Mateo 10
10
Yeso‑ya mai da‑daba mai‑ya yosene
1Yeso‑ya oda da‑daba oda 12 kana oda‑ya Yeso haane, ati yanane,
“Owati ihi dai ene kitawahiya, dai ati ene madi towe mai kanana, mai kiyana mai dai nakitama naboneni.” Yeso ati nemarine.
2Yeso‑ka yo‑yose oda 12 kana oda oni amani, haro, i‑di Simaho Bedoro, Simaho sohori i‑di Anidere, Sebedeo bidi i‑di Tiyako, Tiyako sohori i‑di Yowaho,
3i‑di Firibi, i‑di Batoromeho, i‑di Tome, owa, (owa oni Mateo toha, kofeno‑ka yinero‑bona‑ya ha‑haa ohamaro,) Aofio bidi i‑di Tiyako, i‑di Tadeo,
4i‑di Simaho Seroti, i‑di Yoda Isikari·oti, oda namaroni. Yoda Isikari·oti i‑di Yeso‑ya kahabanawahemarine.
5Oda 12 kana Yeso oda‑ya yose,
“Dai tokahi. Bara mai tabori‑ya dai tokarihi, Samaritano mai tabori‑ya dai tokarihi nahi,
6Yodeo mai tabori‑ya dai tokabisahi. Kaneiro mai fawatonakosa mai‑nima Yodeo mai nineni.
7Dai tokiya, eya dai ati nahi.
‘Neme‑ke ai nafi‑ka hidi kitabote tohawahebona dai‑ya sawine.’ Dai ati nahi.
8Mai kiyana mai dai kasoma, mai mese towe toha mai mese dai nataminawama, mai aba mai dai nakitama, madi towe mai dai kananihi, dai nahi. Owati ihi dai ene kitawaha, yama manakone dai‑ya haa·ora, mai one dai kasoma, yama manakone dai haariyahi.
9Dai tokiya, yinero oro wamani dai ibirihi, yinero barata wamani dai ibirihi, yinero bidi dai ibirihi, dai nahi.
10Yamasi dai weyerihi, bora fama‑ya dai nasawirihi, sanidariya owa dai nasawirihi, dai dabakiba‑ka awa one dai nasawirihi, dai nahi. Mai‑ya dai kasoma dai‑ka yama‑bone‑ya mai daanaboneni. Mai‑ka yama ai anina ai‑ka yama‑bone‑ya mai daateni.
11Mai tabori‑ya dai koboniya, mai ati amosa mai‑ka yobe‑ya dai winiyahi. Aka‑ya dai toki awisari‑ya yobe owa‑ya dai winariyahi.
12Mai‑ka yobe‑ya dai tokiyomiya, dai ati yananahi.
‘Ahi‑ya dai wi‑wina Deoso dai‑ya kasomebonane.’ Dai ati nahi.
13Yobe hidi ati amoseya, Deoso mai‑ya kasomebonane. Yobe hidi ati amosareya, Deoso mai‑ya kasomarebonane.
14 # 10:14 Hibati‑ya mai ati‑ya mai tokadabara, nokobi‑ya mai tame‑ka wami hibakori‑ya mai nanahaba, haa‑nima mai ihi‑niya, “Deoso dai‑ya weenebona, hini dai ene amani.” Mai ati teni. Dai ati‑ya mai nofara, dai yananamiya, mai noki‑ya dai teme hibakori dai nanahabiyahi.” Yeso ati nemarine.
15“Owati amosabote dai mitamatasahi. Ai nafi ene‑ya Deoso kadikeya, mai‑ya weeni kitebonane. Hibati‑ya Sodoma‑ya mai wi‑wina, Komora‑ya mai wi‑wina, mai na, Deoso mai‑ya nanahabematane. Ai nafi ene‑ya Deoso kadikeya, mai‑ya weenamatasebonane. Dai ati‑ya mai nofara mai‑ya Deoso bisini kitabisebonane.
16Owati dai mitahi. Kaneiro mai‑nima dai nahi. Dai hamariyahi. Yome hame‑nima mai teni. Mai‑ya dai‑ya oyose, dai noko wadiyahi. Maka mai noki wadi‑nima dai noko wadiyahi. Wayomata mai hamaterani. Wayomata mai‑nima dai nahi. Dai hamariyahi.
17Dai noko wadahi, mai‑ka hidi bidi mai‑ya dai‑ya mai daanaboneni. Deoso‑ya mai hi‑hiyara‑ke yobe‑ya dai‑ya mai kosinaboneni.
18Bara mai‑ka kofenado mai toha, mai‑ka hidi webote mai toha na, mai ati ihi dai‑ya mai wataboneni. Mai noki‑kaya dai nahoya, owa tamine‑ya mai‑ya dai hiyarawahaboneni. Dai‑ka hidi mai toha, Bara mai toha na, mai‑ya owa tamine‑ya dai hiyaraboneni.
19Dai‑ya mai kahabaniya, dai ati‑ya mai mitabone, dai atibodi yama‑ya kadikariyahi. Deoso ene dai ati yananaboneni.
20Fara dai ati yokana toharabone, ai‑ka Abi neme‑ke‑ka Doni ati nebonane.
21Dai‑ka dai‑ya mai kahabanaboneni, dai‑ya mai nanahababonehe. Anidi sohori‑ya kahabana, badi bidi‑ya kahabana, mai‑ka madehe badi, madi mai na, mai‑ya mai kahabana, mai naboneni, mai mai hinahababonehe.
22Owa dai nofa dai‑ya mai nafi kakaboneni. Owa oni dai saatonakosi awiriya, dai sibaraboneni.
23Tabora ohare‑ya dai‑ya mai weena, tabora one‑ya dai tokahi. Owati amosa dai mitahi. Isara·eo mai tabori dami‑ya dai tokasa riya, dai‑ka Ayo neme‑ke kiti yananebonane.
24Maki‑ya mai kako hika mai da‑daba mai‑ya mai kakohari naboneni. Mai‑ka hidi mai hikako‑nima mai‑ya mai kakohareboneni.
25 # 10:25 Beosibo idi Satanasi oni owa amane. Dai‑ka hidi‑nima dai‑ya mai ni‑ya yama sibaraboneni. Dai‑ka hidi‑ya mai nofara,
‘Dai‑ka hidi i‑di Beosibo amane.’ Mai ati niya,
‘Satanasi‑ka dai amani.’ Mai ati nihi naboneni.
26Mai ati ihi dai kakomeheriyahi. Yama‑ya mai kema, mai dami yama‑ya watowahaboneni.
27Hibayata dai ohiyara, dai damara, makobote mai nafi‑ya dai hiyarawahaboneni. Owati dai mita, owati dai kaminaboneni, mai nafi‑ya.
28Dai‑ya mai ati naboha, mai‑ya dai nayofinariyahi. Dai atibodi‑ya mai nanahabaterani. Deoso dai nayofinabisahi. Deoso‑ya mai nofara, mai aboni, mai atibodi na‑ya yama hirini‑kaya Deoso weretowitibonane.
29Bani bidi mai fama mai daana, yinero bidi ohari‑ya mai manakone tohateni. Ai‑ka Abi ati sibareya, bani bidi ai naboha, ati sibari awireya, bani bidi ai nabohaterani.
30Deoso ai tati kone nafi‑ya wato, ai tati kone nafi‑ya kadikemarine.
31Dai habo siitoriyahi. Bani bidi mai dama mai manakone bi‑bidi teni. Dai‑ta dai manakone nafibisateni.
32Mai‑ya dai hiyariya,
‘Yeso‑ka ama·oni.’ Dai ati niya,
Okobi ohiyariya,
‘Oka mai amani.’ Onaboneni.
33‘Yeso‑ka ohi awirini.’ Mai ati niya,
Okobi neme‑ke ohiyariya,
‘Oka mai tohi awirini.’ Onaboneni.
34‘I‑di Yeso ati ene mai nafi ati hamamateraboneni.’ Dai atibodi ati riyahi.
Owati‑ya mai nofara, oka mai‑ya mai bisinaboneni.
35Bidi badi‑ya nofarihi, bide madi‑ya nofarihi, fana hika koma‑ya nofarihi naboneni.
36Hika mai hikakaboneni.
37Owa dai nofi nafibisahi. Abi, ami, mai na, mai dai nofi bi‑bidi nahi. Dai‑ka madehe dai nofi bi‑bidi nahi. Owa‑ya mai nofi nafira, oka mai tohi awirani.
38‘Owa‑ya mai ati nanahaba yama sibarini. Yeso ati okadababisaboneni.’ Dai atibodi ati ni awiriya,
oka dai tohi awirani.
39 # 10:39 Yeso‑ya dai nofa dai‑ya mai nanahaba, Deoso tabaro‑ya dai ya‑yainaboneni. Oda abariyahi dai ati niya, Yeso ati‑ya dai tokadabara, dai ohinaboneni. Owa‑ya dai nofa dai‑ya mai nanahaba, dai abaraboneni.
“Oda abariyahi.” Dai ati niya,
owati‑ya dai tokadabara, dai ababoneni.
40Oka dai toha dai ati‑ya mai nofa owati‑ya mai nofahari, owati‑ya mai nofa owa‑ya yose‑mari ati‑ya mai nofahari teni.
41Owati amosa dai mitahi. Deoso ati‑ya ka‑kamina dai aweya,
‘Deoso ati‑ya ka‑kamina amane, okasomaho.’ Dai ati niya,
Deoso ati‑ya mai ka‑kamina mai ihi manakone‑nima dai manakone na‑ya Deoso dai‑ya daanebonane. Ai owa Deoso ati‑ya nofe dai awiya,
‘Deoso ati‑ya nofane, okasomaho.’ Dai ati niya,
Deoso ati‑ya mai nofa, mai ihi manakone‑nima dai manakone na‑ya Deoso dai‑ya daanebonane.
42Oka mai baki hoka, mai‑ya faha dai daaniya,
‘Yeso Kirisito‑ka mai amani, mai okasomaboneni.’ Dai atibodi ati niya,
dai ene amosa manakone‑ya Deoso daanebonane.” Yeso ati nemarine.
