मत्ती 22
22
भ्वाजक आहान
लूका १४:१५-२४
1येशू मनैन सिखाइक लाग फेदोस्र आहान कल। 2“स्वर्गक राज्य असिन बा। एकठो राजा आपन छावक भ्वाजम धेर जहन निउँता देल। 3भ्वाजक भत्यार तयार हुइल् त, उ राजा आपन नोकरन निउँता देहेल मनैन बलाए पठैल, तर हुँक्र आइ नैचहल।
4“तब ऊ फेदोस्र और नोकरहुँकन असिक कैक पठैल, ‘जाओ ओ निउँता देहेल मनैन कहो, “खैना ब्याला हुइल्, ठूल-ठूल नट्वन मार्क रिझारुझु, सब चिज ठीकठाक पारल बा। खाए आओ।”’
5“तर निउँता पाइल मनै कुछु मतलब नैकर्ल। एकठो खेत्वम गैल्, और व्यापारम गैल्, 6ओ बाँकी रहल मनै उ नोकरन दुर्व्यवहार कर्ल ओ मार्क मुवादेल। 7तब राजा रिसले चूर हुइल, ओ आपन सेना पठाक उ हत्याराहुँकन मुवाइ ओ हुँकन्हक सहरम आगी लगाइ लगैल।
8“तबदोस्र ऊ आपन नोकरहुँकन कल, ‘भ्वाजक भत्यार तयार बा, तर निउँता पाइल मनै यिहाँ अइना योग्यक नैरलह। 9उहओर्से गल्ली-गल्लीम जाओ, ओ भेटाइल मनैन भ्वाज खाइक लाग निउँता देओ।’ 10तब उ नोकरहुँक्र गल्ली-गल्लीम गैल, ओ भेटाइल सब असल ओ खराब मनैन बलाक अन्ल। ओ भोजाहा घर भरिभराउ हुइल्।
11“राजा पहुनन् ह्यार भित्तर अइल त, एकठो मनैयह भोजाहा लुगा बिना लगैल आइल देख्ल। 12राजा ओहीह पुछ्ल, ‘सङ्घारी, काजे टुँ भोजाहा लुगा नैलगैलो?’ तर उ मनैयकठे कुछु जवाफ नैरलहस।
13“तब राजा आपन सेवकहुँकन आदेश देल, ‘वाकर हाँठ-ग्वारा बाहान्क ओहीह बाहर अन्धकारम फाँकदेओ, जहाँ मनै दुःखले दाँत पिस्टी रुवाबासी कर्टीरह्हीँ।’”#मत्ती ८:१२; २५:३०; लूक १३:२८
14येशू कल, “निउँता पाइल मनै धेर बाट, तर रोजगैल् मनै डान्चे केल बाट।”
कर तिर्ना बारेम
मर्कूस १२:१३-१७; लूका २०:२०-२६
15तब फरिसीहुँक्र गैल ओ येशूह बातबातम फँसैना जाल जोर्ल। 16हुँक्र आपन कुछ चेलन ओ हेरोदक कुछ मनैन येशूकठे असिक कह पठैल, “गुरुजी, अप्न इमान्दार बाटी कना हमन थाहाँ बा। अप्न परमेश्वरक सत्य बात ठीकसे सिखैठी ओ मनै का कहहीँ कना मतलब फे नैकर्टी, काकरकि अप्न केक्रो पक्षपात नैकर्टी। 17आब हमन कही, रोमी सरकारह कर तिर्ना ठीक हो कि नाही?”#२२:१७ यी पदक शाब्दिक अनुवाद: आब हमन कही, कैसरह कर तिर्ना ठीक हो कि नाही?
18येशू हुँकन्हक दुष्ट विचार थाहाँ पाक कल, “टुह्र कपटी मनै, टुह्र छल कैक काकर महीह फँसाइ ख्वाजटो? 19कर तिर्ना पैँसा महीह देखाओ त।” हुँक्र एकठो पैँसा आन्क उहाँह देल। 20येशू हुँकन पुछ्ल, “यी छाप ओ नाउँ क्याकर हो?”
21हुँक्र येशूह कल, “रोमी सरकारक।”
तब येशू हुँकन कल, “ओसिन हो कलसे, सरकारक चिज सरकारह, ओ परमेश्वरक चिज परमेश्वरह देओ।”
22हुँक्र उहाँक बात सुन्क छक्क पर्ल, ओ आपन डगर लग्ल।
मुवलमसे फेदोस्र जीवित हुइना बारेम
मर्कूस १२:१८-२७; लूका २०:२७-४०
23मनै मुलसे फेदोस्र नैजिट कहुइया सदुकी समूहक कौनो-कौनो मनै उह दिन येशूकठे आक पुछ्ल,#प्रे २३:८ 24“गुरुजी, मोशा हमन परमेश्वरक असिन व्यवस्था देरख्ल: यदि कौनो मनैया सन्तान बिना जन्मैल मुवल कलसे, वाकर भैया भौजाइ जन्नी लिह ओ आपन दादुक लाग सन्तान जन्माए।#व्य २५:५ 25एकठो परिवारम सात भाइ रलह। बर्का भ्वाज करल, तर सन्तान बिना जन्मैल मुगैल्। तब मन्ह्ला आपन भौजीह लिहेल्, 26ऊ फे सन्तान बिना जन्मैल मुगैल्। सन्ह्लक फे ओस्तै हुइलस। ओसिक करट-करट् हुँक्र सक्कु भाइ ओहीह लेल, तर सन्तान बिना जन्मैल मुगैल। 27अन्तिमम उ जन्नीमनैया फे मुगैल्। 28आब कही, मुवलमसे हुँक्र फेदोस्र जिहीँ ओ स्वर्ग जैहीँ कलसे, ऊ क्याकर गोसिन्या हुई? काकरकि सक्कु भैयनसे वाकर भ्वाज होरलहस।”
29येशू हुँकन जवाफ देल, “टुह्र बात नैबुझ्ना कारण का हो कलसे, टुह्र ना त धर्मशास्त्र जन्टो ना त परमेश्वरक शक्ति थाहाँ पैटो। 30काकरकि मनै मुवलमसे फेदोस्र जिलसे, भ्वाजकाज कर्ना त बात नैहुइनेहो। स्वर्गम हुँक्र भ्वाज नैकर्ना स्वर्गदूतअस होजैठ। 31मुवलमसे फेदोस्र जिना विषयम परमेश्वरक कहल बात टुह्र पहर्क फे नैजन्टो का? 32उहाँ कल, ‘मै टुन्हक पितापुर्खा अब्राहाम, इसहाक ओ याकूबक परमेश्वर हुइटुँ।’ उहाँ मुवल मनैन्हक नाहीँ, तर जिटीह रहुइयन्हक परमेश्वर हुइट।”#प्रस ३:६
33उहाँक बात सुन्क भीडक मनै छक्क पर्ल।
सबसे महान् आज्ञा
मर्कूस १२:२८-३४; लूका १०:२५-२८
34येशू सदुकीहुँकन चूप लगैल कैक फरिसीहुँक्र सुन्ल त, हुँक्र एक गुट होक उहाँकठे अइल। 35हुँक्रमध्ये एक जन गुरु उहाँह फँसैना विचारले पुछ्ल,#लूक १०:२५-२८ 36“गुरुजी, परमेश्वरक व्यवस्थम रहल सबसे महान् आज्ञा कौन हो?”
37येशू जवाफ देल, “परमप्रभु आपन परमेश्वरह आपन सारा हृदयले, सारा प्राणले, ओ सारा मनले प्रेम करो।#व्य ६:५ 38सबसे मुख्य ओ महत्वपूर्ण आज्ञा यिह हो। 39द्वासर आज्ञा फे अस्तह बा, आपन छिमेकीह अपन्हेहअस प्रेम करो।#लेवी १९:१८ 40सारा व्यवस्था ओ अगमवक्तन्हक शिक्षा यिह दुइठो आज्ञम आधारित बा।”
ख्रीष्ट क्याकर सन्तान हुइट?
मर्कूस १२:३५-३७; लूका २०:४१-४४
41येशू एक गुट होक आइल फरिसीन पुछ्ल, 42“ख्रीष्टक बारेम टुन्हक विचार का बा? ऊ क्याकर सन्तान हुइट?”
हुँक्र उहाँह कल, “दाऊदक सन्तान।”
43उहाँ हुँकन कल, “ओसिन हो कलसे, काजे दाऊदह पवित्र आत्मा ख्रीष्टह ‘प्रभु’ कैक कह लगैल? दाऊद कल,
44‘परमप्रभु म्वार प्रभुह कल,
“जबसम मै टुँहार शत्रुन हराक
टुँहार पौलीक टर नैपारटसम,
टुँ म्वार दाहिन पाञ्जर बैठ्लरहो।”’#भज ११०:१
45दाऊद अपन्हे ख्रीष्टह ‘प्रभु’ कठ कलसे, ख्रीष्ट कसिक दाऊदक सन्तान केल हुइल?” 46कुई फे जवाफ देह नैसेक्ल, ओ उ दिनठेसे उहाँह प्रश्न पुछ्ना आँट फे कुई नैकर्ल।
© 2020, Wycliffe Bible Translators, Inc. All rights reserved.
