मत्ती 10
10
बाह्र चेलन्हक सेवा
मर्कूस ३:१३-१९; ६:७-१३; १३:९-१३; लूका ६:१२-१६; ९:१-६; १२:२-९; २१:१२-१७
1येशू आपन बाह्रजहन चेलन बलैल, ओ हुँकन भूत निक्रैना, ओ हरकिसिमक रोग लागल मनैन चोखैना अधिकार देल।
2बाह्र जन प्रेरितहुँक्र हिँक्रहे हुइट: पैल्ह पत्रुस कैजिना सिमोन, ओ हुँकहार भैया अन्द्रियास, जब्दियक छावन याकूब, ओ हुँकहार भैया यूहन्ना, 3फिलिप ओ बारथोलोमाइ, थोमा ओ कर उठैना मत्ती, अल्फयसक छावा याकूब, थेदियस, 4देशभक्त दलक सिमोन, ओ यहूदा इस्करियोत, जे पाछ येशूह ध्वाखा देहल।
5येशू उ बाह्र जन चेलन असिक आज्ञा देक पठैल, “टुह्र गैरयहूदी मनैन्हकठे जिन जाओ ओ सामरीन्हक सहरम जिन पैँठो। 6बेनसे इस्राएलीन्हकठे जाओ, जे हेराइल भेँरीअस बाट। 7ओ स्वर्गक राज्य लग्घ आस्याकल कटी प्रचार करो।#लूक १०:४-१२ 8बेरम्हेन चोखाओ, मुवल मनैन जियाओ, कोररोग लागल मनैन शुद्ध पारो ओ भूतन निकारो। टुह्र बिना म्वालक पैलो, औरजहन फे बिना म्वालक देओ। 9फाँर कस्ना लुगम स्वान, चाँदी, रूप्या-पैँसा कुछु जिन बोको। 10यात्रम झोली, फेर्ना लुगा, जुत्ता, या टेक्नी कुछु जिन बोको। काकरकि काम करुइयन खाए पाइपर्ठा।#१ कोर ९:१४; १ तिमो ५:१८
11“टुह्र गाउँ या सहरम जैबो कलसे टुँहन स्वागत कर्ना मनैयह खोजो ओ उ गाउँसे नैजाइट्सम उह मनैयक घरम पलरहो। 12टुह्र घरम पैँठ्बो त ‘टुँहन शान्ति ह्वाए’ कैक कहहो। 13यदि उ घरमक मनै शान्ति पैनायोग्यक बाट कलसे, उहाँ शान्ति रनेबा। तर यदि उ घरमक मनै योग्य नैहुइट, कलसे शान्ति टुन्हकठे घुम्क आजाई। 14यदि कुई टुँहन स्वागत नैकरी या टुन्हक बात नैसुनी कलसे, उ घर या सहर छोर्क जाइबेर आपन ग्वारक धूर झराअइहो।#प्रे १३:५१ 15जाट्टीसे मै टुँहन कहटुँ, न्यायक दिनम उ सहरक दशा सदोम ओ गमोरा सहरक दशासे फे कर्रा हुहीन।#मत्ती ११:२४; उत १९:२४-२८
16“हेरो भेँरीन ब्वाँसन्हक बीचम पठाइअस मै टुँहन पठाइटुँ। उहओर्से टुह्र साँपअस चलाक ओ ढुकुरअस स्वाझ होओ।#लूक १०:३ 17मनैनसे होसियार रहो, काकरकि हुँक्र टुँहन पकर्क अड्डा-अदालत लैजैहीँ ओ सभाघरम कोर्रा लगैहीँ। 18टुह्र म्वार कारण हाकिम ओ शासकन्हक आघ लैजाजैबो, उ ब्याला टुह्र गैरयहूदीन्हक आघ म्वार बारेम साक्षी देहपर्नेबा। 19तर जब टुँहन पक्रैहीँ, तब का बोल्ना, कसिक बोल्ना कैक चिन्ता जिन करो। उहब्याला ब्वालपर्ना ठीक वचन टुँहन देजाई। 20काकरकि बोलुइया टुह्र नैहुइबो, तर परमेश्वर बाबक आत्मा जो टुह्रद्वारा बोलहीँ।
21“मनै आपन दादुभैयन मुवाइक लाग पक्रादेहीँ, डाई-बाबा आपन छाई-छावन, छाई-छावा आपन डाई-बाबन्हक विरोधम उठहीँ ओ मुवाइ लगैहीँ। 22म्वार कारणले सबजन टुँहन हेल्हा करहीँ। तर जे अन्तिमसम स्थिर रही, ऊ बचाजैनेबा।#मत्ती २४:९-१३ 23मनै टुँहन एकठो सहरम सँतैहीँ कलसे, टुह्र और सहरम भागजैहो। मै जाट्टीसे टुँहन कहटुँ, टुह्र इस्राएलक हरेक सहरम काम सेक्ल नैरबो त मै मनैयक छावा, फेदोस्र आजैम।
24“कौनो चेला आपन गुरुसे बरा नैरहट्, ओ कौनो नोकर आपन मालिकसे बरा नैरहट्।#लूक ६:४०; यूह १३:१६; १५:२० 25चेला आपन गुरुअस, ओ नोकर आपन मालिकअस हुइलसे धेर हो। यदि हुँक्र मै घरमालिकह त भूतन्हक रज्वा बालजिबुल कठ कलसे, घरपरिवारन झन् का कहीँ?#मत्ती ९:३४; १२:२४; मर्क ३:२२; लूक ११:१५
26“उहओर्से मनैनसे जिन डराओ, काकरकि नुकाक ढैल सब चिज छर्लङ्ग देखपर्नेबा, ओ गोप्यम रहल सब बात खुलस्त पारजैनेबा।#मर्क ४:२२; लूक ८:१७ 27ज्या बात मै अन्धारम कैरख्नु, उ सब बात अजरारम कैदेओ, ओ ज्या बात एकान्तम सुन्रख्लो, उ सब बात घरक धूरीमसे प्रचार कैदेओ। 28हुँकनसे जिन डराओ जे शरीरह केल मुवाइसेक्ठ, तर आत्मह मुवाइ नैसेक्ट। बेनसे आत्मा ओ शरीर दुनु नरकम नाश कर सेक्ना परमेश्वरसे डराओ। 29का एक पैँसम दुइठो गिउँरा नैबिक्ट? उहफे परमेश्वर बाबक इच्छा बिना एकठो गिउँरा फे भूइँयम नैगिरट्। 30टुन्हक कपारिक भुत्ला एक-एक कैक गनगैलबा। 31उहओर्से जिन डराओ, गिउँरनसे टुह्र धेर मूल्यवान बाटो।
32“जे महीह मनैन्हक आघ स्वीकार करी, मै फे ओहीह स्वर्गम रना आपन बाबक आघ स्वीकार करम। 33तर जे महीह मनैन्हक आघ इन्कार करी, मै फे ओहीह स्वर्गम रना आपन बाबक आघ इन्कार करम।#२ तिमो २:१२
34“मै पृथ्वीम शान्ति आनक लाग अइनहुँ कैक जिन सम्झो। मै त शान्ति आनक लाग नाहीँ, तर तरवाल चलाइक लाग पो अइनहुँ। 35मै त छावा आपन बाबक विरोध, छाई आपन डाईक विरोध ओ पटोइह्या आपन सासूक विरोध कराइक लाग अइनहुँ। 36मनैयक शत्रु त वाकर आपनऽ घरक मनै हुइनेबाटस।#मीका ७:६
37“जे आपन डाई-बाबह महीसे धेर प्रेम करी ऊ म्वार चेला हुइना योग्यक नैहो। ओसहँक जे आपन छाई-छावह महीसे धेर प्रेम करी ऊ फे म्वार चेला हुइना योग्यक नैहो। 38जे आपन क्रूस बोक्क म्वार पाछ नैलागट्, ऊ म्वार चेला हुइना योग्यक नैहो।#मत्ती १६:२४; मर्क ८:३४; लूक ९:२३ 39आपन प्राण बचाइ खोजुइयन प्राण गुमैहीँ। तर म्वार पाछ लग्लक कारण आपन प्राण गुमुइयन जीवन पैहीँ।#मत्ती १६:२५; मर्क ८:३५; लूक ९:२४; १७:३३; यूह १२:२५
40“टुँहन स्वीकार करुइया महीह स्वीकार कर्ठा, ओ महीह स्वीकार करुइया महीह पठुइयह स्वीकार कर्ठा।#मर्क ९:३७; लूक ९:४८; १०:१६; यूह १३:२० 41अगमवक्तह ‘अगमवक्ता हुइट’ कैक स्वागत कर्ना मनै अगमवक्तन्हकअस इनाम पैहीँ। धर्मी मनैयह ‘धर्मी हुइट’ कैक स्वागत करुइयन धर्मी मनैन्हकअस इनाम पैहीँ। 42जे यी छोटीसेछोटी चेलामध्ये एकजहन म्वार चेला मान्क एक गिलास जुर पानी केल हुइलसे फे पियक लाग देहल कलसे, मै जाट्टीसे कहटुँ ऊ आपन इनाम अवस्य पैनेबा।”
© 2020, Wycliffe Bible Translators, Inc. All rights reserved.
