Tekang Kbuten 4
4
Kain ne Abél
1Timbow sentungô Adam Ib yóm tuha libunen, tódô mlutut ne mngà logi. Yó udélen, “Lemwót bè tóbóng Dwata dou, yó gónóhu mngà logi.” Ne yó gónóhen moluy du Kain yóm ngaen yó. 2Kogolen bè yó, bud mngà logi, duhen Abél. Bè yóm deng kbong yó kem lewu ngà yó, yó kun nmò Abél gel semgyok ubiha, okóm ke Kain kun fen gel mò nmò bè tonok. 3Sotu kdaw bè yó, wen nwa Kain bè yó kem nutahen ne dsuen ebè Dwata. 4Omin Abél demsù se kun, wen nwahen bè tanay ngà yó kem ubihahen, ominen hmatay kul. Nwahen yóm unged hol hyu mò dsuen ebè Dwata. Tey hyu nawa Dwata ebè Abél ne bè yóm dsuen yó. 5Okóm fen kenbéen yóm kun dsù Kain.#4:5 Yó gónó Dwata kembê yóm dsù Kain, abay se hnuda Kain yóm mò kedsuen ebè Dwata. Ya tey sidek kebut Kain, ne tey sidek kegnómen du.
6Ne yó mon Dwata mò ke Kain, “Moen de, Kain, ke alii lembut? Moen de ke alì sidek kegnómem du? 7Ke yóm hyu yóm dsuem, tedu duónu là hemmóyô du? Okóm lemwót bè yóm là kehyuhen, hol lómón ke wen salà mangat kóm bè bak autem anì nwiten uu. Tódô kenbéem dé anì là gmungi.”
8Sotu kdaw bè yó, mon Kain mò ke Abél yóm twolihen, “Na te slomong ebè tniba dé kemdaw ni.” Tahu se. Tikóng le deng kól ditu bè tniba, tódô kento Kain demlu yóm twolihen ne hnatayen.
9Ne snólók Dwata Kain, “Ó Kain, nô se twolihem du?”
Bnalà Kain se, monen, “Là tngónu du dou. Là kô ou du semgyok du?”
10Omin Dwata bud mon du, “Tey, Kain, moen ni du ke nmoem nim tey sidek ni? Deng tonu litô twolihem dmanag bè tonok, lómón ke dawaten ou anì bnelesu. 11Ni wen tafaku kóm ne là kóen na a mkó tahem. Là buden hyu ne kmoem nmò bè tonok, abay se deng gamà bè tonok litô twolihem bè yóm khatayem du. 12Ne ni, ke tói bud mò hulu, là kóen hyu ktowoken. Ne sotuhen, là buden mtukul ne kbenwuhem, sónmoem ówów.”
13Ne yó mon Kain mò ke Dwata, “Tey Dwata, là kô gbeku mit du nim tey tafakem dou ni. 14Deng hdóhem ou gu bè yóm dou tonok ne hlayukem ou béléem. Ne hówówem ou, laen kô dù mtukul gónóhu nô ne. Ke wen tau mton dou, tódô hnatayen o.”
15Okóm yó balà Dwata du yóm udélen yó, monen, “Là. Ke wen hmatay kóm, hitu duléku he mkay du senta yóm tafaku kóm yóm kun tafak.” Duhen yó, wen ilô nmò Dwata bè Kain anì laen dù tau hmatay du ke wen gemslong du. 16Ne omin Kain tmagak ke Dwata ne ditu gónón nô bè yóm benwu boluyen “Ówów,” nô fi dmata kdaw yóm hungul koyu bè Idin.
Kun ból Kain
17Kogolen bè yó, sentungô Kain tuha libunen ne mlutut ne mngà logi. Yó boluy le du, Inuk. Ominen wen syudad hdà Kain ne yó boluyen du Inuk yóm boluy ngaen.
18Timbow mngà se ke Inuk, duhen Irad. Nim Irad ni, du se mà Mihudyail. Bud mngà se ke Mihudyail, duhen Mitusila yóm mà Lamik.
19Nim Lamik ni, lewu yehenen. Yó boluy le, Ada ne Sila. 20Mngà Ada, duhen Jabal. Nim Jabal ni, du gónó le gu semfu yó kem tau gel semgyok safì. Són bè tolda gónó le gel nô. 21Yó boluy twoli Jabal, duhen Jubal yóm kul gónó gu semfu yó kem tau hulung hemglung ne hulung smoli. 22Mngà se ke Sila, duhen Tubal-kain yóm tau gónó le gu semfu yó kem tau msól. Wen gel nsól le lemwót bè bala tók ne bè yó kem dumu gel nsól le. Wen libun Tubal-kain, boluyen Naama.
23Sotu kdaw, yó mon Lamik mò yó kem yehenen,
“Ó Ada ne Sila, hol hnungol ye ou. Denge gemhatay sotu logi lomi lemnok lanen tembek dou.
24Ke hitu dulék Dwata tmafak yóm tau hmatay ke Kain, fen hitu folò hitu duléken tmafak du ke wen tau hmatay dou.”
Sét ne Inus
25Bud sentungô Adam Ib yóm tuha libunen, ne mlutut, ne mngà logi. Ne yó mon Ib, monen, “Deng bud benlay Dwata ou ngà logi mò tles Abél, yóm tehe hnatay twoguhen.” Ne yó gónón moluy du Sét. 26Bud mngà se ke Sét, duhen Inus. Bè yóm kdaw yó, nbut le ne tmaba ebè Dwata yó kem tau.
© 2007, Wycliffe Bible Translators, Inc. All rights reserved.
