Mathie 3
3
Yon Ndon Táq Tíc Na Dơq
(Mac 1:1-8; Luca 3:1-18; Yon 1:19-28)
1Ndóng ngki, Yon táq tíc na dơq tớq cato parnai ŏ te Yang Arbang-pilŏ́ng nga ntúq aih, tớq vúng Yudê. 2Án cato idô: “Cóq inha ngin luaih pien cơt mít tamme loi, co khoiq tumán lư dyơ ingái Yang Arbang-pilŏ́ng cơt sút.”
3Ê-sai la ticuoi tang ngcang khoiq tông te Yon idô:
“Bôn sieng tubau yứng te ntúq aih, idô:
‘Cóq inha pangcra carna dyôn Ưlla he.
Cháh báng dyôn tinớng carna dyôn án pôq.’”#Ê-sai 40:3
4Yon ndô báq tớc tampớc te sóc pannán lac-da. Alứng án kitớn pa-eu ngcár tớq tarving án. Án cha aliem, alứng ngoiq dơq canyiel te arưih. 5Bôn ticuoi prái te vel Yaru-salem alứng chôp cruong Yudê, díh ticuoi át paniar dơq crong Yôr-dan hơ tớq nga án. 6Nha-án ngin luaih, dyơ Yon táq tíc na dơq dyôn nha-án tớq crong Yôr-dan.
7Tư Yon hôm clứng ticuoi te top Pha-rasi alứng te top Sa-dusê tớq nga án, ính án táq tíc na dơq dyôn nha-án, iki án tông ada nha-án idô: “Inha pla arớq cusánh tur. Inha lớiq têq viar vít te Yang Arbang-pilŏ́ng táq inha tớq án táq máh ticuoi luaih, tớq ingái talloiq. 8Cóq inha táq arnáq ŏ. Ndô la tíc inha khoiq ngin luaih pien cơt mít tamme loi. 9Êq parngíh inha têq viar vít te tôt, co inha ngin idô: ‘A-praham la achúc achiac he.’ Cư tông inha arlớih lư, khán Yang Arbang-pilŏ́ng ính, têq án ial búl teng cơt tŏ́ng toiq A-praham. 10Hoi-ndô arớq bôn mui pla achát payơ tumán tôm along. Tôm mmo lớiq bôn culái ŏ, ngai ính cớl alứng arpớt tớq uih. 11Cư táq tíc dyôn inha na dơq, la tíc inha pien cơt mít tamme loi. Ma án ndon tớq tatun cư, án ngki bôn chức clưi te cư. Cư lớiq crái díh léh ntár cơp te dyưng án, co chức cư la két lư. Án ính táq tíc dyôn inha na Arvai Yang Arbang-pilŏ́ng alứng na uih. 12Ati án kéu adêng, dyơ án u-om nhéq máh sro án. Callong mmo chong, án dŏq tớq tanic. Ma acam ngki án chŏ́ng tớq uih chéh lớiq nai pát.”
Yon Táq Tíc Na Dơq Dyôn Yê-su
(Mac 1:9-11; Luca 3:21-22)
13Ndóng ngki Yê-su ngốh te vúng Ca-lilê pôq nga dơq crong Yôr-dan, co án ính Yon táq tíc na dơq dyôn án. 14Ma Yon suon lớiq ính táq tíc na dơq dyôn án. Yon tông idô: “Piaiq lư la cana táq tíc na dơq dyôn cư. Co imo cana tớq nga cư, ính cư táq tíc na dơq dyôn cana?”
15Ma Yê-su ôi Yon idô: “Hoi-ndô cóq mái táq tíc na dơq dyôn cư. He cóq táq cứp nốh ndon Yang Arbang-pilŏ́ng khoiq yua he táq.”
Cua Yê-su tông iki; Yon táq tíc na dơq dyôn án.
16Cua Yê-su ráp tíc na dơq, dyơ án sớr te dơq. Iki pilŏ́ng arớq ngai pốh, alứng án hôm Arvai Yang Arbang-pilŏ́ng siar te pilŏ́ng arớq achếq cacu bôt tớq cháq án. 17Mui parrứh ngki, bôn sieng Yang Arbang-pilŏ́ng tubau te pilŏ́ng tông idô: “Ndô la Acái cư, án ndon cư amoih lư. Cư sáng bui cannính lư alứng án.”
© 2018, Wycliffe Bible Translators, Inc. All rights reserved.
