Yohani 3
3
Akupangʼipangwi nuNikodemo
1Ilelo alipo wokʼumuntu wa vaFalisayi, izina lyakwe ali wʼuNikodemo, umupiti muvaYuda. 2Wʼahavala kwa Yesu pavusiku ahati: Labi, tukumanyile ukuti we Musambilizi wʼafumile kwa Mulungu, she numo atakupelʼiṿimanyilo ṿiniṿi ṿwʼukupelʼiwe ingʼuMulungu ate nawo. 3PʼuYesu ahamula ahati: Nalyoli lyoli nkuvavuzya ine nkuti: Umuntu ingʼatakupapwa havili pʼakupotwa Ukwenya ishinamwene sha Mulungu. 4UwenʼuNikodemo ahamuvuzya ahati: Apapwaje vuli umuntu, lwʼagosifile? Ingavanga avuyile havili ukwinjila muhati mwa nyina pʼajende nukupapwa? 5AhamulʼuYesu ahati: Nalyoli lyoli nkukuvuzyʼine nkuti: Umuntu ingʼatakupapwa nakuminzi nakwa Mupepo, pʼakupotwa ukwinjila mushinamwene sha Mulungu. 6Uno wengʼamupafile we muvili, wope we muvili vwelele, Uno wengʼamupafile we Mupepo, wope we Mupepo vwelele. 7Zyʼutagandushe zye nkuvuzizye ntili pakuti mupapwaje havili. 8Yenya, inkungu ikuṿugula mwonti mwʼikasimʼiyene. Izwi lyakwe lyʼukwiṿwa we muntu, nkandi nakwʼifumile nakwʼikuvala utamanyile ndali. Yenya lelo she vali vovulo vonti vʼavapafilʼuMupepo. 9PʼuNikodemo ahamula ahamuvuzya ahati: Zye zipelwaje vulivuli zinizi? 10UwenʼuYesu ahamula ahamuvuzya ahati: We musambilizi wenewe muvana-Yisilayili, nkandi Zyope nazinizi utazimanyinsinye? 11Nalyoli lyoli nkukuvuzyʼine nkuti: Iswe tukuyanga zizyo zye tumanyile, tukuhomeshezya zye tuwenyi. Havilʼimwe uluhomeshezyo lwitu mutakuluposhela. 12Izyene lelo inga nazye zya munsʼumu zitakuvaholʼimwe, pe zyinze zivahole vuli lelo izya kumwanya inga zye nkuti imbavuzye? 13Numo atalisile nalumo kumwanya, nkandi wuyo wʼayisile wʼafumile kumwanya, uMwanamuntu, wʼali kumwanya. 14Inza shʼuMose ahimiha injoha mulwugwa, she pakuti wope nawe Mwanamuntu ayimishilwaje vovulo, 15vonti ve vakumwitiha ukuti vatatupulwaje ndali, nkandi vavwajʼuvulanzi vwa shimashima. 16Uwene shʼahonzizye vovulʼuMulungu ukukundʼinsi, kwe kuyipʼuMwana wakwe woka mwene imozi, vonti ve vakumwitiha ukuti vatatupulwaje ndali, nkandi vavwajʼuvulanzi vwa shimashima. 17ShʼuMulungu atamutumilʼuMwana wakwe munsʼumu ukuti alonjʼinsi, nkandi ukuti aposhʼinsi. 18Uno wengʼakumwitiha wʼatakulongwa, nkandʼuno wengʼatakumwitiha wʼalonzilwe, shʼasisitʼukwitiha izina lya Mwana wa Mulungu wʼali woka mwene imozi. 19Uvu vwe vulonzi, shʼuluhozyo lwinzile munsʼumu, shʼavenʼavantu vahasyoshelʼuluhozyo, vahamanyana nishisi, shʼimbombo zyavo zyalʼimbivi. 20She vonti ve vakunanga zimo, avene vakupatʼuluhozyo, vatakuvala kuluhozyo, she vakuti: Ingavanga twaje lukuzimenelezya zye tuvomṿile. 21Avene nyene ve vakuvomba izya nalyoli, avene vakuvala nakuluhozyo, she vakuti zilolehaje zye vavomṿile ukuti vazivomṿile mwe mwa Mulungu.
Umwozyi akupitilizyʼukumuhomeshezyʼu Yesu
22Pisinda pazinizi pʼuYesu ahavala munsi ya mu-Yudayi navasundikwa vakwe. Mwe vahadila, ahozya. 23UwenʼuYohani wope ahozyaga mu-Enoni kupipi namu-Salimu, shʼaminzi galʼaminji mumwo. Avantu vahamusogolela, vahozelwa. 24ShʼashilʼuYohani ukwigalilwa mujela. 25Pʼamadali gahanda navasundikwa va Yohani navaYuda pazya kuzelufwa. 26Vahajenda kwa Yohani vahamuvuzya vahati: Labi, umuntʼula we wali nawo isyila lila lya Yolidani, ula wʼuhamuhomeshezya, yenya, wope akuvozyʼavantu, vonti vakumwinzila. 27AhamulʼuYohani ahati: Numʼumuntu atakuyisendela naṿimo weka ṿwʼatapelilwe ukufuma kumwanya. 28She mukunkomeshezya namwe ukuti njanzile: Nte ne Chilisiti nene, nkandi ntumilwe kwilongolela kukwakwe wuyo. 29Uno wengʼali numuzinjilwa we muhatamushi. Uwene nyene umwimazi wa musendamwantanda ingʼakwimilila, ingʼakwiṿwa lwʼakuyangʼumusendamwantanda, wʼakuseshela nkani lwʼakwi-ṿwʼizwi lya musendamwantanda. Uluseshelo lunulu lwe nsesheye nane, nikusi lelo. 30Uwene we pakuti aṿulaje, ine nyene pakuti imṿilaje.
31Wuyo wʼafumile kumwanya, wʼali pamwanya pali vonti. Wuyo nyene wʼafumile munsʼumu we wa munsi, Zyope nazyʼakuyanga zya munsi vwelele. Uwene wuyo wʼafumile kumwanya, wʼali pamwanya pali vonti. 32Uwene nazizyo zyʼawenyi nazizyo zyʼayiṿuye zyʼakuzihomeshezya. Havili numʼumuntu atakuluposhela uluhomeshezyo lwakwe. 33Uno wengʼakuziposhela zyʼakuhomeshezyʼuwene, wʼayipezilʼukuva shimanyilo sha kumanyila mumwo ukuti uMulungu we wa nalyoli. 34Shʼuno wengʼuMulungu amutumile, wʼakuyanga ge mazwi ga Mulungu. She lwʼakumupʼumuntʼuMupepo atakumupa pashilinjilo. 35UYise akunzitʼuMwana, ṿwonti amupiye mumuhono wakwe. 36Uno wengʼamwitisilʼuMwana, wʼali navwʼuvulanzi vwa shimashima. Nkandʼuno wengʼakusufwʼuMwana, wʼataliyenya uvulanzi ndali, vwe vuhalazu vwa Mulungu vwe vukulinda papakwe.
Nyiha New Testament © British and Foreign Bible Society, 1965.
