Yohani 1
1
Izya kutaliha
1Kuvwando kwe lyalʼizwi. Izwʼili lihava nuMulungu. Izwʼili lyali wʼuMulungu. 2Ilyene kuvwando lihava nuMulungu. 3Vwonti ṿipezilwe mwe mumwakwe lilyo. Litave lilyo pe nkandi ṿitapezilwe naṿimo ṿwe ṿipezilwe. 4Vwope nuvulanzi vuhava mumwakwe lilyo. Uvwenʼuvulanzi vuhava luhozyo lwa vantu. 5Ulwenʼuluhozyo luhahozya mushisi. Ishenʼishisi shihasita ukulwaganya.
6Pʼahaloleha umuntu, wʼuMulungu amutumile, ali wʼuYohani izina. 7Wʼayinzilʼukuyanga izya kuhomeshezya, ayinzilʼukuhomeshezya izya luhozyo, vontʼavantu ukuti avatwale kulwitiho. 8Uwenʼatali luhozyo ndali, nkandi ali wa kuhomeshezya izya luhozyo.
9Ulwene lwe luhozyo lwa nalyoli, lwe lukuhozya vontʼavantu ve vakwinza munsʼumu. 10Uwenʼali munsʼumu, she yopʼinsi yapezilwe mumwakwe, nkandi iyenʼinsi yitahamumanya. 11Ayinzile mumwakwe, havili avenʼavantu vakwe vahasitʼukumuposhela. 12Avene nyene vonti ve vamuposheleye vʼavapiyʼamaha aga kuvelʼukuva vana va Mulungu, vuvo ve vahitiha izina lyakwe, 13ve vatapafilwe namumavanda, namwʼakasimʼumuvili, namwʼakasimʼumuntʼumwanaṿuli ndali, nkandi mumwakwe uMulungu.
14Havilʼizwi lihayipelʼukuva muvili, ahadila mumwitʼumu tuhenya nuvupiti vwakwe, uvupiti fwe vwa Mwana wʼali woka mwenʼimozi mwa Yise, we nuvwila nuvwanalyoli vwizuye mumwakwe. 15UwenʼuYohani ahamuhomeshezya ahavilishila ahati: We wuyo we namutahaga we natinji: Wuyo wʼakundandata mwisinda we mutanzi kukwane, shʼuwenʼalipo lwe nchili ine. 16Havili swenti muvutangale vwakwe tuhasendela vwe vwila havili havili. 17Shʼizyenʼinkomelezyo uMulungu atutumiye nuMose, uvwenʼuvwila nuvwanalyoli vwʼatupeleyʼuYesu Chilisiti. 18Numʼatamuwenyi muminsʼuMulungu nalumo, uMulungu uMwana woka mwene imozi, wʼali pashifuva sha Yise, wuyo wʼatuvuzizye.
Uluhomeshezyo lwa Yohani umwozyi ulwa kumuhomeshezya uYesu
19UwenʼuYohani ahahomeshezya zinizi lwʼavaYuda vavatumile kukwakwe navashiputo navana-Leṿi ukumuvuzilizya ukuti: We nanʼiwe? 20pʼahaṿumbula, ahasita nukuzyiha, ahayihana ahati: Nte ne Chilisiti ine. 21Havili vahamuvuzilizya vahati: Uli vuli lelo? We Eliya? Uwenʼahati: Nte nene. Amwe we mukuvwi iwe? Uwenʼahamula ahati: Ndali. 22Havili avene vahamuvuzilizya vahati: We nanu lelo? Utuvuzye ilya kuvalʼukuvavuzya ve vatutumile. Ukuyiyanjila lili kwi? 23Uwenʼahavavuzya ahati: Ine ne lizwi lya muvilishizi mulwugwa, wʼakuti: Simugolosyʼidala lya Mwene, inza shʼayanzilʼuYesaya umukuvwi. 24Avene nyenʼavantu ve vatumilwe vafumile muvaFalisayi. 25Havili vahamuvuzilizya vahati: Ilelo ukwozya shonu ingʼute we Chilisiti, ute we Eliya, ute we mukuvwi? 26UwenʼuYohani ahamula ahati: Ine ne nkwozezya ge minzi vwelele. Uwene nyene wʼayimiliye pahati pamwinyʼipa, wʼimwe mutamumanyile, 27wuyo wʼandandite mwisindʼine, we wuyo ine ntahondeye ukusatula inkova zya ndyato zyakwe. 28Zinizi zyapezilwe mu-Betaniya kwisyila lila lya Yolidani, mwʼuYohani ahozezyaga.
29Ilya ndavi ahamwagʼuYesu akwinza pʼali, pʼahayanga ahati: Ula halʼahagonzi ha Mulungu he hakunyatulʼuvutalamalandu vwa nsi yonti. 30We wuyo namutahaga we natinji: Akundandata mwisindʼumuntu we mutanzi kukwane, shʼuwene alipo lwe nchili ine. 31Nane ntamumanyile ndali, nkandi alolehaje wuyo kuvana-Yisilayili mwe mumwo nkwozya naminzi. 32Havili uYohani ahahomeshezya ahati: Imuwenyi ine uMupepo lwʼakwiha akufuma kumwanya ngati nkunda, ahatendama papakwe. 33Nane ntamumanyile ndali; wuyo nyene wʼantumile ukwozya naminzi, we wuyo wʼambuzizye atili: Wuyo wengʼuyazile uMupepo akumwishila nukutendama papakwe, we wuyo wʼakwinzʼukwozya muMupepʼuMufinjile. 34Zye nkenyʼine, pe havili nkahomeshezya nkati: We wuyo we Mwana wa Mulungu.
Avasundikwa va Mwozyi nʼuYesu
35Havili ilya ndavi ilyamwavo lwʼayimiliye pupʼuYohani navasundikwa vakwe vavili, 36pʼahamwagʼuYesu akujenda, pʼahati: Ula halʼahagonzi ha Mulungu. 37Avenʼavasundikwa vakwe vavili ve viṿuye lwʼakuyanga linili, pe vahamulandatʼuYesu. 38UwenʼuYesu ahasyetuha, ahaga vakulandata, pʼahavavuzya ahati: Mukuvala kwi? Avene vahamuvuzya vahati: Labi (lye likuti: Musambilizi), ukuva kwi? 39Uwenʼahavavuzya ahati: Nzagaji, mumanye. Pe vahavala, vahenya pʼakuva. Ilelo pe vahizya nawo umusanya wuyo. Apene pali pe pahavalilizyo hʼishumi. 40Avene ve vahiṿwaga zyʼahayangagʼuYohani, ve vahalandatagʼuYesu, woka ali wʼuAndeleya umuzuna wa Simoni Peteli. 41Wʼahataliha ukumwagʼumukulu wakwe uSimoni, ahamuvuzya ahati: TumwazilʼuMesiya (lye likuti: UChilisiti). 42Ahamutwala kwa Yesu. UwenʼuYesu ahamwenyelezya ahati: We Simoni we mwana-Yohani iwe, shinishi ukutashilwa ilya Kefa (lye likuti: UPeteli).
43Ilya ndavi ilyamwavo uYesu lwʼavusilʼukuvala muGalilayi, pʼahahomana nuFilipu, ahamuvuzya ahati: Undandate. 44UwenʼuFilipu nyene afumile mu-Betisayida inkaya yakwe uAndeleya niya Peteli. 45UwenʼuFilipu ahahomana nuNatanayeli, ahamuvuzya ahati: Tumwazile wuyo, wʼuMose amusimṿile munkomelezyo namuvakuvwi, uYesu umwana-Yosefu uwa mu-Nazaleti. 46UwenʼuNatanayeli ahamuvuzya ahati: Mu-Nazaleti ṿwonu ṿifumile mumwo lumʼiṿwinza? UwenʼuFilipu ahati: Nzagaga, uyenye. 47UwenʼuYesu lwʼawenyi uNatanayeli akwinza kukwakwe, pʼahamuyanjila nzila ahati: Musukumile umuYisilayili nalyoli, wʼate namafuji nagamo muhati yakwe. 48PʼuNatanayeli ahamuvuzya ahati: Umanyile poshi? AhamulʼuYesu, ahamuvuzya ahati: LwʼuFilipu ashili ukukwita, lwe wali mwituvu lila, pe nakuwenyʼine. 49Pʼahamwamula uNatanayeli ahati: Labi, we Mwana wa Mulungu wenewe, we Mwene wenewe wa vana-Yisilayili. 50Havili uYesu ahamula ahamuvuzya ahati: she nkuvuzizye ntili: Nakuwenyi mwituvu? mwe mumwo zikuhozile? Ulisukumila impiti nakulʼizi. 51Pʼahayanga nawo ahati: Nalyoli lyoli nkuvavuzyiʼmwe nkuti: Muliyaga kumwanya kwigusile navahavizya va Mulungu ve vakuzuva kumwanya nave vakumwishila uMwanamuntu.
Nyiha New Testament © British and Foreign Bible Society, 1965.
