Matayi 3
3
UYohani umwozyi nukukumusya kwakwe
1Ilelo pe pamanda gala pʼahalolehʼuYohani umwozyi ahakumusya mulwugwa lwa mu-Yudayi 2ahati: Simupindushe, she vwinzilʼuvumwene vwa kumwanya, vuli papipi. 3Uno lelo we wuyo wʼamuyanjiyʼuYesaya umukuvwi lwʼatili:
Izwi lya muvilishizi mulwugwa likuti:
Simuyananye nidala lya Mwene,
mugolosye nutuswatuho twakwe.
4UwenʼuYohani ahazwalagʼinkanzu ya vusepe vwa ngamila, ahayifungagʼilamba lya luhova mumusana. Iṿintu ahalyanga numakanta nuvwushi vwa nzushi. 5Pe vahavala pʼali ava mu-Yelusalemu nava mu-Yudayi insi yonti, navamunsi yonti yʼipalamiye kwijenje lya Yolidani. 6Vahaṿumbulʼamalandu gavo. Pʼuwenʼahavozya mwijenje mwa Yolidani. 7Ayazile lelʼuwene navaFalisayi navaSadusayi ve vinji vakuvala kukwakwe ukwozelwa, pʼahavavuzya ahati: Mwe luho lwa njohʼimwe, unanʼavavuzizyʼimwe ukuti muliponʼuvuhalazu vwe vukwinza? 8Muhomʼinsangʼinyinza zye zihondeline nulupinduho. 9Mwandajʼukuyiyanjila mweka ukuti: Iswe tuli nutata uAbulahamu. Leshʼimbavuzyʼine shʼuMulungu amanyilʼukumuvusizyʼuAbulahamu avana mumavwe iga. 10Yope nintemo yili kumazi kumakwi lwe lutanzi. Gontʼamakwi ge gatakuhomʼinsangʼinyinza galitemangwa galitajilwa mumwoto, 11Ine ne nkuvozezya ge minzi ga lupinduho, uwene nyene wʼakwinza mwisinda mumwane, wʼandusizye namaha, ntahondeyʼukunyatulʼindyato zyakwe. Wuyo nyene alivozezya muMupepʼuMufinjile namumwoto. 12Wʼulupe luli munyove zyakwe, aliyusʼishaniho shakwe, uvulezi vwakwe aliviha mumulaza, nkandʼilyelelo alipemba mumwoto wʼatakuzima nalumo.
Ukwozelwa kwa Yesu
Mal. 1,9-11. Luk. 3,21; 22. Yoh. 1,29-34.
13PʼuYesu ahafuma mu-Galilayi ahavala kwa Yohani ku-Yolidani ahati wʼanozyaje. 14UwenʼuYohani ahanzʼukumudindila ahati: Ntahondeye. Ine nkwanzʼunozye wewe, nkandʼiwe ukwinza kukwane? 15UwenʼuYesu ahamula ahati: Yitihaga shinishi she tuhondeye nkumalilizya vovulo zyontʼizya muvugolosu. Pʼahitiha. 16Ilelo lwʼayozilwʼuYesu pʼahafuma muminzi luvilo luvilo. Pʼahitushila kumwanya kwigusile, ahagʼuMupepo wa Mulungu akumwishila ngati nkunda. 17Yenyi, nizwi likufuma kumwanya likuti: Wuyo we Mwana wane unkundwa we nkuseshela muli wuyo.
Nyiha New Testament © British and Foreign Bible Society, 1965.
