मत्ती 27
27
यहूदा झुल्क मुलक
मर्कूस १५:१-१५; लूका २३:१-५,१३-२५; यूहन्ना १८:२८-३८
1बिहान हुइटीकि सब मुख्य पूजारीहुँक्र ओ जनतन्हक अगुवाहुँक्र येशूह मृत्युदण्ड देहक लाग उहाँक विरोधम सरसल्लाह कर्ल। 2हुँक्र येशूह बाहान्क लैगिल ओ शासक पिलातसकठे सुम्पदेल।
3येशूह मृत्युदण्ड देना सरसल्लाह कर्लक बात सुन्क उहाँह पक्रादेहुइया यहूदा धेर दुःखी हुइल्। ऊ चाँदीक तीसठो पैँसा लेहल, ओ मुख्य पूजारीन्हकठे ओ अगुवन्हकठे जाक#प्रे १:१८-१९ 4कहल, “मै निर्दोष मनैयह ध्वाखा देक पाप कर्नु।”
हुँक्र जवाफ देल, “वाकर हमन का मतलब? टैँ अपन्हे जान्।”
5यी सुन्क यहूदा उ पैँसा मन्दिरम सुइँक्क फाँकदेहल। ऊ ओठेसे गैल् ओ झुल्क मुगैल्।
6मुख्य पूजारीहुँक्र उ पैँसा उठैल ओ कल, “यी त रगतक म्वाल हो, यहीह मन्दिरक भण्डारम ढर्ना ठीक नैहो।” 7हुँक्र अप्न-अप्न सरसल्लाह कर्ल ओ उ पैँसले परदेशीन्हक लाश गारक लाग एकठो कुम्हरक जग्गा किन्ल। 8उहओर्से आजसम फे उ जग्गह “रगतक जग्गा” कना चलन बा। 9असिक यर्मिया अगमवक्तक कहल बात पूरा हुइल्, “हुँक्र चाँदीक तीसठो पैँसा लेल। उ पैँसा इस्राएलीहुँक्र उहाँक लाग त्वाकल म्वाल रह।#जक ११:१२-१३ 10ओ परमप्रभु महीह आज्ञा देहल अनुसार हुँक्र उ पैँसा एकठो कुम्हरक जग्गक लाग देल।”
11येशू शासक पिलातसक आघ ठह्र्यैल त, ऊ उहाँह पुछ्ल, “का टुँ यहूदीन्हक रज्वा हुइटो?”
येशू जवाफ देल, “अप्नहे महीह राजा कहटी।”
12मुख्य पूजारीहुँक्र ओ और अगुवाहुँक्र येशूह धेर बातक दोष लगैल। तर जत्रा दोष लगैलसे फे उहाँ कुछु जवाफ नैदेल। 13पिलातस उहाँह कल, “हिँक्र टुँहार विरोधम अत्रा धेर बातक दोष लगाइट। का टुँ नैसुनठुइटो?” 14तर येशू कुछु जवाफ नैदेल। यी देख्क शासक छक्क पर्ल।
15मुक्ति-दिवस कना टिहारक समयम, पिलातस मनैन्हक माङ्गल एकठो यहूदी जातिक कैदीह छ्वारपर्ना चलन रलहन। 16उ समयम बारब्बा नाउँ रहल एकठो डरलग्टिक मनैया झ्यालखानम परल रह। 17मनै भेला हुइल त, पिलातस हुँकन पुछ्ल, “लेओ कहो, मै केहीह छोरदिऊँ? बारब्बह कि ख्रीष्ट कैजिना येशूह?” 18काकरकि हुँक्र येशूह बिह्र मुक सुम्पदेलह कना बात हुँकहीन थाहाँ रलहन।
19पिलातस न्याय-आसनम बैठल ब्याला हुँकहार गोसिन्या एकठो असिन खबर पठैली, “उ निर्दोष मनैयह कुछु जिन करैहो, काकरकि आज रात्क मै उहाँक बारेम डरलग्टिक सपना देख्नु।”
20तर मुख्य पूजारीहुँक्र ओ और अगुवाहुँक्र भीडक मनैन सुर्याक असिक कह लगैल, “बारब्बह छोरदी, येशूह मृत्युदण्ड दी।”
21शासक फेदोस्र हुँकन पुछ्ल, “मै केहीह छोरदिऊँ? बारब्बह कि येशूह?”
हुँक्र कर्रसे कल, “बारब्बह।”
22पिलातस हुँकन कल, “ख्रीष्ट कैजिना येशूह मै का करुँ तो?”
हुँक्र सबजन कर्रसे कल, “ओहीह क्रूसम टङ्गाक मुवाई!”
23ऊ कल, “काजे? यी का अपराध कैरख्ल जे?”
तर हुँक्र और कर्रसे कल, “ओहीह क्रूसम टङ्गाक मुवाई!”
24पिलातस कुछु सीप नैलागल देख्क ओ हूलदङ्गा मच्च सेकी कना डरले सारा मनैन्हक आघ आपन हाँठ धुइटी कल, “यी मनैयह मुवैलक दोष महीह नाही, टुँहन जो लागी।”#व्य २१:६-९
25सारा मनै जवाफ देल, “हाँ, हाँ, यहीह मुवैलक दोष हमन ओ हमार सन्तानन लागी!”
26तब पिलातस बारब्बह छोरदेल। येशूहजुन कोर्रा लगाक क्रूसम टङ्गाइक लाग सिपाहीन्हक हाँठम सुम्पदेल।
येशूक अपमान
मर्कूस १५:१६-२०; यूहन्ना १९:२-३
27तबदोस्र शासकक् सिपाहीहुँक्र येशूह दरबारभित्तर लैगिल, ओ सारा पल्टनक सिपाहीहुँक्र उहाँकठे भेला हुइल। 28हुँक्र उहाँक लुगा काहारदेल ओ उहाँह लाल लुगा लगादेल। 29हुँक्र काँटक मुकुट बनाक उहाँक कपारिम लगादेल, उहाँक दाहिन हाँठम एकठो लट्ठी पक्रादेल, ओ उहाँक आघ ठिहुन टेक्क हिस्यैटी कल, “यहूदीन्हक राजक जय ह्वाए!” 30तब हुँक्र उहाँह थुक्ल, ओ उ लट्ठी अछिन्क उहाँकऽ कपारिम ठोक्ल। 31हुँक्र उहाँह असिक हिस्याहुसुक लाल लुगा काहारदेल ओ उहाँकऽ लुगा लगादेल। तबदोस्र हुँक्र उहाँह क्रूसम टङ्गाइक लाग लैगिल।
येशू क्रूसम
मर्कूस १५:२१-३२; लूका २३:२६-४३; यूहन्ना १९:१७-२७
32जैटी-जैटी हुँक्र सिमोन नाउँ रहल कुरेनी सहरक एकठो मनैयह भेँटैल। हुँक्र हुँकहीन बलजब्री येशूक क्रूस बोकैल। 33हुँक्र गलगथा कना ठाउँम पुग्ल। गलगथा कलक खोप्रही ठाउँ हो। 34सिपाहीहुँक्र येशूह तीत बिर्वा मिलाइल अङ्गूरिक मद पियक लाग देल। उहाँ उ मद चिख्ल, तर पिय नैचहल।#भज ६९:२१ 35हुँक्र उहाँह क्रूसम टङ्ग्ल, ओ उहाँक लुगाजुन गोटी डार्क बँट्ल।#भज २२:१८ 36तब हुँक्र ओठे बैठ्क उहाँह कुरटलह। 37उहाँह क्रूसम टङ्ग्ना कारण लिखल सूचना पाटी उहाँक कपारिक उप्पर टाँसल रह। उ सूचनम “यी येशू यहूदीन्हक रज्वा हो” लिखल रह। 38उ समयम हुँक्र उहाँक दाहिन ओ बाउँ पाञ्जर दुइठो अपराधीन फे अल्ग-अल्ग क्रूसम टङ्ग्ल। 39उ डगर नेङ्गुइयन सबजन मुन्टा हिला-हिला येशूह हिस्यैटी कल,#भज २२:७; १०९:२५ 40“वाह्! मन्दिर बिग्राक तीनि दिनम बनुइया! यदि टैँ परमेश्वरक छावा हुइट्या कलसे, क्रूसमसे उतर्क अपन्हेह बचा।”#मत्ती २६:६१; यूह २:१९
41असहेँक मुख्य पूजारीहुँक्र, शास्त्रीहुँक्र ओ अगुवाहुँक्र फे उहाँह हिस्यैटी कल, 42“यी औरजहन त बचाइल, तर अपन्हेहभर बँचाए नैस्याकल्! यी इस्राएलीन्हक रज्वा क्रूसमसे उतर्क आए ना, हम्र देख्बी, तब विश्वास कर्बी। 43यी परमेश्वरम भर पर ओ ‘मै त परमेश्वरक छावा हुइटुँ’ कटी न्याङ्ग। यदि परमेश्वर यहीह चहठ कलसे, उहाँ जो यहीह बचैहीँ।”#भज २२:८ 44येशूक दाहिन ओ बाउँ पाञ्जर क्रूसम टङ्गागैल् अपराधीहुँक्र फे उहाँह हिस्यैल।
येशूक मृत्यु
मर्कूस १५:३३-४१; लूका २३:४४-४९; यूहन्ना १९:२८-३०
45लगभग दिनक बाह्र बजेसे तीन बजेसम सारा देशम अन्धार हुइल्। 46तीन बजेओर येशू कर्रसे चिल्लैल, “इलोई, इलोई, लामा सबखथनी।” याकर अर्थ हो, “म्वार परमेश्वर, म्वार परमेश्वर, अप्न महीह काजे छोरदेली?”#भज २२:१
47यी सुन्क ओठे ठह्र्याइलमध्ये कुई-कुई कल, “यी मनैया त एलियह बलाइटा।”
48तब एकठो मनैया दौरटी गैल् ओ आमिल मदम कपास बिल्बोर्क आनल्, ओ लट्ठीम अँट्काक येशूह पिय देहल।#भज ६९:२१ 49तर और जन कल, “हेरी, यहीह बँचाए एलिया आजैठ कि।”
50तब येशू फेदोस्र एकचो कर्रसे चिल्लैल ओ प्राण छोर्ल।
51उह समयम मन्दिरक पर्दा उप्परसे टरलाग फाट्क दुइ भाग होगैल्। धर्ती हिलल्, धेर चट्टान फुटल,#प्रस २६:३१-३३ 52धेर गर्या उभकगैल् ओ मुस्याकल परमेश्वरक धेर मनै जिगैल। 53हुँक्र आपन-आपन गर्यमसे निक्रल, ओ येशू मुवलमसे फेदोस्र जिल त, हुँक्र पवित्र सहरम गैल ओ धेर जन्हकठे देखपर्ल।
54भुइँचाल गैलक ओ उहाँ हुइलक सब घट्ना देख्क कप्तान ओ हुँकाहारसँग येशूह कुर बैठल सिपाहीहुँक्र जातसे डरागैल, ओ कल, “पक्क फे यी मनैया परमेश्वरक छावा रलह।”
55धेर जन जन्नीमनै फे दूरऽसे यी सब घट्ना हेर्टीरलह। हुँक्र गालीलसे येशूक पाछ लाग्क आरलह।#लूक ८:२-३ 56मगदाला सहरक मरियम, याकूब ओ योसेफक डाई मरियम, ओ जब्दियक दुइ भाइ छावन्हक डाई रलह।
येशूक लाश गर्यम
मर्कूस १५:४२-४७; लूका २३:५०-५६; यूहन्ना १९:३८-४२
57दिन बुर्नासे आघ, अरिमाथिया सहरक योसेफ नाउँ रहल एक जन धनी मनैया अइल। ऊ फे येशूक चेला रलह। 58ऊ पिलातसकठे जाक येशूक लाश मङ्ल। पिलातस हुँकहीन येशूक लाश लैजिना अनुमति देल। 59योसेफ लाश लैजाक एकठो लौव मलमलिक लुगले लपेट्ल, 60ओ चट्टान खोल्क आपन लाग बनाइल लौव गर्यम उ लाशह ढर्ल। ऊ एकठो बरानक पत्थ्रले गर्यक मोह्टा टुमदेल, ओ ओठेसे गैल। 61मगदालक मरियम ओ और मरियमजुन गर्यक आघ बैठलरलह।
गर्या कुर्ना सुरक्षा टोली
62द्वासर दिन, अर्थात् बिसैना दिन, मुख्य पूजारीहुँक्र ओ फरिसीहुँक्र एकसाथ पिलातसकठे जम्मा होक कल, 63“हजुर, हम्र सम्झलबाटी, कि उ ठग्गा गधा जिटीह रहल समयम ‘मै मुलक तीसर दिनम फेदोस्र जिजैम’ कटी न्याङ्ग।#मत्ती १६:२१; १७:२३; २०:१९; मर्क ८:३१; ९:३१; लूक ९:२२; १८:३१-३३ 64आब वाकर चेलावँ सुटुक्क आक वाकर लाश चोर्क लैजैना भर नैहो। हुँक्र लाश लैजाक ‘उहाँ त मुवलमसे फेदोस्र जिगैल’ कैक हल्ला फैलाइसेक्ठ। यदि हुँक्र ओसिक करहीँ कलसे, पाछक ध्वाखा पैल्हकसे झन् खराब हुउइया बा। उहओर्से तीन दिनसम उ गर्या कुरक लाग सुरक्षा टोली खटादी।”
65पिलातस हुँकन कल, “ले ठीक बा, सिपाहीन लैजाओ ओ स्याकलसम सुरक्षा देओ।” 66तब हुँक्र जाक गर्यह सुरक्षा देहक लाग वाकर मोह्टा टुमल पत्थ्रम छाप लगैल ओ सिपाहीन कुर लगैल।
© 2020, Wycliffe Bible Translators, Inc. All rights reserved.
