मत्ती 13
13
स्वर्गक राज्यक बारेम विभिन्न आहान
बीया बुउइयक बारेम आहान
मर्कूस ४:१-१२; लूका ८:४-१०
1उह दिन येशू घरमसे निक्रल ओ समुद्रक किनारम जाक बैस्ल। 2तबदोस्र मनैन्हक भारी भीड उहाँक लग्घ आइल, उहओर्से उहाँ लाऊम चिहुर्ल ओ मनैजुन समुद्रक किनारम ठह्र्यैल।#लूक ५:१-३ 3उहाँ मनैन आहानम धेर बात कल। उहाँ कल, “एकठो मनैया बीया ब्वाय निक्रल्। 4बीया बुइबेर आकुर बीया डगरिम परल, ओ चिरैँचुरुङ्गन आक खादेल। 5आकुर बीया पत्थ्राहा जग्गम परल, जहाँ धेर गहिँरसम माटी नैरह। उ बीया झट्ट जामल्। 6तर मजासे जर ट्याक नैसेक्लकओर्से घामकमार उ झट्टहेँ सुख्गैल्। 7आकुर बीया कँटाहा जग्गम परल, तर काँट बाह्रल त, जम्ल बीया फे बाह्र नैस्याकल्। 8आकुर बीयाजुन मलगर जग्गम परल, ओ कौनो सय गुणा, कौनो साठी गुणा ओ कौनो तीस गुणा फरल। 9ज्याकर कान बा, उह सुनऽ।”
10चेलाहुँक्र उहाँकठे आक पुछ्ल, “काकर अप्न मनैनसे बट्वाइबेर आहानम केल बट्वैठी?”
11येशू हुँकन जवाफ देल, “टुँहन स्वर्गक राज्यक रहस्यमय बात बुझ्ना अक्किल देगैल् बा, तर हुँकन देगैल् नैहो। 12काकरकि ज्याकरठे बा, ओहीह आकुर देजाई, ओ वाकरठे प्रशस्त हुइनेबाटस। तर ज्याकरठे नैहो वाकरठेसे रहल फे अछिन्जाई।#मत्ती २५:२९; मर्क ४:२५; लूक ८:१८; १९:२६ 13उहओर्से मै मनैन सिखाइबेर आहानम बोल्ठुँ:
हुँक्र हेर्ना त हेर्ठ, तर नैदेख्ट,
सुन्ना त सुन्ठ, तर सुन्क फे नैबुझ्ट।
14यशैया अगमवक्तक कहल वचन हुँकन्हकम ठ्याक्क मिल्ठन:
टुह्र सुन्ना त सुन्ठो, तर बुझ्बो-बुझ्बो नैकर्टो,
हेर्ना त हेर्ठो, तर देख्बो-देख्बो नैकर्टो।
15काकरकि हिँकन्हक मन भुठ्या होरलन।
हिँकन्हक कान बहिर होरलन,
हिँकन्हक आँख आन्धर होरलन,
नकि त हिँक्र आपन आँखिले देख्नेरलह,
आपन कानले सुन्नेरलह,
मनले बात बुझ्नेरलह,
ओ आपन-आपन पापमसे घुम्नेरलह,
ओ मै हुँकन मुक्ति देनेरनहुँ।#यशै ६:९-१०
16तर टुह्र आशिष पाइल मनै हुइटो, काकरकि टुन्हक आँख देख्ठा ओ टुन्हक कान सुन्ठा। 17मै जाट्टीसे टुँहन कहटुँ, टुन्हक द्याखल ओ सुनल बात धेर अगमवक्तन ओ धर्मी मनै देख्ना ओ सुन्ना भारी इच्छा कैरख्लह, तर द्याख ओ सुन नैपैल।”#लूक १०:२३-२४
आहानक अर्थ
मर्कूस ४:१३-२०; लूका ८:११-१५
18“आब बीया बुइना आहानक अर्थ सुनो। 19डगरिम परल बीया कलक ओसिन मनै हुइट: हुँक्र परमेश्वरक राज्यक बारेम वचन सुन्ना त सुन्ठ, तर नैबुझ्ट। तब शैतान आक हुँकन्हक मनम बुइल् बीया अछिन्क लैजिठा। 20पत्थ्राहा जग्गम परल बीया कलक ओसिन मनै हुइट: हुँक्र परमेश्वरक राज्यक बारेम वचन सुन्टीकि खुशीसे स्वीकार कर्ठ। 21तर यी वचन हुँकन्हक मनम गहिँरसम जर ट्याक नैपैलकओर्से, हुँक्र धेर समयसम टिक नैसेक्ट। परमेश्वरक वचन मन्लक कारण दुःखकष्ट या सतावट अइटीकि पाछ हट्जैठ। 22कँटाहा जग्गम परल बीया कलक ओसिन मनै हुइट: हुँक्र परमेश्वरक राज्यक बारेम वचन त सुन्ठ, तर यी जीवनक चिन्ताफिक्री ओ धनसम्पत्तिक ल्वाभलालचले हुँकन्हकम वचनह उट्मुटादेठा। उहओर्से हुँकन्हकम फारा नैफरट्। 23मलगर जग्गम परल बीया कलक ओसिन मनै हुइट: हुँक्र वचन सुन्ठ, बुझ्ठ ओ सय गुणा, साठी गुणा ओ तीस गुणा फारा फरैठ।”
सोहुँक बारेम आहान
24येशू फेदोस्र हुँकन और आहानम कल, “स्वर्गक राज्य एकठो असिन मनैयाअस हो, जे आपन खेत्वम मजा बीया बुइल्। 25रात्क सबजन सुतल ब्याला मौका छोप्क वाकर शत्रु आइल ओ गोहूँ बुइल खेत्वम सोहुँ बोक चलगैल्। 26जब गोहूँ जाम्क बाह्रल ओ बाल लागल, तब सोहुँ फे देखपरल।
27“तबदोस्र घरमालिकक् नोकरहुँक्र आक कल, ‘हजुर, का अप्न खेत्वम मजा बीया नैबुइलही? हेरी त, सोहुँ कहाँसे आइल?’
28“ऊ हुँकन कल, ‘कौनो शत्रु आक बोदेहल हुई।’
“नोकरहुँक्र मालिकह कल, ‘हम्र जाक उँखारदेना हो?’
29“तर ऊ कल, ‘आब जिन उँखारो, काकरकि सोहुँ उँखारबेर गोहूँ फे उँखारजाई। 30गोहूँ कट्ना समय नैहुइट्सम दुनु चिजह सँगसँग बाह्र देओ। जब गोहूँ कट्ना समय आई, तब गोहूँ कटुइयन कहम, पैल्ह घाँस उँखारक जराईक लाग ब्वाझा पारो, तबदोस्र गोहूँजुन जम्मा कैक बखारीम ढरो।’”
राईक दाना ओ खमिरक बारेम आहान
मर्कूस ४:३०-३४; लूका १३:१८-२१
31येशू फेदोस्र और आहान कल, “स्वर्गक राज्य राईक दानाअस हो। एकठो मनैया आपन बारीम राइ बुइठा। 32राईक बीया और बीयसे छुटी रठा, तर बाह्रल कलसे और सागसब्जीसे बरा, झङ्ल्यार रूख्वाअस होजैठा। ओइहेँम चिरैँचुरुङ्गन आक ठाँट लगैठ।”#१३:३२ इस्राएल देशम राईक ब्वाँट बाह्रल कलसे भारी रूख्वा हुइठा।
33येशू फेदोस्र और आहान कल, “स्वर्गक राज्य खमिरअस हो। एकठो महिला दश किलो पीठम डान्चे खमिर मिलैठी ओ उ पीठा सक्कु नैफुलट्सम एक ठाउँम ढर्लरठी।”
34येशू भीडक मनैन सब बात आहानम सिखाइट्। उहाँ बिना आहानक हुँकन नैसिखाइट्। 35असिक अगमवक्तक ब्वालल् बात पूरा हुइल्,
“मै आहानम बोलम,
संसारक सृष्टिसे थाहाँ नैपागैल् बात मै जनादेहम।”#भज ७८:२
सोहुँक आहानक अर्थ
36तबदोस्र येशू मनैन छोर्क घरभित्तर गैल। उहाँक चेलन आक उहाँह कल, “हमन सोहुँक बारेम कहल आहानक अर्थ बुझादी।”
37येशू कल, “मजा बीया बुउइया मै मनैयक छावा, हुइटुँ। 38खेत्वा कलक संसार हो। मजा बीया कलक परमेश्वरक राज्यक मनै हुइट, ओ सोहुँ कलक शैतानक मनै हुइट। 39सोहुँक बीया बुउइया शत्रुजुन शैतान हो। बाली कट्ना समय कलक यी संसारक अन्त्य हुइना दिन हो, ओ बाली कटुइयनजुन स्वर्गदूतहुँक्र हुइट।
40“जसिक सोहुँ जम्मा कैक आगीम जराजैठा, ओसहेँक यी संसारक अन्त्य फे हुइनेबा। 41उ दिन मै मनैयक छावा, आपन स्वर्गदूतन पठैम ओ हुँक्र म्वार राज्यम पाप कर्ना ओ पाप कर लगैना सबजहन जम्मा कैक 42आगीक भट्टीम फाँकदेहीँ। हुँक्र उहाँ दुःखले दाँत पिस्टी रुवाबासी कर्टिरहीँ। 43तब धर्मी मनै आपन परमेश्वर बाबक राज्यम दिनअस चम्कहीँ। ज्याकर कान बा, उह सुनऽ।
गारल धन ओ मोतीक बारेम आहान
44“स्वर्गक राज्य कौनो जग्गम गारल बहुमूल्य धनअस हो। कौनो मनैया भेटाइल कलसे, फेदोस्र भठारदेठा, ओ ऊ खुशी हुइटी जैठा ओ आपनठे रहल सक्कु सम्पत्ति बेँच्क उ जग्गा किन्ठा।
45“स्वर्गक राज्य असल मोती खोज्ना एकठो ब्यापारीअस हो। 46जब ऊ बहुमूल्य मोती भेटाइल, तब आपनठे रहल सब चिज बेँच्क उ मोती किनल।
जालक बारेम आहान
47“स्वर्गक राज्य समुद्रम फाँकल जालअस हो, यिहिँम सब किसिमक मच्छी पर्ठ। 48जालम मच्छी पर्ल कलसे, मनै ओहीह ढिक्वम तन्ठ। हुँक्र बैठ्क मजा-मजा मच्छी भाँरम ढर्ठ, तर काम नैलग्ना मच्छी सब फाँकदेठ। 49यी संसारक अन्तिम दिनम अस्तह हुइनेबा। स्वर्गदूतहुँक्र आक धर्मी मनैन्हक बीचमसे दुष्ट मनैन अल्गैहीँ, 50ओ आगीक भट्टीम फाँकदेहीँ। हुँक्र उहाँ दुःखले दाँत पिस्टी रुवाबासी कर्टीरह्हीँ।”
51येशू आपन चेलन पुछ्ल, “का टुह्र यी सब बात बुझ्लो?”
हुँक्र कल, “बुझ्ली।”
52उहओर्से येशू हुँकन कल, “आब स्वर्गक राज्यक शिक्षा पाइल हरेक शास्त्री घरक एकठो मालिकअस हो। ऊ आपन भण्डारमसे लौव ओ पुरान बहुमूल्य चिजबिज निक्रैठा।”
आदर नैपैना अगमवक्ता
मर्कूस ६:१-६; लूका ४:१६-३०
53यी आहान कैक सेक्ल त येशू उहाँसे गैल। 54येशू आपन हुर्कलक सहरम गैल। उहाँ उ ठाउँक सभाघरम असिन शिक्षा देल, कि उहाँक शिक्षा सुन्क मनै छक्क पर्ल ओ कल, “यी मनैया असिन बुद्धि ओ अचम्मक काम कर्ना शक्ति कहाँसे पाइलहुहीँ? 55यी त उह सिकर्मीक छावा नैहुइट का? हिँकहार डाईक नाउँ मरियम ओ हिँकहार भैयन याकूब, योसेफ, सिमोन ओ यहूदा नैहुइट का? 56हिँकहार बहिनेन फे हमारसँग नैरट का? तर यी मनैया असिन अचम्मक चिज कहाँसे पाइलहुहीँ?” 57हुँक्र असिक कटी इन्कार कर्ल।
तर येशू हुँकन कल, “आपन गाउँघर ओ परिवारम बाहेक अगमवक्तन्हक सक्कुओर आदर हुइठा।”#यूह ४:४४
58हुँकन्हक विश्वास नैरलक कारण येशू शक्तिक काम धेर नैकर्ल।
© 2020, Wycliffe Bible Translators, Inc. All rights reserved.
