Luuka 23

UYeesu iihigwa kwa Pilaato

(Mataayo 27:1-2, 11-14; Maluko 15:1-5; Yohana 18:28-38)

1Paanyuma, avakhome vala woona va Vayahuudi vayiima, vamutwala uYeesu kwa Pilaato, umunjaajila wa Shiluumi. 2Vayansa kimusitaakha viija, “Umuunu uyu, tamwaga imanyisa gina gikivayasa avaanu mu nyi yeesu. Ikivakhaana avaanu kihomba ikhoodi kwa Kayisaali, umutwa wa Valuumi, khanji umwene ikiyihala iijova, yu Mukulusaaji,#23:2 Mukulusaaji: Kwa Shiyunaani yiyandiikhwe Kilisito. Yimba iliswi Kilisito mu Maswi aMahensa. Mutwa.”

3UPilaato wámuposa uYeesu, “Aasi, owe yuuwe Mutwa wa Vayahuudi?” UYeesu wámugomosesa wáaja, “Owe shiyooli wilogola.” 4Apo, uPilaato wávajovela avatambule avakhome, lumo ni shipuga isha vaanu wáaja, “Nisikilyaga lina ananjile umuunu uyu.” 5Avaanu vala vakhangasa vaajova, “Mbona amamanyiso gaakwe gihonsa avaanu kiiva vanansi! Ayalaliise amamanyiso gaakwe mu nyi iyi yoona iya Yudeya, akhayansiise ku nyi ya ku Galilaya mbakha wáafikha kuno.”

6UPilaato pina wápulikha ago, wávaposa nda uYeesu muunu wa ku Galilaya. 7Pina wáamanya kiija muunu wa ku Galilaya, yuna iihuma mu wutwa wa Helode, wámutwala kwa Helode kwa kiiva uluhaavi ulo, uHelode akhandi bahala pa Yelusalemu.

UHelode ikimuposeelesa uYeesu

8UHelode pina wámwajile uYeesu, wáshendeevile mandu, kwa kiiva akhandi ipulikha imola saakwe, luhaavi lwinshi akhandi isakula kimwaga. Lino, akhandi ihuviilila kiija alyaje yumwene ilibikha lina uYeesu akwiliile kisenga. 9Baheene uHelode wámuposa uYeesu amaswi minshi, leelo umwene asikhavagomoseese lyolyona. 10Avatambule avakhome na vamanyisaaji va ndaji vayiima na kimusitaakha mandu uYeesu.

11Baheene uHelode na vasulukhali vaakwe vayansa kimubeda uYeesu na kimuneenela. Vamufwasa amenda ga shitwa na kimuhekha. Baheene uHelode wámutinia uYeesu kwa Pilaato. 12Kihuma ilijuva ilyo, uHelode nu Pilaato vamanyana, kiiva ulwamwandi vakhandi vanangeene.

UYeesu iihigwa kwa Pilaato

(Mataayo 27:15-26; Maluko 15:6-15; Yohana 18:39–19:16)

13Paanyuma, uPilaato, umunjaajila wa Shiluumi, wávakungaania avatambule avakhome na vakhome va Vayahuudi, lumo na vanji. 14Wávajovela wáaja, “Munileteele umuunu uyu, na kijova kiija imanyisa avaanu vave vigalukha. Lino gina mukimupiikha, namuposa panyeenyu, leelo nisilyajile lina ananjile. 15Woope uHelode asalyaga lina ananjile, lulwene wámutinia kunyeesu. Lino mumanyaje wunofu kiija, umuunu uyu, kusiina ishiinu shina wáagaha, shina shikimugaha abudwe. 16Lulwene niijova, atowe kwa majalidi, baheene nimuleshele.” [17Yikhandi ngʼoma ilijuva ilya shiwungo sha Pasaakha, uPilaato kivadindulila avaanu umudindilwa yumo.]#23:17 Amaswi aga, gakusiina mu mayandikhwa agamonga amakuulu.

18Leelo avaanu vala woona valyova ilyowo vaaja, “Umuunu uyo abudwe! Tisakula umudindulile uBalaaba!” 19UBalaaba wádindiilwe mu shifungo, kwa kiiva wágahaga amabaatu minshi mu lijumbi, na kibuda.

20UPilaato akhandi isakula kimudindulila uYeesu, baheene wálogola na woope khanji avaanu vala. 21Leelo aveene vashilile kilyova ilyowo viija, “Umukhomeelele pa musalaaba! Umukhomeelele pa musalaaba!”

22UPilaato wálogola na woope khanji ulwa wutatu wáaja, “Akhomeelelwe pa musalaaba kwa wunansi wushi? One nisikilwaga hata lujowo kunyaakwe luna lusimugahe abudwe! Lino atowe kwa majalidi baheene nisimuleshele.” 23Leelo avaanu vala vashilile kilyova mandu, visakula kiija uYeesu akhomeelelwe pa musalaaba. Kuunyuma, ilyowo lyanave lyamumena.

24Baheene, uPilaato wálamula kigaha ngaja shina vamulomba. 25Wávadindulila uBalaaba yuna vamugeene aveene, hata nda wádindiilwe kwa kigaha amabaatu minshi na kibuda. Baheene wámutawula uYeesu kwa vasulukhali kiija vamugahe ngaja shina visakula.

UYeesu ikhomeelelwa pa musalaaba

(Mataayo 27:32-44; Maluko 15:21-32; Yohana 19:17-27)

26Avasulukhali pina vikimutwala uYeesu kimukhomeelela, vatangaanaga nu muunu yumonga, yuna akhandi itambulwa Simoni, yuna akhandi mukhaaya wa lijumbi lya Kileene. Umuunu uyo wáhumile ku magunda iiluta ku Yelusalemu. Vamukhata, vamuvegasa umusalaaba gwa Yeesu kiija asumule. Baheene wásumula ikimufwata uYeesu.

27Ishipuga shikhome sha vaanu shaava shikimufwata uYeesu. Mu awo, vakhandi vakwali avashimaayi vina vakhandi vikhoola na kingʼuula kwa kiiva ya Yeesu. 28UYeesu wávasetushila, wávajovela wáaja, “Omwe vaana va ku Yelusalemu! Musikhanikholelaji one! Leelo, muveesaje mukiyikhoolela yuumwe, kwa kiiva ya wiikhasi weenyu na vaneenyu! 29Mumanyaje wunofu kiija uluhaavi luna luyinsa, avaanu vakhajova, ‘Shiba avashimaayi vina vagumba, vina vasisavile hata kiyonsa!’ 30Baheene,

‘Avaanu vakhava vikifijova ifidunda,

“Mutugwile!”

Vakhava vikitujova utudunda,

“Tugubishili!” ’#23:30 Yimba mu litaafili lya Hoseya 10:8.

31“Kwa kiiva, nda viigaha injowo isi ndeeni ku mupishi umwigu, yikhava wuli kwa mupishi guna guyuumile?”#23:31 Uluganulo lwakwe, avaanu ava nda vikimugahila wuvi uYeesu yuna mugolofu, lulwene kiija vakhavagahila wuvi mandu, kishila avaanu vina vasili vagolofu.

32Uluhaavi ulo, avasulukhali vakhandi vikivatwala avanansi vavili lumo nu Yeesu kivakhomeelela. 33Vaganile kifikha pina pakhandi pitambulwa Lipangalasi lya Mutwe, vamukhomeelela uYeesu pa musalaaba. Woope avanansi vala vavili vavakhomeelela, shila muunu pa musalaaba gwakwe. Yumo ulubali lwa kundiilo lwa Yeesu, uyunji ulubali lwa kunshiji. 34UYeesu wáaja, “Wee Daada! Uvasaajile! Kwa kiiva vasimeenye, gina viigaha.” Avasulukhali vala vagavana amenda ga Yeesu, kwa nsila ya kiviikha ululagusanio. 35Avaanu vayiima pala viloleela.

Avakhome va Vayahuudi, vayansa kimuneenela uYeesu viija, “Akhakulwise avanji! Lino, umwene nda yu Mukulusaaji,#23:35 Mukulusaaji: Kwa Shiyunaani yiyandiikhwe Kilisito. Mubaagule wa Nguluvi, ayikuluse yumwene!” 36Avasulukhali woope, vamuneenela. Vaava vikimuvejeela na kimupeela amahuuja ga divaayi, 37vaava vikimujovela viija, “Owe nda uli Mutwa wa Vayahuudi, yikulusa yuuwe!”

38Pashaanya pa musalaaba pakhandi pana shimanyilo shina shiyandiikhwe amaswi aga,

“Uyu yumwene Mutwa wa Vayahuudi.”

39Umunyaayumo mu vanansi vala vavili wámuliga uYeesu wáaja, “Owe usili Mukulusaaji?#23:39 Mukulusaaji: Kwa Shiyunaani yiyandiikhwe Kilisito. Yikulusa yuuwe, baheene utukuluse na yuuse!” 40Leelo uyunji yula uwa wuvili wámukhajila wáaja, “Wee! Usikimutiila uNguluvi? Mbona one noowe tihijiilwe mukhole gumo. 41Ose tisakulwa kiposheela amalava aga, kwa kiiva tihijiilwe kwa gina tinanjile. Leelo uyu, asinanjile lyolyona.” 42Baheene wáaja, “Wee Yeesu! Pina ukhava wiyinjila mu Wutwa waakho, unikumbukhaje!” 43UYeesu wámugomosesa wáaja, “Nikikujovela, shiyooli iminsiyaano usiive lumo noone mu lupepo.”

UYeesu iifwa pa musalaaba

(Mataayo 27:45-56; Maluko 15:33-41; Yohana 19:28-30)

44Kihuma ilisala ilya mutanda paminsi, mbakha ilisala ilya gonja, inshiisi yagubikhaga inyi yila yoona, 45ilijuva lisikhandi limulikha. Umwenda#23:45 Umwenda: Umwenda ugu gugwene gwabagulaga mbali sivili mu nanda ya Nguluvi. Ulubali lumo Panofu, ulubali ulunji Panofu pa Panofu. Yimba iliswi Nanda imbaagule iya kifuunyila mu Maswi aMahensa. guna gukhandi gubagwile mbali sivili mu nanda ya Nguluvi, gwadeemukha mbali sivili kihuma kushaanya mbakha pansi.

46UYeesu wákhoosa mandu ishawuti wáaja, “Wee Daada! Nikiyiviikha inumbula yangu, mu mawokho gaakho.”#23:46 Yimba mu litaafili lya Sabuli 31:5. Wáganile kilogola ago, wáafwa.

47Umuyimililaaji wa vasulukhali pina wágaaga gina gisenjekha, wámusufya uNguluvi wáaja, “Shiyooli, umuunu uyu akhandi mugolofu!”

48Avaanu woona vina vakungaanile pala, pina vagaagaga gina gasenjekha, vaawuya kukhaaya kunyaanave vasugumiilwe mandu. 49Khanji, woona vina vakhandi vamanyeene nu Yeesu, lumo na vashimaayi vina vakhandi vikimufwata kihuma ku Galilaya, vayiimile kutali viloleela gina gisenjekha.

UYeesu iviikhwa mu lijooja

(Mataayo 27:57-61; Maluko 15:42-47; Yohana 19:38-42)

50-51Wáali akwali umuunu yumonga, ilitaawa lyakwe yu Yusufu, yuna wáhumile mu lijumbi lya Alimataaya, ku nyi ya Yudeya. UYusufu akhandi yumo mu vakhome va livansa lya Vayahuudi. Leelo asikhapulinkheene na vayine kwa mola iya kimubuda uYeesu, kwa kiiva akhandi mugolofu pa Nguluvi. Khanji, akhandi iheepaga kiyinsa kwa Wutwa wa Nguluvi.

52Umuunu uyu wáaluta kimulomba uPilaato kiija atoole umufimba gwa Yeesu agusiile. 53UPilaato pina wáyiitikha, wáaluta kiyiisa umufimba pa musalaaba. Baheene wáguvilinjisa na menda, wágugonia mu lijooja lina likhandi lihimbe mu shidunda.#23:53 Lijooja lina likhandi lihimbe mu shidunda: Ingʼoma ya Vayahuudi ya kisiila avaanu, vakhandi vikivaviikha vina vafwile mu lijooja lina likhandi lihimbe mu shidunda na kiviikha ilingʼanga pa mulyango. Ilijooja ilyo, lyali asinasiilwe muunu. 54Ilisiku ilyo, likhandi lisiku lya Vayahuudi kiyipinyanga mu Sabaato,#23:54 Lisiku lya Vayahuudi kiyipinyanga mu Sabaato: Kwa Vayahuudi yikhandi yiyansa Ijumaa pashaamihe. yina yikhandi yihejeelile kiyansa.

55Avashimaayi vina vakhandi lumo nu Yeesu kihuma ku Galilaya, vamufwata uYusufu ku lijooja. Valyaga ilijooja na vagwaga umufimba gwa Yeesu shina vagugoniise. 56Paanyuma, vaawuya kukhaaya, vapinyangania amafuta nu mugoda ugwa kisivila kiwola.#23:56 Amafuta nu mugoda ugwa kisivila kiwola: Ifi fikhandi fya kisusuuta mu mufimba gwa Yeesu. Pa lijuva lya Sabaato vatuuya, ngaja indaji ya Musa shina yitaviilila.

선택된 구절:

Luuka 23: Shisangu

하이라이트

복사