Luuka 19

UYeesu itangaana nu Sakaayo

1UYeesu wáganaga kihuluta mu lijumbi lya Yeliko, baheene wáava iishila paakhati naakhati ya lijumbi lila. 2Mu lijumbi lila, akhandi akwali umuunu yumonga, yuna akhandi itambulwa Sakaayo. USakaayo akhandi mukhome wa vatofya khoodi, khanji akhandi munya wusi. 3Umuunu uyu akhandi isakula kimwaga uYeesu kiija ali wuli, leelo wágombolaga kimwaga kiiva akhandi mufupi, khanji avaanu vakhandi vinshi mandu. 4Baheene wáaluta luvilo kumwandi ya shipuga, wátaana mu mupishi gwa mujombe, kiija amwaje uYeesu pina iiva iishila pala. 5UYeesu pina wáganile kifikha pala, wáloleela kushaanya ya mupishi, wámwaga uSakaayo wáaja, “Sakaayo, yiikha nyangu! Kwa kiiva iminsiyaano mbakha nihwe mu litembe lyakho.” 6USakaayo wáyiikha nyangu, wámusaajisa uYeesu kukhaaya yaakwe kwa wushendeefu.

7Avaanu woona vina vakhandi vikimwaga uYeesu pina ihuluta mula, vayansa kingʼuula, viija, “Kwashi iiluta kikhala kwa munansi!” 8Baheene uSakaayo wáyiima, wámujovela uMutwa wáaja, “Wee Mutwa! Lino, uwusi wangu niigava paakhati naakhati, ulubali lumo nisivapeele avapiina. Khanji, umuunu yuna namupokhaga shoshoona, nisimutinisise mala khana#19:8 Yimba mu litaafili lya Njowo sa Valaawi 6:1-5. mu fiinu fina namupokhaga.” 9UYeesu wámujovela wáaja, “Iminsiyaano uwukulukho wayinsa ku vaanu va nanda iyi, kwa kiiva umuunu uyu woope wa shikholo sha Abulahamu. 10Lulwene, one Lusawo lwa Muunu nayinsaga kisakula na kikulusa avaanu vina vayajile.”

Ishihwano sha vavanda vina vapelwagwa ihela

(Mataayo 25:14-30)

11Woope avaanu vina vakhandi vikimupuliisa uYeesu vakhandi vihiiva kiija uWutwa wa Nguluvi wukhayansa uluhaavi luulo, kwa kiiva vakhandi nkholeela kifikha ku Yelusalemu. Baheene uYeesu wávajovela ishihwano 12wáaja, “Akhandi akwali umuunu yumonga wa shikholo sha shitwa yuna wáshuulile kiluta ku nyi ya kutali. Wálutaga ukho, kiija apeelwe uwutawulilwa wa kiiva mutwa, baheene atine kitema inyi yaakwe.

13“Pina asinawuushe, wávashemeela avavanda vaakwe ishumi, shila muunu wámupeela ihela nyinshi,#19:13 Ihela nyinshi: Kwa Shiyunaani yiyandiikhwe, mina kumi. Ihela iso saava sikwiliile kiiva hela sa mahombo ga musenga nsengo kwa meesi gatatu. wávajovela wáaja, ‘Nisavisisaaji ihela isi mbakha pina nikhatina.’ 14Baheene umuunu uyo wáwuukha. Leelo wáganile kiwuukha avaanu va nyi yaakwe vakhandi vikimukhalalila, baheene vavafilikha avanandeje vamufwata vaajova ndeeni, ‘Umuunu uyu, tisisakula ave mutwa weesu!’ 15Hata nda vajovaga ilyo, wápelwagwa uwutwa uwa shitwa. Pina wátinaga, wávashemeelile avavanda vala vina wávapeelaga ihela, kiija amanye shila muunu akwavile silinga.

16“Umuvanda wa wutasi wáafikha, wámujovela wáaja, ‘Wee mutwa, ihela sina wanipeelaga, nisaviise isinji, nasavisa fipuga ishumi.’ 17Umutwa yula wámujovela wáaja, ‘Waagaha wunofu mandu, owe uli muvanda munofu. Nisikupeele kitema amajumbi ishumi kwa kiiva ukhandi muyinatifu kwa fisheefu.’ 18Umuvanda wa wuvili woope wáafikha, wámujovela wáaja, ‘Wee mutwa, ihela sina wanipeelaga, nisaviise isinji fipuga fisaanu.’ 19Umutwa wámujovela woope uyu wáaja, ‘Na owe, nikikupeela kitema amajumbi gasaanu.’

20“Umuvanda uyunji wáafikha, wáaja, ‘Wee mutwa, ihela saakho isi apa. Nasipinyaga mu munyankha, kiija sisikhayagaga. 21Nagahaga ilyo kwa kiiva nikikutiila, owe uli muunu mukhamu. Witoola fina usiviishile, khanji wikungula fina usivyalile.’

22“Umutwa wámujovela wáaja, ‘Wee muvanda yuna uli munansi! Lino, nikikuhiga kwa maswi gaakho gina walogola. Waava umeenye kiija one nili muunu mukhamu mandu, nitoola fina nisiviishile, khanji nikungula fina nisivyalile. 23Lino kwashi usikhasiviishile ihela sangu kwa vina visavisa,#19:23 Kwa vina visavisa: Kukwene avaanu vinshi viviikha ihela saanave, baheene siyonjelele. baheene nitoole lumo ni sa pashaanya sina siyonjeleele?’

24“Baheene wávajovela avaanu vina vakhandi vayiimile pala wáaja, ‘Uyu, mutoole ihela saakwe, mumupeele yuna asaviise ishumi.’ 25Vamujovela vaaja, ‘Wee mutwa, mbona yula anaso lishumi!’

26“Wáaja, ‘Nikivajovela kiija, umuunu yoyoona yuna iimanya gina nilogola, uNguluvi asimupeele kimanya mandu. Leelo umuunu yoyoona yuna asikigamanya gina nilogola, hata uwumanyi uwudoodo wuna anawo, akhapokhwa. 27Lumo na ago, muvaleete avalugu vangu vala vina vakhandi vasisakula one nive mutwa waanave, muvabude baaha panyangu!’”

UYeesu iyinjila ku Yelusalemu kwa filuulu

(Mataayo 21:1-11; Maluko 11:1-11; Yohana 12:12-19)

28UYeesu pina wájovaga ago, wáava apiyiteneeshe kitaana kiluta ku Yelusalemu kuno avalongwele avamanyisiwa vaakwe. 29Pina ali nkholeela mu lujinji lwa Betifage nu lwa Betaniya, ku shidunda shina shikhandi shitambulwa shidunda sha Miseyituni, wávafilikha avamanyisiwa vaakwe vavili, 30wávajovela wáaja, “Lutaji mu lujinji lula luna luli pamwandi yeenyu. Pina muhuluta mula, musiyaaje inyana dogovi yipinyiilwe, yina yisinajelwajwe kiyangalwa nu muunu. Yiyawulilaji, muyileete panu. 31Umuunu nda avapose kiija, ‘Kwashi mukiyiyawulila?’ mujovelaji kiija, ‘UMutwa ana nsengo nayo.’ ”

32Baheene avamanyisiwa vala vaaluta, vagaaga goona ngaja uYeesu shina akhandi avajoveele. 33Pina vikiyiyawulila inyana dogovi yila, avanya nayo vavaposa vaaja, “Kwashi mukiyiyawulila inyana dogovi iyi?” 34Vavajovela vaaja, “UMutwa ana nsengo nayo.” 35Vamutwalila uYeesu, vatandikha amenda gaanave pa dogovi,#19:35 Dogovi: UYeesu pina wáyangeele idogovi badala ya falaasi, wáwonensaaga avaanu kiija, umwene iyinsa ngaja mutwa wa wulindamafu, asili ngaja mutwa wa kileeta uwulugu. baheene uYeesu wáyangala.

36UYeesu pina iiluta, avaanu vakhandi vitandikha amenda gaanave mu nsila. 37Pina ali nkholeela kiyiikha ku shidunda sha Miseyituni, ishipuga shoona sha vamanyisiwa vaakwe shashendeeva, vayansa kimusufya uNguluvi kwa kiiva ya mabikha goona gina vagaagaga pina iigaha uYeesu. Vaava vikimusufya mandu uNguluvi 38viija,

“Ayimililwajwe uMutwa yuna iyinsa kwa litaawa lya Mutwa uNguluvi.#19:38 Yimba mu litaafili lya Sabuli 118:26.

Uwulindamafu kushaanya nu wutupikho kwa Nguluvi yuna ali kushaanya.”

39Mu shipuga shila vakhandi vakwali aVafalisaayo avanji, vamujova uYeesu vaaja, “Mumanyisaaji, vakhajila avamanyisiwa vaakho, valeshe kilogola ago!” 40Leelo uYeesu wáaja, “Nikivajovela, ava nda vasisime, amangʼanga ago gasilyove mandu!”

UYeesu iikuva amalago kiija iYelusalemu yisibojolwe

41UYeesu pina wálivejeelaga ilijumbi lya Yelusalemu, wáyansa kilikhoolela 42wáaja, “Owe lijumbi lya Yelusalemu, waali uve wiimanya iminsiyaano gina wisakulwa kigasenga, baheene ndi waava nu wulindamafu! Leelo, lino gafihiilwe pa meeho gaakho. 43Mu nsiku sina siyinsa, avalugu vaakho vakhasenga uluhengo ulwa kipilima ilijumbi lyakho lyona, apo baheene vakhayansa kikuyalushila kihuma imbali soona. 44Vakhakugwisa pansi, owe na vaanu vaakho woona. Vasikhalilekha hata lingʼanga lina likhasigala pashaanya ya lingʼanga liyine,#19:44 Vasikhalilekha hata lingʼanga lina likhasigala pashaanya ya lingʼanga liyine: Inanda imbaagule iya kifuunyila yabomolwagwa na Valuumi umwakha gwa mashumi fungati pina wásawaagwa uYeesu Kilisito. kwa kiiva ukhandi usiganile kimanya uluhaavi luna uNguluvi ikikuleetela uwukulukho!”

UYeesu ivalasa inanda imbaagule iya kifuunyila

(Mataayo 21:12-17; Maluko 11:15-19; Yohana 2:13-22)

45UYeesu wáyinjilaga mu lukeeke lwa nanda imbaagule iya kifuunyila. Pina wáyinjila, wáyansa kivadaga woona vina vakhandi viigusa na kigula ifiinu. 46Wávajovela wáaja, “Yiyandiikhwe mu Mayandikhwa aManofu, ‘Inanda yangu yikhava nanda ya mafuunyo.’#19:46 Yimba mu litaafili lya Isaaya 56:7. Leelo omwe mwaseetula kiiva ‘wiikhasi wa vahiiji.’#19:46 Yimba mu litaafili lya Yelemiya 7:11. ”

47Baheene uYeesu wáava imanyisa avaanu shila lijuva mu lukeeke lwa nanda imbaagule. Baheene avatambule avakhome, avamanyisaaji va ndaji sa Musa na vakhome va Vayahuudi, vaava visakula insila ya kimubuda. 48Leelo vapotwagwa, kwa kiiva avaanu woona vina vakhandi vikimufwata, vamupulisaaga mandu.

선택된 구절:

Luuka 19: Shisangu

하이라이트

복사