Matusaleme, Matusaleme mwana Enoke, Enoke mwana Yarete, Yarete mwana Maleleyele, Maleleyele mwana Kayinane, 38Kayinane mwana Enose, Enose mwana Sete, Sete mwana Adame, Adame mwana Njyami.
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES
