Yohana 1
1
ILiswi lyayinsile lyava muunu
1Pashiyanso sha kiwumbwa ifiinu fyona, likhandi likwali iLiswi. ILiswi ilyo likhandi lumo nu Nguluvi. Khanji iLiswi likhandi Nguluvi. 2Kihuma pashiyanso isho, iLiswi ilyo likhandi lumo nu Nguluvi.
3Kishilila kwa Liswi ilyo, uNguluvi wáwumbile ifiinu fyona. Asikhawumbile shiinu shoshoona bila kishilila iLiswi ilyo. 4ILiswi lilyene shiyanso sha wuumi, nu wuumi uwo wuleeta uwuvalafu kwa vaanu woona. 5Uwuvalafu uwo wumulikha mu nshiisi, leelo inshiisi yapootwa kiwumena.
6Wáali akwali umuunu yumonga, ilitaawa lyakwe itambulwagwa Yohana,#1:6 Yohana: Uyu yu Yohana uMutwiniaji. umuunu uyo wáfilikhwagwa nu Nguluvi. 7Uyo wáyinsaga kiiva mulunjikhaaji wa kiwubedela uwuvalafu uwo, kiija kwa wubedelo waakwe avaanu woona vawuhuviilile. 8UYohana asikhandi wuvalafu uwo, leelo wáyinsile kiwubedela uwuvalafu uwo. 9Uwuvalafu uwo, wuvalafu wa shiyooli, wayinsaga mu nyi kiija, wuvamulishile avaanu woona.
10ILiswi ilyo, likhandi likwali mu nyi muno, inyi yawumbwagwa kishilila kwa lyene, leelo avaanu woona ava mu nyi, vasikhalimanyile. 11ILiswi lyayinsaga kwa vaanu vaakwe, leelo avaanu vaakwe vasikhaliposheelile. 12Leelo vala vina valiposheelaga na kilihuviilila, lyavagahaga kiiva vaana va Nguluvi. 13Awo vaveene vaana va Nguluvi, leelo yisili kwa kiiva vasaviilwe mu shimyanja shaanave, khanji yisili kwa kiiva ya lugano lwa muunu, wala lihaahi lya mugoosi nu washimaayi, leelo uNguluvi ikivagaha kiiva vanaakwe yumwene.
14ILiswi ilyo lyayinsaga lyava muunu, umuunu uyo wáakhala lumo noose. Ose tawaagaga uwutupikho waakwe, uwutupikho wa Lusawo yuna ali mwene duguli, yuna iihuma kwa Daada uNguluvi, khanji amemile imota ni shiyooli.
15UYohana wávajovela avaanu imola isa muunu uyo, wákhoosa ishawuti wáaja, “Uyu yumwene yuna nikhandi nikivabedela kiija, ‘Iyinsa umuunu yumonga kunyuma yangu, yuna mukhome kinishila one, kiiva akhandi akwali kihuma uluhaavi luna one nisinaasawe.’”
16Kifwatana na shina asishepushiilwe, uNguluvi atupeelile imota ose woona, ayonjeleese mu mota yina yatalaga. 17Lulwene kiija, pawukuulu uNguluvi wátupeelaga indaji saakwe kwa kishilila uMusa,#1:17 UMusa: Yimba iliswi Musa mu Maswi aMahensa. leelo uluhaavi ulu, atupeelile imota yaakwe ni shiyooli kwa kishilila uYeesu uMukulusaaji.#1:17 Mukulusaaji: Kwa Shiyunaani yiyandiikhwe Kilisito. Kwa Shihebulaniya viija Mesiya. AVayahuudi vatambulaga ilitaawa lya Mesiya kiija, yu muunu yuna wábagulwagwa nu Nguluvi. Khanji wátahisiwaagwa kifilikhwa kiiva Mukulusaaji kwa vaanu. Yimba iliswi Kilisito mu Maswi aMahensa. 18Kusiina umuunu yuna awaahile kimwaga uNguluvi. Leelo uLusawo yuna ali mwene duguli, woope yu Nguluvi,#1:18 Yuna ali mwene duguli, woope yu Nguluvi: Mu mayandikhwa agamonga amakuulu yiyandiikhwe, Lusawo lwa Nguluvi yumo yuna ali mwene duguli. khanji ali lumo nu Daada uNguluvi, yumwene yuna atugubutuliile.
Uwulunjikhaaji wa Yohana uMutwiniaji
(Mataayo 3:1-12; Maluko 1:1-8; Luuka 3:1-18)
19Ilisiku limonga avakhome va Vayahuudi, vavafilikhaga avatambule#1:19 Avatambule: Yimba iliswi Vatambule mu Maswi aMahensa. na Valaawi#1:19 Valaawi: AValaawi vakhandi vasenga nsengo va Nguluvi, vina vakhandi visenga mu nanda imbaagule iya kifuunyila, khanji vakhandi shimyanja sha Vaisilaheli. Yimba mu litaafili lya Luvaso 3:1-13. kihuma ku Yelusalemu#1:19 Yelusalemu: Yimba iliswi ili mu Maswi aMahensa. kiija vamupose uYohana, owe yuuwe naani? 20UYohana wávagomosesa kusiina kifiha ishiyooli wáaja, “One nisili yuune Mukulusaaji yuna uNguluvi wátahisaaga kimufilikha.”#1:20 Mukulusaaji yuna uNguluvi wátahisaaga kimufilikha: Kwa Shiyunaani yiyandiikhwe Kilisito. 21Vamuposa khanji vaajova, “Ino owe yuuwe naani? Wuli, owe yuuwe mukuwamalago uEliya?” UYohana wávagomosesa wáaja, “Ndaali nisili yuune Eliya.” Aveene vamuposa khanji vaajova, “Wuli, owe yuuwe mukuwamalago, yuna timuhepeleese kihuma kwa Nguluvi?”#1:21 Yimba mu litaafili lya Luuju lwa Ndaji 18:15-22. UYohana wávagomosesa wáaja, “Ndaali nisili yuune.” 22Vamuposa khanji vaaja, “Lino owe yuuwe naani? Utujovele baheene tilute tivajovele vina vatufilikha. Owe ukiyitambula yuuwe naani?” 23UYohana wávagomosesa kilingana na maswi gina wálogolaga umukuwamalago uIsaaya kiija,
“One nili muunu yuna ishemeela mu lunyikha iija,
‘Golosaaji insila ya kishila uMutwa.#1:23 UMutwa: Yimba iliswi Mutwa mu Maswi aMahensa. ’”#1:23 Yimba mu litaafili lya Isaaya 40:3.
24Baheene avaanu vala, vina aVafalisaayo#1:24 AVafalisaayo: Yimba iliswi Vafalisaayo mu Maswi aMahensa. vavafilikhaga kwa Yohana, 25vamuposa vaajova, “Nda owe usili yuuwe Mukulusaaji,#1:25 Mukulusaaji: Kwa Shiyunaani yiyandiikhwe Kilisito. wala usili yuuwe mukuwamalago uEliya, wala usili yuuwe mukuwamalago uyunji yuna timuhepeleese kihuma kwa Nguluvi, kwashi witwinia?” 26UYohana wávagomosesa wáaja, “One nitwinia na malenga, leelo paakhati yeenyu akwali yuna omwe musimumeenye. 27Uyo yumwene yuna iyinsa kunyuma yangu, khanji one nisikwiliile hata kihudula ingalawo sa ndaatu saakwe.”#1:27 Kihudula ingalawo sa ndaatu saakwe: Nsengo ya kivahudula avaanu indaatu, yikhandi yiigahwa na vavanda awu na vaanu vina vasimanyikha mu nyi ya Vayahuudi. 28Ago goona gasenjekhaga mu lujinji lwa ku Betaniya, mulubali lwa kunena ulwa mukhoga gwa Yolodani, kuna uYohana akhandi itwinia avaanu.
UYeesu Mwana Nkholo wa Nguluvi
29Pamulaawu njine, uYohana wámwaga uYeesu iyinsa kunyaakwe. Wávajovela avaanu vina vakhandi vakwali pala wáaja, “Loleela, uyo yu Mwana Nkholo wa Nguluvi, yuna iwuusa uwunansi wa vaanu woona!#1:29 Yimba mu litaafili lya Kihuma 12:21-28. 30Uyu yumwene yuna nikhandi nikivabedela kiija, ‘Iyinsa umuunu yumonga kunyuma yangu yuna mukhome kinishila one, kiiva akhandi akwali kihuma uluhaavi luna one nisinaasawe.’ 31Hata one nisikhamumeenye kiija yu naani, leelo nayinsaga kivatwinia avaanu na malenga, baheene nimugubutule kwa Vaisilaheli.” 32-33UYohana wávabedela avaanu wáajova, “One nisikhamumeenye kiija yu naani. Leelo namwaga uNumbula wa Nguluvi kihuma kushaanya, iyiikha pamwene kwa shihwano sha nkunda. UNguluvi yuna wánifilikhaga kitwinia akhandi anijoveele kiija, ‘Umuunu yula yuna ukhamwaga uNumbula wangu iyiikha pashaanya yaakwe na kikhala nawo, uyo yumwene akhava ikivatwinia avaanu kwa Numbula wa Nguluvi.’” 34Baheene uYohana wáaja, “Na yuune nagaaga, khanji nibedela kiija, uyo Lusawo lwa Nguluvi.”#1:34 Lusawo lwa Nguluvi: Yimba iliswi ili mu Maswi aMahensa.
UYeesu ikivabaagula avamanyisiwa vaakwe va wutasi
35Pamulaawu njine, uYohana uMutwiniaji akhandi akwali khanji pala pa mukhoga gwa Yolodani, lumo na vamanyisiwa vavili mu vamanyisiwa vaakwe. 36UYohana wámwaga uYeesu ijenda, wávajovela avamanyisiwa vaakwe wáaja, “Loleela, uyo yu Mwana Nkholo wa Nguluvi!” 37Avamanyisiwa va Yohana vaganile kipulikha ago, vamufwata uYeesu. 38UYeesu wáseetukha, wávaaga avamanyisiwa vala vikimufwata. Wávaposa wáaja, “Wuli, mwisakula shishi?” Aveene vamugomosesa vaajova, “Wee Laabi (uluganulo lwakwe, Mumanyisaaji), wuli, wiikhala kwi?” 39UYeesu wáaja, “Yinsi, musipaaje.” Baheene vamufwata. Ilisala lya ishumi pashinyiijuva, vaafikha pina akhandi iikhala, woope vaahwa nawo ilisiku lila.
40Umumanyisiwa yumonga mu vamanyisiwa vavili vina vapulikhaga amaswi ga Yohana, na vina vamufwataga uYeesu, ilitaawa lyakwe akhandi yu Andeleya, umunangʼana wa Simoni Petulo. 41Baaho uyo wáaluta kimusakula umuvaha waakwe uSimoni. Wáganaga kimwaga, wámujovela wáaja, “Tamwaga uMukulusaaji!”#1:41 UMukulusaaji: Kwa Shiyunaani yiyandiikhwe Mesiya lina liswi lya Shihebulaniya. Uluganulo lwakwe kwa Shiyunaani Kilisito. Yimba iliswi Kilisito mu Maswi aMahensa. Ilitaawa ili kwa Shiyunaani Kilisito. 42Baheene uAndeleya wáyinsa nu Simoni kwa Yeesu. UYeesu wámuloleela uSimoni, wámujovela wáaja, “Owe yuuwe Simoni mwana wa Yohana. Kiyansa iminsiyaano, ilitaawa lyakho usiive yuuwe Kefa,” (ilitaawa ili kwa Shiyunaani Petulo, uluganulo lwakwe lipaama).
UYeesu ikivabaagula avamanyisiwa avanji vavili
43Pamulaawu njine, uYeesu wálamula kiluta ku nyi ya Galilaya. Baheene wámwaga uFilipo, wámujovela wáaja, “Filipo, yinsa unifwate.” 44UFilipo akhandi iikhala ku Betisayida, muna uAndeleya nu Petulo woope vakhandi viikhala. 45UFilipo wámwaga uNatanaheeli, wámujovela wáaja, “Tamwaga umuunu yuna uMusa wáyandikhaga imola saakwe mu mataafili ga ndaji, khanji woope avakuwamalago vayandikhaga imola saakwe. Ilitaawa lyakwe yu Yeesu uwa ku Nasaleti, mwana wa Yusufu.” 46Leelo uNatanaheeli wámuposa uFilipo wáaja, “Shiinu shishi shinofu shina shikwiliile kihuma mu lijumbi ilidoodo ilya Nasaleti?” UFilipo wámugomosesa wáaja, “Yinsa uyibedele.” 47UYeesu pina wámwaga uNatanaheeli iyinsa kunyaakwe, wáaja, “Loleela, umuunu uyo Muisilaheli wa shiyooli, yuna asili mujanjilisaaji.” 48UNatanaheeli wámuposa uYeesu wáaja, “Wee mutwa, waamanya wuli?” UYeesu wámugomosesa wáaja, “Hata uFilipo pina asinayinse kikushemeela, one nakwaga pina ukheele pa mujombe.” 49UNatanaheeli wámugomosesa wáaja, “Wee Mumanyisaaji, iminsiyaano naamanya kiija, owe uli Lusawo lwa Nguluvi! Owe uli Mutwa wa nyi ya Isilaheli!”#1:49 Lusawo lwa Nguluvi! Owe uli Mutwa wa nyi ya Isilaheli! Kwa kitambulwa amataawa ago, uNatanaheeli akhandi iyiitikha kiija, umwene uYeesu yu Mukulusaaji yuna uNguluvi wátahisaaga kiija akhamufilikha. Yimba mu litaafili lya 2 Samweli 7:12-16. 50UYeesu wámuposa wáaja, “Wuli, wihuviilila kwa kiiva nakujovela kiija, nakwaga pina ukheele pa mujombe? Usigaaje aganji, amakhome kishila aga! 51Shiyooli nikivajovela, mukhayinsa kikwaga kushaanya kwa Nguluvi kudindukha, na kivaaga avamalayikha#1:51 Avamalayikha: Yimba iliswi Malayikha mu Maswi aMahensa. va Nguluvi vitaana na kiyiikha pashaanya yangu one Lusawo lwa Muunu.”#1:51 Lusawo lwa Muunu: Yimba iliswi ili mu Maswi aMahensa.
© 2020, Wycliffe Bible Translators, Inc. All rights reserved.
